Sea Sabi y Teme Dios!

‘E temor di Jehova ta e principio di sabiduria.’—PROVERBIONAN 9:10.

1. Dicon hopi hende ta haya e idea di teme Dios un cos dificil pa compronde?

UN TEMPO, tabata un compliment pa describi un persona como un hende temeroso di Dios. Awendia, hopi hende ta haya e idea di teme Dios un cos un poco ouderwets y dificil pa compronde. Kisas nan ta puntra: ‘Si Dios ta amor, pakico lo mi tin cu tem’e?’ Pa nan, temor ta un emocion negativo y cu asta ta paralisa hende. Sinembargo, berdadero temor di Dios tin un nificacion hopi mas amplio y, manera nos lo bai mira, e no ta simplemente un sintimento of emocion.

2, 3. Kico berdadero temor di Dios ta ensera?

² Den Bijbel, temor di Dios ta un caracteristica positivo. (Isaias 11:3) E ta un respet y admiracion profundo pa Dios, un deseo fuerte di no kier desagrad’e. (Salmo 115:11) E ta inclui cu bo ta acepta y pega strictamente na Dios su normanan moral y cu bo tin e deseo di biba di acuerdo cu loke Dios ta bisa ta bon of malo. Un diccionario a señala cu un temor saludabel asina ta expresa “un actitud fundamental pa cu Dios cu ta hiba na comportacion sabi y na evita tur forma di maldad.” Apropiadamente e Palabra di Dios ta bisa nos: ‘E temor di Jehova ta e principio di sabiduria.’—Proverbionan 9:10.

³ De echo, temor di Dios ta liga cu hopi aspecto di asuntonan humano. E ta ser conecta no solamente cu sabiduria sino tambe cu goso, pas, prosperidad, bida largo, speransa y confiansa. (Salmo 2:11; Proverbionan 1:7; 10:27; 14:26; 22:4; 23:17, 18; Echonan 9:31) E ta estrechamente conecta cu fe y amor. De echo, e ta ensera tur cos cu tin di aber cu nos relacion cu Dios y cu nos prohimo. (Deuteronomio 10:12; Job 6:14, BPK; Hebreonan 11:7) Temor di Dios ta inclui e conviccion profundo cu nos Tata celestial personalmente ta cuida nos y ta cla pa pordona nos ofensanan. (Salmo 130:4) Ta solamente malbadonan cu no arepenti tin motibo pa ta yen di miedo di Dios. *—Hebreonan 10:26-31.

Siña Teme Jehova

4. Kico por yuda nos ‘siña teme Jehova’?

⁴ Ya cu temor di Dios ta esencial pa nos por tuma decisionnan sabi y haya Dios su bendicion, con nos por ‘siña teme Jehova’ corectamente? (Deuteronomio 17:19) Den e Scritura tin hopi ehempel di hende homber y hende muher temeroso di Dios. E ehempelnan ei a keda registra “pa nos instruccion.” (Romanonan 15:4) Pa yuda nos compronde loke teme Dios realmente ta nifica, laga nos reflexiona riba e bida di un di e personanan ei, Rei David di antiguo Israel.

5. Con e trabou di cuida carne a yuda David siña teme Jehova?

⁵ Jehova a rechasa Saul, e prome Rei di Israel, debi na Saul su miedo di hende y su falta di temor di Dios. (1 Samuel 15:24-26) Di otro banda, David su bida y su relacion intimo cu Jehova ta indica bon cla cu e tabata un homber realmente temeroso di Dios. David, for di su hubentud, tabata keda hopi biaha pafo den sabana pa cuida e carnenan di su tata. (1 Samuel 16:11) E anochinan cu David a pasa pafo ta cuida carne bou di e streyanan lo mester a yud’e compronde e temor di Jehova. Aunke David por a mira solamente un parti chikito di e universo inmenso, el a saca e conclusion corecto, esta, cu Dios merece nos respet y adoracion. Mas despues el a skirbi: “Ora mi contempla bo shelonan, e obra di bo dedenan, e luna y e  streyanan cu abo a establece, ta kico hende ta, cu bo ta corda di dje? Y e yiu di hende, cu bo ta haci caso di dje?”—Salmo 8:3, 4.

