Pregunta di Lector

Dicon e Traduccion di Mundo Nobo ta bisa na Deuteronomio 31:2 cu Moises ‘no tabatin mag di sali y drenta mas’ como lider di Israel, mientras cu otro traduccionnan di Bijbel ta indica cu e no tabata por, esta, e no tabata capas, pa haci esei?

Aunke por traduci e palabra Hebreo en cuestion na ambos manera, e traduccion den algun Bijbel ta duna e idea cu na fin di su bida, Moises tabata suak, fisicamente incapas pa cumpli cu su responsabilidadnan como lider. Por ehempel, Beibel na papiamentu koriente ta cita Moises su palabranan asin’aki: “Aworaki mi tin 120 aña y apenas mi ta den condicion pa haci algo.”

Sinembargo, Deuteronomio 34:7 ta mustra cu maske Moises tabata di edad avansa, e no tabata fisicamente suak. E versiculo ta bisa: “Moises tabatin shentibinti aña dia cu el a muri. Su wowonan nunca no a bira scur, ni e no a perde su vigor.” Pues, Moises tabata fisicamente capas pa guia e nacion, pero no tabata Jehova su boluntad pa e sigui haci esei. Esaki ta bisto for di loke Moises a sigui bisa: “Jehova a bisa mi: ‘Lo bo no crusa e Jordan aki.’” Aparentemente, Jehova a ripiti loke el a decreta na e awanan di Meriba.—Numbernan 20:9-12.

Moises tabatin un bida largo y remarcabel cu nos por parti den tres periodo. Pa 40 aña el a biba na Egipto, caminda el a wordo “educa den tur e siñansa di e Egipcionan, y e tabata un homber di poder den palabra y echo.” (Echonan 7:20-22) El a biba un 40 aña na Madian. Einan el a cultiva e cualidadnan spiritual necesario pa guia Jehova su pueblo. Por ultimo, pa 40 aña Moises a guia y goberna e Israelitanan. Pero awor Jehova a dicidi cu ta Josue, no Moises, lo a guia e nacion pa crusa Riu Jordan y drenta e Tera Priminti.—Deuteronomio 31:3.

Pues, e Traduccion di Mundo Nobo ta expresa e nificacion corecto di Deuteronomio 31:2. Moises lo no a sigui como lider di Israel mas, no pasobra e tabata fisicamente suak, sino pasobra Jehova no a permitie haci esei.