Storia di Bida

Jehova A Yuda Mi Enfrenta e Retonan di Bida

SEGUN E RELATO DI DALE IRWIN

“OCHO TA BASTA! VIERLING TA DOBEL TRABOU.” Asina e titular di un corant local a anuncia nacemento di un vierling den nos famia cu tabatin cuater yiu muher caba. Tempo mi tabata mas hoben, mi no tabatin ningun intencion di casa, mucho menos haya yiu. Pero ata mi awor, tata di ocho yiu!

MI A nace na 1934 den e pueblo di Mareeba, Australia. Mi tabata esun di mas chikito den nos tres rumannan. Despues mi famia a muda bai Brisbane, caminda mi mama tabata duna les na un zondagsschool di e iglesia metodista.

Na cuminsamento di 1938, corantnan local a informa cu posiblemente autoridadnan lo no a bai laga Joseph F. Rutherford, di e sede mundial di Testigonan di Jehova, drenta Australia. Mi mama a puntra un Testigo cu a bishita nos cas poco despues: “Pakico nan no kier pa e bini?” E Testigo a contesta: “Hesus no a bisa cu hende lo persigui su siguidonan?” E ora ei mi mama a acepta e foyeto chikito Curacion, cu a splica hopi di e diferencianan entre religion berdadero y falso. * Mi mama a keda impresiona cu e foyeto y e siguiente diadomingo el a bai cu nos—ami cu mi dos rumannan—na un reunion di Testigonan di Jehova. Na prome instante mi tata a opone fuertemente, pero de bes en cuando e tabata skirbi un par di pregunta biblico pa mi mama duna un di e rumannan. E ruman, na su turno, tabata skirbi e contestanan biblico pa mi mama duna mi tata.

 Riba un diadomingo mi tata a bai e reunion cu nos cu e intencion di expresa su desgusto cu e Testigonan. Sinembargo, despues cu mi tata a papia cu e superintendente di circuito kende tabata bishitando e congregacion e tempo ei, su actitud a cambia y asta el a permiti pa nos cas ser uza como un centro pa estudio semanal di Bijbel, na cua personanan interesa den nos area tabata asisti.

Na september 1938, mi mayornan a batisa. Ami cu mi rumannan a batisa na december 1941 na un congreso nacional teni na Hargreave Park na Sydney, New South Wales. E tempo ei mi tabatin shete aña di edad. Despues di esei mi tabata participa regularmente den sirbishi di veld cu mi mayornan. Den e tempo ei, e Testigonan tabata bai cu tocadisco portatil di cas pa cas pa laga e hendenan tende discurso biblico graba.

Un di e Testigonan cu te ainda mi ta corda hopi bon ta Bert Horton. E tabatin un auto ekipa cu un amplifier poderoso y un speaker grandi monta riba e dak. Tabata excitante pa traha cu Bert, specialmente pa un hobensito di mi edad. Por ehempel, ora e tabata toca un discurso biblico for di riba top di un serito, hopi biaha nos tabata mira un auto di polis subi bini den nos direccion. Mesora Bert tabata paga su ekipo, core bai na un otro serito varios kilometer leu y toca un otro discurso. Mi a siña hopi tocante confia den Jehova y tene curashi for di Bert y otro rumannan leal y balente manera e.—Mateo 10:16.

Tempo mi tabatin 12 aña di edad, mi tabata predica regularmente mi so despues di scol. Na un ocasion, mi a topa un famia cu yama Adshead. Cu tempo, ambos mayor, nan ocho yiunan y hopi nieto a siña e berdad. Mi ta gradici Jehova cu el a permiti mi, un simpel mucha homber, introduci e berdad di Bijbel na e excelente famia aki.—Mateo 21:16.

Privilegionan di Sirbishi na un Edad Jong

Cu 18 aña di edad mi a bira un pionero, un predicado di tempo completo, y a ser asigna na Maitland, New South Wales. Na 1956, nan a invita mi pa bin sirbi na e sucursal di Australia na Sydney. Di e personal di 20 persona, un di cada tres miembro tabata ungi, cu e speransa di goberna cu Cristo den su Reino celestial. Tabata un privilegio pa traha hunto cu nan.—Lucas 12:32; Revelacion 1:6; 5:10.

