Ora un Ser Keri Bandona Jehova

MARK y Louise ta Testigonan di Jehova. * Cu amor y dedicacion, nan a siña nan yiunan e Scritura, manera Bijbel ta manda mayornan cristian haci. (Proverbionan 22:6; 2 Timoteo 3:15) Lamentablemente, no ta tur nan yiunan a sigui sirbi Jehova ora nan a bira grandi. Louise ta bisa: “Mi curason ta haci dolor ora mi corda riba mi yiunan cu a bai for di e berdad. Mi no por nenga, tur dia mi ta sufri profundamente. Ora otro rumannan ta papia di nan yiunan, mi ta sinti un cos ta choca mi den mi garganta y mi tin cu lucha pa wanta mi lagrimanan.”

Si, ora un persona scohe pa bandona Jehova y e caminda cu ta hiba na bida cu e Scritura ta papia di dje, e miembronan di famia cu si a keda fiel por lo general ta sufri hopi. “Mi stima mi ruman muher masha tanto”, Irene ta bisa. “Mi ta dispuesto pa haci tur loke mi por pa e bolbe na Jehova!” Maria, kende su ruman homber a bira lomba pa Jehova pa hiba un bida inmoral, ta bisa: “Tabata hopi duro pa mi pasobra den tur otro sentido, e tabata un tremendo ruman pa mi. Mi ta sinti su falta specialmente na reunionnan grandi di famia.”

Dicon E Ta Asina Duro?

Pakico e famia cristian ta keda hopi tristo ora un yiu of otro ser keri bandona Jehova? Pasobra nan sa cu e Scritura ta priminti bida eterno den un paradijs riba tera pa hende cu ta keda fiel na Jehova. (Salmo 37:29; 2 Pedro 3:13; Revelacion 21:3-5) Nan ta ansioso pa comparti e bendicionnan aki cu nan casa, nan yiunan, mayornan, rumannan y nietonan. E idea cu nan sernan keri cu a stop di sirbi Jehova ta keda sin haya e bendicionnan ei ta haci nan tristo! Asta pa loke ta toca nan bida actual, cristiannan ta compronde cu e lei- y principionan di Jehova ta pa nan beneficio. P’esei nan curason ta haci dolor ora nan mira nan sernan keri hiba un bida cu lo resulta solamente den amargura.—Isaias 48:17, 18; Galationan 6:7, 8.

 Kisas ta dificil pa algun ruman spiritual cu nunca a pasa den e experencia di mira un ser keri bira lomba pa Jehova compronde con devastador esei por ta. Casi tur aspecto di bida ta ser afecta. “A bira mas y mas dificil pa sinta na reunionnan cristian y mira mayornan hari y papia cu nan yiunan”, segun Louise. “Na cualkier ocasion di alegria mi ta sinti un bashi pa motibo di e ausencia di mi sernan keri.” Un anciano cristian ta corda e cuater añanan durante cua e yiu muher di su casa a stop di asocia cu nan. E ta bisa: “Hopi bes, asta e ‘momentonan dushi’ di bida tabata dificil. Si mi a duna mi esposa un regalo of hib’e cualkier luga bunita pa un weekend, e tabata cuminsa yora, cordando cu su yiu muher no tabat’ei pa comparti nos felicidad.”

E cristiannan ei ta exagera e asunto? No necesariamente. De echo, den un sentido nan ta reflehando e cualidadnan di Jehova, den kende su imagen hende a ser traha. (Genesis 1:26, 27) Kico esaki ta nifica? Wel, con Jehova a sinti ora su pueblo Israel a rebela contra dje? Na Salmo 78:38-41 nos ta lesa cu nan a hacie tristo. Toch, cu pasenshi el a spierta nan y disciplina nan, pordonando nan varios biaha ora nan a demostra arepentimento. Obviamente, Jehova ta sinti un apego personal na su criaturanan, “e obra di [su] mannan”, y no ta bira lomba facil pa nan. (Job 14:15; Jonas 4:10, 11) El a inculca den hende tambe e capasidad di sinti un apego leal na otro, y e lasonan entre  miembronan di famia por ta hopi fuerte. Pues no ta nada straño cu hende ta sinti nan tristo ora un famia stima bandona Jehova.

En berdad, e ‘perdida spiritual’ di un ser keri ta un di e pruebanan di mas dificil cu adoradonan berdadero por haya nan cu ne. (Echonan 14:22) Hesus a bisa cu aceptacion di su mensahe lo a trece division den algun famia. (Mateo 10:34-38) Esaki no ta pasobra e mensahe di Bijbel riba su mes ta causa division den famia. Mas bien, ta e miembronan di famia no creyente of infiel ta causa un separacion dor cu nan ta rechasa, bandona of asta opone e caminda di cristianismo. Sinembargo, nos por ta gradicido cu Jehova si no ta laga su sirbidornan fiel sin yudansa pa enfrenta e pruebanan cu nan ta pasa aden. Si actualmente bo ta tristo pa motibo cu un ser keri a bandona Jehova, ki principionan di Bijbel por yuda bo wanta e tristesa y haya goso y contentamento?

