Teme Jehova y Sea Felis!

“Felis ta e homber cu ta teme Jehova.”—SALMO 112:1, NW.

1, 2. Kico e temor di Jehova por produci?

FELICIDAD no ta un cos cu nos ta logra facilmente. Berdadero felicidad ta depende di si nos ta tuma e decisionnan corecto, ta haci loke ta corecto y ta keda leu for di loke ta robes. Nos Creador, Jehova, a duna nos su Palabra, Bijbel, pa siña nos con nos por hiba e mihor bida cu tin. Dor di busca Jehova su guia y siguie, desplegando asina temor di Dios, nos por ta realmente satisfecho y felis.—Salmo 23:1; Proverbionan 14:26.

² Den e articulo aki nos lo considera algun ehempel biblico y tambe di nos tempo cu ta mustra con berdadero temor di Dios ta duna un hende e fortalesa pa resisti presion pa haci loke ta robes y e curashi pa haci loke ta corecto. Nos lo bai mira cu temor di Dios por haci nos felis dor di motiva nos pa corigi un proceder robes, manera Rei David tabatin cu haci. Tambe nos lo bai mira cu e temor di Jehova ta un herencia realmente valioso cu mayornan por pasa pa nan yiunan. De echo, e Palabra di Dios ta sigura nos: “Felis ta e homber cu ta teme Jehova.”—Salmo 112:1, NW.

Con pa Recupera Felicidad Perdi

3. Kico a yuda David recupera di su picanan?

³ Manera nos a considera den e articulo anterior, na tres ocasion notabel David a faya di demostra e debido temor di Dios y el a peca. Sinembargo, e manera cu el a reacciona riba Jehova su disciplina a demostra cu a pesar di su picanan e tabata un persona temeroso di Dios. Su respet y admiracion profundo pa Dios a motiv’e na admiti su culpa, corigi su caminda y reestablece un relacion cu Jehova. Aunke David su erornan a causa sufrimento p’e y pa otro hende, su arepentimento sincero a pone cu el a sigui haya Jehova  su sosten y bendicion. David su ehempel siguramente por duna curashi na cristiannan djawe cu kisas ta comete un pica serio.

4. Con e temor di Dios por yuda un persona recupera felicidad?

⁴ Considera e caso di Sonja. * Aunke Sonja tabata sirbi como un predicado di tempo completo, el a cuminsa anda cu mal asociacion y el a hay’e envolvi den comportacion no cristian, y mester a expuls’e for di e congregacion cristian. Pero Sonja a recupera su sano huicio, y el a haci tur loke ta necesario pa drecha su relacion cu Jehova. Cu tempo, el a ser reestableci den e congregacion. Durante tur tempo ei, Sonja nunca a bandona su deseo di sirbi Jehova. A lo largo, el a bolbe drenta den sirbishi di pionero di tempo completo. Despues, el a casa cu un excelente anciano cristian, y awor Sonja felismente ta sirbi hunto cu ne den e congregacion. Aunke Sonja ta lamenta cu temporalmente el a dual for di e caminda cristian, e ta felis cu su temor di Dios a yud’e bin bek cerca Jehova.

Mihor Sufri cu Peca

5, 6. Splica con y pakico David a spar Saul su bida dos biaha.

⁵ Naturalmente ta mas mihor ora cu temor di Dios ta yuda un hende evita di comete pica. Esaki tabata e caso cu David. Na un ocasion cu Saul tabata persigui David cu un ehersito di 3.000 hende, Saul a drenta den un cueba. Tabata net e cueba caminda David cu su hombernan tabata sconde. E hombernan di David a urgie pa e mata Saul, rasonando cu ta Jehova tabata entregando David su enemigo mortal den su man. Keto keto, David a sluip yega cerca Saul y a corta zom di su mantel kita afo. Pero como cu David tabata teme Dios, asta e acto relativamente inofensivo ei a tormenta su consenshi. David a plama su hombernan agita for di otro cu e palabranan: ‘Cu esaki sea leu di mi di haci un cos asin’aki cu mi señor, Jehova su ungi, di lanta mi man contra dje, siendo cu e ta Jehova su ungi.’ *—1 Samuel 24:1-7.

