Job—Un Homber di Perseverancia y Integridad
Job—Un Homber di Perseverancia y Integridad
“Bo a considera mi sirbidor Job? Pasobra no tin ningun hende manera e riba tera, un hende perfecto y recto, cu ta teme Dios y cu ta aparta su mes for di maldad.”—JOB 1:8.
1, 2. (a) Ki tragedianan inespera Job a experencia? (b) Describi Job su bida prome cu e tragedianan.
TABATIN un homber cu a parce di tin tur cos: rikesa, prestigio, bon salud y un bida di famia felis. Diripiente tragedia a bati tres biaha na su porta, un tras di otro. Den un tiro el a perde su rikesa. Despues un tormenta inusual a mata tur su yiunan. Poco despues, el a haya un malesa debilitador cu a laga henter su curpa tur na blufein masha doloroso. Probablemente bo a realisa cu ta trata aki di Job, un personahe principal den e buki biblico cu ta carga su nomber.—Job, capitulo 1 y 2.
2 Job a keha: “Mara mi tabata manera mi tabata lunanan pasa.” (Job 3:3; 29:2) Ora calamidad asota nos, ta ken no ta anhela e bon tempo di antes? Den caso di Job, el a hiba un bida recto, aparentemente proteha contra tragedia y desaster. Hendenan prominente tabata respet’e y busca su conseho. (Job 29:5-11) E tabata rico, pero cu un punto di bista balansa di placa. (Job 31:24, 25, 28) Ora cu el a topa huerfano y viuda den necesidad, el a yuda nan. (Job 29:12-16) Y e tabata fiel na su esposa.—Job 31:1, 9, 11.
3. Kico Jehova tabata pensa di Job?
3 Job a hiba un bida recto y sin culpa pasobra e tabata adora Dios. Jehova a bisa: “No tin ningun hende manera e riba tera, un hende perfecto [“sin culpa”, NW] y recto, cu ta teme Dios y cu ta aparta su mes for di maldad.” (Job 1:1, 8) Pero a pesar di Job su integridad moral, tragedia a pone un fin na su bida comodo. Tur loke el a traha p’e a disparce, y dolor, angustia y frustracion a test su berdadero caracter.
4. Dicon lo ta bon pa nos considera Job su prueba dificil?
4 Claro cu Job no ta e unico sirbidor di Dios cu a sufri calamidad personal. Hopi cristian djawe facilmente por mira algun similaridad entre nan experencia y esun di Job. Pa e motibo aki ta bale la pena pa nos considera dos pregunta: Con un repaso di Job su prueba dificil por yuda nos ora nos ta confronta tragedia? Y con e por siña nos pa ta mas comprensivo cu hende cu ta sufri?
Un Cuestion di Lealtad y un Prueba di Integridad
5. Segun Satanas, pakico Job tabata sirbi Dios?
5 Job su caso tabata excepcional. Sin cu Job tabata sa, Diabel a cuestiona e berdadero motibo pakico Job tabata sirbi Dios. Ora cu Jehova durante un reunion den shelo a hala atencion na Job su cualidadnan excelente, Satanas a contesta: “Bo no a traha un trankera rond di dje, rond di su cas, y rond di tur loke e tin na tur banda?” Pues Satanas a pretende cu loke a motiva Job tabata interes propio, y indirectamente el a duna di conoce cu esei tabata conta pa tur sirbidor di Dios. Satanas a bisa Jehova: “Saca bo man awor y mishi cu tur loke e tin; siguramente e lo maldiciona bo den bo cara.”—Job 1:8-11.
6. Cua cuestion importante Satanas a lanta?
6 Esaki tabata un cuestion importante. Satanas a cuestiona e manera cu Jehova ta eherce su soberania. Ta realmente posibel pa Dios goberna e universo pa medio di amor? Of egoismo na final di cuenta semper lo sali gana, manera Satanas a insinua? Jehova a permiti Diabel uza Job su caso como un ehempel, teniendo confiansa den e integridad y lealtad di Su sirbidor. Pues, ta Satanas mes a causa e calamidadnan cu a asota Job un tras di otro. Ora cu Satanas a fracasa cu su atakenan inicial, el a dal Job cu un malesa doloroso. Diabel a pretende: “Cuero pa cuero! Si, tur loke un hende tin e lo duna pa su bida.”—Job 2:4.
