Con pa Acerca Esun “Cu Ta Scucha Oracion”

“Abo cu ta scucha oracion, cerca bo tur hende ta bin.”—SALMO 65:2.

1. Kico ta distingui hende for di e otro criaturanan riba tera y ki posibilidad esaki ta duna nos?

DI TUR e miles di criaturanan cu tin riba tera, ta hende so tin e capasidad di adora e Creador. Ta hende so ta conciente cu nan tin un necesidad spiritual—es decir, cu nan tin cu adora Dios—y ta sinti e deseo di satisface e necesidad ei. Esaki ta duna nos e maraviyoso oportunidad di por tin un relacion personal cu nos Tata celestial.

2. Ki mal efecto pica tabatin riba hende su relacion cu su Creador?

² Dios a traha hende cu e capasidad di comunica cu su Creador. Adam cu Eva a ser crea sin pica. Pues, nan por a acerca Dios libremente mescos cu un yiu ta acerca su tata. Sinembargo, pica a pone nan perde e gran privilegio ei. Adam cu Eva a desobedece Dios y a perde nan relacion intimo cu ne. (Genesis 3:8-13, 17-24) Acaso esei kiermen cu Adam su desendientenan imperfecto no por comunica mas cu Dios? No, e no kiermen esei. Jehova te ainda ta permiti nan acerc’e pero solamente si nan cumpli cu cierto rekisitonan fundamental. Kico e rekisitonan ei ta?

Rekisitonan pa Acerca Dios

3. Con hende pecaminoso mester acerca Dios, y ki ehempel ta ilustra esaki?

³ Un suceso den cua dos yiu di Adam tabata envolvi ta yuda nos mira kico Dios ta rekeri di hende imperfecto cu ta desea di acerc’e. Tanto Cain como Abel a purba acerca Dios dor di presenta sacrificio na dje. Dios a acepta e ofrenda di Abel, mientras cu esun di Cain no. (Genesis 4:3-5) Kico a causa e diferencia? Hebreonan 11:4 ta declara: “Pa medio di fe Abel a ofrece na Dios un mihor sacrificio cu Cain, dor di cual el a obtene e testimonio cu e tabata husto.” Ta bisto anto cu fe ta un rekisito basico pa haya acceso na Dios. Un otro rekisito basico nos ta mira den loke Jehova a bisa Cain: “Si bo haci bon, lo bo no wordo acepta?” Si, Cain su intento pa acerca Dios lo a ser acepta si Cain a bira di su caminda y haci loke ta bon. Sinembargo, Cain a rechasa Dios su conseho. El a mata Abel y na final a hay’e ta biba exclui for di sociedad. (Genesis 4:7-12) Pues, for di tempran den historia humano, e importancia di acerca Dios cu fe compaña cu hacimento di bon obra a keda enfatisa.

4. Kico nos mester reconoce tocante nos manera di acerca Dios?

⁴ Si nos ta desea di acerca Dios ta masha importante pa nos reconoce nos estado pecaminoso. Tur hende ta pecador, y pica ta un obstaculo cu ta stroba nos di acerca Dios. Profeta Jeremias a skirbi tocante Israel: “Nos a transgresa ... Bo a tapa bo mes cu un nubia, asina cu ningun oracion no por pasa.” (Lamentacion 3:42, 44) Pero a pesar cu hende ta pecaminoso, Dios a demostra atrabes di henter historia humano cu e ta dispuesto na acepta e oracionnan di hende cu ta acerc’e cu fe y un bon actitud di curason, y cu ta observa su mandamentonan. (Salmo 119:145) Ken tabata algun di e personanan aki, y kico nos por siña for di nan oracionnan?

5, 6. Kico nos por siña for di Abraham su manera di acerca Dios?

⁵ Un di e personanan ei tabata Abraham.  Dios a acepta Abraham su esfuerso pa acerc’e, pasobra Dios a yama Abraham “mi amigo.” (Isaias 41:8) Kico nos por siña for di Abraham su manera di acerca Dios? E patriarca fiel aki a puntra Jehova tocante un heredero, bisando: “Kico lo bo duna mi, siendo cu mi no tin yiu”? (Genesis 15:2, 3; 17:18) Na un otro ocasion, el a expresa su precupacion tocante ken lo a scapa ora Dios trece huicio contra e malbadonan den Sodoma y Gomora. (Genesis 18:23-33) Tambe Abraham a suplica Dios na fabor di otro hende. (Genesis 20:7, 17) Y mescos cu den e caso di Abel, tabatin biaha cu Abraham su manera di acerca Dios a ensera un ofrenda na Jehova.—Genesis 22:9-14.

