E Temor di Dios Ta “Instruccion pa Sabiduria”

BERDADERO sabiduria a organisa un gran bankete. El a “manda su crianan, e ta grita riba e luganan di mas halto di e stad: ‘Esun cu ta simpel [“sin experencia”, NW], lag’e bin aki!’ Na esun cu ta falta comprondemento e ta bisa: ‘Bin, come di mi pan, y bebe di e biña cu mi a mescla. Bandona bobedad y biba, y sigui den e caminda di comprondemento.’”—Proverbionan 9:1-6.

Comemento di un bankete na e mesa di sabiduria nunca ta hiba na nada malo ni perhudicial. Si nos scucha e sabiduria di Dios cu tin den e proverbionan inspira y acepta nan instruccion of disciplina, e resultado lo ta solamente cos bon. E palabranan sabi cu tin para skirbi na Proverbionan 15:16-33 no ta un excepcion. * Obedeciendo e conseho di e dichonan breve y al caso aki por yuda nos keda satisfecho y contento a pesar cu kisas nos no tin hopi pocesion material. Tambe nan ta yuda nos pa nos ta progresivo y experencia goso den bida. Ademas, haciendo caso di e consehonan ei por yuda nos tuma bon decision y capasita nos pa keda riba e caminda cu ta hiba na bida.

Ora Cu Menos Ta Mihor

Rei Salomon di antiguo Israel a bisa: “Mihor djis un tiki, cu e temor di SEÑOR, cu gran tesoro, y problema hunto cu ne.” (Proverbionan 15:16) Ta un bobedad pa ignora e Creador y haci coremento tras di pocesionnan material e meta principal den nos bida. Un bida asina ta yena cu hopi esfuerso agotador y masha hopi ansiedad. Esta tristo lo ta si den bo biehes bo bin realisa cu henter bo bida tabata bashi y sin proposito! Un cos ta sigur, no ta sabi pa acumula hopi pocesion material compaña cu “problema.” Ta mucho mas mihor pa siña con pa obtene berdadero satisfaccion y biba di acuerdo cu esei. Nos ta haya berdadero satisfaccion y contentamento den e temor di Jehova—den nos relacion cu ne—no den pocesionnan material.—1 Timoteo 6:6-8.

Salomon a enfatisa cu un bon relacion cu otro hende tin mas balor cu un abundancia di cos material, bisando: “Mihor un tayo di berdura caminda tin amor, cu un toro gorda y odio hunto cu ne.” (Proverbionan 15:17) Si, un ambiente amoroso den cas ta mas probechoso cu un abundancia di cuminda rico. Den cas di un mayor soltero e recursonan kisas ta masha limita. Den algun pais ta cuminda simpel so hende por afford. Sinembargo, un famia ta bai bon caminda tin amor y cariño.

Asta den famianan caminda por lo general tin un ambiente amoroso, situacionnan dificil por surgi. Un miembro di famia kisas ta bisa of haci algo cu ta ofende un otro miembro. Con esun ofendi lo mester reacciona?  Proverbionan 15:18 ta declara: “Un hende cu ta rabia lihe ta lanta pleito, ma esun cu no ta rabia lihe ta calma pleito.” Un reaccion suave, no un reaccion rabia, ta promove pas y trankilidad. E conseho di e proverbio aki ta aplica tambe den otro areanan di bida, incluso den actividadnan di congregacion y den e ministerio publico.

“Un Caminda Grandi”

E siguiente proverbio ta enfatisa e contraste entre un persona cu no a haci caso di sabiduria y esnan cu si a hacie. E Rei sabi a bisa: “Caminda di e floho ta manera un trankera di sumpiña, ma berea di e rectonan ta un caminda grandi.”—Proverbionan 15:19.

Un trankera di sumpiña ta un obstaculo. Un persona floho ta imagina tur sorto di obstaculo den su caminda y ta uza nan como un excuse pa hustifica dicon e no a cuminsa un cierto tarea. Di otro banda, hende recto no ta worry cu bareranan cu lo por stroba nan. Nan ta haci nan trabou diligentemente y ta presta atencion na e tarea nan dilanti. Pues asina nan ta evita hopi problema dificil manera sumpiña cu nan lo por a haya nan cu ne si nan tabata negligente. Nan tin un caminda “grandi”, es decir, un caminda progresivo nan dilanti. Nan ta cuminsa nan trabou y nan ta alegra den su progreso.

