E Palabra di Jehova Ta Bibo

Puntonan Sobresaliente di Buki Cinco di Salmonan

HENDE rico kisas ta bisa: “Nos yiu hombernan den nan hubentud ta manera mata cu a crece bira grandi, y nos yiu muhernan manera pilarnan di skina, traha manera pa un palacio; laga nos mangasinanan ta yen ... y nos carnenan rende bira milnan.” Ademas, kisas hende rico ta grita cu nan ta bendiciona debi na loke nan tin. Sinembargo, e salmista na contraste ta bisa: “Felis ta e pueblo kende su Dios ta Jehova!” (Salmo 144:12-15; NW) Esei no por ta otro! Jehova ta e Dios felis, y consecuentemente e personanan cu ta ador’e tambe ta felis. (1 Timoteo 1:11, NW) E berdad aki ta bira bisto den e ultimo coleccion di canticanan inspira pa Dios, consistiendo di Salmonan 107 te cu 150.

Buki Cinco di Salmonan ta enfatisa tambe Jehova su cualidadnan sobresaliente, incluso su misericordia, berdad y bondad. Mas nos ta compronde Dios su personalidad, mas nos ta inclina na stim’e y tem’e. Esaki na su turno ta contribui na nos felicidad. Esta un mensahe valioso nos ta haya den Buki Cinco di Salmonan!—Hebreonan 4:12.

FELIS DEBI NA JEHOVA SU MISERICORDIA

(Salmo 107:1–119:176)

E Hudiunan exilia cu a regresa for di nan cautiverio na Babilonia a canta: “Laga nan duna gradicimento na SEÑOR pa su misericordia, y pa su maraviyanan na e yiunan di hende!” (Salmo 107:8, 15, 21, 31) Alabando Dios, David a canta: “Bo berdad ta yega te na e nubianan.” (Salmo 108:4) Den e siguiente salmo, el a pidi den oracion: “Yuda mi, o SEÑOR mi Dios; salba mi segun bo misericordia.” (Salmo 109:18, 19, 26) Salmo 110 ta un descripcion profetico di e gobernacion di e Mesias. Salmo 111:10 ta declara: ‘E temor di Jehova ta e principio di sabiduria.’ Anto segun e siguiente salmo, bendiciona of ‘felis ta e hende cu ta teme Jehova.’—Salmo 112:1.

Salmonan 113 te cu 118 ta ser yama e Salmonan di Halel, pasobra bes tras bes nan ta uza e expresion “Aleluya”, es decir “Alaba Jah!” [NW] Mishna, un obra skirbi di siglo 3 cu a registra e tradicion oral di antiguedad, ta bisa cu e Hudiunan tabata canta e canticanan aki durante nan Pasco y e tres fiestanan anual. E salmo y a la bes e capitulo di mas largo den Bijbel, Salmo 119, ta engrandece Jehova su palabra of mensahe revela.

Contesta Riba Pregunta Biblico:

109:23—Kico David tabata kiermen ora el a bisa: “Mi ta pasa bai manera un sombra di atardi”? Den forma poetico David tabata bisa cu e ta sinti cu su morto ta hopi cerca.—Salmo 102:11.

110:1, 2—Kico Hesucristo, e “Señor” di David, a haci mientras e tabata sinta na man drechi di Dios? Despues cu Hesus a ser resusita el a subi na shelo y a sinta warda na Dios su man drechi te na aña 1914 pa e cuminsa goberna como Rei. Durante e tempo ei, Hesus a goberna riba su siguidonan ungi, guiando nan den nan trabou di predica y haci discipel y tambe preparando nan pa goberna hunto cu ne den su Reino.—Mateo 24:14; 28:18-20; Lucas 22:28-30.

 110:4—Tocante kico Jehova a ‘hura sin arepenti’? E huramento aki ta e pacto cu Jehova a sera cu Hesucristo pa sirbi como Rei y Sumo Sacerdote.—Lucas 22:29, NW.

113:3—Den ki sentido mester alaba Jehova su nomber “for di ora solo sali te ora cu e drenta”? Esaki ta ensera mas cu un grupo di persona cu ta adora Dios tur dia. For di caminda solo ta sali den oost te caminda e ta drenta den west, e rayonan di solo ta ilumina henter e planeta. Asina tambe Jehova mester ser alaba rond mundo. Esaki no por ser logra sin un esfuerso organisa. Como Testigonan di Jehova, nos tin e privilegio precioso di alaba Dios y participa cu entusiasmo den e trabou di proclama e Reino.

116:15—Con ‘precioso den bista di Jehova ta e morto di su santonan’ of “lealnan” [NW]? E personanan cu ta adora Jehova ta asina precioso p’e cu e ta considera morto di henter e grupo di adorado leal como un prijs mucho halto pa e paga. Si Jehova mester laga esei sosode, lo ta como si fuera su enemigonan ta mas poderoso cu ne. Ademas, e ora ei lo no resta ningun hende riba tera pa forma e fundeshi di e mundo nobo.

