“Boso A Tende di e Perseverancia di Job”

“Boso a tende di e perseverancia di Job y a mira e fin cu Señor tabatin na bista, cu Señor ta yen di compasion y ta misericordioso.”—SANTIAGO 5:11.

1, 2. Ki prueba un pareha na Polonia a confronta?

HARALD ABT tabata Testigo di Jehova pa menos cu un aña ora cu e ehersito di Hitler a tuma control di Danzig (awor Gdańsk) den parti noord di Polonia. E ora ei cosnan a bira dificil y asta peligroso pa cristiannan berdadero einan. Gestapo a purba obliga Harald firma un documento den cua e ta renuncia su fe, pero el a nenga. Despues di algun siman den prizon, nan a manda Harald na e campo di concentracion na Sachsenhausen, caminda bes tras bes nan tabata menas’e y batie. Un oficial a mustra riba e schoorsteen di e crematorio y a bisa Harald: “Si bo sigui tene na bo fe, den menos cu 14 dia lo bo subi for djeinan bai cerca bo Jehova.”

² Ora cu nan a aresta Harald, su casa Elsa ainda tabata duna nan yiu muher di dies luna pecho. Pero Gestapo no a pasa Elsa por halto. No a tarda hopi cu nan a kita su baby for di dje, y a manda Elsa na e campo di exterminacion na Auschwitz. Sinembargo, mescos cu Harald, el a logra sobrevivi pa añanan. Den E Toren di Vigilancia na Spaño di 15 di mei 1980, bo por lesa mas tocante con nan a persevera. Harald a skirbi: “En total mi a pasa 14 aña di mi bida den campo di concentracion y prizon debi na mi fe den Dios. Hende a yega di puntra mi: ‘Bo esposa a yuda bo wanta tur esaki?’ Definitivamente el a yuda mi! Mi tabata sa for di principio cu hamas lo el a compromete su fe, y sabiendo esei a yuda sostene mi. Mi tabata sa cu lo el a prefera di mira mi morto riba un brancard cu sa cu mi a ser libra pasobra mi a compromete . . . Elsa a wanta hopi miseria durante e añanan cu el a pasa den camponan di concentracion Aleman.”

3, 4. (a) Ken su ehempel por anima cristiannan pa persevera? (b) Dicon Bijbel ta urgi nos pa analisa Job su experencia?

³ Manera hopi Testigo por confirma, no ta ni un tiki facil pa sufri pa motibo di maldad. Pa e motibo aki, Bijbel ta conseha tur cristian: “Tuma e profetanan cu a papia den e nomber di Señor como un ehempel di sufrimento y di pasenshi.” (Santiago 5:10) Atrabes di siglonan, hopi sirbidor di Dios a ser  persigui sin motibo. E ehempelnan cu e ‘nubia grandi aki di testigo’ ta pone pa nos por anima nos pa sigui core cu perseverancia den nos careda cristian.—Hebreonan 11:32-38; 12:1.

⁴ Den Bijbel, Job ta destaca como un bon ehempel di perseverancia. Santiago a skirbi: “Mira, nos ta considera como bendiciona esnan cu a persevera. Boso a tende di e perseverancia di Job y a mira e fin cu Señor tabatin na bista, cu Señor ta yen di compasion y ta misericordioso.” (Santiago 5:11) Job su experencia ta duna nos un idea di e recompensa cu ta spera personanan fiel cu Jehova ta bendiciona. Mas importante ainda, e ta revela berdadnan cu lo beneficia nos durante periodonan di adversidad. E buki di Job ta yuda nos contesta e siguiente preguntanan: Ora nos ta bou di prueba, dicon nos tin cu purba compronde e cuestionnan fundamental cu esei ta ensera? Cua ta e cualidadnan y actitudnan cu lo yuda nos persevera? Con nos por fortifica nos rumannan cristian cu ta sufri afliccion?

Capta e Cuadro Completo

5. Cua ta e cuestion principal cu nos mester tene na mente ora nos ta confronta prueba of tentacion?

⁵ Pa nos por mantene nos stabilidad den asuntonan spiritual ora cu nos ta confronta adversidad, nos tin cu mira e cuadro completo, es decir, compronde tur e cuestionnan envolvi. Si no ta asina, problemanan personal lo por pone nos perde nos punto di bista skerpi di asuntonan relaciona cu nos adoracion. E cuestion di lealtad na Dios ta sumamente importante. Nos Tata celestial ta haci un apelacion cu nos cada un por tuma na pecho: “Sea sabi, mi yiu, y haci mi curason contento, pa mi por contesta esun cu reprocha mi.” (Proverbionan 27:11) Ki un privilegio unico nos tin! A pesar di nos debilidad- y imperfeccionnan, nos por haci nos Creador contento. Nos ta haci esei ora cu nos amor pa Jehova ta capasita nos pa resisti prueba y tentacion. Berdadero amor cristian ta soporta tur cos. Nunca e ta faya.—1 Corintionan 13:7, 8.

