“Laga Boso Peticionnan Ta Conoci Dilanti di Dios”

“Den tur cos, pa medio di oracion y suplica cu gradicimento, laga boso peticionnan ta conoci dilanti di Dios.”—FILIPENSENAN 4:6.

1. Cu ken nos tin e privilegio di comunica y dicon esaki ta algo masha asombroso?

SI BO mester pidi pa haya audiencia cerca un gobernante di bo pais, ki clase di reaccion lo bo haya? Su oficina kisas ta manda un contesta cortes pa bo, pero ta masha improbabel cu lo bo haya chens di papia cu e gobernante mes en persona. Sinembargo, cerca e Gobernante mas grandi di tur, Jehova Dios, Soberano di universo, e situacion ta diferente. Nos tin acceso na dje na unda cu nos ta y ki ora cu nos kier. Oracionnan aceptabel semper ta yega cerca dje. (Proverbionan 15:29) Esei ta algo realmente maraviyoso! Nos aprecio pa esaki no mester stimula nos pa haci oracion cu regularidad na Esun cu Bijbel corectamente ta referi na dje como “Abo cu ta scucha oracion”?—Salmo 65:2.

2. Kico ta necesario pa oracionnan ta aceptabel pa Dios?

² Sinembargo, un hende por puntra: ‘Cua oracionnan Dios ta acepta?’ Bijbel ta menciona un cos cu ta necesario pa oracionnan ser acepta ora e ta declara: “Sin fe ta imposibel pa agrad’e, pasobra esun cu bin cerca Dios mester kere cu e ta, y cu e ta Esun cu ta recompensa esnan cu ta busc’e.” (Hebreonan 11:6) Si, manera a wordo splica den e articulo anterior, fe ta un factor clave ora di acerca Dios. Dios ta dispuesto na acepta oracion di hende cu ta acerc’e, pero nan mester haci esei cu fe y cu obranan cu ta aceptabel pa Dios compaña pa sinceridad y un actitud corecto di curason.

3. (a) Manera nos por mira na e oracionnan di sirbidornan fiel di pasado, ki tipo di expresionnan nos por inclui den oracion? (b) Cua ta e varios formanan di oracion cu tin?

³ Apostel Pablo a urgi cristiannan den su tempo: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios.” (Filipensenan 4:6, 7) Den Bijbel nos ta haya hopi ehempel di personanan cu a haci oracion na Dios tocante nan precupacionnan. Entre nan tin Ana, Elias, Ezekias y Daniel. (1 Samuel 2:1-10; 1 Reinan 18:36, 37; 2 Reinan 19:15-19; Daniel 9:3-21) Ta bon pa nos sigui nan ehempel. Tuma nota tambe cu e palabranan di Pablo ta indica cu tin varios forma di oracion. El a menciona gradicimento, esta, oracion den cua nos ta expresa aprecio pa loke Dios ta haci pa nos. Esaki por ta compaña cu alabansa. Suplica ta referi na rogamento humilde y sincero. Y nos por expresa peticionnan, esta, oracionnan den cua nos ta pidi un cos specifico. (Lucas 11:2, 3) Nos Tata celestial gustosamente ta acepta nos esfuerso pa acerc’e den cualkier un di e maneranan aki.

4. Aunke Jehova sa kico nos tin mester, dicon toch nos tin cu haci peticion na dje?

⁴ Tin hende kisas ta puntra: ‘Pero Jehova no sa caba tur loke nos tin mester?’ Si, e sa. (Mateo 6:8, 32) Pakico anto toch e kier pa nos acerc’e cu nos peticionnan? Pensa riba e ehempel aki: Un doño di un negoshi podise ta ofrece un regalo na algun di su clientenan. Sinembargo, pa haya e regalo aki, e clientenan tin cu bin cerca e doño y pidie. Clientenan cu no ta dispuesto na haci e esfuerso ei ta mustra cu  en realidad nan no ta aprecia e oferta. Di igual manera, si nos neglisha di haci nos peticionnan conoci mediante oracion, esei lo indica un falta di aprecio pa loke Jehova ta percura. Hesus a bisa: “Pidi, y boso lo ricibi.” (Juan 16:24) Den e manera aki nos ta demostra cu nos ta depende riba Dios.

Con Nos Mester Acerca Dios?