⁶ Na un otro ocasion mas despues, Saul tabata anochi den un campamento, y e cu su hombernan a pega ‘un soño profundo cu a bin for di Jehova.’ David cu Abisai, un subrino di dje yen di curashi, a sluip drenta meimei di e campamento y para wak Saul drumi na soño. Abisai kier a caba cu Saul di unabes pa semper. Pero David a frena Abisai, bisando: “Ken por saca su man contra SEÑOR su ungi y keda sin culpa?”—1 Samuel 26:9, 12.

7. Kico a frena David di comete pica?

⁷ Dicon David no a mata Saul ora cu dos biaha el a haya chens pa haci esei? Pasobra e tabata teme Jehova mas cu e tabata teme Saul. Como cu David tabatin e debido temor di Dios, el a prefera di sufri—si ta necesario—y no peca. (Hebreonan 11:25) E tabatin pleno confiansa cu Jehova lo a cuida Su pueblo y cuid’e personalmente. David tabata sa cu obedece Dios y confia den dje lo a produci felicidad y trece hopi bendicion, mientras cu ignora Dios lo a trece Dios su desaprobacion. (Salmo 65:4) Tambe e tabata sa cu Dios lo a cumpli cu Su promesa di haci David rei y lo a kita Saul na Su debido tempo y manera.—1 Samuel 26:10.

Teme Dios Ta Produci Felicidad

8. Con David su conducta bou di presion ta sirbi como un ehempel?

⁸ Como cristian, nos ta spera bofon, persecucion y otro pruebanan. (Mateo 24:9; 2  Pedro 3:3) Tin biaha nos por asta haya nos cu dificultad cu tin di aber cu rumannan den fe. Sinembargo, nos sa cu Jehova ta mira tur cos, ta tende nos oracionnan y, na e debido tempo, lo rectifica asuntonan segun su boluntad. (Romanonan 12:17-21; Hebreonan 4:16) P’esei, en bes di tene miedo di nos opositornan, nos ta teme Dios y ta acudi na dje pa libra nos. Mescos cu David, nos no ta venga nos mes, ni nos no ta compromete principionan husto pa  evita sufrimento. Na final di cuenta, esaki ta produci felicidad. Pero con?

9. Duna un ehempel di e manera cu temor di Dios por resulta den felicidad a pesar di persecucion.

⁹ Un cristian cu tin hopi tempo como misionero na Africa a conta: “Mi ta corda e ehempel di un mama cu su yiu muher teenager cu debi na nan neutralidad cristian a nenga di cumpra carchi di partido politico. Un multitud di homber a ataca nan brutalmente y despues a manda nan bai cas. Segun cu nan tabata cana bai, e mama a purba consola su yiu muher cu tabata yora y cu tabata bringa pa compronde dicon e cos aki a pasa cu nan. Nan no tabata contento na e momento ei, pero nan tabatin un consenshi limpi si. Despues, nan tabata masha felis cu nan a obedece Dios. Si nan lo a cumpra e carchinan di e partido, e multitud lo a keda supercontento. E hombernan lo a duna nan boter di refresco y lo a balia rond di nan durante henter nan caminda pa cas. Pero e mucha muher y su mama, sabiendo cu nan a compromete nan fe, lo tabata e hendenan di mas infelis na mundo.” Nan temor di Dios a spar nan di tur esei.

10, 11. Ki bon resultado e temor di Dios di un señora a produci?

¹⁰ Temor di Dios ta resulta den felicidad tambe ora nos ta confronta pruebanan relaciona cu respet pa e santidad di bida. Tempo cu Mary tabata na estado di su di tres yiu, su docter a urgie pa comete aborto. E docter a bisa: “Bo condicion ta peligroso. Lo bo por haya complicacion un momento pa otro y muri den 24 ora. E ora ei e baby tambe lo muri. En todo caso, no tin ningun garantia cu e baby lo ta normal.” Mary tabata studia Bijbel cu Testigonan di Jehova pero ainda e no a batisa. Mary a bisa: “Pero ya mi a dicidi di sirbi Jehova, y mi tabata determina pa keda obedecido na dje, pase loke pase.”—Exodo 21:22, 23, NW.

¹¹ Durante su embaraso, Mary a sigui studia Bijbel y ocupa su mes cu cuido di su famia. Finalmente e baby a nace. Mary a conta: “E parto tabata un poco mas dificil cu e prome dosnan, pero no tabatin complicacion grandi.” Temor di Dios a yuda Mary mantene un bon consenshi, y poco despues el a batisa. Segun cu e baby a crece, e tambe a siña teme Jehova, y actualmente e mucha homber aki ta sirbiendo na un di e sucursalnan di Testigonan di Jehova.

