Kico Religion Ta Yuda cu Ne?

“MI POR ta bon hende sin mester di ta den un religion!” Esei ta un pensamento comun y coriente. Hopi hende honrado, compasivo y confiabel no ta interesa den religion. Por ehempel, masha poco hende di paisnan di West Europa ta baido di misa, aunke mayoria ta bisa cu nan ta kere den Dios. * Asta na Latino America, apenas 15 pa 20 porciento di catoliconan ta bai misa regularmente.

Mescos cu hopi otro hende, talbes bo tambe ta haya cu religion no ta yuda bo hiba un mihor bida. Pero, podise bo sa tambe cu hopi aña pasa, tempo di bo grandinan, mayoria hende tabata hopi mas religioso cu awe. Kico a pone asina tanto hende perde interes den religion? Un persona por ta bon hende sin cu e ta den un religion? Tin un religion cu por beneficia bo?

Pakico Hopi Hende A Bira Lomba pa Religion

Pa hopi siglo, mayoria hende di cristiandad tabatin e creencia cu Dios ta rekeri obediencia. Nan tabata bai misa pa haya e aprobacion di Dios, sea mediante ritonan efectua dor di un pastor of mediante guia di un predicado. Sin duda hopi tabata mira e hipocresia tambe cu tin den religion. E papel di religion den guera, mescos cu e conducta corumpi di algun lider religioso, tabata bon conoci. Pero mayoria hende tabata pensa cu religion riba su mes tabata bon. Otronan tabata gusta e ambiente di reverencia, e tradicion y e musica; algun asta tabata mira cierto beneficio den e peliger di tormento eterno den fierno, locual ta un siñansa cu no ta aparece den e Scritura. Despues, varios desaroyo a pone hende haya un otro punto di bista di religion.

E teoria di evolucion a bira popular. Algun hende tabata combenci cu bida a origina pa casualidad—sin intervencion di Dios. Mayoria religion no a duna prueba combencente cu Dios ta e Fuente di bida. (Salmo 36:9) Ademas, segun cu tecnologia a avansa, logronan remarcabel riba tereno di medicina, transporte y comunicacion a duna hende e impresion cu ciencia por resolve cualkier problema. Como si fuera no ta basta, hopi hende tabata haya cu sociologo- y psicologonan tabata duna mihor guia cu religion. Religionnan, di nan parti, no a demostra bon cla cu un bida conforme e lei di Dios ta e mihor manera di biba.—Santiago 1:25.

E desaroyonan aki a pone hopi religion cambia nan mensahe. Pastor- y predicadonan a stop di siña hende cu Dios ta rekeri obediencia. En bes di esei, hopi di nan a cuminsa siña hende cu ta cada ken mester dicidi pa su mes kico ta bon y kico ta malo. Pa purba gana popularidad, algun lider religioso a pretende cu Dios ta acepta bo sin importa con bo ta biba. E siñansa ei ta pone nos corda un profesia di  Bijbel: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende.”—2 Timoteo 4:3.

En bes di atrae hende, tal siñansa a aleha nan for di religion. Cu rason nan a puntra nan mes: ‘Si religionnan ta duda cu Dios tin poder pa crea cosnan y sabiduria pa traha leinan, kico ami ta bai haci den misa? Pakico mi tin cu worry lanta mi yiunan den un religion?’ Pues net e hendenan cu tabata purba hiba un bida decente a cuminsa bira indiferente pa cu religion. Nan a bandona e iglesianan, y religion no tabata importante mas pa nan. Kico a bai asina robes cu algo cu lo mester tabata bon? Bijbel ta duna un splicacion combencente.

Religion pa Logra Metanan Malbado

Apostel Pablo a spierta e prome cristiannan cu algun individuo lo a uza cristianismo pa logra metanan malbado. El a bisa: “Lobo brabo lo drenta meimei di boso, cu lo no tin misericordia di e tou; y for di meimei di boso mes lo lanta hombernan cu ta papia cosnan perverso, pa desvia e discipelnan y haci nan bai nan tras.” (Echonan 20:29, 30) Un di esnan cu a papia “cosnan perverso” tabata e teologo catolico Romano Agustin. Hesus a siña su siguidonan pa combence otro hende dor di rasona cu nan for di e Scritura. Sinembargo, Agustin a perverti of troce e nificacion di Hesus su palabranan registra na Lucas 14:23, “obliga nan drenta”, pa haci parce cu ta bon pa uza forsa den e obra di comberti hende. (Mateo 28:19, 20; Echonan 28:23, 24) Agustin a uza religion pa domina hende.