Tuma por ehempel, e asunto di adkiri conocemento exacto di e Palabra di Dios y progresa na madures spiritual. Esei ta rekeri esfuerso. Un persona facilmente por uza su educacion limita, falta di bon habilidad di lesa of mal memoria como un excuse pa no dedica su mes diligentemente na un estudio personal di Bijbel. Pero lo ta mucho mas mihor pa nos no mira e cosnan ei como obstaculo cu ta stroba nos di adkiri conocemento! Asta cu habilidadnan limita, nos por haci esfuerso pa mehora nos habilidad di lesa y nos capasidad di compronde loke nos ta lesa, podise dor di haci uzo di un diccionario ora ta necesario. Un actitud positivo ta yuda nos adkiri conocemento y haci progreso spiritual.

Ora ‘un Tata Ta Bira Contento’

E Rei di Israel a bisa: “Un yiu homber sabi ta haci su tata contento, ma un homber bobo ta  desprecia su mama.” (Proverbionan 15:20) Mayornan no ta bira contento ora cu nan yiunan ta actua sabi? Ta berdad cu pa haya e bon resultadonan ei, mayornan mester instrui y disciplina nan yiunan. (Proverbionan 22:6) Pero ki un gran fuente di goso un yiu sabi ta pa su mayornan! Sinembargo, e yiu bobo ta causa nan masha hopi dolor.

Siguientemente e Rei sabi a bisa: “Bobedad ta alegria pa esun cu falta comprondemento, ma un hende di comprondemento ta cana den rectitud.” (Proverbionan 15:21) Hende cu falta comprondemento ta alegra den harimento pa co’i kens y den pasamento di pret cu no ta duna berdadero satisfaccion ni felicidad. Sinembargo, e persona cu tin discernimento ta mira e bobedad di bira un ‘stimado di placer mas bien cu stimado di Dios.’ (2 Timoteo 3:1, 4) Pero dor di pega na Dios su principionan, esei ta yud’e keda recto y mantene su caminda stret.

Ora Cos “Ta Wordo Logra”

Bibando na harmonia cu principionan divino ta produci beneficio den otro aspectonan di nos bida. Proverbionan 15:22 ta declara: “Pa falta di conseho [of, “ora no tin papiamento confidencial”, NW] plannan ta fracasa, ma cu hopi consehero nan ta wordo logra.”

Papiamento confidencial ta nifica comunicacion priva pero franco entre cierto personanan. E palabra Hebreo traduci como “conseho” of “papiamento confidencial” ta ser traduci como “grupo intimo” na Salmo 89:7 [NW]. Esaki ta indica intimidad den comunicacion. Papiamento confidencial ta mas cu un simpel combersacion superficial, e ta un intercambio di sintimento- y pensamentonan profundo y sincero. Ora esposo cu esposa y tambe mayornan cu yiunan ta comunica libremente cu otro den e manera aki, tin pas y union entre nan. Pero un falta di papiamento confidencial ta hiba na frustracion y problema den famia.

Ora nos tin cu tuma decisionnan importante, ta sabi pa haci caso di e conseho: “Cu hopi consehero [plannan] ta wordo logra.” Por ehempel, ora nos ta bai scohe un tratamento medico, lo no ta sabi pa busca un di dos of di tres opinion, specialmente si ta trata di asuntonan serio?

E balor di tin hopi consehero ta sumamente importante ora di atende asuntonan spiritual. Ora cu ancianonan ta consulta cu otro y ta haci uzo di e sabiduria di un grupo di anciano, plannan “ta wordo logra.” Ademas, superintendentenan recien nombra no mester basila pa busca conseho cerca ancianonan cu tin mas edad y experencia, specialmente si e asunto cu nan tin cu atende ta dificil.

‘Ora Cu Duna un Bon Contesta Tin Alegria’

Ki bon por resulta for di papiamento cu ta refleha perspicasia? E Rei di Israel a bisa: “Un  hende tin alegria ora cu e duna un bon contesta, y ki bon ta un palabra duna na ora!” (Proverbionan 15:23) Nos no ta alegra ora cu hende haci caso di nos contesta of conseho y esei hiba na bon resultado? Sinembargo, pa nos conseho por ta efectivo, e tin cu cumpli cu dos rekisito.

Di prome, e conseho mester ta firmemente basa riba Bijbel, e Palabra di Dios. (Salmo 119:105; 2 Timoteo 3:16, 17) Di dos, mester papi’e na e momento corecto. Asta palabranan cu ta berdad pero papia na e mal momento por ta perhudicial. Por ehempel, no ta sabi ni practico pa duna un hende conseho prome cu el a caba di papia tur cos di e problema. Ta masha importante anto pa nos “ta lihe pa tende, no lihe pa papia y no lihe pa rabia”!—Santiago 1:19.

“E Berea di Bida Ta Subi Bai Ariba”

Proverbionan 15:24 ta declara: “E berea di bida ta subi bai ariba pa esun sabi, asina cu e por keda leu for di Seol abou.” Un persona cu ta actua sabi, cu perspicasia, ta riba e caminda cu ta aleh’e for di Seol, e graf comun di humanidad. E persona ei ta keda leu di practicanan perhudicial manera relacion sexual cu diferente partner, uzo di droga y buracheria. Di e manera ei e ta evita un morto prematuro. Su berea ta hiba na bida.