‘Fortalece Bo Mes den Jehova’

12. Con temor di Dios a fortalece David?

¹² David su temor di Jehova a haci mas cu solamente fren’e di haci cos robes. E temor ei a fortalec’e pa actua na un manera decisivo y sabi bou di circunstancianan dificil. Pa un aña y cuater luna, David cu su hombernan a busca refugio for di Saul na Ziklag den e tera di e Filisteonan. (1 Samuel 27:5-7) Un biaha cu e hombernan no tabata t’ei, un grupo di bandido Amalekita a kima e stad y a bai cu tur e hombernan su casa-, yiu- y tounan. Ora cu David y e hombernan a regresa y mira loke a sosode, nan a yora. Pero tristesa a cambia rapidamente den amargura, y e hombernan a cuminsa bisa cu nan kier a piedra David mata. Aunke hopi angustia, David no a desespera. (Proverbionan 24:10) Su temor di Dios a motiv’e pa acudi na Jehova, y el ‘a fortalece su mes den Jehova su Dios.’ Cu Dios su yudansa, David y su hombernan a logra alcansa e Amalekitanan y a recupera tur cos.—1 Samuel 30:1-20.

13, 14. Con temor di Dios a yuda un cristian tuma bon decision?

¹³ Dios su sirbidornan djawe tambe ta confronta situacionnan cu ta rekeri confiansa den Jehova y e curashi pa actua na un manera decisivo. Tuma como un ehempel e caso di Kristina. Na mucha, Kristina a studia Bijbel cu Testigonan di Jehova. Pero e kier a bira un pianista di concierto, y el a haci hopi progreso den e direccion ei. Ademas, e tabatin berguensa di predica y p’esei tabatin miedo di acepta e responsabilidadnan cu lo e tin si e batisa. Segun cu Kristina a sigui studia e Palabra di Dios, el a cuminsa sinti su poder. El a siña conoce e temor di Jehova, y a realisa cu Jehova ta spera di su  sirbidornan cu nan ta stim’e cu henter nan curason, mente, alma y forsa. (Marco 12:30) Esaki a motiv’e pa dedica su mes na Jehova y batisa.

¹⁴ Kristina a pidi Jehova yud’e haci progreso spiritual. El a splica: “Mi tabata sa cu e bida di un pianista di concierto ta envolve masha hopi biahamento y cu lo tin contractnan pa toca te cu 400 concierto pa aña. Pues mi a dicidi pa na luga di esei mi bai duna les pa asina mantene mi mes financieramente y sirbi como un predicado di tempo completo.” Na e tempo ei, tabata plania caba pa Kristina haci su debut den e sala di concierto mas conoci di su pais. El a conta: “Mi prome concierto a resulta di ta a la bes mi ultimo.” Entre tanto Kristina a casa cu un anciano cristian. Awor nan dos hunto ta sirbi na un sucursal di Testigonan di Jehova. E ta felis cu Jehova a dun’e e fortalesa pa tuma decisionnan corecto y cu awor e por uza su tempo y energia den Su sirbishi.

Un Herencia Valioso

15. Kico David kier a pasa pa su yiunan, y con el a hacie?

¹⁵ David a skirbi: “Bin, yiunan, scucha mi; lo mi siña boso e temor di SEÑOR.” (Salmo 34:11) Como tata, David tabata dicidido pa pasa pa su yiunan un herencia valioso, esta, un temor sincero, balansa y saludabel di Jehova. Cu echo y palabra, David a pinta Jehova, no como un Dios exigente cu ta spanta bo, y cu ta cla pa castiga cualkier violacion di Su lei, sino como un Tata amoroso, atento y cla pa pordona su yiunan terenal. David a puntra: “Ta ken por tene conteo di eror?” Anto, indicando asina su confiansa cu Jehova no ta constantemente bezig ta samina nos erornan, el a agrega: “Tene mi leu for di cosnan cu mi no a ripara!” David tabatin sigur cu si e haci su mihor esfuerso, su  palabra- y pensamentonan lo por ta aceptabel pa Jehova.—Salmo 19:12, 14, Byington.

16, 17. Con mayornan por siña nan yiunan teme Jehova?

