“Na Tera Mescos Cu den Shelo”

“E fe catolico ta specifica Cuater Cos Final: Morto, Huicio, Fierno, Shelo.”—Catholicism, edita dor di George Brantl.

RIPARA cu tera no ta riba e lista aki di posibilidadnan pa humanidad. Esei sigur no ta un sorpresa pasobra Iglesia Catolico, mescos cu hopi otro religion, ta kere cu un dia tera lo ser destrui. E Dictionnaire de Théologie Catholique ta menciona e punto aki bou di e expresion “Fin di Mundo”: “Iglesia Catolico ta kere y ta siña cu e mundo actual, manera Dios a cre’e y manera e ta aworaki, lo no dura pa semper.” Un catisashi catolico recien tambe ta presenta e idea aki: “Nos mundo ta destina pa disparce.” Pero si nos planeta ta bai disparce, kico lo para di e promesanan biblico di un paradijs riba tera?

Bijbel ta papia bon cla di un futuro paradijs riba tera. Por ehempel, profeta Isaias a duna e siguiente descripcion di tera y di su habitantenan: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha  cas pa otro hende biba aden, ni planta pa otro hende come; pasobra manera e dianan di un palo, asina e dianan di mi pueblo lo ta; y mi scohinan lo disfruta di e obra di nan mannan pa hopi tempo.” (Isaias 65:21, 22) E Hudiunan, na kende Dios a duna e promesanan aki, tabata sigur cu un dia nan tera—en realidad, e tera completo—lo a bira un paradijs pa beneficio eterno di humanidad.

Salmo 37 ta confirma e speransa aki. “E humildenan lo hereda e tera.” (Salmo 37:11) E versiculo aki no ta bisando cu ta djis pa un tempo e nacion di Israel lo a posee e Tera Priminti. E mesun salmo ta declara specificamente: “E hustonan lo hereda e tera, y lo biba den dje pa semper.” (Salmo 37:29) * Tuma nota cu e salmo aki ta bisa cu bida eterno riba tera lo mester ta un recompensa pa “e humildenan.” Den un Bijbel Frances, un comentario riba e versiculo aki ta bisa cu e palabra “humilde” “tin un nificacion mucho mas amplio cu traduccionnan di Bijbel ta duna di compronde; e ta inclui hende desafortuna, hende aflihi of persigui pa causa di Yahweh, hende manso cu ta sumiso na Dios.”

Riba Tera of den Shelo?

Den e Sermon Riba Sero, Hesus a duna un promesa cu ta pone nos corda riba e textonan menciona anteriormente: “Bendiciona ta esnan humilde, pasobra nan lo hereda e tera.” (Mateo 5:5) Un biaha mas Bijbel ta mustra cu e tera lo mester bira un recompensa permanente pa hende fiel. Sinembargo, Hesus a duna di conoce na su apostelnan cu e tabata preparando un luga pa nan “den cas di [su] Tata” y cu nan lo ta den shelo hunto cu ne. (Juan 14:1, 2; Lucas 12:32; 1 Pedro 1:3, 4) P’esei anto, con nos mester compronde e promesanan di bendicionnan riba tera? Nan ta relevante awe, y na ken nan ta aplica?

Varios erudito di Bijbel ta bisa cu “e tera” menciona den Hesus su Sermon Riba Sero y asta den Salmo 37 ta algo simbolico. Den su comentarionan den Bible de Glaire, F. Vigouroux a mira den e versiculonan aki “un simbolo di shelo y di Iglesia.” Pa M. Lagrange, un analista Frances di Bijbel, e bendicion aki “no ta un promesa di cu e humildenan lo hereda e tera riba cua nan ta biba, ni bou di e sistema actual ni bou di un orden mas perfecto, sino e reino di shelo, na unda cu esaki por ta.” Pa un otro analista di Bijbel, e ta un “uzo simbolico di balornan terenal pa referi na shelo.” Pa un otro grupo, “e tera di promesa, Canan, ta den un sentido spiritual y ta representa e tera natal di ariba, e reino di Dios, cu esnan cu ta humilde tin e garantia di posee. Esei ta e idea tambe cu Salmo 37 y otro textonan ta transmiti.” Pero nos mester exclui e tera fisico mesora for di Dios su promesanan?

Un Proposito Eterno pa Tera

Na principio, e tera tabata directamente liga cu e proposito di Dios pa hende. E salmista a skirbi: “E shelonan ta e shelonan di SEÑOR, ma tera el a duna na e yiunan di hende.” (Salmo 115:16) P’esei e proposito original di Dios pa hende tabata conecta cu tera, no cu shelo. Jehova a duna e prome pareha humano e encargo pa extende e hofi di Eden pa cubri henter e planeta. (Genesis 1:28) E proposito aki no tabata algo  temporal. Jehova ta confirma den su Palabra cu tera lo existi pa semper: “Un generacion ta bai y un generacion ta bin, ma tera ta permanece pa semper.”—Eclesiastes 1:4; 1 Cronicanan 16:30; Isaias 45:18.

E promesanan di Dios nunca ta pasa pa olvido, pasobra e ta e Haltisimo, y e ta garantisa cu nan ta cumpli. Uzando e ciclo natural di awa como ilustracion, Bijbel ta splica cu no tin nada cu por stroba e promesanan di Dios di cumpli: “Manera awasero y sneu ta cai for di shelo, y no ta bolbe ayanan sin muha tera, y ta haci tera produci y spruit . . . , asina mi palabra [e palabra di Dios] cu ta sali for di mi boca lo ta; e lo no bolbe bashi cerca mi, sin cumpli cu loke mi ta desea [“loke mi tin deleite aden”, NW], y sin alcansa e proposito cu cua mi a mand’e.” (Isaias 55:10, 11) Dios ta haci promesa na hende. Kisas ta pasa hopi tempo prome cu e promesanan ei bira realidad, pero Dios no ta faya cu su palabra. Nan ta “bolbe” cerca dje despues cu nan a cumpli cu tur loke el a bisa.

