Crecemento Refrescante Riba un Isla Bunita

HENDE cu bishita Taiwan sin duda ta keda impresiona cu e matanan tropical berde cu ta crece rond di e isla. E bunita color berde di e plantacion di aros ta cambia bira color di oro durante tempo di cosecha. Selvanan sera y berde ta cubri e seronan. Na contraste cu e stadnan hopi pobla, e matanan berde cu ta crece den cunucu y riba sero ta sumamente refrescante. De echo, ta esei a motiva e prome persona di Occidente cu a mira e isla pa scohe e nomber Ilha Formosa, es decir, “Isla Bunita.”

Si, Taiwan ta un isla bunita pero chikito—apenas 390 kilometer largo y mas o menos 160 kilometer hancho. Mayor parti di e isla ta consisti di seronan halto. Yü Shan (Sero Morrison) ta mas halto cu Sero Fuji di Japon of cu Sero Cook di Nueva Zelandia. E seronan cu ta keda meimei di e isla ta rondona pa yanuranan smal cant’i costa cu ta yega te na lama. E partinan plat ei na costa di Taiwan ta yen yen di hende y ta hopi druk. Awor e ta consisti di mas cu 22 miyon hende.

Un Otro Tipo di Crecemento

Sinembargo, tin un otro tipo di crecemento cu ta birando mas y mas bisto na Taiwan—crecemento spiritual, esta, crecemento den e trabou di Testigonan di Jehova. Esaki ta ser refleha den e entusiasmo cu e hendenan, tanto hoben como bieu, ta desplega unabes cu nan siña conoce e Dios berdadero, Jehova. Ta realmente impresionante pa observa e crecemento cu tin den e cantidad di personanan cu ta trahando cu entusiasmo pa yuda otro hende siña tocante Jehova y su proposito.

Crecemento ta pone cu mester haci expansion. Na december 1990, Testigonan di Jehova a cumpra tereno pa traha un sucursal mas grandi. E facilidad anterior, situa na Taipei, a bira mucho chikito pa atende e actividadnan di e 1.777 publicadornan di Reino cu tabatin na Taiwan e tempo ei. Despues cu pa varios aña voluntarionan internacional y local di tur edad a traha diligentemente, e bunita facilidadnan  nobo na Hsinwu a keda cla na augustus 1994. Pa e tempo ei tabatin 2.515 hende ta predica e bon nobo for di Dios su Palabra, e Bijbel. Awe, mas cu dies aña despues, e cantidad aki a bira mas cu dobel, pasando e cantidad di 5.500 publicador, y tur luna tin rond di un cuart di e cantidad ei cu ta participa full-time den e trabou di predica. Loke ta destaca ta e hobennan—mucha homber y mucha muher—cu ta manera “serena” refrescante di mainta.—Salmo 110:3.

Crecemento Spiritual Entre e Hobennan

Hopi di e publicadornan celoso di e bon nobo ta bastante jong. Tin di nan ta alumno di scol basico. Por ehempel, den un pueblo den noord di Taiwan, un pareha casa a haya invitacion pa asisti pa prome biaha na e Scol di Ministerio Teocratico, caminda Testigonan di Jehova ta haya instruccion con pa siña hende berdadnan biblico. E pareha a keda babuca ora nan a mira un mucha homber chikito, Weijun, lesa Bijbel for di plataforma mas mihor cu hopi adulto. Anto na e otro reunionnan cu nan a asisti, nan a keda profundamente impresiona cu asta muchanan cu no ta bai scol ainda tabata duna contesta inteligente. E pareha aki a comenta riba e bon comportacion di e muchanan chikito na e Salon di Reino.

Dicon e hobennan aki ta asina enfoca riba educacion biblico den e pais aki caminda mayoria hende ta budista of taoista? Esei ta pasobra nan mayornan cristian a aplica principionan biblico y a edifica un bida di famia felis cu ta drei rond di un relacion cu Jehova. Como cu Weijun su mayornan ta haci esfuerso pa laga e famia disfruta di nan estudio biblico y di sirbishi di veld, Weijun su ruman homber y ruman muher mas grandi ya a bira Testigo batisa. Ora cu poco tempo pasa Weijun a pidi pa e participa den e trabou di predica publicamente, su mama a comenta cu ya Weijun a laga mas revista e luna ei cu henter e famia hunto. Ta masha bisto cu e gusta papia tocante e berdad, duna comentario na reunion y comparti cu otro hende loke el a siña.