⁶ Na tur e ocasionnan aki, Abraham a sintie liber pa papia cu Jehova. Sinembargo, su frankesa di expresion a refleha tambe un punto di bista humilde di su posicion dilanti di su Creador. Tuma nota di su palabranan respetuoso cu nos ta haya na Genesis 18:27: “At’awor mi a tribi papia cu Señor, aunke ta djis stof y shinishi mi ta.” Ki un actitud excelente pa imita!

7. Ki asuntonan e patriarcanan a inclui den nan oracionnan na Jehova?

⁷ E patriarcanan a haci oracion tocante un variedad di asunto, y Jehova a scucha nan faborablemente. Jacob a expresa un oracion den forma di un promesa solem. Despues cu el a pidi Dios sosten’e, el a priminti solemnemente: “Di tur loke bo duna mi, siguramente lo mi duna bo un decimo parti.” (Genesis 28:20-22) Mas despues, ora cu e tabata a punto di topa su ruman homber, Jacob a roga Jehova pa proteh’e, bisando: “Mi ta pidi bo, libra mi for di man di mi ruman homber, for di man di Esau; pasobra mi tin miedo di dje.” (Genesis 32:9-12) Patriarca Job a acerca Jehova na fabor di su famia, ofreciendo sacrificio pa nan. Ora cu Job su tres compañeronan a peca cu nan palabranan, Job a haci oracion na nan fabor y Jehova “a acepta e oracion di Job.” (Job 1:5; 42:7-9) E relatonan aki ta yuda nos mira ki asuntonan nos por inclui den nos oracionnan na Jehova. Tambe nos ta mira cu Jehova ta dispuesto na acepta e oracionnan di hende cu ta acerc’e den e manera corecto.

Bou di e Pacto di Lei

8. Bou di e pacto di Lei, con asuntonan tabata ser presenta na Jehova na fabor di e pueblo?

⁸ Despues cu Jehova a libra e nacion di Israel for di Egipto, el a duna nan e pacto di Lei. E Lei a prescribi e areglo pa acerca Dios mediante un sacerdocio apunta. Algun Levita a ser asigna pa fungi como sacerdote na fabor di e pueblo. Ora cu a surgi asuntonan  di importancia nacional, un representante di e pueblo—tin biaha un rei of profeta—a presenta e asunto na Dios den oracion. (1 Samuel 8:21, 22; 14:36-41; Jeremias 42:1-3) Por ehempel, na dedicacion di e tempel, Rei Salomon a acerca Jehova den un oracion ferviente y sincero. Jehova, na su turno, a indica cu el a acepta Salomon su oracion dor di yena e tempel cu Su gloria y bisa: “Mi horea [lo ta] atento na e oracion haci den e luga aki.”—2 Cronicanan 6:12–7:3, 15.

9. Ki rekisito mester a cumpli cu ne na e santuario pa acerca Jehova na e manera corecto?

⁹ Den e Lei duna na Israel, Jehova a inclui un rekisito pa por acerc’e na un manera aceptabel na e santuario. Kico esei tabata? Tur mainta y tur anochi, fuera di ofrece sacrificio di bestia, e sumo sacerdote mester a kima sencia aromatico dilanti di Jehova. Mas despues, subsacerdotenan tambe a rindi e servicio aki, excepto riba Dia di Expiacion. Si e sacerdotenan no a rindi tal homenahe respetuoso, Jehova lo no a keda contento cu nan sirbishi.—Exodo 30:7, 8; 2 Cronicanan 13:11.

10, 11. Ki evidencia nos tin cu Jehova a acepta oracion di hende individual?

