Spera den Jehova y Tene Curashi

“Spera den Jehova; tene curashi y laga bo curason sea fuerte. Si, spera den Jehova.”—SALMO 27:14, NW.

1. Con importante speransa ta, y con e expresion aki ta ser uza den e Scritura?

BERDADERO speransa ta manera un lus briyante. E ta yuda nos mira mas aya di nos dificultadnan actual y enfrenta futuro cu curashi y goso. Ta Jehova so por duna nos un speransa sigur, y e ta hacie tambe mediante su Palabra inspira. (2 Timoteo 3:16) De echo, e palabranan “spera” y “speransa” ta aparece hopi biaha den Bijbel y ta referi na e expectativa sigur y cu anhelo di un cos bon. Tambe e ta referi na e cos riba cua bo expectativa ta basa. * E tipo di speransa ei ta hopi mas cu simplemente un deseo cu nos ta expresa cu kisas no tin ningun base ni e posibilidad di cumpli.

2. Con speransa a influencia Hesus su bida?

² Ora cu Hesus tabata confronta prueba y dificultad, el a wak mas aya di e sufrimento di e momento ei y a pone su speransa den Jehova. “Pa motibo di e goso poni su dilanti, [el] a soporta e sufrimento di [“un staca di tormento”, NW] sin haci caso di berguensa, y a sinta na man drechi di e trono di Dios.” (Hebreonan 12:2) Como cu Hesus a enfoca completamente riba e prospecto di vindica Jehova su soberania y santifica Dios su nomber, e no a desvia ningun momento for di su caminda di obediencia na Dios, sin importa ki consecuencianan esei tabatin p’e.

3. Ki papel speransa ta hunga den bida di sirbidornan di Dios?

³ Rei David a menciona e conexion entre speransa y curashi, bisando: “Spera den Jehova; tene curashi y laga bo curason sea fuerte. Si, spera den Jehova.” (Salmo 27:14, NW) Si nos kier pa nos curason ta fuerte, nunca nos no mester laga nos speransa bira vago, mas bien semper nos mester ten’e bon cla den nos mente y ten’e pega na nos curason. Haciendo esei lo yuda nos imita Hesus y manifesta curashi y celo segun cu nos ta participa den e trabou cu el a encarga na su discipelnan. (Mateo 24:14;  28:19, 20) De echo, den Bijbel speransa ta ser menciona hunto cu fe y amor como un cualidad masha importante y duradero cu ta caracterisa e bida di sirbidornan di Dios.—1 Corintionan 13:13.

Bo Ta “Abunda den Speransa”?

4. Kico cristiannan ungi y nan compañeronan, e “otro carnenan”, ta spera ansiosamente?

⁴ E pueblo di Dios tin un futuro maraviyoso nan dilanti. Cristiannan ungi ta spera ansiosamente di sirbi hunto cu Cristo den shelo, mientras cu e “otro carnenan” tin e speransa di “wordo libra for di ... sclabitud na corupcion pa drenta den e libertad glorioso di e yiunan [terenal] di Dios.” (Juan 10:16; Romanonan 8:19-21; Filipensenan 3:20) E “libertad glorioso” ei ta ensera ser libra for di pica y su consecuencianan horibel. En realidad, Jehova—e Dunador di “tur bon regalo y tur don perfecto”—lo no duna nada menos cu lo mihor na su sirbidornan leal.—Santiago 1:17; Isaias 25:8.

5. Con nos ta logra “abunda den speransa”?

⁵ Con grandi e papel di speransa cristian mester ta den nos bida? Na Romanonan 15:13 nos ta lesa: “Cu e Dios di speransa yena boso cu tur goso y pas den keremento, pa boso por abunda den speransa pa medio di e poder di spirito santo.” Si, nos por compara speransa, no cu un bela den scuridad, sino cu e rayonan briyante di solo di mainta. E ta yena nos bida cu pas, felicidad, proposito y curashi. Tuma nota cu nos ta “abunda den speransa” ora cu nos ta kere Dios su Palabra skirbi y ta haya su spirito santo. Romanonan 15:4 ta bisa: “Tur loke a wordo skirbi prome aya a wordo skirbi pa nos instruccion, pa dor di perseverancia y e encurashamento di Scrituranan nos por tin speransa.” Pues puntra bo mes: ‘Mi ta tene mi speransa bibo dor di ser un bon studiante di Bijbel, lesand’e tur dia? Mi ta pidi Dios regularmente pa duna mi su spirito?’—Lucas 11:3.