Con pa Trata cu e Situacion

“Edificando boso mes ..., conserva boso mes den e amor di Dios.” (Hudas 20, 21) Dependiendo di bo circunstancia particular, kisas no tin nada cu bo por haci na e momentonan aki pa yuda un miembro di famia cu a stop di sirbi Jehova. No obstante, bo por y bo mester edifica bo mes y tambe cualkier miembro di famia cu a keda fiel. Veronica, kende a mira dos di su tres yiu hombernan bai for di e berdad, ta bisa: “Ami cu mi esposo a haya conseho pa nos mantene nos mes spiritualmente fuerte pa asina nos por ta den e mihor condicion pa ricibi nos yiunan bek ora nan bolbe na nan sano huicio. Con lo a para cu e yiu perdi si su tata no tabata den un condicion pa ricibie bek?”

Pa bo por mantene bo mes den un condicion fuerte, bo mester keda ocupa cu actividadnan spiritual. Esaki ta inclui mantene un programa di estudio profundo di Bijbel y asistencia na reunionnan cristian. Haci bo mes disponibel pa yuda otronan den e congregacion te na e grado cu bo circunstancianan ta permiti. Ta berdad cu na prome instante kisas bo ta haya e actividadnan ei dificil. Veronica ta corda: “Mi prome inclinacion tabata pa isola mi mes manera un bestia herida. Pero mi casa a insisti pa nos a mantene un bon rutina spiritual. El a haci sigur cu nos a bai e reunionnan. Ora tabata tempo pa asisti na un congreso, mi tabatin mester di hopi curashi pa bai y enfrenta hende. Pero, e programa a hala nos mas cerca Jehova. E congreso ei a anima specialmente nos yiu homber cu a keda fiel.”

Maria, menciona anteriormente, ta haya cu ta masha probechoso pa keda activo den sirbishi di veld y actualmente e ta studiando Bijbel cu cuater persona. Di igual manera, Laura ta bisa: “Aunke ainda mi ta yora tur dia, mi ta gradici Jehova cu mi tin e mensahe perfecto di Bijbel, cu ta capas pa yuda famianan den e ultimo dianan aki, maske mi mes no tabatin e exito cu algun mayor tin den lanta yiu.” Ken y Eleanor, kende nan yiunan adulto a bai laga e congregacion, a ahusta nan circunstancianan pa muda bai un area caminda tin mas necesidad pa publicadornan di Reino y a drenta e ministerio di tempo completo. Esaki a yuda  nan mantene asuntonan den e perspectiva corecto y evita di laga tristesa caba cu nan.

No perde speransa. Amor ‘ta spera tur cos.’ (1 Corintionan 13:7) Ken, menciona anteriormente, a bisa: “Ora nos yiunan a bai laga e berdad, mi a sinti como si fuera ta muri nan a muri. Pero despues cu mi ruman muher a fayece, mi punto di bista a cambia. Mi ta gradicido cu mi yiunan no ta literalmente morto y cu ainda Jehova tin e caminda habri pa nan bolbe na dje.” En berdad, experencia a mustra cu hopi persona cu a bandona e berdad ta bini bek cu tempo.—Lucas 15:11-24.

No culpa bo mes. Mayornan specialmente por tin tendencia di wak bek y lamenta cu nan no a atende cierto situacionnan na un manera diferente. Sinembargo, e idea principal cu Ezekiel 18:20 ta trece padilanti ta cu Jehova ta tene e pecador, y no su mayornan, responsabel pa su mal escohencia. Ta interesante pa nota cu aunke e buki di Proverbionan ta papia hopi tocante e obligacion di mayornan pa lanta nan yiunan den e caminda corecto, e ta contene cuater biaha mas tanto conseho pa hobennan scucha y obedece nan mayornan. Si, yiunan tin e responsabilidad pa sigui e guia basa riba Bijbel cu nan ta haya di nan mayornan imperfecto. Probablemente bo a atende asuntonan lo mihor cu bo tabata por na e tempo ei. Pero, maske bo ta sinti cu bo a comete cierto fayonan y cu esakinan en berdad tabata bo falta, esei no necesariamente kiermen cu ta bo fayonan a pone bo ser keri bandona e berdad. En todo caso, bo no ta gana nada dor di keda lamenta bo accionnan di pasado. Siña for di bo foutnan, sea determina pa no ripiti nan y pidi Jehova pordona bo. (Salmo 103:8-14; Isaias 55:7) Anto wak futuro, no pasado.

Tene pasenshi cu otronan. Kisas ta dificil pa algun ruman sa exactamente con pa anima bo of consola bo, specialmente si nunca nan no a yega di pasa den un experencia similar. Ademas, cada hende por tin nan concepto di kico ta anima nan of consola nan. Pues si un hende bisa algo cu ta pone bo rabia, aplica e conseho di Pablo na Colosensenan 3:13: “Soporta otro y pordona otro, si un di boso tin un keho contra un otro.”

