‘No Murmura’
‘No Murmura’
“Haci tur cos sin murmura.”—FILIPENSENAN 2:14.
1, 2. Ki conseho apostel Pablo a duna e cristiannan na Filipos y Corinto, y pakico?
DEN e carta inspira cu apostel Pablo a skirbi na e congregacion cristian di prome siglo na Filipos, el a duna hopi elogio. El a elogia su rumannan cristian den e stad ei pa nan generosidad y pa nan entusiasmo, y a expresa su goso pa motibo di nan bon obranan. No obstante, Pablo a recorda nan pa “haci tur cos sin murmura.” (Filipensenan 2:14) Pakico e apostel a duna e spiertamento aki?
2 Pablo tabata sa na kico murmuramento por hiba. Un par di aña mas prome, el a recorda e congregacion na Corinto cu esaki por ta peligroso. Pablo a bisa cu tempo e Israelitanan tabata den desierto, bes tras bes nan a pone Jehova rabia. Con? Dor di desea cosnan perhudicial, dor di practica idolatria y fornicacion, dor di pone Jehova na prueba y dor di murmura. Pablo a anima e Corintionan pa siña un les for di e ehempelnan aki. El a skirbi: “No murmura, manera algun di nan a haci y a wordo destrui dor di e destruido.”—1 Corintionan 10:6-11.
3. Pakico e topico di murmuramento ta di interes awe?
3 Como sirbidor di Jehova di e tempo actual, nos ta manifesta e mesun actitud cu e congregacion na Filipos tabatin. Cu entusiasmo nos ta haci obranan excelente, y nos tin amor pa otro. (Juan 13:34, 35) Sinembargo, mirando con murmuramento a perhudica e pueblo di Dios den pasado, nos tin bon motibo pa haci caso di e conseho: “Haci tur cos sin murmura.” Prome, laga nos considera algun ehempel di murmuramento menciona den e Scritura. Despues nos lo considera kico nos por haci pa evita cu murmuramento ta perhudica nos awe.
Un Asamblea Malbado Ta Murmura Contra Jehova
4. Con e Israelitanan a murmura den e desierto?
4 E palabra Hebreo cu ta nifica ‘murmura of keha’ ta wordo uza den Bijbel en conexion cu e sucesonan cu a tuma luga durante e 40 añanan cu Israel a pasa den desierto. Na algun ocasion e Israelitanan tabata malcontento cu nan situacion y a manifesta esaki dor di murmura. Por ehempel, apenas algun siman despues cu nan a ser libra for di sclabitud na Egipto, “henter e congregacion di e yiunan di Israel tabata murmura . . . contra Moises y Aaron.” E Israelitanan a keha tocante cuminda, bisando: “Mihor nos a muri na man di SEÑOR na tera di Egipto, tempo cu nos tabata sinta banda di e weyanan di carni, tempo cu nos tabata come pan yena nos bariga; pasobra boso a saca nos trece nos den e desierto aki pa laga henter e asamblea muri di hamber.”—Exodo 16:1-3.
5. Ora e Israelitanan a keha, contra ken realmente nan murmuramento tabata dirigi?
5 En realidad, Jehova a sostene e Israelitanan amorosamente cu loke nan tabatin mester den e desierto, dunando nan awa cu cuminda. Nunca e pueblo di Israel a core peliger di muri di hamber den e desierto. Sinembargo, dor cu nan tabata malcontento, nan a exagera nan situacion y a cuminsa murmura. Aunke nan kehonan tabata contra Moises y Aaron, den bista di Jehova ta cu ne nan tabata malcontento. Moises a bisa e Israelitanan: “SEÑOR ta tende boso murmuracion cu cua boso ta murmura contra dje. Y ta kico nos ta? Boso murmuracion no ta contra nos, sino contra SEÑOR.”—Exodo 16:4-8.
6, 7. Manera Numbernan 14:1-3 ta mustra, con e actitud di e Israelitanan a cambia?
6 No hopi tempo despues di esei, e Israelitanan a bolbe murmura. Moises a manda 12 homber pa spiona e Tera Priminti. Dies di nan a regresa cu un mal informe. Cu ki resultado? “Tur e yiunan di Israel tabata murmura contra Moises y Aaron; y henter e congregacion a bisa nan: ‘Mihor nos a muri na tera di Egipto! Of mihor nos a muri den e desierto aki! Y pakico SEÑOR ta trece nos na e tera aki [di Canaan] pa nos muri pa medio di spada? Nos esposanan y nos yiunan chikito lo bira victima; no ta mihor nos bolbe Egipto?’”—Numbernan 14:1-3.
