“Cuanto Mi Ta Stima Bo Lei!”

SALMO 119 ta un cantica cu ta expresa e sintimentonan cu e compositor tabatin pa cu e palabra of mensahe inspira di Dios. E salmista a canta: “Bo palabra mi a sconde den mi curason.” “Lo mi tin delicia den bo estatutonan.” “Mi alma ta muri di anhelo pa bo ordenansanan na tur momento.” “Bo testimonionan tambe ta mi delicia.” “Mi ta anhela na bo preceptonan.” “Lo mi tin delicia den bo mandamentonan cu mi ta stima.” “Lo mi medita den bo estatutonan.” “Cuanto mi ta stima bo lei! E ta mi meditacion henter dia.”—Salmo 119:11, 16, 20, 24, 40, 47, 48, 97.

Ki un gran aprecio e salmista tabatin pa Dios su palabra revela! Abo tin e mesun sintimento aki pa cu e mensahe di Bijbel, e Palabra di Dios? Lo bo kier haya delicia den dje? Si ta asina, bo tin cu desaroya na prome luga e custumber di lesa Bijbel regularmente, si ta posibel tur dia. Hesucristo a bisa: “Hende lo no biba di pan so, ma di tur palabra cu ta sali for di boca di Dios.” (Mateo 4:4) Na di dos luga, bo tin cu medita riba loke bo ta lesa. Dor di medita riba e berdad tocante Dios, su cualidadnan, su boluntad y su proposito, lo bo haya mas aprecio pa Bijbel. (Salmo 143:5) Y mas importante ainda, aplica su conseho sano den bo bida di tur dia.—Lucas 11:28; Juan 13:17.

Ora bo tin delicia den e mensahe di Bijbel, con esei lo beneficia bo? Salmo 119:2 ta bisa: “Bendiciona ta esnan cu ta warda [Dios] su testimonionan.” E testimonionan of recordatorionan haya den Bijbel lo yuda bo enfrenta problemanan di bida cu exito. (Salmo 1:1-3) Lo bo haya e sabiduria y comprondemento cu lo yuda bo frena of ‘detene bo pianan for di tur mal caminda.’ (Salmo 119:98-101) E echo cu bo sa e berdad tocante Dios y su proposito pa e tera lo duna bo bida mas sentido y un speransa mas briyante pa futuro.—Isaias 45:18; Juan 17:3; Revelacion 21:3, 4.

Testigonan di Jehova ta masha interesa den yuda otro hende conoce Bijbel mihor y haya un amor pa su mensahe. Nos ta invita bo calurosamente pa acepta e siguiente oferta.