Esun cu ta tras di e maluzo y corupcion di religion ta Satanas, un angel rebelde. El a provoca hende religioso den e prome siglo pa purba corumpi congregacionnan cristian. Bijbel ta bisa di e hombernan ei: “Hombernan asina ta apostelnan falso, trahadonan engañoso, kendenan ta disfrasa nan mes como apostelnan di Cristo. Y no ta nada straño, pasobra Satanas mes ta disfrasa su mes como un angel di lus. P’esei no ta nada straño si su sirbidornan tambe ta disfrasa nan mes como sirbidornan di husticia.”—2 Corintionan 11:13-15.

Ainda Satanas ta uza religion cu ta pretende di ta cristian, moralmente limpi y educativo pa pone hende biba segun su normanan y no segun esnan di Dios. (Lucas 4:5-7) Probablemente bo a ripara cu hopi lider religioso awe ta uza religion pa halsa nan mes cu titulonan cu ta zona impresionante y pa haya placa for di nan miembronan. Gobiernonan tambe a uza religion pa combence ciudadanonan pa sacrifica nan mes den guera.

Diabel ta uza religion den un forma hopi mas extenso cu mayoria hende ta realisa. Kisas bo ta imagina cu ta solamente algun extremista religioso ta sirbiendo interesnan di Satanas. Pero segun Bijbel, esun “kende ta wordo yama Diabel y Satanas ... ta gaña henter mundo.” Bijbel ta bisa tambe: “Henter mundo ta bou di control di e malbado.” (Revelacion 12:9; 1 Juan 5:19)  Kico Dios ta pensa di religion cu lidernan religioso y politico ta uza djis pa busca siguidonan pa nan mes?

‘Ki Mi Ta Gana cu Ne?’

Si e conducta di algun religion di cristiandad a shock bo, bo por ta sigur cu e Dios Todopoderoso ta hopi malcontento cu nan. Cristiandad ta pretende di a sera un pacto cu Dios; Israel di antiguedad a pretende algo similar. Tur dos a resulta di ta infiel. P’esei e denuncia di Jehova contra Israel ta conta mes pisa pa cristiandad awe. Jehova a bisa nan: “Nan no a paga tino na loke mi a bisa nan, nan a rechasa asta e lei cu mi a duna nan. Ki mi ta gana cu e sencia cu boso a importa pa mi for di Seba? ... Pa loke ta toca e otro sacrificionan, nan no ta agrada mi.” (Jeremias 6:19, 20, BPK) Dios no a reconoce e actonan di adoracion cu hipocritanan a rindi na dje. E no tabata interesa den nan ritonan y oracionnan. El a bisa Israel: “Mi ta odia boso ... fiestanan stipula; nan a bira un carga pa mi. Mi ta cansa di soporta nan. P’esei, ora boso habri boso mannan den oracion, lo mi sconde mi wowonan pa boso; si, maske boso haci hopi oracion, lo mi no scucha.”—Isaias 1:14, 15.

Jehova ta contento cu e fiestanan cu religion a duna un bachi cristian pero cu originalmente tabata na honor di dios falso? E ta scucha oracion di lidernan religioso cu ta corumpi e siñansanan di Cristo? Dios ta acepta cualkier religion cu ta rechasa su lei? Bo por ta sigur cu awe e ta mira ritonan religioso mescos cu el a mira e sacrificionan di Israel di antiguedad, di cua el a bisa: ‘Ki mi ta gana cu nan?’

Pero loke Jehova ta hopi interesa den dje si ta e adoracion basa riba e berdad cu hende sincero ta rindi na dje. Ora hende ta expresa aprecio pa tur loke nan ta ricibi for di dje, e ta keda masha contento. (Malakias 3:16, 17) Pues bo por ta un bon hende sin ta adora Dios? Un persona cu no ta haci nada pa su mayornan amoroso no tin ni un base pa bisa cu e ta un bon hende, no ta berdad? Un persona cu no ta haci nada pa Dios por ta bon hende? Ta logico anto cu nos echonan mester mustra cu nos tin interes den e Dios berdadero, esun cu a origina bida. Den e siguiente articulo, nos lo mira con adoracion berdadero no solamente ta honra Dios sino ta beneficia nos tambe.

[Nota]

[Plachi na pagina 4]

Religionnan a mustra riba pruebanan cu ta Dios a crea tur cos?

[Plachi na pagina 4, 5]

Un hende cu ta representa Dios ta pas den e escena aki?

[Plachi na pagina 5]

Con Dios ta mira e tipo di fiestanan aki?

[Reconocemento]

AP Photo/Georgy Abdaladze