Storia di Bida

Beneficiando di e Lealtad di Mi Sernan Keri

SEGUN E RELATO DI KATHLEEN COOKE

NA AÑA 1911, durante un bishita cerca su famia na Glasgow, Escocia, mi wela Mary Ellen Thompson a asisti na un charla di Charles Taze Russell, un miembro prominente di e Studiantenan di Bijbel, kendenan despues a bira conoci como Testigonan di Jehova. Mi wela a keda masha emociona cu loke el a tende. Ora el a regresa Zuid Africa, el a tuma contacto cu e Studiantenan di Bijbel local. Na april 1914 e tabata un di e 16 personanan cu a batisa na e prome congreso di Studiantenan di Bijbel teni na Zuid Africa. Mi wela su yiu muher Edith, cu despues a bira mi mama, tabatin seis aña e tempo ei.

Despues cu Ruman Russell a muri na aña 1916, a surgi mundialmente un friccion den e Studiantenan di Bijbel. E cantidad di rumannan fiel na Durban a baha di 60 te rond di 12. Mi wela parti tata, Ingeborg Myrdal, y su yiu homber Henry, un teenager cu a batisa poco prome cu esei, a apoya esnan leal. Na 1924, Henry a bira un colporteur, manera tabata yama predicadonan di tempo completo di Testigonan di Jehova e tempo ei. Durante e siguiente cinco añanan el a predica den hopi parti di e region den zuid di Africa. Na 1930, Henry cu Edith a casa, y tres aña despues ami a nace.

Un Famia Grandi

Pa un tempo nos a biba na Mozambique, pero na 1939 nos a bai biba cerca mi wela y welo parti mama na Johannesburg. Mi welo no  tabata interesa den e berdad di Bijbel y tabatin biaha cu el a asta opone mi wela, pero a pesar di esei e tabata un persona masha hospitalario. Mi ruman muher, Thelma, a nace na 1940, y ami cu ne a siña cuida hende grandi. Anochi ora di come hopi biaha nos a pasa basta tempo hunto ya cu nos tabata combersa cu otro tocante loke a pasa durante dia of a sinta recorda cosnan di antes.

Nos famia tabata gusta pa Testigonan cu a pasa di bishita keda cerca nos, specialmente esnan den sirbishi di tempo completo. Nan tambe tabata participa den nos combersacion na ora di cena, y loke nan tabata conta a aumenta nos aprecio pa e herencia spiritual cu nos tabatin. Esaki a duna ami cu Thelma mas gana di bira pionero mescos cu nan.

For di un edad hopi jong, nan a siña nos disfruta di lesamento. Mi mama, tata y wela tur tabata lesa pa nos for di bon bukinan di cuenta of for di Bijbel mes. Reunionnan cristian y e ministerio tabata un parti integral di nos bida. Mi tata tabata e sirbidor di compania (awor yama superintendente presidente) di Congregacion Johannesburg, pues nos tur mester a yega reunion tempran. Ora cu nos tabatin congreso, mi tata tabata yuda cu e administracion di e congreso, mientras cu mi mama tabata yuda cu alohamento pa e delegadonan.

Un Congreso Masha Special pa Nos

E congreso di 1948 na Johannesburg tabata uno special. Pa prome bes, miembronan di e sede mundial di Testigonan di Jehova na Brooklyn, New York, tabata presente. Mi tata tabata asigna pa transporta Nathan Knorr y Milton Henschel cu su auto durante nan estadia. Ta na e congreso ei mi a batisa.

Poco despues, pa mi tata su sorpresa su tata a bis’e cu e ta lamenta profundamente cu despues di morto di Ruman Russell, el a laga e personanan cu a bandona e Studiantenan di Bijbel influenci’e. El a fayece un par di luna despues. Di otro banda, mi tata su mama a keda leal te ora cu el a termina su carera terenal na 1955.