119:71—Ki bon por tin den sufri afliccion? Afliccion por siña nos confia mas plenamente den Jehova, haci oracion mas sincero na dje y bira mas diligente den studia Bijbel y aplica loke e ta bisa. Es mas, e manera cu nos ta reacciona riba afliccion por revela fayonan den nos personalidad cu nos por corigi. Sufrimento lo no haci nos amarga si nos lag’e refina nos.

119:96—Kico Bijbel kiermen cu “un limite na tur perfeccion”? E salmista tabata papia di perfeccion for di un punto di bista humano. Probablemente e tabatin na mente cu hende su idea di perfeccion ta limita. Na contraste, Dios su mandamento no tin tal limite. Su guia ta aplica na tur aspecto di bida. Beibel na papiamentu koriente ta bisa: “M’a mira fin di tur loke ta perfecto, ma bo mandato ta sin limite.”

119:164—Kico ta e importancia di alaba Dios “shete biaha pa dia”? Den Bijbel, number shete hopi biaha ta indica un cos completo. Pues, e salmista tabata kiermen cu Jehova merece tur alabansa.

Les pa Nos:

107:27-31. E sabinan di mundo lo keda “man na cabes” ora cu Armagedon dal aden. (Revelacion 16:14, 16) Nan sabiduria no por salba ningun hende for di destruccion. Solamente esnan cu acudi na Jehova pa salbacion lo biba pa “duna gradicimento na [Jehova] pa su misericordia.”

109:30, 31; 110:5. Normalmente un solda su man drechi no tin e proteccion di su escudo cu e ta tene den su man robes, pasobra e tin cu bringa cu su spada den su man drechi. Figurativamente, Jehova ta “na man drechi” di su sirbidornan, pa bringa pa nan. Pues e ta duna nan proteccion y yudansa, locual ta un motibo excelente pa nos “duna masha hopi gradicimento” y alabansa na dje.

113:4-9. Jehova ta asina eleva cu e tin cu humilia su mes asta “pa mira e cosnan cu ta den shelo.” Sinembargo, e ta tene compasion cu hende pober, esnan den necesidad y e muher steril. Señor Soberano Jehova ta humilde y kier pa su adoradonan tambe ta asina.—Santiago 4:6.

114:3-7. Loke nos ta siña tocante e obranan maraviyoso cu Jehova a haci na fabor di su pueblo na Lama Cora, na Riu Jordan y na Sero Sinai, lo mester tin un influencia profundo riba nos. Humanidad, representa pa “tera”, en realidad mester ta sumamente impresiona—figurativamente mester ta “tembla”—den presencia di Señor.

119:97-101. E sabiduria y comprondemento cu nos ta adkiri for di e Palabra di Dios ta proteha nos for di daño spiritual.

119:105. E Palabra di Dios ta un lampi pa nos pia den e sentido cu e por yuda nos trata cu problemanan actual. Tambe den sentido figurativo e ta lusa nos caminda, ya cu di antemano e ta bisa kico ta Dios su proposito pa futuro.

 FELIS A PESAR DI ADVERSIDAD

(Salmo 120:1–145:21)

Con nos por confronta circunstancianan dificil y sobrevivi adversidad? Salmonan 120 te cu 134 ta duna un contesta cla riba e pregunta aki. Nos ta sobrevivi dificultad y keda cu nos goso dor di acudi na Jehova pa yudansa. E salmonan aki, yama Cantica di Subidanan, probablemente tabata ser canta segun cu e Israelitanan tabata subi bai Jerusalem pa celebra nan fiestanan anual.

Salmo 135 y 136 ta describi Jehova como Esun cu ta haci loke sea cu ta agrad’e, na contraste skerpi cu idolonan indefenso. Salmo 136 a ser componi pa canta y un coro ta responde, e ultimo parti di cada versiculo tabata ser canta como contesta riba e prome parti. E siguiente salmo ta conta con kibra e curason di e Hudiunan den Babilonia tabata, ya cu nan kier a adora Jehova na Sion. Salmonan 138 te cu 145 ta di David. E kier a ‘alaba Jehova cu henter su curason.’ Dicon? “Pasobra mi ta traha na un manera temerosamente maraviyoso”, el a bisa. (Salmo 138:1; 139:14) Den Salmo 140 pa 144, David ta pidi Dios pa proteh’e for di mal hende, pa dun’e reprendemento husto, pa libr’e for di persiguido y pa dun’e guia den conducta. E ta enfatisa e felicidad di e pueblo di Jehova. (Salmo 144:15) Despues di repasa Dios su grandesa y bondad, David ta declara: “Mi boca lo papia di e alabansa di [Jehova]; y tur carni lo bendiciona su nomber santo pa semper y semper.”—Salmo 145:21.

Contesta Riba Pregunta Biblico:

122:3—Con Jerusalem tabata un stad “traha cu cas un riba otro”? E frase “traha cu cas un riba otro” a ser traduci tambe como “bon construi segun plan harmonioso.” (BPK) Manera tabata por lo general e caso den stadnan di tempo antiguo, e casnan den Jerusalem tabata traha hopi pega cu otro. E stad tabata compacto y p’esei facil pa defende. Ademas, e echo cu e casnan tabata pega cu otro a haci posibel cu e habitantenan por a steun riba otro pa haya yudansa y proteccion. Esaki a representa e union spiritual di e 12 tribunan di Israel ora cu nan a reuni hunto pa adoracion.

