Probecha di Dje Pasobra Bo No Por Ward’e

TEMPO ta oro. Esei ta un dicho bon conoci. En realidad, tin un gran diferencia entre tempo y oro of otro cos material. Bo no por warda tempo pa bo uz’e den futuro manera bo por warda placa, cuminda, combustibel of hopi otro cos. Cualkier intento pa warda tempo dor di no probecha di dje ta en vano. Kico lo sosode si bo drumi ocho ora y purba warda resto di e dia dor di no haci nada? Na final di e dia, e oranan cu bo no a probecha di dje a bai perdi.

Bo por compara tempo cu un riu grandi cu tin un coriente fuerte. Semper e ta bai den un solo direccion. Bo no por par’e, ni bo no por uza cada gota cu ta pasa bai. Hopi siglo pasa, hende a cuminsa traha wiel di awa na oriya di riu. Cu esakinan, nan tabata genera energia for di coriente di awa pa pone piedra di mula, zag di palo, pomp y martiu di steam grandi (stoomhamer) traha. Mescos tambe, bo no por warda tempo, pero bo por probecha di dje si pa haci algo bon. Pero, pa bo por haci esei, bo tin cu combati dos ladron principal di tempo: posponemento di cos y potoshi. Laga nos cuminsa na considera e asunto di posponemento di cos.

Evita di Pospone Cos

Un dicho conoci ta bisa: Nunca laga pa mañan loke bo por haci awe. Sinembargo, algun hende ta gusta formul’e di otro manera; nan ta bisa: Nunca laga pa mañan loke bo por laga pa otro siman. Ora nan haya nan confronta cu un tarea dificil, nan ta mira posponemento como un solucion facil. “Pospone cos” ta nifica keda sin haci algo cu mester wordo haci. Pa esun cu ta gusta pospone cosnan, esaki ta bira un custumber. Ora e haya su mes cu hopi stress y presion, e ta busca alivio dor di pospone e tarea y disfruta di su “tempo liber” recien haya te ora e presion aumenta atrobe.

Tin biaha, kisas pa motibo di nos estado fisico y emocional, nos mester pospone algun of asta tur nos cosnan di haci. Ademas, de bes en cuando tur hende mester di un cambio den e rutina di tur dia. Ni e Yiu di Dios no tabata un excepcion. Hesus tabata hopi ocupa den su ministerio, pero el a traha tempo tambe pa su mes y pa su discipelnan. (Marco 6:31, 32) Un cambio di rutina ta beneficioso. Sinembargo, posponemento di cos ta un otro asunto; por lo general e ta perhudicial. Pensa riba e siguiente ehempel.

Un studiante hoben tin tres siman pa prepara pa un proefwerk di wiskunde. E tin cu repasa  bastante nota y buki, y e ta sinti e presion. E tin gana di pospone e preparacion, y e ta cai den e trampa ei. En bes di studia, e ta wak television. Dianan ta pasa sin cu e ta prepara su mes pa e proefwerk. Anto finalmente, riba e anochi prome cu e proefwerk, e ta hay’e confronta cu tur e tarea. Sinta na su mesa, e ta cuminsa pasa dor di su notanan y bukinan.

Oranan ta pasa. Mientras otro miembronan di e famia ta drumi, e ta forsa su mente pa purba corda un cantidad di vergelijking, cosinus y wortel. Su siguiente dia na scol e ta lucha cu e preguntanan cu su mente cansa no ta prepara pa contesta. E ta haya un mal punto. E tin cu studia e material di nobo y e tin chens di keda sinta.

Posponemento di cos a sali e studiante aki caro. Pero tin un principio di Bijbel cu por yuda hende evita e tipo di situacionnan aki. Apostel Pablo a skirbi: “Mira bon con boso ta cana, no manera hende bobo, ma manera hende sabi, haciendo bon uzo di boso tempo.” (Efesionan 5:15, 16) Aki Pablo a spierta cristiannan pa uza nan tempo na un manera sabi pa cumpli cu nan debernan spiritual, pero e principio por ta masha beneficioso den hopi actividad importante di bida. Unabes cu por lo general nos por dicidi na ki momento nos ta haci un cierto tarea, nos lo haya mihor resultado y lo caba mas lihe cu e trabou si nos scohe pa cuminsa na e tempo mas cumbiniente. Manera e texto ta mustra, esaki ta un caracteristica di “hende sabi.”

Ki ora ta e tempo mas cumbiniente pa e studiante hoben prepara pa e proefwerk di wiskunde? Talbes tur anochi lo e por dedica mas o menos 15 minuut na repasa e material progresivamente. Den e manera ei lo e no tin nodi studia hopi e anochi prome, durante oranan largo cu lo e mester ta drumiendo. Riba e dia di e proefwerk, lo e ta bon sosega y completamente prepara, y lo tin mas chens di haya un bon punto.

