Tene Curashi Mediante Fe y Temor di Dios

“Sea fuerte y tene curashi! ... [Jehova] bo Dios ta cu bo.”—JOSUE 1:9.

1, 2. (a) For di un punto di bista humano, con grandi Israel su chens di sali victorioso riba e Cananeonan tabata? (b) Ki siguransa Josue a haya?

NA AÑA 1473 prome cu nos era, e nacion di Israel tabata cla pa drenta e Tera Priminti. Relaciona cu e dificultadnan cu nan lo a confronta, Moises a recorda e pueblo: “Awe bo ta bai crusa Jordan pa drenta y core cu nacionnan mas grandi y mas poderoso cu bo, stadnan grandi cu ta fortifica te na shelo, un pueblo grandi y halto, e yiu hombernan di e Anakeonan ... di kendenan bo a tende bisa: ‘Ken por keda para dilanti di e yiu hombernan di Anak?’” (Deuteronomio 9:1, 2) Si, e guereronan gigante ei tabata famoso! Ademas, algun Cananeo tabatin ehersito bon ekipa, cu cabai y garoshi di guera cu tabatin cuchiu di hero na nan wiel.—Huesnan 4:13.

² Israel, di otro banda, tabata anteriormente un nacion di catibo y a caba di pasa 40 aña den desierto. Pues, for di un punto di bista humano, nan tabatin masha tiki chens di sali victorioso. Sinembargo, Moises tabatin fe; e por a “mira” Jehova ta guia nan. (Hebreonan 11:27) Moises a bisa e pueblo: “SEÑOR bo Dios ta Esun cu ta crusa bo dilanti . . . E lo destrui nan y e lo somete nan bo dilanti.” (Deuteronomio 9:3; Salmo 33:16, 17) Despues di Moises su morto, Jehova a sigura Josue cu e tabatin Su apoyo, bisando: “Lant’ariba awor, crusa e Jordan aki, abo y henter e pueblo aki, bai na e tera cu mi ta duna nan—e yiunan di Israel. Ningun hende lo no por para bo dilanti tur e dianan di bo bida. Mescos cu mi tabata cu Moises, asina lo mi ta cu bo.”—Josue 1:2, 5.

3. Kico a contribui na Josue su fe y curashi?

³ Pa Josue por tabatin Jehova su sosten y guia, e mester a lesa y medita riba e Lei di Dios y aplic’e den su bida. Jehova a bis’e: “E ora ei lo bo haci bo caminda prospera, y e ora ei lo bo tin exito. No ta ami a ordena bo? Sea fuerte y tene curashi! No tembla ni desmaya, pasobra SEÑOR bo Dios ta cu bo unda cu bo bai.” (Josue 1:8, 9) Josue a scucha Dios, y esei a dun’e curashi y el a resulta di ta fuerte y exitoso. Sinembargo, mayoria hende di su generacion no a scucha. Como resultado, nan no tabatin exito y nan a muri den desierto.

Un Pueblo sin Fe y sin Curashi

4, 5. (a) Ki diferencia tabatin entre e actitud di e dies spionnan y e actitud di Josue y Caleb? (b) Con Jehova a reacciona riba e pueblo su falta di fe?

⁴ Cuarenta aña prome, ora cu Israel a yega cerca di Canaan pa prome biaha, Moises a manda 12 homber bai spiona e pais. Dies a bin bek morto spanta. Nan a sclama: “Henter e pueblo cu nos a mira einan ta hombernan di gran estatura. Tambe nos a mira gigantenan ayanan (e yiu hombernan di Anak ta bin for di e gigantenan); y nos a bira manera tiracochi den nos mes bista.” Ta “henter e pueblo” tabata gigante? No, e Anakeonan so. Acaso e Anakeonan tabata descendiente di e gigantenan cu a biba prome cu Diluvio? Claro cu no! Pero toch, dor di e declaracionnan exagera aki di e spionnan, miedo a plama den henter e campamento. E pueblo kier a asta bai Egipto bek, e pais di nan sclabitud!—Numbernan 13:31–14:4.