Sin duda, Jehova tabatin “deleite” den crea e tera pa humanidad. Na fin di e di seis dia di creacion, el a declara cu tur cos tabata “masha bon.” (Genesis 1:31) E transformacion di tera den un paradijs permanente ta parti di e proposito divino cu no a cumpli ainda. Pero e promesanan di Dios ‘lo no bolbe sin cumpli.’ Tur e promesanan di bida perfecto riba tera, caminda hende lo biba pa semper den pas y siguridad, lo cumpli.—Salmo 135:6; Isaias 46:10.

E Proposito di Dios Lo Cumpli Sigur

E pica di nos prome mayornan, Adam cu Eva, a interumpi temporalmente e proposito original di Dios di haci e tera aki un paradijs. Despues di nan desobediencia, nan a ser saca for di e hofi, y asina nan a perde e privilegio di participa den e realisacion di e proposito divino pa hende perfecto biba den un paradijs riba tera. Pero asina mes Dios a dal e pasonan necesario pa cumpli cu su proposito. Kico el a haci?—Genesis 3:17-19, 23.

E situacion den Eden tabata mescos cu esun di un homber cu ta cuminsa construi un cas riba un bon tereno. Un poco despues cu e caba di basha e fundeshi, un hende ta pasa y destrui loke el a traha. En bes di laga esaki stroba su proyecto, e homber ta tuma e medidanan pa garantisa cu e ta caba e cas. Asta si e trabou adicional aki ta ensera mas gasto, esei no ta strob’e di dal bai cu e proyecto original y cab’e.

Mescos tambe, Dios a tuma medida pa haci sigur cu su proposito ta cumpli. Un poco despues cu nos prome mayornan a peca, el a anuncia un speransa pa nan desendientenan—un “simiña” cu lo a deshaci di e daño causa. Esun cu a cumpli cu e profesia aki tabata Hesus, Yiu di Dios. Como e parti principal di e simiña, el a bini na tera y a ofrece su bida como sacrificio pa cumpra humanidad bek. (Galationan 3:16; Mateo 20:28) Unabes resusita pa bida den shelo, Hesus lo a bira Rei di e Reino. E ta e prome persona humilde cu ta hereda e tera hunto cu hende fiel scohi cu ta ser resusita pa bai shelo y bira cogobernante den e Reino aki. (Salmo 2:6-9) Cu tempo, e gobierno aki lo tuma mando riba asuntonan di tera pa cumpli cu e proposito original di Dios y transforma e planeta aki den un paradijs. Miyones y miyones di hende humilde ta “hereda e tera” den e sentido cu nan ta beneficia di e gobernacion di e Reino aki den man di Hesucristo y su cogobernantenan.—Genesis 3:15; Daniel 2:44; Echonan 2:32, 33; Revelacion 20:5, 6.

“Na Tera Mescos Cu den Shelo”

Un vision cu apostel Juan a haya ta papia di e salbacion aki cu tin dos destinacion: un  celestial y un terenal. Juan a mira reinan riba trononan celestial cu a ser scohi for di entre e discipelnan fiel di Cristo. Relaciona cu e socionan aki di Cristo, Bijbel ta bisa specificamente cu “nan lo reina riba tera.” (Revelacion 5:9, 10) Tuma nota di e aspecto dobel cu e realisacion di Dios su proposito ta ensera: un tera restaura bou di direccion di un Reino celestial cu ta consisti di Hesucristo y su coherederonan. Tur e areglonan divino aki ta habri caminda pa e tera finalmente bira un paradijs segun e proposito original di Dios.

Hesus, den su oracion modelo, a invita su discipelnan pa pidi pa Dios su boluntad tuma luga “na tera mescos cu den shelo.” (Mateo 6:9, 10) E palabranan aki lo tabatin sentido si tera ta ser destrui of si e ta djis un simbolo di shelo? Of, nan lo tabatin sentido si tur hende husto ta bai shelo? E boluntad di Dios pa tera ta hopi bisto den e Scritura, for di e relato di creacion te na e visionnan di e buki di Revelacion. Tera mester bira loke Dios tabata kier pa e bira: un paradijs. Esaki ta e boluntad cu Dios a priminti di cumpli cu ne, y hende fiel riba tera ta resa pa e boluntad ei cumpli.

E proposito original di e Creador, e Dios cu “no ta cambia”, ta pa hende biba pa semper riba tera. (Malakias 3:6; Juan 17:3; Santiago 1:17) Pa mas cu un siglo caba, e revista aki, E Toren di Vigilancia, ta splicando e dos aspectonan aki den e realisacion di e proposito di Dios. Esaki ta yuda nos compronde e promesanan di un restauracion di e planeta aki cu nos por haya den e Scritura. Nos ta invita bo pa analisa e punto aki mas aleu, sea dor di combersa cu Testigonan di Jehova of dor di tuma contacto cu e editornan di e revista aki.

[Nota]

[Plachi na pagina 4]

Bijbel ta mustra bon cla cu den futuro e tera lo bira un paradijs

[Plachi na pagina 7]

E oracion modelo di Hesus lo tabatin sentido si tera ta caba na nada?