Mi determinacion pa keda soltero a caba na nada dia mi a topa Judy Helberg, un ruman muher pionero atractivo cu a ser invita na e sucursal temporalmente pa yuda mi cu un proyecto grandi. Ami cu Judy a enamora di otro y dos aña despues nos a casa. Despues di esei, nos a cuminsa e trabou di circuito, cu a ensera bishita un congregacion di Testigonan di Jehova tur siman pa anima e rumannan.

Na 1960, Judy a duna lus na nos prome yiu muher, Kim. Awe, si bo haya un yiu lo bo tin cu bandona e trabou di circuito y establece bo mes un caminda. Pero pa nos gran sorpresa, nan a invita nos pa sigui bishita e congregacionnan. Despues di hopi oracion, nos a acepta e invitacion, y pa e siguiente shete lunanan, Kim a biaha 13.000 kilometer hunto cu nos den bus, avion y trein segun cu nos a sirbi congregacionnan cu tabata keda leu aya na Queensland y Teritorio di Noord. E tempo ei nos no tabatin auto.

Semper nos tabata keda na cas di e rumannan. Pa motibo di e clima tropical, den e tempo  ei cambernan di drumi por lo general tabatin cortina en bes di porta, locual a duna nos mas stress ora Kim tabata yora anochi. Cu tempo e responsabilidad di percura pa un baby y pa nos asignacion a resulta mucho dificil. P’esei nos a establece nos mes na Brisbane, y mi a cuminsa traha borchi di propaganda, un tipo di arte comercial. Dos aña despues di Kim su nacemento, nos a haya un otro yiu muher, Petina.

Con Nos A Trata cu Tragedia

Na 1972, ora mi yiu muhernan tabatin 12 y 10 aña di edad, Judy a fayece di e enfermedad di Hodgkin, un tipo di tumor maligno. E perdida aki tabata casi insoportabel pa nos famia. No obstante, durante Judy su enfermedad y despues di su morto, Jehova a consola nos pa medio di su Palabra, su spirito santo y e hermandad. E Toren di Vigilancia cu nos a ricibi un poco despues di e morto di mi casa tambe a fortalece nos. E tabatin un articulo cu a trata cu pruebanan personal, incluso morto di un ser keri, y a mustra con pruebanan por yuda nos desaroya cualidadnan piadoso, manera perseverancia, fe y integridad. *—Santiago 1:2-4.

Despues di Judy su morto, ami cu mi yiu muhernan a bira hopi mas pega cu otro. Pero mi tin cu admiti cu tabata un lucha pa cumpli cu e papel di tanto tata como mama. Sinembargo, mi dos prendanan a haci e trabou hopi mas facil.

Casa di Nobo y un Famia Mas Grandi

Cu tempo, mi a bolbe casa. Ami cu Mary, mi casa nobo, tabatin hopi cos en comun. E tambe a perde su casa pa motibo di e malesa di Hodgkin. E tambe tabatin dos yiu muher, esta, Colleen y Jennifer. Colleen tabata mas o menos tres aña mas jong cu Petina. P’esei nos famia tabata consisti awor di cuater yiu muher, di 14, 12, 9 y 7 aña di edad.

Ami cu Mary a dicidi cu na principio nos cada un lo a disciplina su mes yiunan biologico te ora e otro yiunan a sinti nan mas confortabel pa acepta ordo di e mayor di criansa. Den nos mes relacion di esposo y esposa, ami cu Mary tabatin dos regla importante. Uno, nunca nos tabata atende nos diferencianan di opinion den presencia di e muchanan, y dos, na harmonia cu e principio di Bijbel cu tin para skirbi na Efesionan 4:26, nos tabata papia te ora nos a resolve asuntonan—maske esei a tuma oranan!