6. Con Satanas ta reprocha Jehova, y te na ki grado?

⁶ E buki di Job claramente ta identifica Satanas como esun cu ta reprocha Jehova. Tambe e buki ta revela e caracter malicioso di e enemigo invisibel aki y su deseo pa destrui nos relacion cu Dios. Manera a keda demostra den e caso di Job, Satanas basicamente ta acusa tur sirbidor di Jehova cu nan motivacion ta egoista y e ta busca manera pa proba cu nan amor pa Dios por fria. E tin miles di aña ta reprocha Dios. Ora cu Satanas a ser tira for di shelo, un bos den shelo a describie como “e acusado di nos rumannan”, y a bisa cu e ta haci e acusacionnan ei “di dia y anochi dilanti di nos Dios.” (Revelacion 12:10) Dor di persevera fielmente, nos por demostra cu su acusacionnan ta infunda.

7. Cua ta e mihor manera pa nos contraresta debilidad fisico y asina wanta prueba?

⁷ Nos tin cu corda cu Diabel lo probecha di cualkier tribulacion cu nos lo por ta confronta afin di purba aleha nos for di Jehova. Por ehempel, ki ora el a tenta Hesus? Despues cu Hesus a yuna pa basta dia y tabatin hamber. (Lucas 4:1-3) Sinembargo, Hesus su fortalesa spiritual a yud’e rechasa e tentacionnan di Diabel firmemente. P’esei ta masha importante pa nos contraresta cualkier debilidad fisico—causa podise pa malesa of biehes—cu fortalesa spiritual! Maske “nos hende exterior ta  degenera”, nos no ta entrega pasobra “nos hende interior ta wordo renova dia pa dia.”—2 Corintionan 4:16.

8. (a) Con e efecto di emocionnan negativo por debilita nos? (b) Ki actitud Hesus tabatin?

⁸ Ademas, emocionnan negativo tin e tendencia di debilita nos fortalesa spiritual. Un cristian lo por cuminsa puntra su mes: ‘Dicon Jehova ta permiti e cos aki?’ Of un otro cristian, despues di a ser trata cu falta di bondad, lo por puntra: ‘Con un ruman por a trata mi asina?’ Sintimentonan asina lo por pone nos pasa por halto di e cuestionnan principal y consentra completamente riba nos circunstancianan personal. Job a sintie hopi frustra debi na su tres compañeronan cu tabatin ideanan incorecto. E daño emocional cu el a sufri debi na esei, tabata mes fuerte cu e daño fisico causa pa su malesa. (Job 16:20; 19:2) Di igual manera, apostel Pablo a indica cu keda rabia pa un periodo prolonga por “duna Diabel oportunidad.” (Efesionan 4:26, 27) En bes di cristiannan baha nan frustracion of rabia riba personanan individual of consentra mucho riba e inhusticia di un situacion, ta mihor pa nan imita Hesus y “confia [nan] mes na Esun cu ta husga cu husticia”, esta, Jehova Dios. (1 Pedro 2:21-23) Si nos tin e mesun “disposicion mental” cu Hesus, esei por ta un gran defensa contra e atakenan di Satanas.—1 Pedro 4:1, NW.

9. Ki siguransa Dios ta duna nos relaciona cu e pesonan cu nos tin cu carga of e tentacionnan cu nos ta confronta?

⁹ Mas cu tur cos, nos nunca mester mira nos problemanan como un evidencia di cu Dios ta mal contento cu nos. Ta e mal comprondemento ei a hurt Job ora cu e tabata ser ataca cu e palabranan skerpi di su supuesto consoladornan. (Job 19:21, 22) Bijbel ta sigura nos: “Dios no por wordo tenta dor di maldad, y e mes no ta tenta ningun hende.” (Santiago 1:13) Al contrario, Jehova a priminti di yuda nos carga cualkier peso cu cai riba nos y di provee salida for di cualkier tentacion cu nos ta confronta. (Salmo 55:22; 1 Corintionan 10:13) Dor di hala cerca Dios den tempo di angustia, nos por evalua e situacion den un manera obhetivo y resisti Diabel cu exito.—Santiago 4:7, 8.

Cosnan Cu Por Yuda Nos Persevera

10, 11. (a) Kico a yuda Job persevera? (b) Con un bon consenshi a yuda Job?

