Storia di Bida

Porfin Nos Famia A Uni!

SEGUN E RELATO DI SUMIKO HIRANO

Mi a haya e mihor manera di biba, y mi a desea pa mi esposo comparti esei cu mi. A tuma cuarentidos aña pa esei a tuma luga.

NOS a casa na 1951, tempo cu mi tabatin 21 aña. Den cuater aña, nos a haya dos yiu homber, y mi bida a parce bendiciona den tur manera.

Un dia na 1957, mi ruman muher mayo a bisa mi cu un misionero di Testigonan di Jehova tabata bishitand’e. Aunke e tabata un budista, el a cuminsa studia Bijbel cu e misionero y a anima mi pa mi tambe studia Bijbel, locual mi a acepta. Mi tabata asisti na un iglesia protestant, y mi a pensa cu lo mi por a mustra e Testigonan di Jehova riba supuesto fayonan den nan doctrina.

No a tarda mucho cu mi a descubri cu mi tabata sa masha tiki di Bijbel. Mi a haya mi ta puntra e misionero: “Ken ta Jehova?” Nunca mi a yega di tende nan uza e nomber ei den mi iglesia. E misionero, Daphne Cooke (despues Pettitt), a manda mi na Isaias 42:8, cu ta bisa claramente cu e nomber di e Dios Todopoderoso ta Jehova. Daphne a contesta tur mi preguntanan uzando Bijbel.

Mi a haci e mesun preguntanan ei na mi domi. El a bisa mi: “Ta un pica pa haci pregunta. Djis kere loke nos bisa bo.” Aunke mi no a haya cu tabata malo pa haci pregunta, pa seis luna mi a bai misa tur diadomingo mainta y a asisti na e reunionnan di Testigonan di Jehova parti atardi.

 E Efecto Riba Mi Matrimonio

Loke mi tabata siña for di Bijbel a conmove mi, y mi tabata comparti esei cu mi esposo, Kazuhiko. Despues di cada estudio y reunion, mi tabata cont’e loke mi a siña. Esei a pone e relacion entre nos dos fria. E no tabata kier pa mi bira Testigo di Jehova. Pero mi tabata gusta studia Bijbel asina tanto cu mi a sigui cu mi estudionan y asociacion cu e Testigonan.

Prome cu mi tabata sali cas riba e anochinan di reunion, mi tabata prepara Kazuhiko su cumindanan faborito p’e, pero el a cuminsa ta bai come na restaurant. Ora mi tabata yega cas bek despues di reunion, mi tabata hay’e cu mal beis y e tabata nenga di papia cu mi. Despues di dos of tres dia, su beis tabata drecha atrobe, pero tabata dia di bai e siguiente reunion.

Rond di e tempo aki, mi a haya tuberculosis, un enfermedad cu ya caba a causa varios morto den famia di mi esposo. Kazuhiko a bira masha precupa y a bisa mi cu dia mi bira bon, lo mi por a haci cualkier cos cu mi tabata gusta. E unico cos cu mi a pidie tabata pa e tabatin e bondad di permiti mi bai mi reunionnan tur siman, locual el a acepta.

A tuma seis luna pa mi recupera, y durante e tempo ei mi a haci un estudio intensivo di Bijbel. Mi a busca fayo den e siñansanan di e Testigonan, cu e idea cu si mi a haya maske ta un, lo mi a stop di studia Bijbel cu nan. Wel, mi no por a haya ni un. Na luga di esei, e doctrinanan eroneo di Iglesia Protestant a bira mas bisto. Mi a yega na conoce e amor y husticia di Jehova y a mira e beneficio di biba na harmonia cu su leinan.

Despues cu mi a recupera, mi esposo a cumpli cu su palabra y no a opone mi baimento di reunion mas. Mi a sigui crece spiritualmente, y na mei 1958 mi a batisa como Testigo di Jehova. Mi a anhela pa mi famia tambe cuminsa adora e Dios berdadero.