6. Pa mantene nos speransa bibo, kico nos tin cu tene cuidou cu ne?

⁶ Hesus, nos Gran Ehempel, a saca hopi fortalesa for di e Palabra di Dios. Ora nos ta medita riba Hesus cu sumo cuidou y atencion, nos ta evita cu nos ta “cansa y perde animo.” (Hebreonan 12:3) Ta logico cu si e speransa cu Dios a duna nos mester bira scur den nos mente y curason of si nos bai enfoca riba otro cos—podise riba cosnan material of metanan di mundo—den poco tempo nos lo cansa den sentido spiritual. Cu tempo esei lo pone nos perde e fortalesa y curashi pa biba segun principionan moral. Den e condicion ei, nos por asta “naufraga encuanto [nos] fe.” (1 Timoteo 1:19) Di otro banda, berdadero speransa ta fortifica nos fe.

Speransa Ta Esencial pa Fe

7. Den ki manera speransa ta esencial pa fe?

⁷ Bijbel ta bisa: “Fe ta e siguransa di cosnan cu hende ta spera, e conviccion di cosnan cu hende no ta mira.” (Hebreonan 11:1) Pues, speransa no ta djis algo cu ta acompaña fe; e ta un parti esencial di fe. Tuma por ehempel Abraham. For di un punto di bista humano, e cu su casa, Sara, a pasa nan edad pa haya yiu ora cu Jehova a priminti nan un heredero. (Genesis 17:15-17) Con Abraham a reacciona? “Aunke e tabata mas aya di speransa, toch basa riba speransa e tabatin fe, cu e por bira tata di hopi nacion.” (Romanonan 4:18, NW) Si, ta e speransa cu Dios a duna Abraham a percura un base firme pa su fe cu lo e haya un yiu. Como resultado su fe a haci su speransa mas bibo y fuerte. Figura bo, Abraham cu Sara tabatin asta e curashi di bandona nan cas y nan famia y biba e resto di nan bida den tent den un pais stranhero!

8. Con fiel perseverancia ta fortifica speransa?

⁸ Abraham a mantene su speransa bibo dor di obedece Jehova incondicionalmente, asta ora cu tabata dificil pa haci esei. (Genesis 22:2, 12) Di igual manera, si nos ta obedece Jehova y persevera den su sirbishi, nos por tin sigur di nos recompensa. Pablo a skirbi cu “perseverancia” ta resulta den “caracter” [of, “un condicion aproba”, NW], locual na su turno ta produci speransa, “y speransa no ta desapunta.”  (Romanonan 5:4, 5) Ta p’esei Pablo a skirbi tambe: “Nos ta desea cu cada un di boso lo mustra e mesun diligencia pa asina realisa e siguransa completo di speransa te na fin.” (Hebreonan 6:11) Un punto di bista positivo asina, cu ta basa riba un relacion intimo cu Jehova, por yuda nos enfrenta cualkier dificultad cu curashi, y asta cu goso.

‘Alegra den Speransa’

9. Haciendo kico cu regularidad por yuda nos ‘alegra den speransa’?

⁹ E speransa cu Dios a duna nos ta infinitamente superior na cualkier cos cu mundo por ofrece. Salmo 37:34 ta bisa: “Spera riba SEÑOR y sigui su caminda, y e lo halsa bo pa hereda e tera; ora cu e malbadonan wordo corta kita afo, abo lo mira esaki.” Si, nos tin tur motibo pa alegra of ‘regociha den speransa.’ (Romanonan 12:12) Sinembargo, pa por haci esei nos tin cu mantene nos speransa bibo den nos mente. Abo ta reflexiona cu regularidad riba e speransa cu Dios a duna bo? Bo por mira bo mes den Paradijs, gosando di bon salud, liber di inkietud, rondona pa hendenan cu bo stima y haciendo trabou cu ta duna bo berdadero satisfaccion? Bo ta medita riba e escenanan di Paradijs cu ta sali den nos publicacionnan? Nos por compara tal meditacion regular cu e limpiamento di un bentana cu ta duna nos un bista riba un paisahe magnifico. Si nos neglisha di limpia e bentana, den poco tempo stof y sushi lo stroba nos di tin un bista cla di e paisahe atractivo. E ora ei otro cosnan lo por capta nos atencion. Laga nos nunca permiti esei sosode!

10. Dicon e echo cu nos ta anticipa e recompensa ta un indicacion di nos bon relacion cu Jehova?

¹⁰ Claro cu e motibo principal pakico nos ta sirbi Jehova ta nos amor p’e. (Marco 12:30) Pero hunto cu esei, nos mester spera ansiosamente riba e recompensa. De echo, Jehova ta spera cu nos ta haci esei! Hebreonan 11:6 ta bisa: “Sin fe ta imposibel pa agrad’e, pasobra esun cu bin cerca Dios mester kere cu e ta, y cu e ta Esun cu ta recompensa esnan cu ta busc’e.” Dicon Jehova kier pa nos mir’e como Esun cu ta duna recompensa? Pasobra ora nos ta mir’e asina, nos ta demostra cu nos conoce nos Tata celestial bon. E ta un Tata generoso y ta stima su yiunan. Imagina bo con infelis nos lo tabata y con facil nos lo a desanima si nos no tabatin “un futuro y un speransa.”—Jeremias 29:11.