⁵ Sinembargo dos di e spionnan, Josue y Caleb, tabata ansioso pa drenta e Tera Priminti.  Nan a bisa: ‘E Cananeonan ta manera pan pa nos. Nan proteccion a wordo kita for di nan, y Jehova ta cu nos; no tene miedo di nan.’ (Numbernan 14:9) Acaso Josue y Caleb tabata optimista sin ningun base? Definitivamente cu no! Hunto cu e resto di e nacion, nan a mira con Jehova pa medio di e Dies Plaganan a humilia e poderoso nacion di Egipto y su diosnan. Despues nan a mira Jehova hoga Farao y su ehersito militar den Lama Cora. (Salmo 136:15) Ta bisto anto cu no tabatin excuse pa e miedo cu e dies spionnan y esnan influencia dor di nan a desplega. Jehova a sinti su mes hopi ofendi y a expresa esei bisando: “Cuanto tempo mas nan lo no kere den mi, a pesar di tur e señalnan cu mi a haci meimei di nan?”—Numbernan 14:11.

6. Den ki manera curashi ta liga cu fe, y con nos por mira esei den e tempo aki?

⁶ Jehova a bai directamente na e raiz di e problema—e actitud cobarde di e pueblo a revela nan falta di fe. Si, fe y curashi ta estrechamente liga cu otro. Nan ta asina liga cu otro cu apostel Juan por a skirbi relaciona cu e congregacion cristian y e guera spiritual cu e tin: “Esaki ta e victoria cu a vence mundo—nos fe.” (1 Juan 5:4) Awe, fe manera esun di Josue y Caleb a pone cu e bon nobo di Reino ta ser predica rond mundo pa mas cu seis miyon Testigo di Jehova, hoben y bieu, fisicamente fuerte y fisicamente suak. Ningun enemigo no a logra silencia e ehersito poderoso y yen di curashi aki.—Romanonan 8:31.

No “Hal’atras”

7. Kico “hal’atras” ta nifica?

⁷ Jehova su sirbidornan djawe cu curashi ta predica e bon nobo pasobra nan ta di mesun opinion cu apostel Pablo, kende a skirbi: “Nos no ta di esnan cu ta hal’atras pa destruccion, sino di esnan cu tin fe pa preservacion di e alma.” (Hebreonan 10:39) E expresion “hal’atras” cu Pablo a menciona, no ta nifica hal’atras djis debi na un sintimento temporal di miedo, ya cu hopi sirbidor fiel di Dios tabatin miedo na cierto ocasion. (1 Samuel 21:12; 1 Reinan 19:1-4) Mas bien, manera un diccionario biblico ta splica, e kiermen “retira, sali afo”, “neglisha di tene na e berdad.” E diccionario ta agrega cu “hal’atras” por ta basa riba e idea di ‘baha bela di un boto y asina reduci su velocidad.’ Pues e por referi na bai mas sosega den Dios su sirbishi. Claro cu personanan cu tin un fe fuerte no ta pensa mes di ‘bai mas sosega’ ora cu dificultad surgi, sea cu ta persecucion, malesa of cualkier otro prueba. Mas bien, nan ta sigui padilanti den Jehova su sirbishi, sabiendo cu e ta profundamente interesa den nan y sa nan limitacionnan. (Salmo 55:22; 103:14) Abo tin e clase di fe ei?

8, 9. (a) Con Jehova a fortifica e fe di e cristiannan di prome? (b) Kico nos por haci pa fortifica nos fe?

 ⁸ Na un ocasion e apostelnan a sinti cu nan tabata falta fe, p’esei nan a bisa Hesus: “Aumenta nos fe!” (Lucas 17:5) Nan a haya contesta riba nan peticion sincero, specialmente na Pentecoste di aña 33 di nos era, ora cu e spirito santo priminti a bin riba e discipelnan y a duna nan un comprondemento mas profundo di Dios su Palabra y proposito. (Juan 14:26; Echonan 2:1-4) Cu nan fe fortifica, e discipelnan a cuminsa un campaña di predica cu a hiba e bon nobo na “henter creacion bou di shelo”, a pesar di oposicion.—Colosensenan 1:23; Echonan 1:8; 28:22.

