E Humildenan Lo Hereda e Tera

“Mi ta imagina cu naturalesa lo ser transforma y restaura . . . No mañanmainta, sino hopi leu den futuro, ora lo tin un shelo nobo y un tera nobo.”—Jean-Marie Pelt, specialista Frances di medioambiente.

ANGUSTIA pa e problemanan social y di medioambiente riba tera, hopi hende lo tin masha gana di mira nos planeta tera transforma den un paradijs. Pero e speransa aki no ta djis un soño di siglo 21. Hopi tempo pasa Bijbel a priminti cu e tera aki lo bolbe bira un paradijs. E declaracionnan di Hesus di cu e “humilde . . . lo hereda e tera” y “cu bo boluntad sosode na tera mescos cu den shelo”, ta entre e textonan mas conoci den e Scritura. (Mateo 5:5; 6:10) Sinembargo, awe masha poco hende ta kere cu e tera aki lo bira un paradijs habita pa e humildenan. Pa mayoria hende cu ta bisa cu nan ta cristian, e idea di un paradijs no ta existi mes.

E revista semanal Frances La Vie ta splica pakico hende, por lo menos den Iglesia Catolico, no ta kere mas den un paradijs, ni riba tera ni den shelo: “Despues cu [e concepto di un] paradijs a domina siñansanan catolico pa por lo menos 19 siglo, el a disparce for di retraite [periodo di reflexion] spiritual, predicashinan riba diadomingo, cursonan di teologia y lesnan di catisashi.” Segun e revista, e palabra mes ta tapa bou di un “neblina diki” di “misterio y confusion.” Algun predicado ta evit’e deliberadamente pasobra e ta “transmiti demasiado imagen di felicidad riba tera.”

Pa Frédéric Lenoir, un sociologo cu ta specialisa den religion, e concepto di un paradijs a bira algo cu ta biba solamente den mente di algun hende. Mescos tambe, Jean Delumeau, historiado y autor di varios buki cu ta trata e topico aki, ta pensa cu e promesanan biblico ta cumpli principalmente den sentido simbolico. E ta skirbi: “Riba e pregunta: ‘Kico a para di Paradijs?’ e fe cristian ta duna e siguiente contesta: Gracias na e resureccion di e Salbador, cualkier dia asina nos tur lo ta uni y felis.”

E mensahe di un paradijs riba tera ta relevante ainda? Kico exactamente tin den futuro pa nos planeta? Futuro ta mustra vago, of nos por mir’e cu hopi claridad? E siguiente articulo lo contesta e preguntanan aki.

 [Reconocemento pa Potret na pagina 2]

COVER: Emma Lee/​Life File/​Getty Images