Segun Cu e Hobennan Ta Bira Mas Grandi

Con ta bai cu e chikitinnan ei segun cu nan ta bira mas grandi? Mayoria di nan ta sigui mustra berdadero amor pa Jehova y pa e trabou di predica. Por ehempel, Huiping ta un studiante di scol. Un dia su docente a bisa cu miembronan di un cierto religion no ta acepta sanger pero e no sa ta ken nan ta. Despues di e les, e hoben cristian aki a bisa su docente cu e hendenan ei ta Testigonan di Jehova y a splic’e dicon nan no ta acepta sanger.

Un otro docente a mustra un video tocante malesanan transmiti sexualmente. E video a menciona 1 Corintionan 6:9, pero e docente a bisa cu Bijbel no ta condena homosexualidad. Un biaha mas Huiping por a duna un docente Dios su punto di bista di e asunto.

Ora cu Shuxia, un compañera di klas, tabata prepara un scriptie tocante violencia den famia, Huiping a dun’e e Spierta! di 8 di november 2001 cu tabatin e titulo riba portada “Yudansa pa Hende Muher Maltrata.” Huiping a splic’e cu e revista tabatin hopi informacion basa riba Bijbel tocante e topico ei. Cu tempo, Shuxia a bira un publicador no batisa. Awor e cu Huiping ta comparti e bon nobo cu otro hende.

Hopi mucha cristian na scol ta haya cu no ta facil ora cu bo ta conoci como un hende cu ta biba segun principionan di Bijbel. Vooral den pueblonan chikito den cunucu esaki ta e caso. Zhihao tabatin cu trata cu presion di pareu debi na su creencianan religioso y su actividad di predica. El a conta: “Mi tabata sinti mi asina frustra cu mi tabatin miedo di topa muchanan di mi klas ora cu mi tabata den e trabou di predica. Tabatin biaha cu dies di nan tabata tenta mi!” Un dia, Zhihao su meneer a dun’e como tarea pa haci un spreekbeurt tocante su religion. Zhihao a conta: “Mi a dicidi  di cuminsa mi spreekbeurt cu Genesis capitulo 1 y despues papia tocante preguntanan manera: Ken a traha e tera y tur loke tin riba dje? Con hende a bin na existencia? Asina cu mi a lesa for di e Scritura, algun mucha a cuminsa hari mi, y bisa cu mi ta supersticioso. Sinembargo, mi a sigui cu mi presentacion y cab’e. Despues, mi a haya chens di papia un pa un cu algun mucha di mi klas tocante nos obra y nos creencianan religioso. Awor, ora nan mira mi den e trabou di predica, nan no ta hari mi mas!”

Zhihao a sigui conta: “Como cu mi mayornan ta Testigo di Jehova, nos ta papia tocante e texto di dia tur mainta. Tambe nos ta studia Bijbel y asisti cu regularidad na e reunionnan. Ta p’esei mi por deal cu cualkier mucha cu ainda kier tenta mi ora mi ta purba comparti cu otro hende siñansanan di Bijbel cu ta refrescante.”

Tingmei ta alumno na un scol tecnico pa mucha muher so. Un biaha algun mucha muher di su klas a invit’e pa bai un picknick hunto cu mucha hombernan di un scol pa mucha homber. Tingmei por a mira e peliger cu e tipo di asociacion ei tabata forma pa su moralidad y el a nenga di bai. Nan a invita Tingmei varios biaha, maske cu el a comparti bon informacion cu nan for di e buki Loke hovenan sa puntra—Contesta práctica. * E mucha muhernan a haci bofon di dje, y bis’e cu e tabata ouderwets. Sinembargo, poco despues e sabiduria di sigui principionan biblico a keda comproba ora cu un di e mucha muhernan a sali na estado y a comete aborto. Tingmei a bisa: “Haci loke Jehova ta manda a duna mi un consenshi limpi. Como resultado, mi tin goso den mi curason y un satisfaccion profundo.”

Superando Obstaculo pa Crecemento

Un amiga intimo di Tingmei ta Ruiwen. Tempo cu Ruiwen tabata mas jong, e tabata haya baimento di reunionnan cristian y salimento den sirbishi di veld un rutina masha laf. Sinembargo, el a mira e contraste entre e berdadero amor di e personanan den su congregacion na comparacion cu e amistad superficial di su compañeranan di klas. Esei a combenc’e cu e tabatin cu haci algun cambio den su bida. Ruiwen a cuminsa predica na e muchanan di su scol y den corto tempo el a mira bon cla kico e tabatin cu haci. El a cuminsa sirbi como pionero ausiliar, dedicando mas cu 50 ora pa luna na e trabou di  predica. Despues el a cuminsa sirbi como pionero regular, dedicando mas cu 70 ora na sirbishi. Ruiwen a bisa: “Mi no tin palabra pa expresa mi gratitud na Jehova. Nunca e no a mira mi como un caso perdi. Aunke mi a haci cosnan cu a decepcion’e, el a sigui stima mi. Mi mama y otro rumannan den congregacion a trata mi cu e mesun actitud amoroso ei. Awor cu mi ta conduci cinco estudio di Bijbel, mi ta sinti cu mi ta participa den e trabou cu ta duna mas satisfaccion cu tur.”

