Pronto Tur Hende Lo Sinti Nan Digno

“Nos mester construi un mundo nobo—un mundo mucho mas mihor—den cua e dignidad eterno di hende ta ser respeta.”​—PRESIDENTE MERICANO HARRY TRUMAN, SAN FRANCISCO, CALIFORNIA, MERCA, 25 DI APRIL 1945.

MESCOS cu hopi hende den e añanan despues di Segundo Guera Mundial, presidente Truman tabata combenci cu hende por a siña di nan pasado y crea “un mundo nobo” cu dignidad pa tur hende. Lamentablemente, historia moderno ta presenta un otro realidad. Ainda “e dignidad eterno di hende” ta ser trapa pasobra e raiz di e problema ta sinta, no cerca hende, sino cerca e enemigo di mas grandi di hende.

Raiz di e Problema

Bijbel ta identifica e enemigo aki como Satanas e Diabel, un criatura spiritual malbado cu for di cuminsamento di historia humano a desafia e derecho di Dios di goberna. For di ora Satanas a comunica cu Eva den e hofi di Eden, su meta tabata pa stroba hende di sirbi nan Creador. (Genesis 3:1-5) Pensa riba e consecuencianan desastroso cu Adam y Eva a haya nan cu ne ora nan a sucumbi na e tentacion di Diabel! Net despues di nan desobediencia na e lei di Dios relaciona cu e fruta prohibi, nan dos a bai “sconde pa e presencia di SEÑOR Dios.” Pakico? Adam a confesa: “Mi tabatin miedo, pasobra mi tabata sunu; p’esei mi a bai sconde.” (Genesis 3:8-10)  E relacion cu Adam tabatin cu su Tata celestial y e manera cu el a mira su mes a cambia. E tabatin berguensa y no tabata sinti su mes comodo mas den presencia di Jehova.

Pakico Diabel tabata kier pa Adam perde respet propio? Pasobra hende a ser crea den imagen di Dios, y Satanas ta gosa pa mira hende actua na un manera cu ta mancha su refleho di e gloria di Dios. (Genesis 1:27; Romanonan 3:23) Esaki ta yuda nos compronde pakico tabatin asina tanto actonan di humiliacion den historia. Satanas, como “e dios di e mundo aki”, a promove e spirito aki durante e tempo cu “hende a eherce autoridad riba ... hende pa su daño.” (2 Corintionan 4:4; Eclesiastes 8:9; 1 Juan 5:19) Esaki ta nifica cu nunca mas hende no por sinti nan berdaderamente digno?

Jehova Ta Trata Su Creacion cu Dignidad

Pensa atrobe riba e condicionnan cu a existi den e hofi di Eden prome cu Adam y Eva a peca. Nan tabatin cuminda na abundancia, trabou agradabel y e posibilidad di biba pa semper den salud perfecto tanto pa nan mes como pa nan desendientenan. (Genesis 1:28) Cada aspecto di nan existencia a resalta Dios su proposito amoroso y digno pa humanidad.

Jehova su punto di bista di dignidad humano a cambia ora Adam cu Eva a peca? No. El a mustra consideracion pa e berguensa cu nan a sinti awor pa e echo cu nan tabata sunu. Den su gran amor, el a traha “bisti di cuero” pa remplasa e blachinan di figo cu nan a cose na otro pa tapa nan curpa. (Genesis 3:7, 21) En bes di laga nan na berguensa, Dios a trata nan cu dignidad.

Despues, ora Jehova a trata cu e nacion di Israel, el a mustra compasion pa huerfano, viuda y residente stranhero—miembronan di sociedad cu hopi bes ta ser trata malo. (Salmo 72:13) Por ehempel, ora e Israelitanan tabata cosecha nan grano, oleifi y wendruif, nan no tabatin mag di bai bek pa recohe loke a keda atras. Mas bien, Dios a bisa cu loke a sobra mester a “keda pa e stranhero, pa e huerfano y pa e viuda.” (Deuteronomio 24:19-21) Ora e leinan aki a ser aplica, hende no tabatin nodi cana pidi limosna, y asta pa e hendenan di mas pober tabatin trabou digno.

Hesus A Trata Otro Hende cu Dignidad

Tempo cu Hesucristo, Yiu di Dios, tabata na tera, el a demostra interes den e dignidad di otro hende. Por ehempel, den e dianan cu e tabata na Galilea, un homber cu tabata tur na lepra a acerc’e. Segun e Lei di Moises, pa evita di pega otro hende, e leproso mester a grita: “Impuro! Impuro!” (Levitico 13:45) Sinembargo, e homber aki no a dal un grito di advertencia ora el a acerca Hesus. Na luga di esei, el a cai riba su cara y a roga Hesus: “Señor, si bo kier, bo por haci mi bira limpi.” (Lucas 5:12)  Con Hesus a reacciona? Hesus no a reprende e homber pa motibo cu el a kibra e Lei, ni E no a ignor’e of hala leu for di dje. Mas bien, el a trata e leproso na un manera digno dor di mishi cu ne y a bisa: “Mi kier, sea limpi.”—Lucas 5:13.

