Bijbel Tin Mucho Restriccion?

“COMO mucha, nan no a siña mi ningun norma di Bijbel. Nunca nos no tabata papia mes tocante Dios”, un yoncuman di Finlandia a conta. E tipo di criansa ei no ta algo straño awe. Hopi hende, specialmente hobennan, ta haya cu Bijbel ta sumamente anticua y cu su conseho ta mucho restrictivo. Den nan bista, personanan cu kier biba segun Bijbel ta hende oprimi cu ta hiba un bida carga cu restriccion y mandamento pa cumpli cu ne. Pues, hopi ta haya cu ta mihor laga Bijbel keda riba reki y busca guia otro caminda.

E punto di bista ei tocante Bijbel ta debi principalmente na e historia largo di opresion di parti di religionnan di cristiandad. Por ehempel, den e periodo cu algun historiado a yama e Epoca di Scuridad, Iglesia Catolico na Europa a domina practicamente tur aspecto di bida di hende. Ken cu a tribi di bai contra iglesia a core peliger di ser tortura y asta ehecuta. E iglesianan protestant cu a lanta despues tambe a restringi libertad personal. Awe, pa hende cu conoce e religionnan ei, nombernan manera “calvinista” of “puritano” ta pone nan corda no solamente e siguidonan di cierto creencia sino tambe e disciplina severo asocia cu e gruponan ei. Consecuentemente, pa motibo cu e religionnan tabata opresivo, hende ta conclui eroneamente cu e siñansanan di Bijbel lo mester ta opresivo.

Den siglonan recien, iglesia a perde gran parti di su gara riba bida di hende, por lo menos den algun pais. Como consecuencia di e rechaso di creencianan religioso tradicional, a desaroya e nocion cu hende tin e derecho di dicidi pa nan mes loke ta bon y loke ta malo. Cu ki resultado? Ahti Laitinen, un profesor di criminologia y sociologia hudicial, ta splica: “Respet pa autoridad a mengua, y hende su comprondemento di loke ta aceptabel y loke no ta aceptabel ta birando mas vago.” Pa straño cu por parce, asta lidernan di iglesia a adopta e forma di pensa aki. Un obispo luterano prominente a declara: “Mi tin e tendencia di rechasa e idea di cu pa resolve cuestionnan moral mester habri Bijbel of acudi na un ke otro autoridad religioso.”

Libertad sin Limite Ta Deseabel?

E idea di por gosa di libertad sin limite por parce algo deseabel, specialmente pa hobennan. Ta ken gusta pa ser trata como inferior of biba segun un lista largo di regla tocante kico mag y kico no mag? Pero esei ta nifica cu tur hende mester ta liber pa haci loke nan kier? Pa contesta e pregunta aki, pensa riba lo siguiente. Imagina bo un stad caminda no tin regla di trafico. No tin mester di rijbewijs ni pasa examen pa core auto. Hende por core  manera nan kier, asta ora nan ta burachi, sin tin nodi precupa cu velocidad maximo, borchi di stop, lus di trafico, caya di un solo direccion of zebrapad. Tal “libertad” lo ta deseabel? Claro cu no! Esei lo hiba na caos, confusion y desaster. Aunke reglanan di trafico ta restringi hende su libertad, nos ta compronde cu nan t’ei pa proteha tanto chauffeur como hende na pia.

Asina tambe, Jehova ta duna guia encuanto con nos mester biba, y esei ta pa nos beneficio. Sin e guia ei, nos lo tin cu siña dor di purba esaki y purba esaya, y den e proceso ei, nos por haci daño na nos mes y na otro hende. Tal ambiente di anarkia moral lo ta mesun indeseabel y peligroso cu core auto den un stad sin regla di trafico. Echo ta cu nos mester di regla y lei; esei ta algo cu mayoria hende ta reconoce mesora.

“Mi Carga Ta Lihe”

Leinan di trafico por ensera un lista largo y detaya di regla—den algun stad e cantidad di regla pa parker so caba ta asombroso. Na contraste, Bijbel no ta stipula un lista largo di regla. Mas bien, e ta establece principionan basico, y esakinan no ta pisa ni opresivo. Hesucristo a extende un invitacion atractivo na su contemporaneonan: “Bin cerca mi tur cu ta cansa y carga, y lo mi duna boso sosiego. Pasobra mi yugo ta suave y mi carga ta lihe.” (Mateo 11:28, 30) Den un carta dirigi na e congregacion cristian na Corinto, apostel Pablo a skirbi: “Caminda e spirito di SEÑOR ta, ei tin libertad.”—2 Corintionan 3:17.