5. Dicon nos tin cu haci oracion den nomber di Hesus?

⁵ Jehova no a traha un lista largo di reglanan stricto tocante con pa haci oracion. Pero toch nos tin cu siña e manera corecto di acerca Dios cu ta ser splica den Bijbel. Por ehempel, Hesus a siña su siguidonan: “Kico cu boso pidi e Tata, e lo duna boso den mi nomber.” (Juan 16:23) Pues nos mester haci oracion den nomber di Hesus, reconociendo Hesus como e unico medio via cua e bendicionnan di Dios ta ser extendi na henter humanidad.

6. Ora di haci oracion, ki posicion di curpa nos mester tin?

⁶ Ki posicion di curpa nos mester tin ora di haci oracion? Bijbel no ta indica un posicion specifico cu nos mester tin pa Dios scucha nos oracionnan. (1 Reinan 8:22; Nehemias 8:6; Marco 11:25; Lucas 22:41) Loke ta importante ta pa haci oracion na Dios cu sinceridad y cu e actitud corecto di curason.—Joel 2:12, 13.

7. (a) Kico “amen” ta nifica? (b) Con ta uza “amen” apropiadamente den oracion?

⁷ Kico di e uzo di e palabra “amen”? E Scritura ta indica cu esaki por lo general ta un conclusion apropia pa nos oracionnan, specialmente ora nos ta haci oracion den publico. (Salmo 72:19; 89:52) E palabra Hebreo ʼa·mén tin e nificacion basico di “sea asina.” E Cyclopedia di McClintock y Strong ta splica cu e nificacion di bisa “Amen” na final di oracion ta “pa confirma e palabranan cu a caba di ser expresa, y suplica nan cumplimento.” Pues, ora e persona cu ta haci oracion conclui cu un “Amen” di curason, e ta indica su sinceridad relaciona cu loke el a caba di bisa. Ora un cristian cu ta representa e congregacion den oracion conclui cu “Amen”, esnan cu ta scuch’e tambe por agrega nan “Amen” den nan curason of na bos halto pa indica cu nan ta completamente di acuerdo cu loke a caba di ser expresa.—1 Corintionan 14:16.

8. Con algun di nos oracionnan por parce e oracionnan di Jacob of Abraham, y kico esaki lo demostra di nos parti?

⁸ Tin biaha Dios por laga nos demostra con profundo nos precupacion ta pa e asuntonan pa cua nos ta haci oracion. Kisas nos lo tin cu bira manera Jacob di pasado, kende a lucha henter anochi cu un angel pa e haya un bendicion. (Genesis 32:24-26) Of algun circunstancia por rekeri pa nos bira manera Abraham, kende a suplica Jehova bes tras bes na fabor di Lot y otro personanan husto cu lo por tabatin den Sodoma. (Genesis 18:22-33) Asina tambe nos por suplica Jehova tocante cosnan cu ta valioso pa nos, rogand’e a base di su husticia, bondad amoroso y misericordia.

Kico Nos Por Pidi den Oracion?

9. Kico mester ta loke mas ta interesa nos ora nos ta haci oracion?

⁹ Corda cu Pablo a bisa: “Den tur cos ... laga boso peticionnan ta conoci dilanti di Dios.” (Filipensenan 4:6) Pues, oracionnan personal por inclui precupacionnan cu ta toca casi tur faseta di bida. Sinembargo, e prome precupacion den nos oracionnan mester ta e interesnan di Jehova. Daniel a pone un excelente ehempel den esaki. Ora cu Israel tabata sufri castigo debi na nan picanan, Daniel a roga Jehova pa mustra misericordia, bisando: “Pa bo mes causa, o mi Dios, no tarda, pasobra bo stad y bo pueblo ta wordo yama na bo nomber.” (Daniel 9:15-19) Nos oracionnan tambe ta mustra cu santificacion di Jehova su nomber y cumplimento di su boluntad ta nos precupacionnan principal?

10. Con nos sa cu ta apropia pa haci oracion tocante asuntonan personal?

¹⁰ Pero ta apropia tambe pa haci peticionnan relaciona cu asuntonan personal. Por ehempel, mescos cu e salmista, nos por pidi pa  compronde e cosnan mas profundo di Dios. El a pidi den oracion: “Duna mi comprondemento, pa mi por warda bo lei y cumpli cu ne cu henter mi curason.” (Salmo 119:33, 34; Colosensenan 1:9, 10) Hesus a “ofrece oracion y suplica . . . na Esun cu ta capas pa salb’e for di morto.” (Hebreonan 5:7) Haciendo esei Hesus a demostra cu ta masha apropia pa busca fortalesa ora cu bo ta confronta peliger of prueba. Ora cu Hesus a duna su discipelnan e oracion modelo, el a inclui asuntonan di interes personal, manera pordon pa eror y pa haya pan di cada dia.