7 Mira con e actitud di Israel a cambia! E gratitud cu nan tabatin na principio despues cu nan a ser libra for di Egipto y pasa sano y salvo dor di Lama Cora a impulsa nan pa canta alabansa na Jehova. (Exodo 15:1-21) Sinembargo, awor cu e Israelitanan a haya nan den condicionnan incomodo den e desierto y tabatin yen di miedo di e Cananeonan, nan no tabata gradicido na Dios mas. Nan a bira malcontento. En bes di gradici Dios pa nan libertad, nan a culp’e pasobra eroneamente nan a kere cu ta el a priva nan di cierto cosnan. Pues cu nan murmuramento, nan a manifesta falta di aprecio pa Jehova su provisionnan. Nada straño anto cu el a bisa: “Te ki dia mi tin cu soporta e congregacion malbado aki cu ta murmura contra mi?”—Numbernan 14:27; 21:5.
Murmuramento den e Prome Siglo
8, 9. Menciona ehempelnan di murmuramento registra den e Scritura Griego Cristian.
8 E ehempelnan di murmuramento cu nos a caba di menciona a envolve gruponan di hende cu aparentemente a manifesta nan malcontento abiertamente. Sinembargo, tempo cu Hesucristo tabata na Jerusalem pa e Fiesta di Ramada (of, Fiesta di Tabernakelnan) na aña 32 di nos era, “keto keto tabatin hopi comentario riba dje den e pueblo.” (Juan 7:12, 13, 32, BPK) Nan tabata fluister tocante dje; algun a bisa cu e tabata bon hende, otronan a bisa cu e tabata mal hende.
9 Na un otro ocasion, Hesus cu su discipelnan tabata huespet den cas di Levi, of Mateo, un cobrado di belasting. “E farizeonan y nan escribanan a cuminsa murmura contra su discipelnan, bisando: ‘Pakico boso ta come y bebe hunto cu e publicanonan y pecadornan?’” (Lucas 5:27-30) Algun tempo despues, na Galilea, “e Hudiunan . . . tabata murmura contra [Hesus], pasobra el a bisa: ‘Ami ta e pan cu a baha for di shelo.’” Asta algun di Hesus su siguidonan a sinti nan ofendi cu loke el a bisa y a cuminsa murmura.—Juan 6:41, 60, 61.
10, 11. Pakico e Hudiunan di abla Griego a murmura, y kico ancianonan cristian por siña for di e manera cu e apostelnan a atende e keho?
10 Un poco despues di Pentecoste di aña 33 di nos era tabatin un caso di murmuramento cu no tabatin malconsecuencia. E tempo ei hopi discipel recien comberti di areanan pafo di Israel tabata disfrutando di e hospitalidad di nan rumannan cristian na Judea, pero a surgi problemanan en conexion cu reparticion di e alimento cu tabatin disponibel. E relato ta bisa: “A surgi un reclamo di parti di e Hudiunan Griego contra e Hebreonan, pasobra nan tabata salta nan viudanan den partimento di e cuminda di tur dia.”—Echonan 6:1.
11 E murmuradonan aki no tabata manera e Israelitanan den e desierto. E Hudiunan di abla Griego no tabata malcontento tocante nan situacion den bida y no a manifesta esei tampoco. Tur loke nan a haci ta hala atencion na e echo cu no a satisface e necesidadnan di algun di e viudanan. Ademas, e murmuradonan no a actua manera buscado di problema ni reclama Jehova abiertamente. Nan a dirigi nan keho na e apostelnan, kendenan a haci areglo pa tuma accion mesora pasobra e keho tabata hustifica. Cu esei e apostelnan a pone un bon ehempel pa ancianonan cristian awe! E wardadonan spiritual aki ta tene cuidou pa no ‘sera nan horea pa sclamacion di hende pober.’—Proverbionan 21:13; Echonan 6:2-6.
Cuidou cu e Influencia Destructivo di Murmuramento
12, 13. (a) Ilustra e efectonan di murmuramento. (b) Kico por pone un hende murmura?