¹⁰ Den antiguo Israel, ta solamente mediante representantenan specialmente apunta hende por a acerca Dios? No, e Scritura ta mustra cu Jehova gustosamente a acepta oracionnan personal di hende individual. Salomon a suplica Jehova den su oracion di dedicacion di e tempel, bisando: “Cualkier oracion of suplica cu un hende of cu henter bo pueblo Israel haci ... [ora e] habri su mannan den direccion di e cas aki, e ora ei tende abo for di shelo.” (2 Cronicanan 6:29, 30) E relato di Lucas ta conta nos cu ora Zacarias, tata di Juan Bautista, tabata ofrece sencia den e santuario, un multitud di adorado di Jehova cu no tabata sacerdote tabata “haci oracion pafo.” Evidentemente, despues a bira un custumber cu hende tabata reuni pafo di e santuario pa haci oracion na momento cu tabata ofrece sencia na Jehova riba e altar di oro.—Lucas 1:8-10.

¹¹ Pues, ora cu e personanan cu a representa e nacion completo y hende individual cu a trata di acerca Jehova personalmente, a acerc’e den e manera corecto, gustosamente el a acepta nan peticionnan. Awe, nos no ta biba bou di e pacto di Lei mas. Toch nos por siña algun les valioso tocante oracion for di e maneranan cu e Israelitanan di pasado a acerca Dios.

Bou di e Areglo Cristian

12. Cua areglo tin pa cristiannan acerca Jehova?

¹² Nos ta biba awor bou di e areglo cristian, esun estableci pa Cristo. No tin un tempel literal mas den cua sacerdotenan ta representa henter e pueblo di Dios of den cua su direccion nos por bira ora nos ta haci oracion na Dios. Pero toch Jehova ainda tin un areglo cu el a establece pa nos por acerc’e. Cua esei ta? Na aña 29 di nos era, ora cu Cristo a ser ungi y apunta como Sumo Sacerdote, un tempel  spiritual a cuminsa funciona. * E tempel spiritual aki tabata e areglo nobo pa acerca Jehova den adoracion a base di e sacrificio di reconciliacion di Hesucristo.—Hebreonan 9:11, 12.

13. Relaciona cu oracion, kico ta un paralelo entre e tempel na Jerusalem y e tempel spiritual?

¹³ Hopi di e aspectonan di e tempel na Jerusalem aptamente ta representa e varios rasgonan di e tempel spiritual, incluso esnan relaciona cu oracion. (Hebreonan 9:1-10) Por ehempel, kico e sencia cu a ser ofreci, mainta y anochi, riba e altar di sencia den e luga Santo di e tempel a representa? Segun e buki di Revelacion, e ‘sencia ta e oracionnan di e santonan.’ (Revelacion 5:8; 8:3, 4) David a ser inspira pa skirbi: “Laga mi oracion wordo poni bo dilanti manera sencia.” (Salmo 141:2) Pues, den e areglo cristian, e sencia di holo dushi apropiadamente ta representa oracionnan aceptabel y alabansa na Jehova.—1 Tesalonicensenan 3:10.

14, 15. Kico nos por bisa di e oportunidad pa acerca Jehova pa (a) cristiannan ungi? (b) e “otro carnenan”?

¹⁴ Ken por acerca Dios na e tempel spiritual aki? Na e tempel literal, e sacerdotenan y Levitanan tabatin e privilegio di sirbi den e patio of plenchi paden, pero solamente e sacerdotenan por a drenta den e luga Santo. Cristiannan ungi cu tin e speransa celestial ta disfruta di un condicion spiritual unico prefigura pa e plenchi paden y e luga Santo, locual ta haci posibel cu nan por rindi oracion y alabansa na Dios.

¹⁵ Kico di e hendenan cu tin un speransa terenal, esta, e “otro carnenan”? (Juan 10:16) Profeta Isaias a indica cu hende for di hopi nacion lo a bin adora Jehova “den e ultimo dianan.” (Isaias 2:2, 3) Tambe el a skirbi cu “stranheronan” lo a uni nan mes na Jehova. Indicando cu e ta dispuesto pa acepta nan intento pa acerc’e, Dios a bisa: “Lo mi haci nan contento den mi cas di oracion.” (Isaias 56:6, 7) Revelacion 7:9-15 ta duna mas detaye. E ta describi “un multitud grandi” for di “tur nacion” cu ta reuni hunto den adoracion y oracion na Dios “di dia y anochi” mientras nan ta para riba e plenchi pafo di e tempel spiritual. Ta ki un consuelo cu tur sirbidor di Dios djawe por acerca Dios libremente cu e pleno confiansa cu e ta scucha nan!

Ki Tipo di Oracionnan Dios Ta Acepta?