11. Con oracion por yuda nos pa nos no cai den tentacion?

¹¹ Den e oracion modelo ei, Hesus a inclui e peticion: “No hiba nos den tentacion, ma libra nos for di e malbado.” (Mateo 6:9-13) Despues el a conseha: “Keda vigila y haci oracion, pa boso no cai den tentacion.” (Mateo 26:41) Oracion ta esencial ora cu nos ta confronta tentacion. Nos por sinti nos tenta pa ignora principionan biblico na trabou of na scol. Personanan cu no ta Testigo di Jehova por invita nos na nan actividadnan cu kisas no ta aceptabel pa cristian. Un hende por pidi nos haci algo cu ta viola principionan husto. Na momentonan asina, ta bon pa nos sigui Hesus su conseho di haci oracion—tanto prome cu e tentacion como ora cu nos ta confrontando e tentacion—y pidi Dios yuda nos pa nos no cai den tentacion.

12. Ki causanan di ansiedad lo por motiva nos pa haci oracion, y kico nos por spera di Jehova?

¹² Varios presion y ansiedad ta surgi den bida di Dios su sirbidornan awe. Malesa y tension emocional ta e fuentenan principal di ansiedad pa hopi hende. Condicionnan violento rond di nos ta yena bida cu tension. Problemanan economico ta pone cu ta dificil pa obtene  e necesidadnan di bida. Ta un gran consuelo pa sa cu Jehova ta scucha su sirbidornan cu ta presenta e asuntonan aki na dje den oracion! Salmo 102:17 ta declara tocante Jehova: “El a considera e oracion di esnan desampara y no a desprecia nan oracion.”

13. (a) Ki asuntonan personal ta topiconan apropia pa oracion? (b) Conta un ehempel di un oracion asina.

¹³ En realidad, cualkier asunto cu ta afecta nos sirbishi na Jehova of nos relacion cu ne por ta un topico apropia pa oracion. (1 Juan 5:14) Si bo tin cu tuma decisionnan tocante matrimonio of empleo of tocante haci mas den bo sirbishi, sinti bo liber pa papia cu Dios tocante esakinan y pidie guia bo. Por ehempel, un ruman muher hoben na Filipinas kier a drenta den sirbishi di tempo completo. Sinembargo, e no tabatin un trabou pa mantene su mes. El a conta: “Un diasabra, mi a haci oracion na Jehova specificamente tocante sirbishi di pionero. Mas despues riba e dia ei, ora cu mi tabata den e trabou di predica, mi a ofrece un buki na un teenager. Diripiente, e mucha muher a bisa mi: ‘Bo mester bin mi scol dialuna mainta tempran.’ Mi a puntr’e: ‘Dicon?’ El a splica mi cu nan tabatin mester di un hende pa cuminsa traha mas pronto posibel. Mi a bai, y nan a tuma mi mesora. Tur cos a sosode masha lihe.” Cantidad di Testigo rond mundo tabatin experencianan similar. Pues no basila pa presenta bo peticionnan sincero na Dios den oracion!

Kico si Nos A Peca?

14, 15. (a) Dicon un persona no mester keda sin haci oracion asta si el a peca? (b) Fuera di oracionnan personal, kico mas lo yuda un persona recupera di su pica?

¹⁴ Con oracion por yuda si un persona a peca? Berguensa ta pone algun cristian cu a peca keda sin haci oracion. Sinembargo, esei no ta un proceder sabi. Un ehempel: Pilotonan di avion sa cu si nan dual, nan por comunica cu toren di control pa haya yudansa. Pero kico si un piloto cu a dual ta basila pa tuma contacto cu toren di control pasobra e tin berguensa cu el a dual? Esei lo por hiba na desaster! Di igual manera, e persona cu a peca y cu tin berguensa di haci oracion na Dios lo por sufri mas daño. Berguensa pa motibo di a peca no mester stroba un persona di papia cu Jehova. De echo, Dios ta invita esnan cu a comete erornan serio pa haci oracion na dje. Profeta Isaias a urgi pecadornan den su tempo pa yama riba Jehova, “pasobra e lo pordona abundantemente.” (Isaias 55:6, 7) Claro cu e persona lo tin cu ‘busca e fabor di Jehova’ prome dor di humilia su mes, bira for di su caminda pecaminoso y arepenti sinceramente.—Salmo 119:58; Daniel 9:13.