¹⁰ A pesar di Job su situacion penoso—incluso e palabranan di abuso di su supuesto consoladornan y su propio confusion tocante e berdadero causa di su calamidad—toch Job a mantene su integridad. Kico nos por siña for di su perseverancia? Sin duda, e motibo fundamental pakico el a logra persevera tabata su fieldad na Jehova. El a ‘teme Dios y aparta su mes for di maldad.’ (Job 1:1) Esei tabata e manera cu el a biba. Job a nenga di bira lomba pa Jehova, asta ora cu e no a compronde dicon diripiente tur cos a bai malo. Job tabata kere cu e mester sirbi Dios den tempo bon y den tempo malo.—Job 1:21; 2:10.

¹¹ Un otro cos cu a consola Job tabata e echo cu e tabatin un bon consenshi. Na momento cu a parce cu su bida tabata yegando su fin, e tabatin e consuelo di sa cu el a haci su best pa yuda otro hende, cu el a tene firmemente na e normanan husto di Jehova y cu el a evita tur forma di adoracion falso.—Job 31:4-11, 26-28.

12. Con Job a reacciona riba e yudansa cu el a haya di Eliu?

¹² Pero echo ta cu Job tabatin mester di yudansa pa cambia su punto di bista den algun aspecto. Anto humildemente el a acepta e yudansa ei, locual tabata un otro factor clave cu a yud’e persevera cu exito. Cu respet Job a scucha e conseho sabi di Eliu, y el a reacciona na un manera positivo riba Jehova su coreccion. El a admiti: “Mi a declara loke mi no tabata compronde.” Y a agrega: “Mi ta hala mi palabranan atras, y ta arepenti den stof y shinishi.” (Job 42:3, 6) A pesar cu ainda Job tabata sufri di su malesa, el a keda contento cu e ahuste aki di su manera di pensa a hal’e mas cerca di Dios. Job a bisa: “Mi sa cu bo [Jehova] por haci tur cos.” (Job 42:2) Gracias na e descripcion cu Jehova a duna di Su grandesa, Job a  compronde mucho mas mihor kico tabata su posicion na comparacion cu e Creador.

13. Con e echo cu Job a mustra misericordia a resulta probechoso p’e?

¹³ Por ultimo, Job ta un ehempel sobresaliente di misericordia. Su consoladornan falso a hurt e profundamente, pero toch ora Jehova a pidi Job haci oracion pa nan, el a haci esaki. Despues di esei, Jehova a restaura Job su salud. (Job 42:8, 10) Ta bisto anto cu carga rencor lo no yuda nos persevera, mientras cu mustra amor y misericordia si lo yuda nos. Ora nos stop di carga rencor nos ta sinti nos refresca den sentido spiritual, y esei ta un proceder cu Jehova ta bendiciona.—Marco 11:25.

Conseheronan Sabi Cu Ta Yuda Nos Persevera

14, 15. (a) Cua cualidadnan lo yuda un consehero cura otro hende? (b) Splica dicon Eliu tabatin exito den yuda Job.

¹⁴ Un les mas cu nos por siña for di e relato di Job ta e balor di consehero sabi. Personanan asina ta manera ruman “naci pa tempo di adversidad.” (Proverbionan 17:17) Sinembargo, manera e experencia di Job ta mustra, tin consehero por causa herida na luga di cura. Un bon consehero tin cu mustra comprension, respet y bondad, mescos cu Eliu a haci. Ancianonan y otro cristiannan maduro kisas tin cu ahusta e manera di pensa di rumannan cu ta carga cu problema, y den esaki e conseheronan ei por siña hopi for di e buki di Job.—Galationan 6:1; Hebreonan 12:12, 13.

¹⁵ Tin hopi les excelente cu nos ta saca for di e manera cu Eliu a atende e asunto. El a scucha cu pasenshi prome cu el a reacciona riba e comentarionan eroneo di Job su tres compañeronan. (Job 32:11; Proverbionan 18:13) Eliu a yama Job na su nomber y a apela na dje manera un amigo. (Job 33:1) Distinto for di e tres consoladornan falso, Eliu no a considera su mes superior cu Job. E di: “Mi tambe a wordo forma for di klei.” E no kier a laga Job sufri mas tanto dor di papia palabranan sin pensa. (Job 33:6, 7; Proverbionan 12:18) Anto en bes di critica Job su conducta anterior, Eliu a elogi’e pa su husticia. (Job 33:32, NW) Mas importante ainda, Eliu a mira cosnan for di Dios su punto di bista, y el a yuda Job enfoca riba e echo cu Jehova nunca lo actua inhustamente. (Job 34:10-12) El a anima Job pa warda riba Jehova, en bes di purba demostra su propio husticia. (Job 35:2; 37:14, 23) Ancianonan cristian y otro hende sigur por beneficia di e lesnan ei.