11. Con e speransa cu Dios a duna Moises a yud’e tuma decisionnan sabi?

¹¹ Un ehempel sobresaliente di un persona cu a sigui enfoca riba e speransa cu Dios a dun’e tabata Moises. Como “yiu di e yiu muher di farao”, Moises tabatin poder, prestigio y e rikesanan di Egipto na su disposicion. Lo el a core tras di e cosnan aki, of lo el a sirbi Jehova? Cu curashi Moises a scohe pa sirbi Jehova.  Dicon? Pasobra “e tabata fiha su bista riba e recompensa di den futuro.” (Hebreonan 11:24-26, BPK) Si, Moises sigur no tabatin un actitud di no precupa tocante e speransa cu Jehova a pone su dilanti.

12. Dicon speransa cristian ta manera un helm?

¹² Apostel Pablo a compara speransa cu un helm. Nos helm figurativo ta proteha nos mente y asina ta capasita nos pa tuma decisionnan sabi, fiha prioridadnan cu ta refleha sano huicio y mantene integridad. (1 Tesalonicensenan 5:8) Bo tin bo helm figurativo henter ora bisti? Si ta asina, e ora ei mescos cu Moises y Pablo, lo bo no fiha bo speransa “riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.” Ta berdad cu bo mester tin curashi pa no acepta tendencianan popular y pa bira lomba pa actividadnan egoista, pero ta bale la pena! De echo, pakico lo bo acepta cualkier cos cu ta menos cu e “bida berdadero” cu tin warda pa esnan cu ta pone nan speransa den Jehova y ta stim’e?—1 Timoteo 6:17, 19.

“Nunca Lo Mi No Bandona Bo”

13. Ki siguransa Jehova ta duna su sirbidornan leal?

¹³ Hende cu ta pone nan speransa den e mundo actual mester pensa seriamente riba e cosnan teribel cu nan ta bai confronta segun cu mundo ta sufri mas y mas ‘dolor di parto’, esta, dolor di angustia. (Mateo 24:8) Pero esnan cu ta pone nan speransa den Jehova no tin tal temor. Nan lo sigui “biba trankil, sin miedo di maldad.” (Proverbionan 1:33) Como cu nan speransa no ta den e mundo actual, gustosamente nan ta haci caso di Pablo su conseho: “Laga boso caracter ta liber di amor pa placa y sea contento cu loke boso tin; pasobra e mes a bisa: ‘Nunca lo mi no bandona bo, y nunca lo mi no laga bo desampara.’”—Hebreonan 13:5.

14. Dicon cristiannan no mester ta indebidamente precupa tocante nan necesidadnan material?

¹⁴ E expresion enfatico “nunca”, no ta laga ningun duda cu Dios lo percura pa nos. Hesus tambe a sigura nos di Dios su interes amoroso, bisando: “Ma busca prome e reino di Dios y su husticia, y tur e cosnan aki [e necesidadnan material di bida] lo wordo añadi na boso. P’esei, no precupa boso mes pa e dia di mañan ... Cada dia tin suficiente problema di su mes.” (Mateo 6:33, 34) Jehova sa cu ta dificil pa nos ta celoso pa su Reino y na mesun tempo carga e pleno responsabilidad di percura pa nos necesidadnan fisico. P’esei laga nos pone nos pleno confiansa den su capasidad y deseo di percura pa nos necesidadnan.—Mateo 6:25-32; 11:28-30.

15. Con cristiannan ta mantene un ‘wowo simpel’?

¹⁵ Nos ta demostra cu nos ta depende riba Jehova ora cu nos ta mantene un ‘wowo simpel.’ (Mateo 6:22, 23, NW) Un wowo simpel ta sincero, cu motivacion puro y liber di golosidad y ambicion egoista. E echo cu nos tin un wowo simpel no kiermen cu nos mester biba den pobresa extremo of neglisha di atende nos responsabilidadnan cristian. Al contrario, e ta nifica demostra “sano huicio” segun cu nos ta pone sirbimento di Jehova na prome luga.—2 Timoteo 1:7.