Na otro ocasionnan, Hesus a demostra su capasidad pa cura sin ningun contacto fisico—algun biaha for di un distancia. Sinembargo, den e caso aki el a opta pa mishi cu e homber. (Mateo 15:21-28; Marco 10:51, 52; Lucas 7:1-10) Dor cu e homber tabata “yen di lepra”, pa hopi aña caba lo e no tabatin ningun contacto fisico cu otro hende. Lo mester tabata un gran consuelo pa e sinti un otro hende mishi cu ne atrobe! Tur loke e homber a spera tabata pa e cura di su lepra. Pero e manera cu Hesus a cur’e sin duda a yuda restaura algo mas, esta, e homber su dignidad. Ta realistico pa pensa cu e interes ei den e dignidad di otro hende por ta existi den e sociedad djawe? Si ta asina, con lo e ser manifesta?

E Regla Cu Ta Pone Hende Sinti Nan Digno

Hesus a declara loke hopi hende ta considera e instruccion di mas famoso cu a yega di ser duna encuanto relacionnan humano: “Tur loke boso kier pa hende haci pa boso, haci mescos pa nan.” (Mateo 7:12) E Regla di Oro aki, manera e sa ser yama, ta impulsa un hende pa respeta su prohimo cu e speransa di haya e mesun trato bek.

Manera historia ta mustra, hende no ta aplicando e regla aki di nan mes. Hopi biaha ta sosode net contrario. Un homber cu nos lo yama Harold a bisa: “Mi tin cu admiti cu ami tabata gusta humilia otro hende. Cu djis un par di palabra, mi por a laga nan keda perturba,  pone nan na berguensa y asta pone nan yora.” Pero a sosode algo cu a pone Harold cambia su manera di trata otro hende. “Varios Testigo di Jehova a cuminsa bishita mi na cas. Ora mi wak bek, mi ta haya berguensa ora mi pensa riba algun di e cosnan cu mi a bisa nan y e manera cu mi tabata trata nan tin biaha. Pero nunca nan no a entrega, y tiki tiki e berdadnan di Bijbel a yega na mi curason y a motiva mi pa cambia.” Awe, Harold ta sirbi como anciano den e congregacion cristian.

E experencia di Harold ta duna prueba cu “e palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.” (Hebreonan 4:12) E Palabra di Dios tin e poder pa conmove un persona su curason y cambia su manera di pensa y actua. Esaki ta e clave pa pone otro hende sinti nan digno—un deseo sincero pa yuda, no pa ofende, pa honra y no pa humilia.—Echonan 20:35; Romanonan 12:10.

Dignidad Apropia Restaura

Ta e mesun deseo aki ta motiva Testigonan di Jehova pa papia cu otro hende tocante e speransa maraviyoso di Bijbel. (Echonan 5:42) E mihor manera pa mustra respet pa nos prohimo y trat’e na un manera digno ta di comparti cu ne e “bon nobo di felicidad [“algo mihor”, NW].” (Isaias 52:7) “Algo mihor” ta inclui bisti “e hende nobo”, cu lo mata e “deseo malo” di humilia otro hende. (Colosensenan 3:5-10) E ta inclui tambe e proposito di Jehova pa pronto elimina e condicion- y actitudnan cu ta trapa hende su dignidad, hunto cu e instigado, Satanas e Diabel. (Daniel 2:44; Mateo 6:9, 10; Revelacion 20:1, 2, 10) Ta solamente na e tempo ei, ora tera ta “yen di e conocemento di SEÑOR”, tur hende lo sinti nan finalmente digno.—Isaias 11:9.

Nos ta invita bo pa siña tocante e speransa maraviyoso aki. Dor di asocia cu Testigonan di Jehova, bo mes lo mira cu aplicacion di principionan biblico ta duna otro hende dignidad. Ademas, lo bo por siña con e Reino di Dios pronto lo trece ‘un mundo nobo y mucho mas mihor’, un mundo den cua “e dignidad eterno di hende” lo bira un realidad, pa nunca mas e ser trapa atrobe.

[Cuadro/Plachi na pagina 6]

Nan Integridad A Conserva Nan Dignidad

Durante Segundo Guera Mundial, mas cu 2.000 Testigo di Jehova a ser manda camponan di concentracion Nazi pa motibo di nan fe. Impresiona pa e manera remarcabel den cua nan a demostra nan integridad, e ex preso di Ravensbrück, Gemma La Guardia Gluck, ta conta den su buki My Story: “Na un dado momento Gestapo a anuncia cu cualkier Studiante di Bijbel cu a renuncia su fe y firma un declaracion pa confirma esei lo a haya su libertad y lo no a wordo persigui mas.” Di esnan cu a nenga di firma e declaracion, e ta skirbi: “Nan a prefera di sigui sufri y spera cu pasenshi riba e dia di liberacion.” Pakico nan a tuma e posicion ei? Magdalena, menciona na cuminsamento di e articulo anterior, kende awor tin 80 y pico aña, ta splica: “Keda fiel na Jehova tabata mas importante cu haci cualkier otro cos pa keda na bida. Mantene nos dignidad a nifica mantene nos integridad.” *

[Nota]

[Plachi na pagina 5]

Hesus a trata hende cu el a cura cu dignidad

[Plachi na pagina 7]

Testigonan di Jehova ta trata otro hende cu dignidad dor di comparti cu nan e “bon nobo di algo mihor”