12 Mayoria di e ehempelnan biblico cu nos a considera ta mustra cu den pasado murmuramento a causa hopi daño den e pueblo di Dios. P’esei, ta bon pa nos pensa seriamente riba e influencia destructivo cu e por tin awe. Nos por ilustra esaki den e siguiente manera: Hopi tipo di metal tin e tendencia natural di frustia. Si nos ignora e prome señalnan di frustiamento, un obheto di metal por frustia te na e punto cu e no ta sirbi mas. Awendia nan ta deshaci di hopi auto no pa motibo di fayo di motor, sino pa motibo cu e metal a frustia asina tanto cu e vehiculonan a bira insigur. Con nos por aplica e ilustracion aki na murmuramento?
13 Mescos cu cierto metalnan tin tendencia di frustia, hende imperfecto tin e tendencia di keha. Nos mester paga tino pa detecta cualkier señal di esaki. Mescos cu humedad y salpeter ta acelera frustiamento, contratiempo ta haci nos mas inclina pa murmura. Stress por pone un desgusto leve bira un keho serio. Segun cu e situacion di e sistema di cosnan aki ta bai atras den e ultimo dianan, e posibel causanan di kehamento probablemente lo aumenta. (2 Timoteo 3:1-5) P’esei, un sirbidor di Jehova lo por cuminsa murmura contra un otro. Kisas e causa ta un cos chikito, manera un malcontento pa motibo di un persona su debilidadnan, habilidadnan of privilegionan di sirbishi.
14, 15. Pakico nos no mester permiti un tendencia di keha sali for di man?
14 Sea cual sea e motibo di nos desgusto, si nos permiti un tendencia di keha sali for di man, e por fomenta den nos un spirito di malcontento y un custumber di murmura. Si, e efecto spiritualmente destructivo di murmura por corumpi nos completamente. Ora e Israelitanan a murmura tocante bida den e desierto, nan a bai asina leu di culpa Jehova. (Exodo 16:8) No laga esei hamas sosode cu nos!
15 Por reduci e tendencia cu metal tin di frustia dor di pasa un man di verf antioxidante riba dje y trata e areanan frustia mesora. Di mes manera, si nos ripara cu nos tin tendencia di keha, nos por mantene esaki bou di control si nos haci oracion mesora tocante e asunto aki. Con asina?
Mira Cosnan for di e Punto di Bista di Jehova
16. Con nos por vence e tendencia di keha?
16 Murmuramento ta enfoca nos mente riba nos mes y riba nos problemanan y ta pone nos lubida e bendicionnan cu nos ta disfruta di dje como Testigo di Jehova. Pa vence un tendencia di keha, nos tin cu keda corda riba e bendicionnan aki. Por ehempel, cada un di nos tin e privilegio maraviyoso di carga e nomber personal di Jehova. (Isaias 43:10) Nos por cultiva un relacion personal estrecho cu ne, y ki ora cu nos kier nos por papia cu ‘Esun cu ta scucha oracion.’ (Salmo 65:2; Santiago 4:8) Nos bida tin berdadero proposito pasobra nos ta compronde e cuestion di soberania universal y ta corda cu nos tin e privilegio di mantene integridad na Dios. (Proverbionan 27:11) Nos por participa regularmente den e trabou di predica e bon nobo di Reino. (Mateo 24:14) Fe den e sacrificio di rescate di Hesucristo ta haci posibel cu nos por tin un consenshi limpi. (Juan 3:16) Maske kico nos por ta pasando aden, esakinan ta e bendicionnan cu nos ta ricibi.
17. Pakico nos mester purba mira cosnan for di e punto di bista di Jehova, asta ora nos tin un motibo valido pa keha?
17 Laga nos purba mira cosnan for di e punto di bista di Jehova, y no djis sigui nos mes pensamentonan. E salmista David a canta: “Haci mi conoce bo camindanan, o SEÑOR; siña mi bo bereanan.” (Salmo 25:4) Si nos tin un motibo valido pa keha, Jehova no ta keda sin tuma nota di esei. Lo e por corigi e asunto inmediatamente. Pues, pakico tin biaha e ta permiti un contratiempo continua? Kisas esaki ta pa yuda nos desaroya cualidadnan excelente manera perseverancia, fe y pasenshi.—Santiago 1:2-4.