16. Con Job su tres consoladornan falso a bira herment di Satanas?

¹⁶ Eliu su conseho sabi tabata net lo contrario di e palabranan ofensivo di Elifaz, Bildad y Zofar. Jehova a bisa nan: “Boso no a papia di mi loke ta recto.” (Job 42:7) Asta si nan a pretende cu ta cu bon intencion nan a hacie, nan a actua mas como herment di Satanas cu como compañeronan fiel. Tur tres a asumi for di principio cu e calamidadnan di Job tabata su mes falta. (Job 4:7, 8; 8:6; 20:22, 29) Segun Elifaz, Dios no tin confiansa den su sirbidornan, y e no tin cu nes si nos ta husto of no. (Job 15:15; 22:2, 3) Elifaz asta a acusa Job di erornan cu e no a comete. (Job 22:5, 9) Eliu, di otro banda, a fortalece Job pa e bolbe haya un punto di bista balansa di su relacion cu Dios, locual semper ta e meta di un consehero amoroso.

17. Kico nos mester tene na mente ora nos ta bou di prueba?

 ¹⁷ Tin un otro les tocante perseverancia cu nos por saca for di e buki di Job. Nos Dios amoroso ta observa nos situacion y e tin tanto e boluntad como e poder pa yuda nos den varios manera. Na principio di e articulo aki nos a menciona e experencia di Elsa Abt. Reflexiona un rato riba e conclusion cu el a saca: “Prome cu nan a aresta mi, mi a lesa un carta di un ruman muher cu a bisa cu bou di prueba severo e spirito di Jehova ta laga bo sinti un trankilidad. Mi a pensa cu e ruman lo mester tabata exagera un poco. Pero ora cu mi mes a pasa den prueba, mi a realisa cu loke el a bisa tabata berdad. Di berdad esei ta sosode. Ta dificil pa imagina esei si bo mes no a experenci’e. Sinembargo, esei ta realmente loke a pasa cu mi. Jehova ta yuda.” Elsa no tabata papia di loke Jehova lo por haci of a haci miles di aña pasa den tempo di Job. E tabata papia di nos tempo. Si, “Jehova ta yuda”!

Felis Ta e Hende Cu Persevera

18. Ki beneficionan Job a saca dor di persevera?

¹⁸ Poco di nos lo tin cu enfrenta tribulacionnan severo manera esnan cu Job a experencia. Pero sea cual sea e pruebanan cu e sistema di cosnan aki ta trece riba nos, nos tin motibonan valido pa mantene nos integridad mescos cu Job a haci. De echo, perseverancia a enrikece Job su bida. Esei a haci Job perfecto, es decir, completo. (Santiago 1:2-4) Perseverancia a fortalece su relacion cu Dios. Job a afirma: “Ta tende mi a tende di bo, ma awor mi wowo ta mira bo.” (Job 42:5) Tambe a keda demostra cu Satanas ta un mentiroso y cu e no por a kibra Job su integridad. Siglonan despues, Jehova tabata referi ainda na su sirbidor Job como un ehempel di husticia. (Ezekiel 14:14) Job su registro di integridad y perseverancia ta motiva Dios su pueblo te awe.

19. Dicon bo ta haya cu perseverancia ta bale la pena?

¹⁹ Ora cu Santiago a skirbi na e cristiannan di prome siglo tocante perseverancia, el a referi na e satisfaccion cu perseverancia ta trece. Anto el a uza Job su ehempel pa recorda nan cu Jehova ta recompensa su sirbidornan fiel ricamente. (Santiago 5:11) Nos ta lesa na Job 42:12: “[Jehova] a bendiciona e ultimo dianan di Job mas cu e promenan.” Dios a duna Job dobel di loke el a perde, y Job tabatin un bida largo y felis. (Job 42:16, 17) Di igual manera, cualkier dolor, sufrimento of pena cu nos kisas tin cu wanta durante e fin di e sistema di cosnan aki lo ser elimina y lubida den Dios su mundo nobo. (Isaias 65:17; Revelacion 21:4) Nos a tende di e perseverancia di Job, y nos ta determina—cu Jehova su yudansa—pa imita Job su ehempel. Bijbel ta priminti: “Bendiciona [“Felis”, NW] ta un hende cu ta persevera den prueba; pasobra unabes cu el a pasa e prueba, e lo ricibi e corona di bida, cu Señor a priminti na esnan cu ta stim’e.”—Santiago 1:12.

Con Lo Bo Contesta?

• Con nos por haci Jehova su curason contento?

• Dicon nos no mester conclui cu nos problemanan ta evidencia cu Dios ta mal contento cu nos?

• Cua ta e factornan cu a yuda Job persevera?

• Con nos por imita Eliu ora di fortifica nos rumannan den fe?

[Preguntanan di Estudio]

[Plachi na pagina 28]

Un bon consehero ta mustra comprension, respet y bondad

[Plachi na pagina 29]

Elsa y Harald Abt