Bo Por Biba pa Semper

E GRAN mayoria di creyente den e religionnan di mundo ta carga e speransa di bida eterno den un of otro forma. Kisas cada religion tin su propio version di esaki, pero e speransa ta basicamente mescos: biba felismente den condicionnan ideal sin e menasa di morto. Esei no ta loke abo tambe ta desea? Con bin tin asina tanto hende cu e creencia ei? Y e speransa di bida eterno lo bira realidad un dia?

E Scritura ta mustra cu for di ora cu Dios a crea e prome pareha humano, el a inculca profundamente den nan conciencia e deseo di biba pa semper. Bijbel ta bisa cu Dios “a pone eternidad den nan curason.”—Eclesiastes 3:11.

Sinembargo, pa cumpli cu e deseo di biba pa semper, e prome pareha humano mester a acepta e autoridad di Dios pa dicidi loke ta bon y loke ta malo. Si nan a haci esei, Jehova lo a husga nan digno pa “biba pa semper” den e hogar cu el a prepara pa nan, esta, e hofi di Eden.—Genesis 2:8; 3:22.

Bida Eterno A Bai Perdi

E registro di Bijbel ta mustra cu Dios a planta den e hofi “e palo di conocemento di bon y malo”, y el a prohibi Adam cu Eva di come di su fruta. Si nan a come di dje, nan lo a haya castigo di morto. (Genesis 2:9, 17) Si Adam cu Eva a evita di come di e fruta ei, nan lo a mustra Dios cu nan a reconoce su autoridad. Di otro banda, dor di come di e fruta, nan lo a indica cu nan a rechasa Dios su autoridad. Adam cu Eva a desobedece e instruccionnan di Jehova y a uni cu Satanas, un criatura spiritual cu a rebela contra e autoridad di Dios. Como resultado, Dios a determina corectamente cu Adam y Eva no tabata den condicion mas pa biba pa semper.—Genesis 3:1-6.

Loke Dios a ofrece tabata bida of morto, existencia of inexistencia. Desobediencia lo a hiba na morto y e fin completo di nan existencia. No tabatin ni un bebida magico cu por a laga Adam cu Eva of nan desendientenan sigui biba, ni nan no tabatin un alma inmortal. *

Tur descendiente di Adam a sufri pa motibo di su rebelion. Apostel Pablo a splica e consecuencianan. El a skirbi: “Dor di un hende pica a drenta den mundo, y morto dor di pica, y asina morto a pasa pa tur hende, pasobra tur a peca.”—Romanonan 5:12.

Bida Eterno Ta Ser Recobra

Apostel Pablo a ilustra e condicion di e desendientenan di Adam dor di compar’e cu esun di un esclabo di prome siglo. Pa motibo di pica hereda, e  yiunan di Adam cu Eva a nace inevitablemente como “esclabo di pica”, destina pa muri. (Romanonan 5:12; 6:16, 17) Esei lo tabata inevitabel berdad si no tabata pa e solucion legal cu Jehova a percura pa cumpra e libertad di e esclabonan ei. Pablo a splica: “Mescos cu un transgresion [esun di Adam] a trece condenacion pa tur hende, asina tambe un echo di husticia a trece hustificacion di bida pa tur hende.” E “echo di husticia” ei a hiba na e sacrificio cu Hesus a haci di su curpa humano perfecto como “e prijs di rescate pa tur hende.” Jehova a reconoce e poder legal di e rescate pa libra humanidad for di e “huicio” di “condenacion.”—Romanonan 5:16, 18, 19; 1 Timoteo 2:5, 6.

Pa e motibo ei cientificonan hamas lo por haya e solucion pa bida eterno den e codigo genetico di hende. E solucion ta un otro caminda. Segun Bijbel, e causa basico di morto di humanidad ta un cuestion moral y legal, no biologico. E medio pa restaura bida eterno—e sacrificio di rescate di Hesus—tambe ta uno legal. E rescate ta un manifestacion tambe di e husticia y bondad amoroso di Dios. Ken anto lo beneficia di e rescate y ricibi bida eterno?

E Don di Inmortalidad

Jehova Dios ta “for di eternidad te na eternidad.” E ta inmortal. (Salmo 90:2) E prome persona na ken Jehova a duna e don di inmortalidad tabata Hesucristo. Apostel Pablo a splica: “Cristo, siendo lanta for di e mortonan, lo no muri nunca mas; morto no tin dominio mas riba dje.” (Romanonan 6:9) En berdad, haciendo un contraste entre Hesus resusita y gobernantenan riba tera, Pablo a describie como e unico persona entre nan cu tin inmortalidad. Hesus lo “biba pa semper.” Su bida ta “indestructibel.”—Hebreonan 7:15-17, 23-25; 1 Timoteo 6:15, 16.

Hesus no ta e unico persona cu a ricibi e don ei. Cristiannan ungi cu spirito santo cu a wordo scohi pa goberna como rei den gloria celestial ta ricibi e mesun clase di resureccion cu Hesus a haya. (Romanonan 6:5) Apostel Juan a mustra cu e privilegio aki ta ser otorga  na 144.000 persona. (Revelacion 14:1) Nan tambe ta ricibi inmortalidad. Relaciona cu nan resureccion, Pablo a bisa: “Carni y sanger no por hereda e reino di Dios ... Trompet lo zona, y e mortonan lo wordo lanta den incorupcion, y nos lo wordo transforma. Pasobra e loke ta coruptibel aki mester wordo bisti cu loke ta incoruptibel, y e loke ta mortal aki mester wordo bisti cu loke ta inmortal.” Morto no tin dominio riba esnan cu ta ricibi un resureccion asina.—1 Corintionan 15:50-53; Revelacion 20:6.