Pa mi sorpresa, tur miembro a ahusta su mes na e bida di un famia di criansa, pero e recuerdonan di nos sernan keri cu a bai laga nos si no a disparce di un dia pa otro. Por ehempel, dialuna anochi a bira Mary su “anochi pa yora.” Despues di nos estudio di famia, ora e muchanan a bai drumi, hopi biaha Mary tabata desahoga su sintimentonan cu e tabatin wanta paden.

Mary tabata kier pa nos dos haya un yiu. Lamentablemente, el a perde bariga. Ora Mary a sali na estado atrobe, un gran sorpresa tabata warda nos. Un ecografia a revela cu e tabata na estado di, no un, sino cuater baby! Mi a keda den shock. Ata mi awor, cu 47 aña di edad y cerca di bira tata di ocho yiu! E vierling  a nace via keizersnee dia 14 di februari 1982 cu 32 siman. Den e secuencia cu nan a nace, nan tabata Clint cu 3,5 liber; Cindy cu 4,2 liber; Jeremy cu 3,1 liber y Danette cu 3,8 liber. Ni un no tabata parce otro.

Un poco despues cu e babynan a nace, e docter di Mary a bini y cai sinta banda di mi.

El a puntra mi: “Bo ta precupa con bo ta bai cuida e yiunan?”

Mi di cu ne: “Wel, nunca mi a yega di haya mi den un cos asin’aki.”

Su siguiente palabranan a sorprende mi y anima mi di berdad.

E di: “Bo congregacion lo no laga bo na caya. Si bo djis hera nister, lo bo mira cuanto kleenex nan lo saca pa bo!”

Mi ta hopi gradicido na e excelente ginecologo aki y su staf medico pasobra despues di apenas dos luna cuater baby rasonablemente saludabel a sali for di hospital.

E Reto di Lanta un Vierling

Pa cosnan por a cana bon, ami cu Mary a hinca un programa di 24 ora den otro. E cuater yiu muhernan mas grandi a yuda nos hopi bon cu e babynan. Y tabata en berdad manera e docter a bisa—asina nos a “nister”, e congregacion tabata cla pa duna nos un man. Mas prome, un amigo di hopi tempo, John MacArthur, a organisa Testigonan cu tabata por a haci trabou di construccion pa rek nos cas. Ora e babynan a bini cas, un team di ruman muher a yuda cuida nan. Tur e gestonan bondadoso aki tabata un demostracion di amor cristian den accion.—1 Juan 3:18.

E vierling tabata manera “baby di e congregacion.” Te na e dia djawe, nan ta mira e tantisimo rumannan amoroso cu a yuda nos como famia. Pa loke ta Mary, el a resulta di ta un excelente esposa y mama cu a sacrifica su mes pa cuida su yiunan. El a echt aplica loke el a siña for di e Palabra di Dios y su organisacion. No tin mihor conseho!—Salmo 1:2, 3; Mateo 24:45.

E reunionnan cristian y e trabou di predica a keda un parti importante di nos rutina semanal, aunke tabata un lucha pa atende cu cuater baby. Un bendicion cu nos a ricibi e tempo ei tabata e estudionan di Bijbel cu nos a tene cu dos pareha casa, kendenan tabatin e bondad di bini na nos cas pa studia. Aunke esaki a haci cosnan mas facil pa nos, tin biaha Mary tabata asina cansa cu e tabata pega soño durante e estudio, cu un baby drumi den su brasanan. Cu tempo ambos pareha a bira nos rumannan spiritual.

Educacion Spiritual for di Chikito

Asta prome cu e babynan por a cana, ami cu Mary y e yiu muhernan mas grandi tabata sali den sirbishi cu nan. Ora nan a siña cana, ami cu Mary cada un tabata bai cu dos, y nan no tabata un carga. De echo, hopi biaha nan tabata bira e topico pa cuminsa combersacion cu doñonan di cas amigabel. Un dia mi a topa un homber cu tabata pretende cu si bo a nace bou di un cierto signo riba un dia en particular, bo personalidad lo cuadra cu un cierto patronchi. Mi no a discuti cu ne, pero mi a puntr’e si mi por a bolbe bek mas lat e mainta ei. El a bai di acuerdo, y despues mi a bini bek cu e vierling. Segun cu el a para wak nan babuca, mi a pone e muchanan den e orden cu nan a nace. Despues nos tabatin un combersacion amigabel, no solamente tocante nan diferencianan fisico obvio sino tambe tocante e gran diferencianan den nan personalidad, locual a pone henter su teoria cai den otro. E di: “Figura bo, mi ta bin cu  mi teoria net cerca bo. Lo mi tin cu haci mas investigacion, no ta berdad?”

