Pregunta di Lector

Despues di e ultimo prueba na fin di e Milenio, lo ta posibel pa hende peca y muri?

Den Revelacion tin dos texto cu ta duna nos informacion cu ta yuda nos contesta esaki: “Morto y Hades a wordo tira den e lago di candela. Esaki ta e di dos morto, e lago di candela.” (Revelacion 20:14) “E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.”—Revelacion 21:4.

Tuma nota di e tempo cu e cosnan aki lo sosode. E tiramento di “morto y Hades” den e lago di candela ta tuma luga despues cu a husga e sobrevivientenan di Armagedon, e mortonan resusita y ken cu a nace despues di Armagedon, for di “loke tabata para skirbi den e bukinan.” Pues, e husgamento ei lo ta a base di Jehova su rekisitonan detaya pa humanidad durante e mil aña. (Revelacion 20:12, 13) Apostel Juan a registra un otro vision, cu nos ta haya na Revelacion capitulo 21, y cu lo cumpli durante di Cristo Hesus su Reinado di Mil Aña. Sinembargo, e cumplimento completo di e vision ei ta na final di e Dia di Huicio di mil aña. E ora ei Jehova lo biba cu humanidad den e pleno sentido di palabra sin ningun mediado, ya cu Hesus lo a entrega e Reino na su Tata. Jehova simbolicamente lo biba cu “su pueblo” den un manera permanente y directo. E promesa cu “lo no tin morto mas” lo cumpli den e sentido completo ora cu humanidad lo a alcansa perfeccion debi cu e balor di Cristo su sacrificio di rescate a ser aplica plenamente.—Revelacion 21:3, 4.

Pues, e morto menciona den e versiculonan cita ariba ta e morto hereda di Adam cu lo ser anula pa medio di Cristo su rescate. (Romanonan 5:12-21) Unabes e morto cu humanidad a hereda for di e prome homber keda anula, hende lo ta mescos cu Adam ora cu el a ser crea. Adam tabata perfecto, pero esei no tabata kiermen cu e no por a muri. Jehova a bisa Adam pa no come for di “e palo di conocemento di bon y malo” y a agrega: “E dia cu bo come di dje, lo bo muri sigur.” (Genesis 2:17) E morto ei tabata debi na pica delibera. Despues di e ultimo prueba na final di e Reinado di Mil Aña, hende ainda lo tin boluntad liber. (Revelacion 20:7-10) Ainda nan lo por scohe di nan propio boluntad si nan lo sigui sirbi Jehova of no. P’esei, nos no por bisa cu ningun hende nunca lo bira lomba pa Dios, manera Adam a haci.

Kico lo pasa cu un persona cu scohe pa rebela despues di e ultimo prueba ora cu lo no tin morto ni Hades? E tempo ei e morto hereda di Adam no t’ei mas. Y Hades, e graf comun di humanidad cu tin e speransa di resureccion, tampoco no t’ei mas. Sinembargo, Jehova por destrui cualkier rebelde den e lago di candela, y asina nenga di duna e persona aki cualkier speransa di resureccion. E morto ei lo ta manera e morto cu Adam cu Eva a experencia, no e morto cu hende a hereda for di Adam.

Sinembargo, nos no tin motibo pa spera cu esaki lo sosode. E hendenan cu pasa e ultimo prueba lo ta distinto for di Adam den un aspecto crucial. Nan a ser getest plenamente. Nos por tin sigur cu e ultimo prueba lo ta cabal pasobra Jehova sa con pa samina hende paden y pafo. Nos por keda trankil cu e ultimo prueba lo elimina ken cu maluza su libertad di scohe. Pues, maske ta posibel pa esnan cu a pasa e ultimo prueba rebela contra Dios y consecuentemente ser destrui, e chens ta masha chikito cu un cos asina lo sosode.

[Plachi na pagina 31]

Despues di e ultimo prueba, den ki aspecto humanidad por ser compara cu Adam?