6. Con David a sinti ora el a ripara Jehova su grandesa?

⁶ Ta na su luga cu David a keda impresiona ora cu el a realisa con chikito e ta na comparacion cu e shelo inmenso yen di streya. En bes di spant’e, e conocemento aki a motiv’e pa alaba Jehova y bisa: “E shelonan ta conta di e gloria di Dios; y e firmamento ta proclama e obra di su mannan.” (Salmo 19:1) E respet y admiracion profundo aki pa Dios a hala David mas cerca di Jehova y a pone cu e kier a siña Jehova su camindanan perfecto y sigui nan. Imagina bo con David a sinti ora cu el a canta na Jehova: “Bo ta grandi y ta haci obranan maraviyoso; abo so ta Dios. Siña mi bo caminda, o SEÑOR; lo mi cana den bo berdad; uni mi curason pa teme bo nomber.”—Salmo 86:10, 11.

7. Con e echo cu David a teme Dios a yud’e bringa contra Goliat?

⁷ Ora cu e Filisteonan a invadi e tera di Israel, nan guerero Goliat, cu tabata midi tres meter halto, a haci bofon di e Israelitanan y a reta nan, bisando basicamente: ‘Scohe un homber pa ami cu ne so bringa! Si e gana, nos lo sirbi boso.’ (1 Samuel 17:4-10) Saul y henter su ehersito tabata morto spanta; pero David si no. E tabata sa cu Jehova ta esun cu nos mester teme, y no hende, sin importa con poderoso e hende ta. P’esei David a bisa Goliat: ‘Ami ta bin riba bo den e nomber di Jehova di ehersitonan. Pa henter e asamblea aki por sa cu Jehova no ta libra cu spada ni cu lansa; pasobra e bataya ta di Jehova.’ Cu su slinger y un solo piedra—y cu e yudansa di Jehova—David a mata e gigante.—1 Samuel 17:45-47.

8. Kico nos ta siña for di e ehempelnan den Bijbel di personanan temeroso di Dios?

⁸ Podise nos ta confronta obstaculo of enemigo cu ta mesun dificil cu esnan cu David a confronta. Kico nos por haci? Nos por trata cu nan den e mesun manera cu David y otro personanan fiel di pasado a trata, esta, cu temor di Dios. Temor di Dios por vence miedo di hende. Dios su fiel sirbidor Nehemias a urgi su compañeronan Israelita, cu tabata bou di presion di opositor: “No tene miedo di nan; corda riba Señor [Jehova], kende ta grandi y temibel.” (Nehemias 4:14) Cu e sosten di Jehova, tanto David, Nehemias como otro sirbidornan fiel di Dios a logra cumpli cu e asignacion cu Dios a duna nan. Cu temor di Dios, nos tambe por.

Enfrenta Problema cu Temor di Dios

9. Den ki circunstancianan David a desplega temor di Dios?

⁹ Despues cu David a mata Goliat, Jehova a dun’e mas victoria. Sinembargo, Saul a bira hopi jaloers y a purba mata David, na prome instante el a actua di un manera impulsivo, despues cu astucia y finalmente cu un ehersito. Aunke Jehova a sigura David cu lo e bira rei, pa añanan David tabatin cu hui, bringa y warda riba Jehova su tempo pa hacie rei. Atrabes di tur esaki, David a demostra cu e tabata teme e Dios berdadero.—1 Samuel 18:9, 11, 17; 24:2.

10. Con David a demostra temor di Dios ora el a confronta peliger?

¹⁰ Na un ocasion, David a busca refugio cerca Akis, Rei di e stad Filisteo di Gat, for di unda Goliat tabata. (1 Samuel 21:10-15) E sirbidornan di e Rei a denuncia David di ta un enemigo di nan nacion. Con David a reacciona den e situacion peligroso ei? El a desahoga su curason den oracion na Jehova. (Salmo 56:1-4, 11-13) Aunke David tabatin cu haci manera ta loco e ta pa e por a scapa, e tabata sa cu en realidad ta Jehova a libr’e dor di bendiciona su esfuerso. E echo cu David a steun di henter su curason riba Jehova y e confiansa cu el a pone den Jehova ta demostra cu di berdad e tabata un homber temeroso di Dios.—Salmo 34:4-6, 9-11.