7. Cua ta e maneranan cu sirbidornan di Dios djawe ta haya nan confronta cu pruebanan similar na esnan di Job?
7 Aunke cu mayoria cristian djawe no ta sufri te na e grado cu Job a sufri, nan ta enfrenta diferente tipo di tribulacion. Hopi cristian ta confronta persecucion of problema den famia. Dificultad economico of problema cu salud por ta devastador. Tin cu a entrega nan bida pa motibo di nan fe. Claro cu nos no tin cu asumi cu Satanas personalmente ta causa delaster un tragedia cu nos ta sufri. De echo, tin problema cu kisas ta ser causa asta dor di nos propio erornan of dor di un condicion fisico hereda. (Galationan 6:7) Ademas, nos tur ta ser afecta pa e efectonan perhudicial di biehes y di desasternan natural. Bijbel ta splica bon cla cu den e tempo actual Jehova no ta proteha su sirbidornan milagrosamente for di e afliccionnan aki.—Eclesiastes 9:11, NW.
8. Con Satanas lo por purba probecha di e tribulacionnan cu nos ta sufri?
8 Sinembargo, Satanas lo por uza e tribulacionnan cu nos ta pasa aden pa debilita nos fe. Apostel Pablo a conta cu e tabata sufri di “un sumpiña den carni, un mensahero di Satanas”, cu tabata blo dal e “bofta.” (2 Corintionan 12:7) Sea cu esaki tabata un problema fisico, podise bista scur of algo otro, Pablo a compronde cu Satanas lo por a uza e problema y e frustracion cu esaki a trece cu ne, pa kibra Pablo su goso y integridad. (Proverbionan 24:10) Awe, Satanas lo por instiga miembronan di famia, compañeronan di scol of asta gobiernonan dictatorial pa den un manera of otro persigui e sirbidornan di Dios.
9. Dicon nos no mester keda mucho sorprendi si nos confronta adversidad of persecucion?
9 Con nos por enfrenta e problemanan aki cu exito? Dor di mira nan como un oportunidad pa demostra cu nos amor pa Jehova y nos sumision na su soberania no ta algo inconsistente. (Santiago 1:2-4) Sea cual sea e causa di nos angustia, si nos ta compronde e importancia di lealtad na Dios, esei lo yuda nos mantene nos stabilidad den asuntonan relaciona cu nos adoracion na Jehova. Apostel Pedro a skirbi e cristiannan: “Stimanan, no sea sorprendi pa motibo di e candela di prueba cu tin meimei di boso, cu ta bin riba boso pa boso wordo proba, como si fuera ta algo straño ta pasa cu boso.” (1 Pedro 4:12) Anto Pablo a splica: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Te ainda Satanas ta cuestiona e integridad di e Testigonan di Jehova, mescos cu el a haci den e caso di Job. De echo, Bijbel ta indica cu Satanas a aumenta su atakenan contra e pueblo di Dios durante e ultimo dianan aki.—Revelacion 12:9, 17.
Un Mal Comprondemento y Algun Mal Conseho
10. Ki desbentaha Job tabatin?
10 Job tabatin un desbentaha cu nos no tin nodi experencia. E no tabata sa dicon e tabata pasa den e calamidadnan aki. Eroneamente Job a conclui cu den un manera of otro ta ‘Jehova a duna y Jehova a kita.’ (Job 1:21) Podise Satanas deliberadamente a purba duna Job e impresion cu ta Dios tabata esun cu a causa su sufrimento.
11. Splica con Job a reacciona riba su calamidadnan.
11 Job a bira profundamente desanima, aunke el a nenga di maldiciona Dios, manera su casa a urgie pa haci. (Job 2:9, 10) Job a bisa: ‘Cos ta bai mas bon pa e malbadonan cu pa ami.’ (Job 21:7-9) Lo e mester a puntra su mes: ‘Dicon Dios ta castiga mi?’ Tabatin biaha cu simplemente e kier a muri. El a sclama: “O cu bo lo a sconde mi den Seol, cu bo lo a sconde mi te ora bo furia pasa!”—Job 14:13.
12, 13. Con e comentarionan di Job su tres compañeronan a afect’e?
12 Job tabatin tres compañero cu a bishit’e, supuestamente pa “condoler Job y consol’e.” (Job 2:11) Sinembargo, nan a resulta di ta “consolador molestioso.” (Job 16:2, NW) Job lo por a beneficia di amigonan cerca ken lo e por a desahoga su mes relaciona cu su problemanan, pero e tres compañeronan aki a confundi Job mas tanto y a lag’e sinti mas frustra.—Job 19:2; 26:2.
