Dignidad Humano​—Un Derecho Cu Hopi Bes Ta Ser Trapa

“Cada detaye di e bida di campamento a nifica un stap mas abou riba e trapi cu a baha den humiliacion y indignidad.”​—MAGDALENA KUSSEROW REUTER, SOBREVIVIENTE DI CAMPO DI CONCENTRACION NAZI.

PA HORIBEL cu e crueldadnan di e camponan di concentracion Nazi durante Segundo Guera Mundial tabata, no tabata e prome ni e ultimo biaha cu hende a ser trata na un manera indigno. Sea nos analisa pasado of presente, e conclusion ta obvio: Pa basta tempo caba, hopi ta esnan cu a ‘baha e trapi cu ta caba den humiliacion y indignidad.’

Sinembargo, no ta e crueldadnan cu a mancha historia humano so ta trapa dignidad humano. Hopi biaha esei ta tuma luga den formanan mas sutil. Pensa riba e mucha cu ta ser tenta pa motibo di su aparencia. Of e inmigrante cu ta bira obheto di mofa pa motibo di cierto custumbernan “straño.” Of e hende cu ta ser descrimina pa motibo di su color of nacionalidad. Kisas esnan cu ta haci e cosnan ei ta mira nan como wega, pero e dolor y humiliacion cu hende menosprecia ta sinti no ta cos di hari.—Proverbionan 26:18, 19.

Kico Ta Dignidad Humano?

Un diccionario ta defini dignidad como ‘e cualidad of condicion di ta digno, honra of aprecia.’ P’esei, dignidad humano tin di aber cu e manera cu nos ta mira nos mes y tambe e manera cu otro hende ta trata nos. Aunke tin varios factor cu por influencia loke nos ta pensa  di nos mes, e manera cu otro hende ta mira nos of trata nos tin hopi di aber cu e balor cu nos ta duna nos mes den e bida di tur dia.

Tur sociedad tin hende pober, indefenso y vulnerable. Pero e echo cu un persona ta den e circunstancianan ei no necesariamente ta hacie menos digno. Ta e actitud y reaccion di otro hende por pon’e sinti su mes indigno. Lamentablemente, ta hende cu ta den situacionnan desafortuna por lo general ta esnan cu nan derecho relaciona cu dignidad humano ta ser trapa of neglisha. Cuanto biaha nos no ta tende expresionnan manera “no ta sirbi pa nada”, “despreciabel” y “indigno” den casonan di maltrato di hende di edad, hende pober of hende mentalmente of fisicamente incapasita!

Pakico hende ta humilia otro? E derecho basico cu hende tin pa sinti nan digno lo bira realidad un dia? E siguiente articulo lo duna contesta satisfactorio for di Bijbel, e Palabra di Dios.