Sinembargo, e libertad ei no ta sin limite. Hesus a mustra bon cla cu e rekisitonan di Dios ta ensera algun mandamento simpel. Por ehempel, Hesus a bisa su discipelnan: “Esaki ta mi mandamento, cu boso stima otro mescos cu ami a stima boso.” (Juan 15:12) Imagina con bida lo ta si tur hende ta cumpli cu e mandamento ei! Pues, e libertad cu cristiannan ta disfruta di dje no ta sin limite. Apostel Pedro a skirbi: “Actua como hende liber, y no uza boso libertad como un capa pa maldad, ma uz’e como esclabonan di Dios.”—1 Pedro 2:16.

Pues, maske cristiannan no ta mara na un lista largo di lei, nan no ta actua a base di nan mes ideanan di loke ta bon y malo. Hende mester di e guia cu Dios so por duna. Bijbel ta bisa bon cla: “E caminda di hende no ta di dje mes; tampoco no ta keda na hende pa dirigi su pasonan.” (Jeremias 10:23) Si nos sigui e guia di Dios, esei lo beneficia nos hopi.—Salmo 19:11.

Un di e beneficionan ei ta felicidad. Por ehempel, e yoncuman menciona na principio tabata un ladron y un gañado. Ademas, e tabata hiba un bida promiscuo. Ora el a siña e normanan halto di Bijbel, el a cambia su estilo di bida y a cuminsa biba segun esakinan.  El a bisa: “Aunke mi no por a cumpli cu tur e normanan di Bijbel mesora, mi a mira nan balor si. E manera cu mi tabata biba antes no a duna mi e felicidad cu mi tin aworaki. Biba segun normanan di Bijbel ta simplifica bo bida. Bo sa den ki direccion bo ta bayendo y kico ta bon y kico ta malo.”

Miyones di hende tabatin e mesun experencia. Un di e beneficionan ta cu e guia cu nan a haya den Bijbel a yuda nan disfruta di mihor relacionnan humano, cultiva un punto di bista balansa di trabou, abstene di custumbernan cu ta perhudicial y asina hiba un bida mas felis. Markus, * un yoncuman cu un tempo no tabata sigui e normanan di Bijbel, a bisa di su bida: “Dor di biba segun Bijbel, mi a haya mas respet propio.” *

Kico Abo Lo Scohe?

Pues Bijbel ta pone restriccion? E contesta ta si; esei ta pa beneficio di nos tur. Pero, e ta pone mucho restriccion? E contesta ta no. Libertad sin limite ta hiba solamente na dificultad. E normanan di Bijbel ta balansa, y nan ta promove nos bienestar y felicidad. Markus a bisa: “Tempo a demostra mi cu ta sabi berdad pa biba segun e Palabra di Dios. Aunke den hopi sentido mi bida ta diferente for di hende en general, mi no ta pensa ningun momento so cu mi a perde algo cu ta bale la pena den bida.”

Ora bo cuminsa ricibi e bendicionnan di biba segun e normanan di Bijbel, bo aprecio pa e Palabra di Dios lo aumenta. Esaki lo hiba na un bendicion mas grandi ainda; lo bo bin stima Bijbel su Fuente Divino, Jehova Dios. “Esaki ta e amor di Dios, cu nos ta warda su mandamentonan; y su mandamentonan no ta pisa.”—1 Juan 5:3.

Jehova ta nos Creador y nos Tata celestial. E sa kico ta mihor pa nos. En bes di restringi nos, e ta duna nos guia amoroso pa nos mes bon. Uzando palabranan poetico, Jehova ta urgi nos: “Mara bo a pone atencion na mi mandamentonan! E ora ei bo pas lo tabata manera un riu, y bo husticia manera ola di lama.”—Isaias 48:18.

[Nota]

[Plachi na pagina 9]

Hesus a bisa cu e rekisitonan di Dios lo ta refrescante

[Plachi na pagina 10]

Ora hende ta sigui e guia di Dios, nan ta haya felicidad y respet propio