Mi A Yuda Mi Yiunan Spiritualmente

Semper mi yiunan a compaña mi na e reunionnan y den e trabou di predica, pero tabatin algun cos cu a laga mi mira cu nan tabata creciendo den conocemento di Bijbel. Un dia, Masahiko, mi yiu homber di seis aña, tabata hunga pafo di cas. Mi a tende un zonido duro y un hende a dal un grito skerpi. Un bisiña a core drenta mi cas, gritando cu auto a dal mi yiu. El a muri? Mi a obliga mi mes pa keda calmo segun cu mi a core sali pafo. Ora mi a mira su bais tur machica mi a tembla, pero despues mi a mir’e ta cana yega cerca mi, levemente herida. El a cohe mi tene y bisa: “Mami, Jehova a yuda mi, no ta berdad?” Ora mi a mir’e bibo y a tende e bunita palabranan ei, mi a yora.

Un otro dia, den sirbishi nos a topa un biehito cu tabata grita mi: “Con bo por hinca den bo cabes pa lastra un mucha chikito asina bo tras? Mi tin duele di dje.” Prome cu mi por a contesta, Tomoyoshi, cu e tempo ei tabatin ocho aña, a bis’e: “Opa, no ta mi mama ta forsa mi pa predica. Mi ta predica pasobra mi  kier sirbi Jehova.” E biehito a keda wak sin por a bisa ni un pia di palabra.

Den sentido spiritual, mi yiunan no tabatin tata. Ta ami tabatin cu siña nan e berdadnan di Bijbel, aunke mi mes tabatin hopi di siña. Mi a cultiva mi mes amor, fe y celo y a purba di pone un bon ehempel. Tur dia mi tabata gradici Jehova dilanti mi yiunan. Mi tabata conta nan di mi experencianan den e trabou di predica. Esaki a anima nan. Ora a puntra nan despues pakico nan a bira pionero, of predicadonan di tempo completo di Testigonan di Jehova, nan a contesta: “Nos a mira cu nos mama tabata felis sirbiendo como pionero, y nos tambe kier tabata felis.”

Mi tabata tene masha cuidou pa no papia malo di nan tata ni di ningun miembro di e congregacion. Mi a realisa cu papiamento negativo por tabatin un efecto perhudicial riba mi yiunan. Nan lo por a perde respet no solamente pa esun cu ta ser critica sino tambe pa esun cu ta critica.

Mi A Vence Obstaculo pa Progresa

Na 1963 nos famia mester a muda bai Taiwan pa motibo di e trabou di mi esposo. El a bisa mi cu si mi a bai predica na e comunidad Japones einan, esei lo a trece dificultad. Nan lo a manda nos bek Japon, y esei lo a crea problema pa su compania. E tabata kier a separa nos for di e Testigonan.

Na Taiwan, caminda nan tabata tene tur e reunionnan na Chines, e Testigonan a duna nos un cordial bonbini. Mi a dicidi di siña Chines pa mi por a predica na e hendenan local en bes di e Japonesnan. Di e manera ei, lo mi por a evita e problemanan cu mi esposo a menciona.

Nos amistad cu e Testigonan na Taiwan a fortalece nos. Un pareha misionero, Harvey y Kathy Logan, a yuda nos masha tanto. Ruman Logan a bira un tata spiritual pa mi yiunan. El a mustra nan cu sirbi Jehova no ta un bida rigido y sin goso. Mi ta kere cu ta tempo cu nos tabata na Taiwan mi yiunan a tuma nan decision di sirbi Jehova.

Tomoyoshi y Masahiko a bai un scol Mericano, caminda nan a siña Ingles y tambe Chines. E enseñansa ei a prepara nan pa nan futuro sirbishi como predicado di e Dios berdadero, Jehova. Mi ta hopi gradicido na Jehova cu el a cambia loke por tabata un periodo dificil pa nos den un tempo di bendicion duradero. Despues di tres aña y mei memorabel na Taiwan, nos famia a regresa Japon.