16. Dicon fe y curashi ta necesario pa mantene un wowo simpel?

¹⁶ Pa mantene un wowo simpel nos mester tin fe y curashi. Por ehempel, si bo doño di trabou ta insisti pa bo traha cu regularidad na un ora cu ta programa pa reunionnan cristian, lo bo demostra curashi y pega na bo prioridadnan spiritual? Si un persona ta duda cu Jehova lo cumpli cu Su promesa di percura pa Su sirbidornan, Satanas e ora ei simplemente tin cu sigui pone presion y e persona ei lo stop di asisti na tur reunion mes. Si, un falta di fe di nos parti por laga Satanas haya un gara riba nos di tal manera cu ta e, y no Jehova, ta fiha nos prioridadnan. Ki un tragedia esei lo ta!—2 Corintionan 13:5.

‘Spera den Jehova’

17. Con e personanan cu ta confia den Jehova ta bendiciona for di awor?

¹⁷ E Scritura ta mustra bes tras bes cu e personanan cu pone nan speransa den Jehova y ta confia den dje nunca ta sali perdi.  (Proverbionan 3:5, 6; Jeremias 17:7) Ta berdad cu tin biaha nan lo tin cu keda contento cu menos comodidad material, pero nan ta considera esaki un sacrificio chikito na comparacion cu e bendicionnan cu ta warda nan. Pues nan ta demostra cu nan ta ‘spera den Jehova’ y cu nan tin e confiansa cu den futuro lo e duna su sirbidornan leal tur e deseonan husto di nan curason. (Salmo 37:4, 34) P’esei, nan ta realmente felis for di awor. “E speransa di e husto ta alegria, ma e expectativa di e malbado lo perece.”—Proverbionan 10:28.

18, 19. (a) Ki garantia amoroso Jehova ta duna nos? (b) Con nos ta mantene Jehova na nos “man drechi”?

¹⁸ Ora cu un mucha homber chikito ta cana cu man di su tata teni, e ta sintie safe y sigur. Nos tambe ta sinti nos asina segun cu nos ta cana cu nos Tata celestial. Jehova a bisa Israel: “No tene miedo, pasobra mi ta cu bo . . . Si, lo mi yuda bo ... Pasobra ami ta SEÑOR bo Dios, kende ta sostene bo man drechi, kende ta bisa bo: ‘No tene miedo, lo mi yuda bo.’”—Isaias 41:10, 13.

¹⁹ Ki un cuadro conmovedor esei ta describi, Jehova ta cohe bo man tene! David a skirbi: “Mi a pone SEÑOR semper mi dilanti; pasobra e ta na mi man drechi, lo mi no wordo movi.” (Salmo 16:8) Con nos ta mantene Jehova na nos “man drechi”? Nos ta haci esei den por lo menos dos manera. Na prome luga, nos ta laga su Palabra guia nos den tur aspecto di bida; y na di dos luga, nos ta enfoca riba e premio glorioso cu Jehova a pone nos dilanti. Salmista Asaf a canta: “Mi ta constantemente cerca bo; bo a cohe mi man drechi tene. Cu bo conseho lo bo guia mi, y despues ricibi mi den gloria.” (Salmo 73:23, 24) Cu un garantia asina, nos realmente por enfrenta futuro cu confiansa.

“Boso Redencion Ta Yegando Cerca”

20, 21. Ki futuro ta warda e personanan cu ta pone nan speransa den Jehova?

²⁰ Cada dia cu pasa, ta bira mas urgente pa nos mantene Jehova na nos man drechi. Denter di poco, cuminsando cu destruccion di religion falso, Satanas su mundo lo experencia un tribulacion cu nunca el a yega di experencia. (Mateo 24:21) Miedo lo podera di humanidad sin fe. Sinembargo, durante e tempo di caos ei, Jehova su sirbidornan cu ta demostra curashi lo alegra den nan speransa! Hesus a bisa: “Ora cu e cosnan aki cuminsa tuma luga, wak ariba y lanta boso cabes, pasobra boso redencion ta yegando cerca.”—Lucas 21:28.

²¹ P’esei laga nos alegra den e speransa cu Dios a duna nos y no laga Satanas su distraicionnan astuto gaña nos ni tenta nos. Na mesun tempo, laga nos traha duro pa cultiva fe, amor y temor di Dios. Si nos haci esaki, nos lo tin e curashi pa obedece Jehova bou di tur circunstancia y resisti e Diabel. (Santiago 4:7, 8) Si, ‘sea fuerte y fortalece boso curason, boso tur cu ta spera den Jehova.’—Salmo 31:24.

[Nota]

Bo Por Contesta Esaki?

• Den ki manera Hesus su speransa a contribui na su curashi?

• Con fe y speransa ta conecta cu otro?

• Con speransa hunto cu fe por duna un cristian e curashi pa fiha prioridadnan sano den bida?

• Dicon e personanan cu ta “spera den Jehova” por mira futuro cu confiansa?

[Preguntanan di Estudio]

[Plachi na pagina 28]

Sea bo ta hoben of bieu, bo por mira bo mes den Paradijs?