Sucesonan Cu A Influencia Mi Bida

Mi a cuminsa sirbi como pionero regular dia prome di februari 1949. Poco tempo despues, tur hende tabata masha emociona pasobra e siguiente aña lo tabatin un congreso internacional na New York City. Nos tabatin masha gana di bai, pero nos no tabatin moda. Sinembargo, na februari 1950, mi welo parti mama a fayece, anto mi wela a uza e placa cu el a hereda pa paga pasashi pa nos cinco.

Algun siman prome cu nos biahe, a yega un carta for di e sede mundial di Testigonan di Jehova na Brooklyn, New York. Tabata un invitacion pa mi asisti na e di 16 klas di e scol di misionero di Galaad. Esta emocionante, pasobra mi no tabatin ni 17 aña ainda! Ora cu e klas  a cuminsa, ata mi meimei di e dies studiantenan di Zuid Africa, disfrutando di e gran privilegio ei.

Despues cu nos a gradua na februari 1951, ocho di nos a regresa Zuid Africa pa sirbi como misionero. Durante e siguiente añanan, ami cu mi compañera a predica principalmente den pueblonan mas chikito caminda e hendenan tabata papia Afrikaans. Na principio mi no tabata bon den e idioma ei, y mi ta corda con un dia mi tabata bai cas riba mi bais cu awa na wowo pasobra mi no tabata efectivo den e ministerio. Sinembargo, cu tempo mi a siña papi’e mihor y Jehova a bendiciona mi esfuersonan.

Matrimonio y e Trabou Biahero

Na 1955 mi a sera conoci cu John Cooke. El a yuda inicia e trabou di predica na Francia, Portugal y Spaña prome y tambe despues di Segundo Guera Mundial, y el a caba di bira un misionero na Africa e aña cu mi a top’e. Mas despues el a skirbi: “Mi a haya tres shock den un solo siman ... Un ruman masha generoso a duna mi un auto chikito; mi a keda nombra como sirbidor di districto; y mi a enamora di un mucha muher.” * Nos a casa na december 1957.

Durante nos enamoracion, John a sigura mi cu mi bida cu ne nunca lo ta laf, y e tabatin rason. Nos a bishita congregacionnan rond Zuid Africa, mayoria di nan den area caminda hende color scur ta biba. Tur siman, nos tabata confronta e reto di haya permit pa djis drenta e areanan ei, pa keda drumi anochi tabata casi imposibel. Na algun ocasion, nos a drumi riba vloer di un tienda bashi den un bario di hende color cla den bisindario, y a purba pa hende cu pasa no mira nos. Por lo general nos tabatin cu keda cerca e Testigonan color cla cu tabata biba mas cerca, y hopi biaha nan tabata biba hopi kilometer leu.

 Tambe nos a confronta e reto di uza facilidadnan simpel di asamblea traha den pleno mondi. Nos tabata pasa peliculanan produci dor di Testigonan di Jehova cu a yuda e hendenan haya aprecio pa nos hermandad mundial. Nos tabata bai cu nos mes delco, pasobra generalmente no tabatin coriente den e areanan ei. Tambe nos tabatin cu lucha cu problemanan den e regionnan bou di gobierno Britanico caminda nos literatura tabata prohibi y ademas nos tabatin e reto di siña e idioma Zulu. Sinembargo, nos tabata contento cu nos por a sirbi nos rumannan.

Na augustus 1961, John a bira e prome instructor di e Scol di Ministerio di Reino di Zuid Africa, un scol di cuater siman prepara specialmente pa yuda superintendentenan di congregacion. John tabata bon den e arte di siña y el a alcansa curason di e studiantenan cu su logica simpel y ilustracionnan bibo. Pa casi un aña y mei, nos a biaha di un luga pa otro pa cada klas di abla Ingles cu a sigui. Mientras cu John tabata duna e les, ami tabata sali den sirbishi di veld cu e Testigonan local. Anto pa nos sorpresa, nos a haya un carta cu a invita nos pa bin sirbi na e oficina di sucursal di Zuid Africa pega cu Johannesburg cuminsando 1 di juli 1964.