123:2—Kico ta e punto di e ilustracion tocante wowo di sirbidornan? Sirbidornan y sirbientenan tabata wak man di nan shon of señora pa dos motibo: pa determina kico e ta desea y pa haya proteccion y e necesidadnan di bida. Di igual manera, nos wowo ta riba Jehova pa saca afo kico ta su boluntad y pa haya su aprobacion.

131:1-3—Con David a ‘calma y trankilisa su alma manera un mucha kita for di pecho cu ta drumi cerca su mama’? Mescos cu un mucha kita for di pecho ta siña haya consuelo y satisfaccion den brasa di su mama, asina David a siña calma y trankilisa su alma ‘manera un mucha kita for di pecho cu ta drumi cerca su mama.’ Con? Dor di no tin un curason orguyoso ni wowo arogante ni busca cosnan mucho grandi pa su mes. En bes di busca prominencia, David por lo general a reconoce su limitacionnan y a desplega humildad. Lo ta sabi di nos parti pa imita su actitud, specialmente ora cu nos ta haci esfuerso pa alcansa privilegionan den e congregacion.

Les pa Nos:

120:1, 2, 6, 7. Papia mentiranan malicioso y cosnan sarcastico por causa angustia insoportabel pa otro hende. Tene nos lenga bou di control ta un manera pa demostra cu nos “ta pa pas.”

 120:3, 4. Si nos tin cu soporta un persona cu tin un “lenga engañoso”, nos por haya consuelo den e echo cu Jehova lo rectifica asuntonan na su debido tempo. Calumniadonan lo sufri calamidad na man di “un guerero.” Siguramente nan lo ricibi Jehova su huicio ardiente simbolisa pa e cayente di “carbon di mata di enebro.”

127:1, 2. Den tur nos esfuersonan, nos mester acudi na Jehova pa duna nos guia.

133:1-3. E union cu tin den Jehova su pueblo ta trankilisante, edificante y refrescante. Nos no mester perturba e union ei dor di cana piki pieu, pleita of keha.

137:1, 5, 6. Adoradonan di Jehova den exilio a sinti un apego pa Sion cu e tempo ei tabata e parti terenal di Dios su organisacion. Kico di nos? Nos ta pega lealmente na e organisacion cu Jehova ta uzando awe?

138:2. Jehova ta ‘engrandece su palabra riba henter su nomber’, den e sentido cu e cumplimento di tur loke el a priminti den su nomber lo surpasa masha hopi mes cualkier expectativa cu nos lo por tin. En berdad, tin cosnan magnifico ta warda nos den futuro.

139:1-6, 15, 16. Jehova conoce nos actividadnan, nos pensamentonan y nos palabranan asta prome cu nos papia nan. E conoce nos for di ora cu nos tabata un substancia sin forma den matris, prome cu cada parti di e curpa a bira bisto. E conocemento cu Dios tin di nos cada un individualmente ta “mucho maraviyoso” pa nos compronde. Ta un gran consuelo pa sa cu Jehova no solamente ta mira un situacion dificil cu kisas nos ta confrontando sino tambe cu e ta compronde ki efecto esei tin riba nos!

139:7-12. No tin un luga cu nos por bai cu ta mucho leu pa Dios fortalece nos.

139:17, 18. Conocemento di Jehova a bira un cos agradabel pa nos? (Proverbionan 2:10) Si ta asina, anto nos a haya un fuente inagotabel di goso. Jehova su pensamentonan ta “surpasa e pipitanan di santo.” Semper lo tin mas cos cu nos por siña tocante Jehova.

139:23, 24. Nos deseo lo mester ta pa Jehova samina e persona cu nos ta di paden pa wak si den nos tin cualkier “caminda di maldad”—esta, mal pensamento, deseo y inclinacion—y yuda nos elimina nan.

143:4-7. Con nos por soporta asta dificultadnan pisa? E salmista ta duna nos e yabi: Medita riba e actividad di Jehova, tene nos mes ocupa cu su obranan y pidi su yudansa den oracion.

“Alaba Jah”

Cada un di e prome cuater coleccionnan di salmo a termina cu un expresion di alabansa na Jehova. (Salmo 41:13; 72:19, 20; 89:52; 106:48) E coleccion final no ta un excepcion. Salmo 150:6 [NW] ta declara: “Tur cos cu ta hala rosea—alaba Jah. Boso alaba Jah!” Esei en berdad lo bira un realidad den Dios su mundo nobo.

Segun cu nos ta spera cu anhelo riba e tempo bendiciona ei, nos tin hopi motibo pa glorifica e Dios berdadero y alaba su nomber. Ora nos pensa riba e felicidad cu nos ta experencia pasobra nos conoce Jehova y tin un bon relacion cu ne, nos no ta sinti nos mes motiva pa alab’e cu un curason gradicido?

[Plachi na pagina 15]

Jehova su obranan maraviyoso ta inspira temor

[Plachi na pagina 16]

Jehova su pensamentonan ta “surpasa e pipitanan di santo”