13 Ta di compronde cu Job lo por a puntra su mes: ‘Dicon net ami? Kico mi a haci pa merece tur e calamidad aki?’ Su compañeronan a dun’e splicacionnan cu tabata totalmente falso. Por ehempel, nan a asumi cu ta Job mes a trece sufrimento pa su mes dor di comete un of otro pica serio. Elifaz a puntra: “Ken a yega di perece, siendo inocente?” Y el a agrega: “Conforme loke mi a mira: esnan cu ploeg inikidad y esnan cu sembra problema, ta cosecha esei.”—Job 4:7, 8.
14. Dicon nos no mester conclui automaticamente cu sufrimento ta debi na mal conducta?
14 Ta berdad cu problema por surgi si nos ta sembra segun carni en bes di segun spirito. (Galationan 6:7, 8) Sinembargo, den e mundo actual problema por surgi sin importa con nos comporta nos mes. Es mas, di ningun manera no ta asina cu hende inocente ta ser gespar di tur calamidad. Hesucristo, kende tabata “sin mancha, separa for di pecadornan”, a sufri un morto doloroso riba un staca di tormento, y apostel Santiago a muri como martir. (Hebreonan 7:26; Echonan 12:1, 2) E rasonamento robes di Elifaz y su dos compañeronan a pone Job defende su bon reputacion y insisti riba su inocencia. Pero toch, nan alegacionnan insistente cu evidentemente Job su sufrimento tabata debi na mal conducta, kisas a influencia Job su punto di bista di Dios su husticia.—Job 34:5; 35:2.
Con pa Haya Yudansa Ora Nos Ta Confronta Tribulacion
15. Ki rasonamento lo yuda nos ora nos ta confronta sufrimento?
15 Nos por siña un les for di esaki? Tragedia, malesa of persecucion por parce masha inhusto. Kisas ta manera cu otro hendenan si ta scapa di hopi di e problemanan ei. (Salmo 73:3-12) Tin biaha, nos lo tin cu puntra nos mes e preguntanan fundamental aki: ‘Mi amor pa Dios ta motiva mi pa sirbie pase loke pase? Mi ta anhela pa duna Jehova “un contesta na esun cu ta reproch’e?”’ (Proverbionan 27:11; Mateo 22:37) Nunca nos no mester laga comentarionan desconsidera di otro hende pone nos duda cu nos Tata celestial lo yuda nos. Un cristian fiel cu pa hopi aña a sufri di malesa cronico a bisa un biaha: “Mi sa cu loke sea cu Jehova permiti, lo mi por soport’e. Mi sa cu lo e duna mi e fortalesa cu mi mester. Semper el a haci esei.”
16. Con e Palabra di Dios ta percura yudansa pa personanan cu ta confronta dificultad?
16 Relaciona cu e tacticanan di Satanas, nos ta den un mihor posicion pa compronde nan cu Job. “Su trikinan no ta desconoci pa nos.” (2 Corintionan 2:11) Ademas, nos tin un abundancia di sabiduria practico cu nos por haci uzo di dje. Den Bijbel nos ta haya relatonan di hende homber y muher cu a persevera atrabes di tur sorto di dificultad. Apostel Pablo, kende a sufri mas cu mayoria cristian, a skirbi: “Tur loke a wordo skirbi prome aya a wordo skirbi pa nos instruccion, pa dor di perseverancia y e encurashamento di Scrituranan nos por tin speransa.” (Romanonan 15:4) Un Testigo na Europa cu tabata encarsela pa su fe durante segundo guera mundial a cambia su porcion di cuminda di tres dia pa un Bijbel. El a bisa: “E cambio ei si a bale la pena! A pesar di mi hamber fisico, mi a ricibi alimento spiritual cu a yuda sostene ami y otronan den e pruebanan cu nos a pasa durante e tempo dificil ei. Te ainda mi tin e Bijbel.”