Respeta Jehova su areglo pa disciplina. Si bo famia a ricibi disciplina di e congregacion, corda cu esaki ta parti di Jehova su areglo y cu esei ta mihor pa tur persona envolvi, incluso pa esun cu a haci malo. (Hebreonan 12:11) P’esei, resisti cualkier inclinacion pa critica e ancianonan cu tabata envolvi den e caso of e decisionnan cu nan a tuma. Corda cu e mihor resultadonan ta bini ora hende haci cosnan na e manera di Jehova; en cambio, ora nan bai contra e areglonan di Jehova esei por resulta solamente den mas sufrimento.

Despues cu Israel a ser libra for di Egipto, Moises tabata sirbi regularmente como hues. (Exodo 18:13-16) Siendo cu un huicio na fabor di un persona probablemente lo tabata contra un otro, no ta dificil pa imagina cu e decisionnan di Moises a desapunta algun hende. Critica contra Moises talbes lo a hiba na algun caso di rebeldia contra su liderato. Sinembargo, ta Jehova tabata uzando Moises pa guia Su pueblo, y El a castiga, no Moises, sino e rebeldenan y nan famianan cu a apoya nan. (Numbernan 16:31-35) E les cu nos por siña for di esaki ta cu nos tin cu haci esfuerso pa respeta y coopera cu e decisionnan cu e personanan cu tin autoridad teocratico awe ta tuma.

 Den e contexto aki, Delores ta corda con dificil tabata pa el a mantene un punto di bista balansa ora su yiu muher a ricibi disciplina di e congregacion. E ta bisa: “Loke a yuda mi tabata pa lesa bes tras bes e articulonan cu a splica con rasonabel Jehova su areglonan ta. Mi a traha un buki di nota special di puntonan cu mi a haya den discursonan y articulonan cu lo a yuda mi wanta y sigui padilanti.” Esaki ta hiba na un otro medio importante cu ta yuda bo wanta.

Expresa bo sintimentonan. Talbes lo bo haya ta probechoso pa desahoga bo mes cerca un of dos amigo di confiansa cu por compronde bo. Scohe amigo cu lo yuda bo mantene un actitud positivo. Sin duda lo ta mucho mas efectivo pa ‘drama bo curason’ den oracion na Jehova. * (Salmo 62:7, 8) Pakico? Pasobra e ta compronde completamente e profundidad di bo sintimentonan. Por ehempel, kisas bo ta sinti cu ta inhusto cu bo mester pasa den e angustia emocional ei. Al fin y al cabo, no ta abo a bandona Jehova. Papia di bo sintimentonan cu Jehova y pidie yuda bo mira e situacion den un manera menos doloroso.—Salmo 37:5.

Segun cu tempo ta pasa, probablemente lo bo por controla bo sintimentonan mihor. Mientrastanto, sigui haci esfuerso pa agrada bo Tata celestial, y nunca sinti cu esaki ta en vano. (Galationan 6:9) Corda, si nos bandona Jehova, esei no ta libra nos di problema. Di otro banda, dor di keda leal na dje, e ta yuda nos soporta e pruebanan cu nos ta enfrenta. Bo por ta sigur anto cu Jehova ta compronde con dificil bo situacion ta y lo e sigui duna bo e forsa necesario na e momento cu bo tin mester di dje.—2 Corintionan 4:7; Filipensenan 4:13, NW; Hebreonan 4:16.

[Nota]

[Cuadro na pagina 19]

Con pa Trata cu e Situacion

◆ “Edificando boso mes ..., conserva boso mes den e amor di Dios.”—Hudas 20, 21.

◆ No perde speransa.—1 Corintionan 13:7.

◆ No culpa bo mes.—Ezekiel 18:20.

◆ Tene pasenshi cu otronan.—Colosensenan 3:13.

◆ Respeta Jehova su areglo pa disciplina.—Hebreonan 12:11.

◆ Expresa bo sintimentonan.—Salmo 62:7, 8.

[Cuadro/Plachi na pagina 21]

Abo A Bandona Jehova?

Si ta asina, sea cual sea e motibo, bo relacion cu Jehova y bo speransa pa haya bida eterno ta na peliger. Talbes bo tin intencion di bolbe na Jehova. Bo ta haciendo esfuerso cu empeño pa logra esaki aworaki? Of bo ta posponiendo esei te na “e momento apropia”? Corda, e nubianan di Armagedon ta acercando rapidamente. Ademas, bida den e sistema di cosnan aki ta cortico y insigur. Bo no sa mes si bo ta na bida mañan. (Salmo 102:3; Santiago 4:13, 14) Un homber cu tin un malesa incurabel a bisa: “Mi a haya e enfermedad aki mientras mi tabata sirbiendo Jehova tempo completo, sin nada riba mi consenshi. Y esei ta un cos cu ta laga mi sinti mi bon aworaki.” Pero imagina bo con lo el a sinti si el a haya e enfermedad ora e tabata bisando: “Un dia lo mi bolbe na Jehova!” Si bo a bandona Jehova, awor ta e mihor tempo pa bolbe bek.

[Plachi na pagina 18]

Loke por yuda bo mantene e perspectiva corecto ta kedando ocupa den actividadnan spiritual