Bo Ta Corda?

Bo a disfruta di e edicionnan recien di E Toren di Vigilancia? Wel, wak si bo por contesta e siguiente preguntanan:

• Con Hesus lo “libra esun den necesidad”, manera Salmo 72:12 a profetisa?

Durante Hesus su reinado, lo tin husticia pa un y tur, sin nada di corupcion. Guera hopi biaha ta resulta den pobresa, pero Cristo lo trece pas perfecto. E tin sintimento pa hende y lo uni tur hende, y lo e haci sigur cu tin cuminda na abundancia pa humanidad. (Salmo 72:4-16)—1/5, pagina 7.

• Con nos como cristian por desplega “frankesa di expresion” [NW]? (1 Timoteo 3:13; Filemon 8; Hebreonan 4:16)

Nos por haci esei dor di predica na otro hende cu entusiasmo y curashi, dor di siña hende y duna nan conseho di biaha y na un manera efectivo, y dor di desahoga nos curason cerca Dios den oracion, cu e confiansa cu lo e tende nos oracionnan y contesta nan.—15/5, pagina 14-16.

• Dicon bou di e Lei di Moises, cierto procesonan natural relaciona cu organonan sexual a haci un hende “impuro”?

E leinan relaciona cu impuresa causa pa emision di simiña, menstruacion y hayamento di yiu a contribui na bon higiena y un estilo di bida saludabel. Tambe nan a enfatisa e echo cu sanger ta sagrado y a mustra cu mester haci expiacion pa pica.—1/6, pagina 31.

• Si un persona kier ta felis, dicon lo ta bon pa e analisa e buki di Salmonan?

E compositornan di e Salmonan tabata sa cu felicidad ta bin dor di tin un bon relacion cu Dios. (Salmo 112:1) Nan a enfatisa cu ningun relacion humano, ningun pocesion material ni ningun logro personal por trece e felicidad cu hende ta haya dor cu nan ta pertenece na ‘e pueblo cu su Dios ta Jehova!’ (Salmo 144:15)—15/6, pagina 12.

• Ki relacion special cu Jehova e Israelitanan di antiguedad tabatin?

Na aña 1513 prome cu nos era, Jehova a forma un relacion nobo cu e Israelitanan, basa riba un aliansa of pacto. (Exodo 19:5, 6; 24:7) Despues di esei, Israelitanan a nace como miembro di Dios su nacion scohi y dedica na dje. Pero toch, cada persona tabatin cu tuma un decision personal pa sirbi Dios.—1/7, pagina 21-2.

• Dicon nos mester haci tur cos “sin murmura”? (Filipensenan 2:14)

Mayoria ehempel biblico ta mustra cu murmuramento a causa daño den e pueblo di Dios. P’esei ta bon pa nos pensa seriamente riba e influencia destructivo cu e por tin awe. Hende imperfecto tin e tendencia di keha, y nos mester paga tino pa detecta cualkier señal di esaki y evit’e.—15/7, pagina 16-17.

• Con nos por sa cu e descripcion di sabiduria cu tin na Proverbionan 8:22-31 no ta sabiduria den e sentido abstracto?

E sabiduria ei a ser “crea” como e principio di Jehova su caminda. Dios semper a existi y semper tabata sabi; su sabiduria no a ser crea. E sabiduria describi den Proverbionan 8:22-31 tabata na Dios su lado como “un trahado experto”, locual ta aplica na e criatura spiritual cu a bira Hesus y cu a traha estrechamente cu Dios den creacion. (Colosensenan 1:17, NW; Revelacion 3:14)—1/8, pagina 31.