17. Cua percuracion divino por yuda nos persevera?
17 Fuera di e consuelo for di e Scritura, nos tin hopi herment pa studia Bijbel cu ta duna nos guia practico pa trata cu problema. Si bo consulta e Index di Publicacionnan Watch Tower, probablemente lo bo haya experencia di un ruman cristian cu a pasa dor di un prueba similar na esun di bo. (1 Pedro 5:9) Tambe por ta bon pa papia tocante bo circunstancianan cu ancianonan comprensivo of cu otro cristiannan maduro. Mas cu tur cos, mediante oracion bo por conta cu e yudansa di Jehova y di su spirito santo. Con Pablo a resisti e ‘boftanan’ di Satanas? Dor di siña depende riba e poder di Dios. (2 Corintionan 12:9, 10) El a skirbi: “Pa tur cos mi tin e forsa mediante esun cu ta duna mi poder.”—Filipensenan 4:13, NW.
18. Con otro cristiannan por duna animacion sumamente valioso?
18 Pues anto, tin yudansa disponibel, y nunca bo no mester basila pa busc’e. E proverbio ta bisa: “Bo a mustra bo mes desanima den e dia di afliccion? Bo poder lo ta poco.” (Proverbionan 24:10, NW) Mescos cu comehein por pone un cas di palo basha den otro, asina desanimacion por debilita un cristian su integridad. Pa contraresta e peliger aki, Jehova ta sostene nos mediante su otro sirbidornan. Un angel a aparece na Hesus y a fortalec’e durante e anochi cu el a ser aresta. (Lucas 22:43) Ora cu Pablo tabata riba caminda pa Roma como preso, el a “gradici Dios y a haya animo” ora cu el a topa e rumannan na e Foro di Apio y e Tres Posadanan. (Echonan 28:15) Un Testigo di Jehova Aleman te ainda ta corda e yudansa cu el a haya ora el a yega na e campo di concentracion na Ravensbrück como un teenager poco spanta. El a conta: “Un ruman cristian a haya mi mesora y a duna mi un caluroso bonbini. Un otro ruman muher fiel a tuma mi bou di su hala, y a bira manera un mama spiritual pa mi.”
“Sea Fiel”
19. Kico a yuda Job resisti e esfuersonan di Satanas?
19 Jehova a describi Job como un homber cu a “mantene su integridad.” (Job 2:3) A pesar cu Job a sinti su mes desanima y no por a compronde pakico e tabata sufri, nunca e no a tambalia relaciona cu e cuestion crucial di lealtad. Job a nenga di rechasa tur loke el a biba p’e. El a insisti: “Te na mi morto lo mi no bandona mi integridad”!—Job 27:5.
20. Dicon ta bale la pena persevera?
20 Si nos tin e mesun determinacion, esei lo yuda nos mantene nos integridad bou di tur circunstancia, sea ta tentacion, oposicion of adversidad. Hesus a bisa e congregacion na Smirna: “No tene miedo di loke bo ta bai sufri. Mira, Diabel ta bai tira algun di boso den prizon, pa boso wordo poni na prueba, y boso lo sufri tribulacion [problema, angustia of opresion] dies dia largo. Sea fiel te na morto y lo mi duna bo e corona di bida.”—Revelacion 2:10.
21, 22. Ki conocemento por consola nos ora nos ta wanta tribulacion?
21 Nos perseverancia y integridad lo ser poni na prueba den e mundo aki goberna pa Satanas. Sinembargo, Hesus ta sigura nos cu ora nos spera riba futuro, nos no tin nodi tene miedo. E cos importante ta pa nos keda fiel. Pablo a bisa cu nos tribulacion of ‘afliccion ta pa un momento so’, mientras cu e “gloria”, of recompensa cu Jehova ta priminti nos, ta di ‘un peso mucho mas grandi y eterno.’ (2 Corintionan 4:17, 18) Asta e tribulacion di Job tabata pa un momento so si compara esei cu e hopi añanan felis cu el a disfruta di dje prome y despues di su prueba.—Job 42:16.
22 Pero toch por tin momentonan den nos bida cu nos pruebanan ta parce sin final y nos sufrimento ta parce casi insoportabel. Den e siguiente articulo, nos lo considera con Job su experencia por siña nos mas les relaciona cu perseverancia. Tambe nos lo analisa algun manera cu nos por fortalece otro hende cu ta confronta adversidad.
Con Lo Bo Contesta?
• Ki cuestion crucial Satanas a lanta relaciona cu Job su integridad?
• Dicon nos no mester keda mucho sorprendi si nos confronta adversidad?
• Con Jehova ta yuda nos persevera?
[Preguntanan di Estudio]
[Plachi na pagina 23]
Haci investigacion, papia cu cristiannan maduro y desahoga nos curason den oracion, por yuda nos persevera