11. Con nos, mescos cu David, por demostra temor di Dios ora nos ta pasa den prueba?

¹¹ Mescos cu David, nos por demostra temor di Dios dor di confia den su promesa cu lo e yuda nos trata cu nos problemanan. David a bisa: “Encomenda bo caminda na SEÑOR, confia  tambe den dje, y e lo hacie [of, “e mes lo actua”, NW].” (Salmo 37:5) Esaki no kiermen cu nos ta djis tira nos problemanan riba Jehova sin haci nada cu nan, anto spera cu e lo soluciona e problemanan pa nos. David no a djis haci oracion pidi Dios yud’e anto sin haci nada mas. El a uza su capasidadnan fisico y intelectual cu Jehova a dun’e y a deal cu e problema su dilanti. Sinembargo, David tabata sa cu e no por a steun riba esfuerso humano so pa e por tin exito. Mescos mester ta e caso cu nos. Despues di a haci tur loke nos por, nos tin cu laga e resto den man di Jehova. De echo, hopi biaha no tin nada otro cu nos por haci sino di depende riba Jehova. Aki ta caminda nos ta demostra personalmente nos temor di Dios. Nos por haya consuelo den David su expresion sincero: “E comunion intimo di SEÑOR ta cu esnan cu ta tem’e.”—Salmo 25:14.

12. Dicon nos tin cu tuma nos oracionnan masha na serio, y ki actitud nunca nos mester tin?

¹² P’esei nos tin cu mira nos oracionnan y nos relacion cu Dios como un asunto masha serio. Ora nos ta acerca Jehova, nos mester “kere cu e ta, y cu e ta Esun cu ta recompensa esnan cu ta busc’e.” (Hebreonan 11:6; Santiago 1:5-8) Anto ora e yuda nos, nos mester mustra cu nos ta “gradicido”, manera apostel Pablo a conseha nos. (Colosensenan 3:15, 17) Nunca nos no mester ta manera e personanan describi pa un cristian ungi di hopi experencia. El a bisa: “Nan ta mira Dios manera un tipo di waiter celestial. Ora cu nan tin mester di algo, nan kier djis klap nan man pa Dios core bin. Anto unabes nan a haya loke nan kier, nan kier pa e bai.” Un actitud asina ta revela un falta di temor di Dios.

Ora Cu Temor di Dios A Mengua

13. Na ki ocasion David a keda sin mustra respet pa e Lei di Dios?

¹³ E echo cu David a experencia Jehova su yudansa durante angustia a profundisa su temor di Dios y a fortalece su confiansa den Jehova. (Salmo 31:22-24) Sinembargo, na tres ocasion notabel David su temor di Dios a mengua, locual a hiba na consecuencianan serio. E prome ocasion tabatin di aber cu e areglonan cu el a haci pa hiba Jehova su arca di aliansa Jerusalem riba un garoshi en bes di riba scouder di e Levitanan, manera e Lei di Dios a manda. Ora cu Uza, kende tabata dirigi e garoshi, a coi e Arca  tene pa e no cai, el a cai muri mesora pa su “ireverencia”, of falta di respet. Si, Uza a peca gravemente, pero loke na final di cuenta a causa e resultado tragico ei tabata pasobra David no a mustra e debido respet pa e Lei di Dios. Temor di Dios ta nifica haci cosnan segun su areglo.—2 Samuel 6:2-9; Numbernan 4:15; 7:9.

14. Kico a resulta for di e echo cu David a conta Israel?

¹⁴ Mas despues David, instiga pa Satanas, a haci un conteo di e cantidad di hombernan guerero den Israel. (1 Cronicanan 21:1) Cu esei David a demostra cu su temor di Dios a mengua, y esei a hiba na e morto di 70.000 Israelita. Aunke David a arepenti dilanti di Jehova, e y e pueblo a sufri masha hopi.—2 Samuel 24:1-16.

15. Kico a pone David cai den pica sexual?

¹⁵ Na un otro ocasion David su temor di Dios a mengua temporalmente y esei a pon’e drenta den un relacion inmoral cu Betsabe, esposa di Urias. David tabata sa cu adulterio of asta desea e casa di un otro hende tabata malo. (Exodo 20:14, 17) E problema a cuminsa ora cu David a mira Betsabe ta baña. Debido temor di Dios lo mester a motiva David mesora pa stop di wak y bai pensa riba otro cos. Pero na luga di esei, David evidentemente a sigui “wak” Betsabe te ora cu pasion a supera su temor di Dios. (Mateo 5:28; 2 Samuel 11:1-4) David a lubida cu Jehova tabata envolvi den tur aspecto di su bida.—Salmo 139:1-7.