¹⁶ David ta sirbi como un ehempel pa mayornan awe. Ralph, kende hunto cu su ruman homber ta sirbi na un sucursal di Testigonan di Jehova, a bisa: “Nos mayornan a lanta nos na un manera cu tabata agradabel pa ta den e berdad. Tempo cu nos tabata chikito, nan a inclui nos den nan combersacionnan tocante actividadnan di e congregacion, y nos a bira mesun entusiasma tocante e berdad cu nan. Nan a lanta nos cu e creencia cu nos por haci bon cos den e sirbishi di Jehova. De echo, durante varios aña nos famia a biba den un pais cu tin gran necesidad di publicadornan di Reino, y a yuda establece congregacionnan nobo.

¹⁷ Loke a tene nos riba e caminda corecto no tabata un cantidad di reglanan stricto sino e echo cu pa nos mayornan, Jehova tabata real y masha masha bon y bondadoso mes. Nan a purba di siña conoce Jehova mihor y di agrad’e, y nos a siña for di nan berdadero temor di Dios y amor p’e. Asta ora nos a haci algo robes, nos mayornan no a laga nos sinti cu Jehova no tabata stima nos mas; tampoco nan no a rabia y pone restriccionnan innecesario riba nos. Mayoria biaha, nan tabata pone nos sinta y djis papia cu nos, Mama tin biaha cu awa den su wowo, purbando pa yega na nos curason. Y esei a duna resultado. Nos a siña mediante nos mayornan su echo y palabra cu temor di Jehova ta un cos bunita y cu ta un goso y placer—no un carga—di por ta un di su Testigonan.”—1 Juan 5:3.

18. Kico nos lo gana dor di teme e Dios berdadero?

¹⁸ Entre “e ultimo palabranan di David” nos ta lesa: “Esun cu ta goberna hende cu husticia, cu ta goberna den e temor di Dios, ta manera e lus di mainta ora solo ta sali.” (2 Samuel 23:1, 3, 4) Salomon, David su yiu y sucesor, aparentemente a siña e sabiduria di e palabranan aki, pasobra el a pidi Jehova dun’e “un curason obedecido” y e capasidad “pa discerni entre bon y malo.” (1 Reinan 3:9, NW) Salomon a reconoce cu temor di Jehova ta hiba na sabiduria y felicidad. Mas despues, el a resumi e buki di Eclesiastes cu e palabranan: “E conclusion di tur loke cu a wordo tendi, ta: teme Dios y warda su mandamentonan, pasobra esaki ta aplicabel na cada persona. Pasobra Dios lo trece tur echo na huicio, tur cos cu ta scondi, sea bon of malo.” (Eclesiastes 12:13, 14) Si nos obedece e conseho ei, nos en berdad lo nota cu ‘e recompensa di humildad y e temor di Jehova’ no ta solamente sabiduria y felicidad, sino tambe “rikesa, honor y bida.”—Proverbionan 22:4.

19. Kico lo capasita nos pa compronde ‘e temor di Jehova’?

¹⁹ For di ehempelnan biblico y experencianan di nos tempo, nos ta mira cu e debido temor di Dios ta hunga un papel positivo den e bida di Jehova su sirbidornan berdadero. E temor ei no solamente por preveni nos di haci loke ta desagrada nos Tata celestial sino tambe cu e por duna nos e curashi pa enfrenta nos adversarionan y e fortalesa pa wanta prueba- y dificultadnan cu ta bin den nos direccion. P’esei laga nos tur, hoben y bieu, haci nos best diligentemente pa studia e Palabra di Dios, medita riba loke nos ta siña y hala cerca di Jehova den oracion sincero y riba un base regular. Haciendo esei, no solamente nos lo haya “e conocemento di Dios”, sino tambe nos lo compronde ‘e temor di Jehova.’—Proverbionan 2:1-5.

[Nota]

Bo Por Splica?

Con e temor di Dios por

• yuda un hende recupera for di pica serio?

• produci felicidad a pesar di prueba y persecucion?

• fortalece nos pa haci e boluntad di Dios?

• ta un herencia valioso pa nos yiunan?

[Preguntanan di Estudio]

[Plachi na pagina 26]

Temor di Jehova a frena David di mata Rei Saul

[Plachi na pagina 29]

Temor di Dios ta un herencia valioso cu mayornan por pasa pa nan yiunan