Ora e cuater chikitinnan a comporta nan mes malo nan no tabata gusta disciplina den grupo, p’esei nos tabata corigi nan un pa un. No obstante, nan a siña cu e mesun reglanan a conta pa tur. Ora nan a enfrenta asuntonan di consenshi na scol, nan a para firme pa principionan di Bijbel y a apoya otro. Cindy a bira nan vocero. Pronto hende a haya sa cu un vierling tabata un influencia poderoso cu bo mester tene cuenta cu ne!

Ami cu Mary tabatin e retonan di custumber di yuda e muchanan keda leal na Jehova durante nan adolescencia. Unico cos cu nos por bisa ta cu si no tabata pa e apoyo di un congregacion amoroso y e abundancia di alimento spiritual cu nos a ricibi for di e parti visibel di Jehova su organisacion, e trabou lo tabata mucho mas dificil. Nos a trata di tene un estudio di Bijbel regular den famia y mantene un bon comunicacion cu nan, aunke esaki no tabata semper facil. Toch, e esfuerso tabata bale la pena pasobra tur nos ocho yiunan a scohe pa sirbi Jehova.

Luchando cu Edad Avansa

Den transcurso di añanan, mi a disfruta di hopi privilegio spiritual: anciano di congregacion, superintendente di stad y superintendente di circuito substituto. Tambe mi a sirbi como miembro di e Comite di Contacto cu Hospital cu tin e funcion di yuda docternan coopera cu pashentnan Testigo ora surgi e cuestion di transfusion di sanger. Pa 34 aña mi tabatin tambe e honor di por a casa hende oficialmente. Mi a conduci rond di 350 ceremonia di matrimonio, incluso esnan di mi seis yiu muhernan.

Mi ta gradici Jehova constantemente pa e apoyo leal cu mi a ricibi, prome di Judy y awor di Mary. (Proverbionan 31:10, 30) Hunto cu e apoyo cu nan a duna mi den mi trabou como anciano di congregacion, nan a pone tambe un bon ehempel den e ministerio y a yuda inculca cualidadnan spiritual den e muchanan.

Na 1996, docternan a diagnostica mi cu un trastorno celebral cu ta pone mi mannan tembla y mi curpa perde balansa. P’esei mi no por a sigui mas cu mi trabou di traha borchi di propaganda. Sinembargo, ainda mi tin hopi goso den e sirbishi di Jehova, aunke mi ritmo a baha. Un aspecto positivo di esaki ta cu mi a haya mas consideracion pa hende grandi.

Ora mi reflexiona riba mi bida, mi ta gradici Jehova cu semper e tabat’ei pa yuda tanto ami como mi famia enfrenta nos tantisimo retonan cu goso. (Isaias 41:10) Ami cu Mary, hunto cu nos ocho yiunan, ta gradicido tambe pa e sosten cu nos a ricibi di un famia spiritual maraviyoso di rumannan homber y muher. Tur a demostra nan amor den hopi mas manera cu nos lo por relata.—Juan 13:34, 35.

[Nota]

[Plachi na pagina 12]

Hunto cu mi mama, mi ruman homber mayo Garth y mi ruman muher Dawn, cla pa bai e congreso di 1941 na Sydney

[Plachi na pagina 13]

Ami cu Judy y nos baby Kim, tempo mi tabata den e trabou di circuito na Queensland

[Plachi na pagina 15]

Despues cu e vierling a nace, nos cuater yiu muhernan mas grandi y e congregacion a uni forsa pa duna nos un man