“Pa Motibo di un Hobensito di Nuebe Aña”

KI ORA cu Testigonan di Jehova a yega na porta di Wiesława, kende ta biba na sur Polonia, e tabata gradici nan cortesmente pero tabata nenga di combersa cu nan. Un dia, Samuel, di nuebe aña di edad, a pasa na Wiesława su cas hunto cu su mama. E biaha aki si Wiesława a dicidi di scucha e mensahe y a acepta un revista tocante un paradijs riba tera.

Debi cu e Conmemoracion di e morto di Hesucristo tabata acercando, Samuel kier a invita Wiesława na e ocasion special aki. Pues, acompaña pa su mama, e hobensito a bolbe bishit’e, e biaha aki cu un invitacion imprimi. Mirando con bon bisti e mucha tabata, Wiesława a pidi nan despens’e un rato y el a bai cambia paña. Ora el a bin bek, el a scucha Samuel, a acepta e invitacion y a puntra: “Mi mester bini mi so of hunto cu mi casa?” Anto el a agrega: “Asta si mi casa no bini, ami si lo bini. Mi ta hacie pa bo, Samuel.” Pa Samuel su gran alegria, Wiesława a cumpli cu su palabra.

Durante e discurso di Conmemoracion, Samuel a sinta banda di Wiesława y a mustr’e e textonan cu tabata ser considera. Esaki a impresiona Wiesława. El a gusta e Conmemoracion y a aprecia con e orador a splica pensamentonan profundo cu palabranan simpel. Ademas, e recepcion caluroso y e amabilidad cu e congregacion a mustra na dje, a conmov’e. For di e dia ei, Wiesława a mustra mas y mas aprecio pa cosnan spiritual y a cuminsa asocia cu Testigonan di Jehova regularmente. Recientemente el a bisa: “Mi tin berguensa cu antes mi no tabata scucha ora boso tabata bin na mi porta. Y mi tin cu admiti cu mi a scucha boso mensahe unicamente pa motibo di un hobensito di nuebe aña, pa motibo di Samuel.”

Mescos cu Samuel di Polonia, hopi otro Testigo di Jehova jong ta alaba Dios cu palabra y pa medio di nan bon manera y conducta excelente. Si bo ta un hoben, bo tambe por yuda personanan sincero mustra interes den balornan spiritual saludabel.