P’esei, ora bo haya un tarea pa haci, determina ki ora ta e tempo mas cumbiniente pa hacie y pega na esei. Asina lo bo evita e trampa di pospone cos y su consecuencianan. Tambe lo bo haya e satisfaccion di a haci un bon trabou. Esaki ta specialmente importante ora e tarea lo afecta otro hende, manera ta e caso cu asignacionnan den e congregacion cristian.

Elimina Potoshi

Manera a ser menciona anteriormente, e di dos cos cu por yuda nos probecha di nos tempo precioso ta di evita potoshi. Nos ta conciente cu ta tuma tempo pa atende cosnan, pa organisa nan, pa uza nan, pa limpia nan, pa warda nan y pa busca nan. Mas cos ta exigi mas tempo. Den un cuarto of un cas cu tin yen di cos poni aki y aya ta frustrante pa traha y esaki ta tuma mas tempo cu den areanan cu tin espacio liber y superficie sin nada ariba. Ademas, segun cu mas y mas cos ta acumula, ta tuma mas tempo pa haya un cos cu nos ta busca.

Expertonan di trabou di cas ta bisa cu casi mitar di e tempo cu un hende ta dedica na haci limpiesa ta bai perdi na “piki, hala y kita potoshi y otro cos for di caminda.”  Probablemente e situacion ta mescos den otro areanan di bida. Pues si bo ta desea di haci mihor uzo di bo tempo, tira un bista rond di bo. Tin hopi cos ta ocupa bo espacio, stroba bo di move y, piyo ainda, tumando tur bo tempo? Si ta asina, elimina potoshi.

Kisas no ta facil pa elimina potoshi. Talbes nos tin problema pa deshaci di cosnan cu tin cierto balor pa nos pero cu ta innecesario—ta como si fuera nos ta perde un bon amigo. P’esei con bo por dicidi si bo tin cu warda un cos of deshaci di dje? Algun hende ta aplica e regla di un aña. Si bo no a uza un obheto pa un aña, deshaci di dje. Kico bo por haci si bo ta duda ainda pa deshaci di dje despues di un aña? Ward’e un caminda pa seis luna mas. Ora bo wak e atrobe y realisa cu un aña y mei a pasa sin cu bo a uz’e, lo ta mas facil pa deshaci di dje. En todo caso, e cos importante ta pa reduci potoshi pa haci mihor uzo di bo tempo.

Claro cu no ta cos di cas of trabou so ta forma ‘potoshi.’ Hesus a papia di “e precupacionnan di e mundo aki y e engaño di rikesa” cu por “hoga e palabra” di Dios y pone un persona “keda sin duna fruta” relaciona cu e bon nobo. (Mateo 13:22) Un persona por ocupa su bida cu asina tanto actividad y cos di haci cu ta bira dificil pa e saca e tempo necesario pa mantene un rutina y ekilibrio spiritual, locual ta sumamente importante. Consecuentemente, e por bai atras spiritualmente y cu tempo perde su chens di drenta e mundo nobo cu Dios a priminti, ora cu lo tin tur tempo pa haci loke ta trece berdadero satisfaccion y delicia.—Isaias 65:17-24; 2 Pedro 3:13.

Bo ta sinti cu constantemente bo ta purba organisa bo tempo pa por logra haci tur loke bo ta kere cu bo mester haci—sea ta cosnan relaciona cu bo trabou, cas, auto, hobi, biahe, ehercicio, actividad social of yen di otro actividadnan interesante? Si ta asina, talbes ta tempo pa pensa riba con bo por reduci potoshi den sentido spiritual.

Un otro dicho conoci ta, tempo no ta para warda bo. En berdad, tempo ta core nonstop den un solo direccion mescos cu un coriente di awa fuerte. Bo no por bir’e bek ni ward’e; unabes el a pasa, el a pasa bai pa semper. Ma dor di sigui algun principio simpel di Bijbel y dal un par di paso practico, nos por probecha di e tempo cu nos tin mester pa haci “e cosnan cu ta excelente” pa nos beneficio eterno y “pa e gloria y alabansa di Dios.”—Filipensenan 1:10, 11.

[Plachi na pagina 8, 9]

Nos por probecha di tempo mescos cu di un coriente fuerte pa haci loke ta bon

[Plachi na pagina 9]

Ki ora ta e tempo cumbiniente pa e prepara pa su proefwerk?

[Plachi na pagina 10]

Traha den un area yen di cos poni aki y aya ta frustrante y ta tuma hopi tempo