Pero pa e tempo ei, John su salud a cuminsa precupa nos. Na 1948 el a haya un atake di tuberculosis y despues di esei cada bes e tabata sufri di falta di energia. E tabata sinti sintomanan di griep y tabata malo pa varios dia tras di otro, sin por a haci nada ni mira ni un hende. Un docter cu nos a consulta un poco prome cu nos a haya invitacion pa bin sucursal a diagnostica cu John su problema tabata depresion.

Pa nos tabata imposibel pa hiba un bida mas trankil, manera e docter a sugeri. Na sucursal, John a ser asigna na e Departamento di Sirbishi y ami na haci proofreading, esta, coreccion di cosnan skirbi. Anto esta un bendicion e tabata di por tin nos mes cuarto! John tabata sirbi den teritorio Portugues prome cu nos a casa, p’esei na 1967 e rumannan a pidi nos pa yuda e unico famia Testigo local Portugues predica na e comunidad grandi di Portugues cu tabatin alrededor di Johannesburg. Esaki a nifica cu mi mester a siña un idioma mas.

Como cu e comunidad Portugues tabata plama den un area grandi, nos tabatin cu biaha hopi, tin bes te cu 300 kilometer pa por yega na hendenan merecedor. Rond di e tempo aki, Testigonan di abla Portugues for di Mozambique a cuminsa bishita nos ora nos tabatin asamblea, locual tabata un gran yudansa pa esnan nobo. Durante e 11 añanan cu nos a predica den e teritorio Portugues, nos a mira nos grupo chikito di rond di 30 miembro crece bira cuater congregacion.

Cambionan na Cas

Mientrastanto, tabatin cambionan na cas di mi mayornan. Na aña 1960 mi ruman muher, Thelma, a casa cu John Urban, un pionero di Merca. Na 1965 nan a asisti na e di 40 klas di Galaad y a sirbi lealmente como misionero na Brazil pa 25 aña. Na 1990 nan a regresa Ohio pa cuida John su mayornan enfermo. A pesar di e stress cu esaki a trece cu ne, nan a keda den e sirbishi di tempo completo te awe.

Mi wela parti mama a termina su carera terenal na 1965 na edad di 98 aña, kedando semper fiel na Dios. E mesun aña ei mi tata a baha cu pension. P’esei ora cu e rumannan a pidi ami cu John pa bai yuda den e teritorio Portugues, mi mama cu mi tata a ofrece pa compaña nos. Nan a contribui na stabilidad di e grupo y despues di algun luna e prome congregacion a keda forma. Poco despues, mi mama a cuminsa sinti e efectonan di cancer y esei a hiba na su morto na 1971. Mi tata a muri shete aña despues.

Tratando cu e Malesa di John

Den decada di 1970 a bira bisto cu John su salud no tabata mehora. Pocopoco e tabatin cu entrega algun di su asignacionnan precioso na Betel. Por ehempel, e no por a conduci e Estudio di Toren di Vigilancia semanal di e famia di Betel mas ni e consideracionnan di Bijbel na mesa mainta. Su asignacion a cambia for di e  Departamento di Sirbishi pa e Departamento di Post y mas despues pa traha den hardin.

John su celo a pone cu tabata dificil pa e haci cambio. Ora cu persistentemente mi tabata purba pon’e baha man na su actividadnan, e tabata bisa den wega cu mi tabata manera un bala di hero mara na su pia, anto por lo general ora e caba di bisa asina e tabata brasa mi cariñosamente. Cu tempo nos a haya cu ta mihor pa stop di traha den e teritorio Portugues y sirbi hunto cu e congregacion cu tabata reuni den e Salon di Reino na sucursal.