16. Kico nos por siña tocante oracion for di e cristiannan di prome?

¹⁶ E cristiannan di prome tabata hende di oracion. Tocante kico asina nan a haci oracion? Ancianonan cristian a pidi guia ora di scohe hombernan pa carga responsabilidad den e organisacion. (Echonan 1:24, 25; 6:5, 6) Epafras a haci oracion na fabor di rumannan den fe. (Colosensenan 4:12) Miembronan di e congregacion na Jerusalem a haci oracion pa Pedro ora cu e tabata den prizon. (Echonan 12:5) E cristiannan di prome a  pidi Dios duna nan curashi y confiansa pa papia a pesar di oposicion, bisando: “Señor, tuma nota di nan menasanan y laga bo sirbidornan papia bo palabra cu tur confiansa.” (Echonan 4:23-30) Discipel Santiago a urgi cristiannan pa pidi Dios sabiduria ora cu nan ta bou di prueba. (Santiago 1:5) Abo ta inclui e tipo di asuntonan ei den bo peticionnan na Jehova?

17. Ken su oracionnan Jehova ta acepta?

¹⁷ Dios no ta acepta tur oracion. Con anto nos por haci oracion cu e siguransa cu nos oracionnan lo ser acepta? Hende fiel cu Dios a scucha den tempo antiguo a acerc’e cu sinceridad y cu un bon actitud di curason. Nan a demostra fe y a apoya nan fe cu obranan excelente. Nos por tin sigur cu Jehova lo scucha esnan cu acerc’e den e mesun manera awe.

18. Pa cristiannan su oracion ser scucha, ki rekisito nan tin cu cumpli cu ne?

¹⁸ Pero tin un rekisito adicional. Apostel Pablo a splica esaki, bisando: “Pa medio di dje nos ... [tin] entrada den un spirito cerca e Tata.” Na ken Pablo tabata referi ora cu el a skirbi “pa medio di dje”? Na Hesucristo. (Efesionan 2:13, 18) Si, nos por acerca e Tata libremente solamente pa medio di Hesus.—Juan 14:6; 15:16; 16:23, 24.

19. (a) Ki ora e ofrenda di sencia di Israel a bira repugnante pa Jehova? (b) Con nos por haci sigur cu nos oracionnan ta manera sencia di holo dushi pa Jehova?

¹⁹ Manera a ser menciona caba, e sencia cu e sacerdotenan Israelita a ofrece ta representa e oracionnan aceptabel di Dios su sirbidornan fiel. Sinembargo, tabatin biaha cu e ofrenda di sencia di e Israelitanan tabata repugnante pa Jehova. Esaki tabata e caso ora cu e Israelitanan a kima sencia den e tempel pero na mesun tempo nan a buig pa diosnan falso. (Ezekiel 8:10, 11) Awe ta mescos, oracion di esnan cu ta pretende di ta sirbi Jehova pero cu na mesun tempo ta practica obranan cu ta na conflicto cu su leinan ta bira manera un holo repugnante p’e. (Proverbionan 15:8) P’esei laga nos sigui mantene tur aspecto di nos bida limpi di manera cu nos oracionnan por ta manera un sencia di holo dushi pa Dios. Jehova tin goso den oracion di esnan cu ta sigui su camindanan husto. (Juan 9:31) Sinembargo, tin algun pregunta cu no a haya contesta. Con nos mester haci oracion? Kico nos por pidi den oracion? Y con Dios ta contesta nos oracionnan? Nos siguiente articulo lo considera e preguntanan aki y otronan mas.

[Nota]

Bo Por Splica?

• Con hende imperfecto por acerca Dios na un manera cu e ta acepta?

• Con nos por imita e patriarcanan den nos oracionnan?

• Kico nos ta siña for di e oracionnan di e cristiannan di prome?

• Ki ora nos oracionnan ta manera un sencia di holo dushi pa Dios?

[Preguntanan di Estudio]

[Plachi na pagina 23]

Dicon Dios a acepta e ofrenda di Abel pero no esun di Cain?

[Plachi na pagina 24]

“Ta djis stof y shinishi mi ta”

[Plachi na pagina 25]

“Siguramente lo mi duna bo un decimo parti”

[Plachi na pagina 26]

Bo oracionnan ta manera sencia di holo dushi pa Jehova?