Di Edad Pero sin Soledad

DEBI na e efectonan di edad avansa, hopi hende ta bira incapasita, isola for di otro hende den comunidad. Esei no tabata e caso cu Fernand Rivarol, kende a muri na edad di 95 aña na Ginebra, Suisa. E tabata biba su so, pasobra su esposa a muri y su yiu muher casa tabatin su mes cas. Aunke generalmente Fernand no por a sali for di cas, e no tabata sinti soledad. Hopi biaha e tabata sinta na un mesa den sala, cu e telefon den su man, y tabata bel hende pa combersa cu nan tocante asuntonan spiritual.

Durante Fernand su bida interesante, tabatin un tempo si cu e tabata na cadena, na moda di papia. Dicon? Pasobra net na aña 1939, tempo cu Fernand cu su casa a bira Testigo di Jehova activo, Segundo Guera Mundial a cuminsa na Europa. Fernand a pega na su decision basa riba Bijbel pa no causa ningun hende daño. Debi na esaki el a perde su trabou y a haya varios castigo di prizon, un total di cinco aña y mei. Durante e tempo ei e no por tabata hunto cu su casa y su yiu muher chikito.

Mirando bek na e tempo ei, Fernand a bisa: “Pa hopi hende a parce cu mi a bandona un trabou stabil y a laga mi famia na caya. Hende tabata desprecia mi y trata mi manera un criminal. Toch ora mi pensa riba e añanan dificil ei, mi ta corda mas cu tur cos con Jehova a sostene nos y yuda nos. Entretanto, hopi aña a pasa, pero mi confiansa den Jehova te ainda ta mesun firme cu e tabata e tempo ei.”

Ta e fe aki di Fernand a motiv’e pa comparti su speransa biblico cu otro hende via telefon. Ora e tabatin un bon combersacion cu un persona, e tabata manda literatura biblico p’e via post. Despues, e tabata bel e persona atrobe pa wak si el a disfruta di e publicacion. Tabatin biaha cu hende a contest’e cu un carta di aprecio, y esei tabata hacie hopi contento.

Por sosode cu un persona manera Fernand ta tuma contacto cu bo den bo area. Pakico no scucha loke e tin di bisa pa asina bo por haya sa kico e ta kere? Testigonan di Jehova semper ta dispuesto pa comparti nan creencianan cu bo.