Na un scol secundario pafo di stad, dos mucha Testigo di Jehova a ser asigna pa representa e scol den un competencia di baile folclorico. Ora cu e hobennan Testigo a haya sa precies ki tipo di competencia esei lo ta, nan a sinti cu si nan participa den dje esei lo viola nan consenshi cristian. Nan a purba splica nan punto di bista y a pidi pa saca nan for di e competencia, pero nan peticion a ser rechasa. E docentenan a bisa nan cu como cu nan a ser asigna, nan mester bai. E hobennan Testigo no tabatin intencion di compromete nan fe, p’esei nan a subi e Website di departamento di enseñansa y a manda un E-mail den cua nan a splica nan problema. Aunke e hobennan no a haya un contesta personal, poco despues e scol si a haya instruccion pa no forsa ningun hende participa den un competencia asina. E dos hobennan aki a keda hopi contento di mira cu e entrenamento biblico cu nan a haya, no solamente a moldea nan consenshi sino tambe a duna nan e fortalesa pa para firme pa loke ta corecto!

Asta hobennan cu tin limitacionnan fisico tin hopi goso den comparti cu otro hende nan speransa basa riba Bijbel. Minyu ta paralisa for di nacemento. Como cu e no por uza su mannan, e ta bira e paginanan di Bijbel cu su lenga, y asina ta haya e texto cu e kier lesa. Ora e tin cu duna parti den e Scol di Ministerio Teocratico na Salon di Reino, e ta drumi riba un sofa y su doño di cas ta sinta riba un banki chikito y tene e microfon p’e. Ta masha alentador pa mira e esfuerso cu Minyu ta haci pa prepara e partinan aki!

Ora cu Minyu kier a bira un publicador di Reino, algun ruman muher den e congregacion a bai siña con pa predica via telefon pa asina nan por a yud’e. E ta primi e number di telefon cu su lenga mientras cu e rumannan ta yud’e tene un registro di e yamadanan cu e haci. E ta gusta e trabou di predica ei asina tanto cu el a bira pionero ausiliar, y ta papia 50 pa 60 ora pa luna cu otro hende tocante e Reino di Dios via telefon. El a haya algun hende cu ta acepta literatura biblico y cu ta lag’e bel nan bek pa haci rebishita. Awor e ta conduci tres estudio di Bijbel cu personanan cu el a drenta den contacto cu ne via telefon.

Si, e hobennan—homber y muher—den e 78 congregacionnan di Testigonan di Jehova cu tin na Taiwan ta mescos cu gota di serena refrescante. Di buena gana y cu entusiasmo nan ta hibando e bon noticia di Reino cu ta sostene bida na e miyones di hendenan cu tin riba e isla hopi pobla aki. Esaki ta djis un parti chikito di e cumplimento mundial di e siguiente profesia biblico: “Bo pueblo lo pone su mes disponibel den e dia di bo poder; den e splendor di santidad, for di e matris di marduga, bo hobennan ta pa bo manera serena.” (Salmo 110:3) E hobennan aki ta un fuente di estimulo pa e publicadornan di mas edad entre nan, y mas cu tur cos, nan ta un fuente di goso pa nan Tata celestial, Jehova Dios!—Proverbionan 27:11.

[Nota]

[Cuadro/​Plachi na pagina 10]

TIN MESTER DI MAS SALON DI REINO

Cu e crecemento cu tin na Taiwan, a bira mas dificil ainda pa haya suficiente Salon di Reino. Dicon? Pasobra cu excepcion di algun region di cunucu, casi no tin tereno apropia pa traha Salon di Reino. Ademas, prijs di tereno ta exorbitante y tin leinan stricto relaciona cu destinacion di tereno. Den pueblo- y stadnan mas grandi, e unico alternativa ta pa cumpra edificio of piso diseña pa oficina y transforma nan den Salon di Reino. Asina mes, mayoria oficina tin blafon mucho abou, cuota halto pa mantencion, regla cu publico no tin mag di drenta e edificio of otro factornan cu ta haci nan inapropia pa uza como Salon di Reino.

A pesar di esei, den añanan recien, Testigonan di Jehova na Taiwan a logra obtene varios Salon di Reino nobo. Pero e buskeda pa mas luga ta sigui segun cu e Testigonan ta demostra di ta dispuesto pa carga e responsabilidad financiero y tambe pa desaroya e habilidadnan necesario den trabou di construccion.