¹⁵ Pa loke ta trata pica, oracion ta bira importante pa un otro motibo mas. Discipel Santiago a declara relaciona cu un persona cu tin mester di yudansa spiritual: “Lag’e yama e ancianonan di iglesia, y laga nan haci oracion p’e, ... y Señor lo lant’e.” (Santiago 5:14, 15) Si, un persona mester confesa su pica personalmente na Jehova den oracion, pero tambe e por pidi e ancianonan haci oracion na su fabor. Esei lo yud’e drecha su relacion cu Dios.

Contesta Riba Oracion

16, 17. (a) Con Jehova ta contesta oracion? (b) Menciona algun experencia cu ta mustra cu oracion y e trabou di predica ta estrechamente liga cu otro.

¹⁶ Con oracionnan ta ser contesta? Tin oracion ta ser contesta di biaha y masha bisto. (2 Reinan 20:1-6) Otro oracionnan kisas ta tuma tempo pa haya contesta y kisas ta mas dificil  pa mira e contesta. Manera a keda demostra den Hesus su ilustracion tocante e viuda cu a keda bin bek cerca e hues, kisas ta necesario pa nos keda haci oracion na Dios bes tras bes tocante un asunto. (Lucas 18:1-8) Sinembargo, nos por tin sigur cu ora nos ta haci oracion na harmonia cu e boluntad di Dios, Jehova nunca lo bisa nos: “No molestia mi.”—Lucas 11:5-9.

¹⁷ Jehova su pueblo den hopi caso a mira nan oracionnan ser contesta. Esaki hopi biaha ta bisto den nos predicacion publico. Por ehempel, dos ruman muher cristian na Filipinas tabata parti literatura biblico den un area aisla di e pais. Ora cu nan a duna un tratado na un señora, su wowonan a yena cu awa. E di: “Ayeranochi mi a pidi Dios den oracion pa manda un hende pa siña mi Bijbel, y mi ta kere cu esaki ta e contesta riba mi oracion.” Poco despues, e señora a cuminsa asisti na reunion na Salon di Reino. Den un otro parti di Zuidoost Asia, un ruman homber cristian tabata nervioso pasobra e mester a predica den un edificio residencial di alta siguridad. Sinembargo, el a haci oracion na Jehova, tuma un curashi y drenta e edificio. El a bati na porta di un apartamento y un mucha muher a sali. Ora cu e ruman a splic’e e motibo di su bishita, e mucha muher a cuminsa yora. El a bisa e ruman cu e tabata busca Testigonan di Jehova y a haci oracion pa Dios yud’e haya nan. E ruman gustosamente a pon’e den contacto cu e congregacion local di Testigonan di Jehova.

18. (a) Con nos mester reacciona ora cu nos oracionnan ser contesta? (b) Di kico nos por ta sigur si nos ta haci oracion na tur oportunidad cu nos haya?

¹⁸ Oracion ta realmente un provision maraviyoso. Jehova ta cla pa scucha y reacciona riba nos oracionnan. (Isaias 30:18, 19) Sinembargo, nos mester observa bon pa wak con Jehova ta contesta nos oracionnan. Kisas no ta tur biaha e ta haci esei den e manera cu nos a spera. Pero ora nos ripara cu el a duna nos su guia, nunca nos no mester lubida di gradicie y alab’e. (1 Tesalonicensenan 5:18) Ademas, semper corda e conseho di apostel Pablo: “Den tur cos, pa medio di oracion y suplica cu gradicimento, laga boso peticionnan ta conoci dilanti di Dios.” Si, probecha di tur oportunidad pa papia cu Dios. Den e manera ei, lo bo sigui experencia e berdad di loke Pablo a declara relaciona cu e personanan kende nan oracionnan ta ser contesta: “E pas di Dios, cu ta surpasa tur comprondemento lo warda boso curason y boso mente.”—Filipensenan 4:6, 7.

Bo Por Contesta Esaki?

• Cua ta e varios formanan di oracion cu tin?

• Con nos mester haci oracion?

• Ki topiconan nos por inclui den nos oracionnan?

• Kico ta e papel di oracion ora cu un hende peca?

[Preguntanan di Estudio]

[Plachi na pagina 29]

Oracion di curason ta yuda nos pa nos no cai den tentacion

[Plachi na pagina 31]

Mediante oracion, nos ta expresa na Dios nos gratitud, precupacionnan y peticionnan