Awor e hobennan tabata teenager y kier tabata mas independiente. Mi a dedica hopi ora rasonando cu nan riba principionan biblico, y Jehova a yuda nan atrabes di e tempo dificil  ei. Ora Tomoyoshi a caba su scol secundario, el a cuminsa traha como pionero. E por a yuda cuater persona yega na dedicacion y bautismo durante su prome añanan como pionero. Masahiko a sigui e ehempel di su ruman homber y a cuminsa traha pionero mesora despues di scol secundario. El a yuda cuater hoben bira Testigo den su prome cuater añanan como pionero.

Pero despues Jehova a drama mas bendicion riba mi yiunan. Tomoyoshi a studia cu e esposo di un señora kende ami a yuda siña e berdadnan di Bijbel. Nan dos yiu muhernan tambe a bira Testigo. Despues, Tomoyoshi a casa cu esun mas grandi, Nobuko, y Masahiko a casa cu esun mas jong, Masako. Aworaki Tomoyoshi cu Nobuko ta sirbi na e sede mundial di Testigonan di Jehova na Brooklyn, New York, y Masahiko cu Masako ta traha como misionero na Paraguay.

Cambionan Gradual den Mi Esposo

Den e añanan ei, aparentemente mi esposo no tabatin mucho interes den nos religion, pero nos a cuminsa mira señalnan di cambio den dje. Por ehempel, ora otro hende tabata bai contra mi, e tabata defende mi creencianan y en realidad e tabata apoya e berdadnan di Bijbel sin realisa esei. Ademas, e tabata duna yudansa material na Testigonan den necesidad. Den un discurso cortico na casamento di un di nos yiunan, el a bisa: “E mihor trabou, a la bes esun di mas dificil, cu un hende por haci, ta esun di siña hende e forma corecto di biba. Mi yiunan y nan esposanan a scohe e rumbo dificil aki como nan carera. Por fabor, yuda nan.” Tur e cosnan aki a pone mi pensa cu un dia e tambe lo a cuminsa sirbi Jehova hunto cu nos.

Mi a haci areglo pa e asocia cu otro Testigonan na nos cas. Mi tabata invita Kazuhiko na reunion- y asambleanan cristian y tambe na e Memorial di e morto di Cristo. Ora su trabou a permitie, e tabata asisti na esakinan, aunke sin mucho smak. Hopi biaha mi tabata sinti cu lo e por a acepta un estudio di Bijbel, p’esei mi tabata invita ancianonan cristian na nos cas. Pero el a nenga di acepta un estudio. Mi tabata puntra mi mes ta dicon.

E palabranan di apostel Pedro a bini na mi mente: “Boso, esposanan, sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso.” (1 Pedro 3:1, 2) Mi a realisa cu no ta semper mi a sigui e conseho ei. Pa cumpli cu ne completamente, mi tabatin cu mehora mi spiritualidad.

Na 1970, mi a cuminsa traha pionero cu e meta di bira un persona mas spiritual. Dies aña a pasa, despues 20. Ainda mi no a mira cambio spiritual den mi esposo. Un biaha un studiante di Bijbel a remarca: “Lo mester ta hopi duro pa yuda otro hende anto bo no por yuda ni bo mes casa.” Esei a desanima mi, pero mi no a entrega.

Pa cabamento di añanan ’80 di siglo 20, ya nos mayornan tabata hopi grandi. E trabou di cuida nan, y a la bes cumpli cu mi otro debernan, tabata un cansancio y a causa hopi stress. Pa hopi aña, nan tur tabata contra mi fe den Jehova, pero mi a purba mustra nan mi amor mas tanto posibel. Un poco prome cu mi mama a muri cu 96 aña di edad, el a bisa mi: “Sumiko, si mi resusita, lo mi join bo religion.” Mi a realisa cu mi esfuersonan no tabata pornada.

Mi esposo a tuma nota di tur loke mi a haci pa nos mayornan. Pa mustra su aprecio, el a cuminsa asisti na e reunionnan regularmente. El a haci esei pa hopi aña pero sin haci berdadero progreso spiritual. Mi a sigui purba agrad’e. Mi tabata invita su amigonan y asta su coleganan di trabou di otro pais pa bin come cerca nos na cas. Mi tabata recrea hunto cu ne. Ora a reduci e rekisito pa sirbishi di pionero, mi por a pasa mas tempo hunto cu ne.

