En Busca di Bida Eterno

FOR di un principio humanidad a soña cu e idea di biba pa semper. Pero e soño ei no a bira realidad ainda pasobra ningun hende no a haya un manera pa vence morto. Pero recientemente, estudionan medico a rebiba e speransa cu realmente lo por ta posibel pa alarga bida humano notablemente. Laga nos wak kico ta tumando luga riba varios tereno di investigacion cientifico.

Biologonan ta experimentando cu e enzim telomerase den un intento pa extende e cantidad di biaha cu celnan ta reproduci nan mes. Cientificonan sa cu e curpa ta elimina cel bieu cu ta deteriorando y remplasa esakinan cu cel nobo. De echo, gran parti di e curpa ta ser renova varios biaha durante un hende su bida. Cientificonan ta pensa cu si nan por extende e proceso di renovamento, “e curpa humano lo por renova su mes pa un tempo hopi largo—asta pa semper.”

Teoreticamente, clonacion terapeutico via cua ta obtene stamcel di un embryo—un ramo controversial di investigacion cientifico—lo por percura pa pashentnan haya higra, nier of curason nobo y perfectamente compatibel pa un transplante. Docternan lo uza stamcel di e pashent mes pa traha replica di e organonan ei.

Specialistanan den nanotecnologia—e arte di traha ekipo microscopico sumamente chikito—ta premira e tempo ora cu docternan lo por hinca robot tamaño di cel den e circulacion di sanger di un pashent pa localisa y destrui celnan canceroso y bacteria dañino. Algun hende ta pensa cu e ramo di ciencia aki, hunto cu terapia di gene, cu tempo lo permiti e curpa humano sostene su mes pa tempo indefini.

Esnan cu ta na fabor di cryonica ta vries curpa di hende cu a muri. E idea ta pa conserva esakinan te ora avancenan den ciencia medico permiti docternan cura enfermedad, elimina e efectonan di biehes y restaura tanto bida como salud di e mortonan. E revista American Journal of Geriatric Psychiatry ta yama e concepto aki “un metodo moderno cu ta coresponde cu e practica di e Egipcionan di antiguedad di balsama morto.”

Hende su esfuersonan persistente pa alcansa inmortalidad ta mustra con dificil ta pa e acepta e realidad cu un dia lo e muri. Ta realmente posibel pa humanidad alcansa bida eterno? Kico Bijbel ta bisa riba e topico aki? E siguiente articulo lo contesta e preguntanan aki.