16. Ki consecuencianan David a sufri pa su malecho?

¹⁶ David su relacion inmoral cu Betsabe a produci un yiu homber. Poco despues, Jehova a manda su profeta Natan pa saca David su pica na cla. Despues di a ser restaura na su sano huicio, David a recupera su temor di Dios y a arepenti. El a roga Jehova pa no tir’e afo ni kita Su spirito santo for di dje. (Salmo 51:7, 11) Jehova a pordona David y a reduci e castigo, pero e no  a proteha David di tur e mal consecuencianan di su accion. David su yiu a muri, y dolor di curason y tragedia a asota su famia djei padilanti. Ki un prijs halto el a paga pa e echo cu su temor di Dios a mengua temporalmente!—2 Samuel 12:10-14; 13:10-14; 15:14.

17. Duna un ehempel di e dolor cu actonan pecaminoso ta produci.

¹⁷ Awe tambe si un hende keda sin demostra temor di Dios den asuntonan moral esei por tin consecuencianan serio y duradero. Imagina bo e dolor di un esposa hoben ora cu el a haya sa cu su esposo cristian tabata infiel na dje durante cu e tabata traha den exterior. Tur dobla di shock y tristesa, e esposa a tapa su cara cu su mannan y a grita yora. Cuanto tempo lo tuma prome cu su esposo lo por bolbe gana su confiansa y respet? Consecuencianan tragico asina por ser evita dor di realmente teme Dios.—1 Corintionan 6:18.

Temor di Dios Ta Frena Nos di Pica

18. Kico ta Satanas su meta y ki metodo e ta uza pa logra esei?

¹⁸ Satanas ta cabando rapidamente cu e normanan moral di e mundo, y e kier corumpi specialmente cristiannan berdadero. Pa haci esei, e ta probecha di nos sentidonan, specialmente nos bista y nos oido, ya cu nan ta e ruta mas directo pa yega na nos curason y nos mente. (Efesionan 4:17-19) Con abo lo reacciona si bo haya bo confronta onverwacht cu imagennan, palabranan of hendenan inmoral?

19. Con temor di Dios a yuda un cristian vence tentacion?

¹⁹ Considera e caso di André, * cu ta un anciano cristian, tata y docter na Europa. Tempo cu André tabatin cu traha warda di anochi na hospital, coleganan femenino tabata pega notanan—decora tur na curason—na su cusinchi cu e invitacion pa e tene relacion sexual cu nan. André tabata nenga firmemente di pensa mes riba nan proposicionnan. Ademas, pa saca su mes for di e mal ambiente ei el a busca trabou otro caminda. E echo cu e tabata teme Dios a resulta di ta e proceder sabi y a hiba na bendicion, pasobra awe André ta sirbi part-time na e sucursal di Testigonan di Jehova den su pais.

20, 21. (a) Con temor di Dios por yuda nos evita di comete pica? (b) Kico nos lo considera den e siguiente articulo?

²⁰ Ora un persona ta keda pensa riba loke ta malo, esei por hib’e na un estado mental caminda e ta dispuesto pa bandona su relacion cu Jehova a cambio di algo cu e no tin derecho riba dje. (Santiago 1:14, 15) Di otro banda, si nos ta teme Jehova, nos lo keda leu—nos lo asta cana bai—for di hende, luga, actividad y entretenimento cu lo por pone nos rebaha nos vigilancia moral. (Proverbionan 22:3) Cualkier berguensa of sacrificio cu esei lo por ensera, ta nada na comparacion cu perde e aprobacion di Dios. (Mateo 5:29, 30) Teme Dios definitivamente ta ensera cu nunca nos lo expone nos mes deliberadamente na cos inmoral, y esei ta inclui cualkier forma di pornografia. Mas bien nos ta ‘kita nos bista for di banidad.’ Si nos haci esei, nos por tin e confiansa cu Jehova lo preserva nos na bida y percura tur loke nos realmente tin mester.—Salmo 84:11; 119:37.

²¹ Si, actua cu berdadero temor di Dios semper ta e proceder sabi. Esei ta ademas e fuente di berdadero felicidad. (Salmo 34:9) E siguiente articulo lo mustra esaki bon cla.

[Nota]

Bo Por Splica?

• Cua cualidadnan cristian temor di Dios ta inclui?

• Con temor di Dios ta contraresta miedo di hende?

• Con nos por demostra cu nos tin e punto di bista corecto di oracion?

• Con temor di Dios por frena nos di comete pica?

[Preguntanan di Estudio]

[Plachi na pagina 23]

David a siña teme Dios tempo cu el a observa Jehova su creacion

[Plachi na pagina 24]

Con abo lo reacciona si bo haya bo onverwacht cu un tentacion?