E revelacion divino aki en berdad ta remarcabel. Ni e angelnan, a pesar cu nan ta criaturanan spiritual, no a ser crea inmortal. Nos por conclui esaki for di e echo cu e criaturanan spiritual cu a uni cu e rebelion di Satanas lo ser ehecuta. (Mateo 25:41) Di otro banda, e cogobernantenan di Hesus ta ricibi e don di inmortalidad, locual ta un prueba di e confiansa firme cu Jehova tin den nan fieldad.

Esaki ta nifica cu ta 144.000 persona so, un grupo relativamente chikito na comparacion cu e miles di miyones di hende cu a yega di biba, lo haya bida eterno? No. Laga nos mira dicon.

Bida Eterno den un Paradijs Riba Tera

E buki biblico di Revelacion ta describi e bunita escena di un multitud grandi incontabel di hende cu ta haya bida eterno den un paradijs riba tera. Hunto cu nan tin personanan cu a muri pero cu a resusita y recobra nan salud y vigor hubenil. (Revelacion 7:9; 20:12, 13; 21:3, 4) Nan ta ser hiba na “un riu di e awa di bida, transparente manera cristal, cu tabata sali for di e trono di Dios.” Na oriyanan di e riu tin “palo di bida ... y e blachinan di e palo tabata pa e curamento di e nacionnan.” Jehova Dios ta extende e invitacion bondadoso aki: “Laga esun cu tin sed, bin; laga esun cu kier, tuma e awa di bida pornada.”—Revelacion 22:1, 2, 17.

E palo- y awanan aki no ta ningun cura lo todo of fontein di hubentud, manera esnan cu hopi siglo pasa alkimistanan (practicante di ciencia kimico di Edad Medio) y exploradonan tabata busca. Mas bien, nan ta representa e provisionnan di Dios pa medio di Hesucristo pa restaura humanidad na e condicion perfecto cu tabata existi originalmente.

E proposito di Dios pa duna humanidad obediente bida eterno riba tera no a cambia. E proposito ei lo cumpli, pasobra Jehova ta leal. Salmo 37:29 ta declara: “E hustonan lo hereda e tera, y lo biba den dje pa semper.” E promesa aki ta motiva nos, hunto cu e personanan di humanidad cu ta haya inmortalidad den shelo, pa declara: “Grandi y maraviyoso bo obranan ta, o SEÑOR Dios Todopoderoso; husto y berdadero bo camindanan ta, abo, Rei di e nacionnan [“Rei di eternidad”, NW]. Ken lo no teme [bo], o SEÑOR, y glorifica bo nomber? Pasobra abo so ta santo.”—Revelacion 15:3, 4.

Abo ta desea e don precioso di bida eterno? Si ta asina, bo tin cu demostra cu bo ta leal y obediente na e “Rei di eternidad.” Bo tin cu siña tocante Jehova y esun pa medio di ken e bida ei a bira posibel, Hesucristo. Tur hende cu ta dispuesto pa acepta e normanan di Dios di loke ta bon y malo lo ricibi e don di “bida eterno.”—Juan 17:3.

[Nota]

[Cuadro/Plachi na pagina 5]

Un Soño di Hopi Tempo

E Poema Epico di Gilgamesh, un leyenda di Mesopotamia cu supuestamente ta data for di e di dos milenio prome cu nos era, ta describi con un heroe tabata busca hubentud eterno. E Egipcionan di antiguedad tabata balsama nan defuntonan cu e idea cu e almanan, cu segun nan tabata inmortal, lo por a uza nan curpanan atrobe. Consecuentemente, algun graf Egipcio a wordo yena cu tur loke e mortonan lo por tabatin mester den e asina yama bida despues di morto.

Cerca e alkimistanan Chines, ta parce cu e creencia den un curpa inmortal ta data for di por lo menos siglo 8 prome cu nos era, y e posibilidad pa alcansa esei pa medio di bebidanan magico ta data for di siglo 4 prome cu nos era. Alkimistanan Arabir y Europeo di Edad Medio a busca y a purba inventa nan mes cura lo todo. Algun di nan bebidanan tabata contene un mescla di arsenico, mercurio y suafel. Ken sa cuanto di nan no a venena nan mes ora nan a bebe e cocktailnan aki!

Un tempo e leyendanan tocante un asina yama Fontein di Hubentud—un fuente cu supuestamente ta rehuvenece tur hende cu bebe for di dje—tabata masha conoci.

 [Cuadro/Plachi na pagina 7]

Bida Eterno Lo Ta Laf?

Algun hende ta bisa cu bida eterno lo ta laf, nada mas cu un malgastamento di eternidad tiki tiki na hobinan sin sentido, cu ta blo ser ripiti. Talbes e eternidad cu nan ta imagina nan ta un continuacion eterno di e estilonan di bida y condicionnan actual, cu pa hopi hende lo parce laf y sin sentido. Pero, den e Paradijs cu Dios lo restaura, e ta priminti cu hende “lo deleita nan mes den pas abundante.” (Salmo 37:11) Un bida asina lo duna humanidad e oportunidad di siña conoce Jehova su creacion y di dedica tempo pa desaroya cualkier of tur e habilidad-, estudio- y actividadnan fascinante cu nos por solamente soña cu ne aworaki.

Dr. Aubrey de Grey, specialista den genetica di e Universidad di Cambridge, kende a dedica su mes na e estudio di con pa prolonga bida, a remarca: “Awe, hende cu tin un bon educacion y e tempo pa uz’e no ta fada nunca, y no por imagina nan cu un dia lo no tin nada nobo cu nan lo tin gana di haci.” Asina mes, e Palabra inspira di Dios ta bisa: “Hende [lo no] por haya sa e trabou cu Dios a haci for di principio te na fin.”—Eclesiastes 3:11.