 Pension Ta Trece un Cambio

Mi casa a baha cu pension na 1993. Mi a pensa cu awor si lo e tabatin tempo pa studia Bijbel. Pero el a bisa cu adora Dios djis pasobra e tabatin tempo lo ta blasfemia. Mas bien, el a bisa cu lo e adora Dios ora su curason impuls’e pa e haci esei y cu ami no mester a oblig’e.

Un dia Kazuhiko a puntra mi si lo mi kier a pasa e resto di mi bida bibando p’e. Esaki a duel mi pasobra for di dia mi a casa cu ne mi ta haciendo tur loke mi por p’e. Mi a haci hopi esfuerso pa hacie contento, pero e tabata haya cu mi tabata biba mas pa Jehova cu p’e. Despues di pensa un rato, mi a bis’e cu mi no por haci mas di loke mi tabata haciendo caba p’e. Pero si el a join mi den loke mi tabata haciendo, nos lo por a cuminsa un bida nobo hunto cu lo a dura, no pa un par di aña so, sino pa eternidad. Pa hopi dia, mi esposo no tabatin un contesta. Finalmente el a puntra: “Bon, bo kier studia Bijbel cu mi?” Cada bes cu mi pensa riba e palabranan aki, mi curason ta yena cu goso.

Na prome instante, mi a haci areglo pa un anciano cristian studia cu mi esposo, pero el a bisa mi: “Ta cu bo mi kier studia, cu ni un otro hende.” P’esei nos a cuminsa studia Bijbel tur dia. Siendo cu mi ta den un congregacion Chines y mi casa ta bon den e idioma ei, nos a studia na Chines. Tambe nos a lesa Bijbel completo hunto den menos cu un aña.

Durante e tempo aki, un anciano den e congregacion Chines, hunto cu su casa, a mustra interes den nos como pareha. Aunke nan tabata mas jong cu nos yiunan, nan a bira nos bon amigonan. Hopi otro Testigo tambe a mustra un interes special den mi casa. Nan a mustra hospitalidad na nos y a combersa cu Kazuhiko como si fuera e tabata nan tata. Esei a hacie masha felis.

Un dia nos a haya un invitacion na cas pa un casamento den e congregacion, dirigi na mi esposo. E reconocemento ei como cabes di famia a conmov’e profundamente, y el a dicidi di asisti. Un poco despues el a bira mas habri cu e Testigonan y a cuminsa studia Bijbel cu un anciano cristian. Su estudio di Bijbel, asistencia na reunion y e amor di e congregacion a yud’e progresa bon spiritualmente.

Porfin un Famia Uni

Na december 2000, mi esposo a batisa como simbolo di su dedicacion na Jehova. Mi yiunan y nan casanan a bini for di leu pa mira e “milager” di tempo moderno aki. A tuma 42 aña, pero porfin nos ta un famia uni.

Awor tur mainta, nos dos ta considera e texto di dia y ta lesa Bijbel hunto. Tur dia, nos ta disfruta di combersacionnan spiritual y ta participa den actividadnan spiritual. Awor mi esposo ta un sirbidor ministerial den e congregacion, y recientemente el a duna un discurso publico na Chines basa riba Bijbel. Mi ta gradici Jehova pa e echo cu el a uni nos. Hunto cu tur famia y amigonan stima, mi ta anhela pa sostene su nomber y soberania pa eternidad.

[Mapa na pagina 13]

(Pa e texto den su formato completo , wak e publicacion)

CHINA

REPUBLICA POPULAR DEMOCRATICO DI COREA

REPUBLICA DI COREA

Lama di Japon

JAPON

Tokio

Lama di Oost China

TAIWAN

Taipei

[Plachi na pagina 12]

Hunto cu mi famia na 1958, e aña cu mi a batisa

[Plachi na pagina 13]

Tempo cu nos a muda for di Tokio pa Taipei, amigonan manera Harvey y Kathy Logan a fortalece nos spiritualmente

[Plachi na pagina 15]

Awe mi famia ta uni den adoracion berdadero