18, 19. Ora nos ta soporta situacionnan incomodo sin keha, den kico esei por resulta? Ilustra.
18 Ora nos ta soporta situacionnan incomodo sin keha, esei no solamente ta yuda nos mehora nos personalidad sino tambe lo e por impresiona esnan cu ta observa nos conducta. Na 2003 un grupo di Testigo di Jehova a biaha cu bus for di Alemania bai Hungria pa asisti na un congreso. E chauffeur di bus no tabata Testigo di Jehova, y e no a gusta e idea pa ta hunto cu e Testigonan pa dies dia largo. Pero na final di e biahe, el a cambia di idea completamente. Dicon?
19 Durante e biahe, varios cos a bai robes. Pero ni un momento so e Testigonan no a keha. E chauffeur a bisa cu esaki tabata e mihor grupo di pasahero cu el a yega di haya! De echo, el a priminti cu e siguiente biaha cu e Testigonan bishit’e, lo e invita nan paden y scucha nan cu atencion. Ki un bon impresion e pasaheronan a laga atras dor di “haci tur cos sin murmura”!
Pordon Ta Promove Union
20. Pakico nos tin cu pordona otro?
20 Kico si nos tin un keho contra un ruman cristian? Si e asunto ta serio, nos mester aplica e principionan cu nos ta haya den loke Hesus a bisa na Mateo 18:15-17. Sinembargo, esaki no ta semper necesario, ya cu mayoria keho ta tocante cosnan chikito. Pakico no mira e situacion como un oportunidad pa pordona? Pablo a skirbi: “Soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci. Y ademas di tur e cosnan aki bisti amor, cual ta e laso perfecto di unidad.” (Colosensenan 3:13, 14) Nos ta dispuesto pa pordona di curason? Jehova no tin motibo pa keha contra nos? Toch, bes tras bes e ta mustra compasion y ta pordona nos.
21. Ki efecto murmuramento por tin riba hende cu ta tende esaki?
21 Sea cual sea e reclamo cu nos por tin, cu murmuramento nos no ta resolve un problema. E palabra Hebreo pa “murmura” por nifica “gruña” tambe. Muy probablemente, nos lo sinti nos incomodo banda di un persona cu ta murmura constantemente y nos lo purba distancia nos mes for di dje. Si nos ta esun cu ta murmura, of gruña, esnan cu ta tende nos por sinti mescos. En realidad, nan por sinti nan asina incomodo cu nan kier distancia nan mes completamente for di nos! Gruñamento of murmuramento por capta un hende su atencion, pero sigur lo e no gana ni un hende su curason.
22. Kico un mucha muher a bisa tocante Testigonan di Jehova?
22 Un actitud di pordona ta promove union—algo cu ta di hopi balor pa sirbidornan di Jehova. (Salmo 133:1-3) Den un pais Europeo, un mucha muher catolico di 17 aña a skirbi e sucursal di Testigonan di Jehova pa expresa su admiracion pa nan. El a bisa: “Esaki ta e unico organisacion cu mi conoce caminda e miembronan no ta dividi pa causa di odio, golosidad, intolerancia, egoismo of desunion.”
23. Kico nos lo considera den e siguiente articulo?
23 Aprecio pa tur e bendicionnan spiritual cu nos ta ricibi como adorado di Jehova, e Dios berdadero, lo yuda nos promove unidad y evita di murmura contra otro pa motibo di asuntonan personal. E siguiente articulo lo mustra con cualidadnan cu ta agrada Dios lo yuda nos evita un forma asta mas peligroso ainda di murmuramento, esta, murmuramento contra e parti terenal di e organisacion di Jehova.
Bo Ta Corda?
• Kico murmuramento ta ensera?
• Con lo bo por ilustra e efectonan di murmuramento?
• Kico por yuda nos vence e tendencia di murmura?
• Con e echo cu nos ta dispuesto pa pordona por yuda nos evita di murmura?
[Preguntanan di Estudio]
[Plachi na pagina 15]
En realidad e Israelitanan a murmura contra Jehova!
[Plachi na pagina 17]
Bo ta purba mira cosnan manera Jehova ta mira nan?
[Plachi na pagina 18]
Pordon ta promove union cristian