Na contraste, tuma nota di e hendenan cu no tin perspicasia: “SEÑOR lo destrui cas di e orguyosonan, ma e lo establece frontera di e viuda. Plannan di maldad ta un abominacion pa SEÑOR, ma palabranan agradabel ta puro. Esun cu ta haragan pa ganashi ta tormenta su mes cas, ma esun cu ta odia placa pasa bou di mesa lo biba.”—Proverbionan 15:25-27.

Mustrando nos con pa evita un trampa hopi comun, e Rei di Israel a bisa: “Curason di e husto ta studia bon con pa contesta, ma for di boca di e malbadonan ta brota maldad.” (Proverbionan 15:28) Esta valioso e conseho di e proverbio aki ta! Contestanan sin sentido y bobo, cu ta djis bula sali for di boca sin pensa, rara bes ta hiba na algo bon. Pero ora nos ta tuma na cuenta varios factor cu lo por tin relacion cu un asunto, incluso e circunstancianan y sintimentonan di otro hende, e chens ta masha chikito cu nos lo bisa algo cu kisas despues nos ta lamenta.

Kico anto ta e beneficio di teme Dios y acepta su disciplina? E homber sabi a contesta: “SEÑOR ta leu for di e malbadonan, ma e ta tende oracion di e hustonan.” (Proverbionan 15:29)  E Dios berdadero no ta cerca di e malbadonan. Bijbel ta declara: “Esun cu haci su mes sordo pa no scucha lei, asta su oracion ta un abominacion.” (Proverbionan 28:9) Hende cu ta teme Dios y ta haci esfuerso pa haci loke ta corecto den su bista por acerc’e libremente, cu e pleno confiansa cu lo e scucha nan.

Loke “Ta Alegra Curason”

Uzando un comparacion cu ta pone bo para pensa, Salomon a bisa: “Wowo cu ta briya ta alegra curason; bon noticia ta haci weso salud.” (Proverbionan 15:30) Weso ta “salud” ora cu nan ta yen di tut’i weso. Esaki ta duna henter e curpa vigor y ta alegra e curason. Anto e goso di curason ta ser refleha den e manera cla cu e wowo ta briya. Asina tanto efecto un bon noticia tin!

Acaso e informenan di e expansion mundial di Jehova su adoracion no ta un fuente di berdadero animacion pa nos? De echo, ora nos tende di tur loke ta ser logra den e trabou di predica e Reino y di haci discipel, esei ta stimula nos pa haci mas den e ministerio. (Mateo 24:14; 28:19, 20) E experencianan di personanan cu ta haci Jehova nan Dios y ta cuminsa practica adoracion berdadero ta yena nos curason cu goso. Como cu “bon noticia for di un tera leu” tin asina un efecto poderoso, ta masha importante pa ora nos ta raporta loke nos ta haci den e ministerio nos hacie na un manera exacto y consencialmente.—Proverbionan 25:25.

“Prome Cu Honor Ta Bin Humildad”

Enfatisando e balor di acepta disciplina den su varios formanan, e Rei sabi a bisa: “Horea cu ta scucha reprendemento di bida lo biba meimei di e sabinan. Esun cu neglisha disciplina ta desprecia su mes alma, ma esun cu scucha reprendemento ta adkiri comprondemento.” (Proverbionan 15:31, 32) Reprendemento, of disciplina, ta yega na un hende su curason y ta ahust’e, dunando e persona sano huicio. Nada straño cu disciplina, of “bara di coreccion”, ta kita ‘locura mara den curason di un mucha’! (Proverbionan 22:15) Esun cu ta scucha disciplina ta adkiri tambe comprondemento y bon motivacion. Di otro banda, rechasa disciplina ta nifica rechasa bida.

En berdad ta probechoso pa ricibi e disciplina di sabiduria y acept’e den humildad. Esei no solamente ta hiba na contentamento, progreso, alegria y logro, sino tambe na honor y bida. Proverbionan 15:33 ta conclui: ‘E temor di Jehova ta instruccion pa sabiduria, y prome cu honor ta bin humildad.’

[Nota]

[Plachi na pagina 17]

Un ambiente amoroso den cas ta mas probechoso cu un abundancia di cuminda rico

[Plachi na pagina 18]

Asta si nos tin cierto limitacionnan, un actitud positivo ta yuda nos adkiri conocemento

[Plachi na pagina 19]

Papiamento confidencial ta un intercambio di sintimento- y pensamentonan profundo y sincero

[Plachi na pagina 20]

Bo sa con “bon noticia ta haci weso salud”?