Adoracion Cu Ta Bon pa Bo

“HALA cerca Dios ta bon pa mi”, e salmista Asaf a declara. Un dado momento el a bin riba e idea pa imita hende cu no tabata sirbi Dios pensando cu asina lo e por a hiba un bida comodo. Pero despues Asaf a corda riba e bentahanan di hala cerca Dios y a conclui cu esei tabata bon p’e. (Salmo 73:2, 3, 12, 28, NW) Adoracion berdadero ta bon pa bo awe? Con e por beneficia bo?

Adoracion di e Dios berdadero ta yuda bo posee algo hopi mas valioso cu un bida puramente egoista. E manera cu “e Dios di amor” a crea nos ta pone cu hende cu ta busca nan mes interesnan so nunca por ta felis. (2 Corintionan 13:11) Hesus a siña hende un berdad fundamental tocante naturalesa humano ora el a bisa: “Ta mas bendiciona pa duna cu pa ricibi.” (Echonan 20:35) Pa e motibo ei nos ta gusta haci cosnan pa nos amigonan y famianan. Pero e felicidad di mas grandi ta bini di haci cosnan pa Dios. E merece nos amor mas cu cualkier otro persona. Miyones di hende di tur gremio social ta haya un satisfaccion profundo den rindi adoracion na Dios, debi cu nan ta cumpliendo cu su mandamentonan.—1 Juan 5:3.

Un Bida cu Proposito

Adoracion berdadero ta bon tambe pa bo pasobra e ta duna bo un proposito den bida. Bo no a ripara cuanto biaha felicidad ta conecta cu e sintimento cu bo ta logrando algo cu ta bale la pena? Mayoria hende tin un meta den bida, por ehempel en conexion cu nan famia, amigonan, negoshi of placer. Pero pa motibo di e insiguridadnan di bida, hopi bes e cosnan aki no ta haci nan felis. (Eclesiastes 9:11, NW) Sinembargo, adoracion berdadero ta yuda bo haya un proposito mas halto, uno cu ta sigui duna bo satisfaccion asta ora otro aspectonan di bida desapunta bo.

Adoracion berdadero ta ensera conoce Jehova y sirbie fielmente. Hende cu ta practic’e ta hala hopi cerca di Dios. (Eclesiastes 12:13; Juan 4:23; Santiago 4:8) Kisas e idea di conoce Dios asina bon te cu e ta bira bo amigo ta dificil pa bo imagina. Pero ora bo medita riba e relatonan di con e ta trata hende y ora bo pensa riba su creacion, bo por distingui varios aspecto di su personalidad. (Romanonan 1:20) Ademas, ora bo lesa e Palabra di Dios, bo por compronde pakico nos ta aki, pakico Dios ta permiti sufrimento, con lo e pone fin na sufrimento, y kisas loke ta mas fascinante ainda, con bo por hunga un papel importante den e proposito di Dios. (Isaias 43:10; 1 Corintionan 3:9) E comprondemento ei por duna bo un motivacion nobo den bida!

Bo Ta Bira un Mihor Hende

Adoracion berdadero ta bon pa bo pasobra e ta yuda bo bira un mihor hende. Segun cu bo ta practica adoracion berdadero, bo ta cultiva un personalidad cu ta hiba na relacionnan mas felis cu otro hende. Bo ta siña for di Dios y su Yiu con pa ser honrado, con pa papia cu bondad y biba na un manera responsabel. (Efesionan 4:20–5:5) Ora bo siña conoce Dios asina bon cu bo ta cuminsa stim’e, bo ta sinti bo impulsa pa imit’e. Bijbel ta bisa: “Sea imitadonan di Dios, manera yiunan stima; y cana den amor.”—Efesionan 5:1, 2.

Lo no ta un goso pa biba meimei di hende cu ta imita e amor di Dios? Afortunadamente,  adoracion di e Dios berdadero no ta un actividad solitario. E ta pone bo den contacto cu otro hende cu ta stima loke ta husto y bon. Kisas bo no ta gusta e idea di pertenece na un religion organisa. Pero manera nos a mira den e articulo anterior, e problema di mayoria religion no ta cu nan ta organisa; e punto ta cu nan no ta organisa den e manera corecto y pa e motibonan corecto. Hopi religion tin metanan no cristian. Jehova mes ta organisa su pueblo pa un proposito noble. Bijbel ta bisa: “Dios no ta un Dios di confusion [“desordo”, NW], sino di pas.” (1 Corintionan 14:33) Mescos cu miyones di otro hende, ora bo ta afilia na un grupo di cristian bon organisa bo tambe por sinti e influencia placentero cu esaki tin riba bo punto di bista.

Speransa pa Futuro

E Santo Scritura ta mustra cu Dios ta organisando adoradonan berdadero pa nan por sobrevivi e fin di e sistema di cosnan aki y hereda un tera nobo den cua ‘husticia lo biba.’ (2 Pedro 3:13; Revelacion 7:9-17) Den e forma ei adoracion cu ta bon pa bo ta duna bo speransa, locual ta indespensabel pa felicidad. Algun hende ta basa nan expectativanan pa futuro riba stabilidad di gobiernonan, oportunidadnan comercial of e speransa di por gosa di bon salud y un pension satisfactorio. Pero ni un di e cosnan aki no ta pone un base solido pa un futuro felis. Di otro banda, apostel Pablo a skirbi: “Nos a fiha nos speransa den e Dios bibo.”—1 Timoteo 4:10.

Si bo busca cuidadosamente, lo bo haya e adoradonan berdadero. Den e mundo dividi djawe, amor y union ta distingui Testigonan di Jehova claramente. Nan ta bini di casi tur nacion y condicion social; ma nan amor pa otro y pa Jehova ta uni nan. (Juan 13:35) Nan ta invita bo pa bo mes descubri loke nan a experencia. Asaf a skirbi: “Hala cerca Dios ta bon pa mi.”—Salmo 73:28, NW.

[Plachi na pagina 7]

Bo por bira amigo di Dios