Segun cu John su salud a sigui bai atras, tabata conmovedor pa mira su relacion intimo cu Jehova. Ora cu John tabata lanta meianochi den un estado di depresion profundo, nos tabata papia cu otro te ora cu el a sinti su mes suficiente calmo pa haci oracion na Jehova y pidi su yudansa. Cu tempo el a siña trata cu e mal momentonan ei su so dor di obliga su mes pa ripiti lentamente Filipensenan 4:6 y 7: “No precupa pa nada ...” E ora ei e tabata bira suficiente trankil pa cuminsa haci oracion. Hopi biaha mi tabata lanta y mi tabata wak keto keto con su lipnan tabata move segun cu el a keda roga Jehova sinceramente.

Como cu nos sucursal a bira mucho yen, e rumannan a cuminsa traha un sucursal nobo grandi pafo di Johannesburg. Ami cu John hopi biaha tabata bai bishita e luga trankil ei, leu for di e boroto y polucion di stad. Un cos cu a yuda John hopi tabata ora cu nos tabatin mag di muda bai einan den alohamento temporal te ora cu e sucursal nobo a keda cla.

Retonan Nobo

Segun cu John su capasidad di pensa y rasona a bai mas atras, a bira mas dificil tambe pa e cumpli cu su asignacionnan di trabou. Pero e manera cu otro rumannan tabata apoya John den su esfuerso tabata conmove mi profundamente. Por ehempel, ora un ruman mester a bai un biblioteca publico pa haci investigacion, e tabata bai cu John. John tabata bai cu su saconan di carson yen yen di tratado cu revista pa e laga cu hende cu e topa. Esaki a yuda John mantene un sentido di logro y balor propio.

Na un dado momento e malesa di Alzheimer a pone cu John no por a compronde palabra skirbi mas. Nos tabata gradicido pa e audiocassettenan di literatura biblico y canticanan di Reino. Nos tabata scucha nan bes tras bes. Hopi biaha John tabata bira inkieto si mi no sinta y scucha nan hunto cu ne, p’esei mi a tene mi mes ocupa durante e tantisimo oranan ei haciendo obra di man manera por ehempel hak y brei. Esei a pone cu nos tabatin un bon stock di sweater y deken!

Cu tempo, John su condicion a exigi mas cuido di mi parti. Aunke hopi biaha mi tabata mucho cansa pa lesa of studia, tabata un privilegio di por a cuid’e te na fin. E fin ei a yega na 1998 ora cu John a muri trankilamente den mi brasa poco despues cu el a haci 85 aña. El a keda completamente firme den su lealtad te na final. Mi ta anhela masha hopi mes di mir’e den e resureccion, cu su salud y mente restaura!

Hayando Refrescamento

Despues di John su morto, no tabata facil pa mi siña hiba un bida mi so. P’esei na mei 1999 mi a bai bishita mi ruman muher, Thelma, cu su casa na Merca. Esta dushi y refrescante tabata pa topa cu hopi amigo stima y leal, specialmente durante nos bishita na e sede mundial di Testigonan di Jehova na New York! Esei tabata definitivamente e estimulo spiritual cu mi tabatin mester.

Ora mi sinta pensa riba e bida di mi sernan keri leal, mi ta ser recorda di tantisimo cos cu tabata bon pa mi. Pa medio di nan instruccion, ehempel y yudansa, mi a siña amplia mi amor pa hende di otro nacion y rasa. Mi a siña demostra pasenshi, perseverancia y adaptabilidad. Mas cu tur cos, mi a experencia e bondad di Jehova, Esun cu ta scucha oracion. Mi ta sinti e mesun sintimentonan cu e salmista cu a skirbi: “Bendiciona ta esun cu bo ta scohe y ta hala cerca bo, pa biba den bo pationan. Nos lo keda satisfecho cu e bondad di bo cas.”—Salmo 65:4.

[Nota]

[Plachi na pagina 8]

Mi wela hunto cu su yiu muhernan

[Plachi na pagina 9]

Ami cu mi mayornan dia cu mi a batisa na 1948

[Plachi na pagina 10]

Hunto cu Albert Schroeder, secretario di Galaad, y e nuebe otro studiantenan for di Zuid Africa

[Plachi na pagina 10]

Ami cu John na 1984