⁹ Pa nos por fortifica nos fe y sigui padilanti den nos ministerio, nos tambe tin cu studia y medita riba e Scritura y pidi den oracion pa haya spirito santo. Ta solamente dor di graba Dios su berdad den nos mente y curason—manera Josue, Caleb y e discipelnan cristian di prome a haci—nos lo tin e fe cu ta duna nos e curashi necesario pa persevera den nos guera spiritual y sali victorioso.—Romanonan 10:17.

Fe Ta Mas cu Djis Kere

10. Kico berdadero fe ta ensera?

¹⁰ Manera personanan fiel den tempo biblico a demostra, fe cu ta hiba na curashi y perseverancia ta ensera mas cu djis kere den Dios. (Santiago 2:19) E ta rekeri pa nos siña conoce Jehova su personalidad y tene pleno confiansa den dje. (Salmo 78:5-8; Proverbionan 3:5, 6) E ta nifica kere cu henter nos curason cu loke mas ta cumbini nos ta di haci caso di Dios su lei- y principionan. (Isaias 48:17, 18) Tambe fe ta ensera tene pleno confiansa cu Jehova lo cumpli cu tur su promesanan y ta bira “Esun cu ta recompensa esnan cu ta busc’e.”—Hebreonan 11:1, 6; Isaias 55:11.

11. Den ki manera Josue y Caleb a ser bendiciona pa nan fe y curashi?

¹¹ Berdadero fe ta crece. E ta crece segun cu nos ta aplica e berdad den nos bida, ta “purba” e beneficionan, ta “mira” contesta riba nos oracionnan y den otro maneranan mas ta sinti Jehova su guia den nos bida. (Salmo 34:8; 1 Juan 5:14, 15) Nos por tin sigur cu e fe di Josue y Caleb a bira mas profundo segun cu nan a purba of experencia Dios su bondad. (Josue 23:14) Pensa riba e puntonan aki: Nan a sobrevivi e biahe trabahoso di 40 aña dor di desierto, manera Dios a priminti cu lo sosode. (Numbernan 14:27-30; 32:11, 12) Nan por a participa activamente den e conkista di Canaan cu a dura seis aña. Finalmente, nan a disfruta di bida largo y bon salud y asta a haya un  herencia personal. Wak con Jehova ta recompensa esnan cu sirbie fielmente y cu curashi!—Josue 14:6, 9-14; 19:49, 50; 24:29.

12. Con Jehova ta ‘engrandece su palabra’?

¹² Dios su bondad amoroso cu el a demostra na Josue y Caleb ta pone nos corda e palabranan di e salmista: “Bo a engrandece bo palabra riba henter bo nomber.” (Salmo 138:2) Ora Jehova uza su nomber pa garantisa un promesa, e cumplimento di e promesa ei ta ser “engrandece” den e sentido cu lo e surpasa tur expectativa. (Efesionan 3:20) Si, Jehova nunca ta desapunta esnan cu ‘deleita nan mes’ den dje.—Salmo 37:3, 4.

Un Homber Cu A “Agrada Dios”

13, 14. Dicon Enok tabatin mester di fe y curashi?

¹³ Nos por siña hopi cos tocante fe y curashi dor di considera e ehempel di un otro testigo precristian, esta, Enok. Probablemente Enok tabata sa, asta prome cu el a cuminsa profetisa, cu su fe y curashi lo ser poni na prueba. Con bin e tabata sa? Pasobra Jehova a declara den Eden cu lo tin enemistad, of odio, entre esnan cu ta sirbi Dios y esnan cu ta sirbi Satanas e Diabel. (Genesis 3:15) Tambe Enok tabata sa cu e odio aki a cuminsa for di principio di historia humano ora cu Cain a asesina su ruman homber Abel. De echo nan tata, Adam, a biba casi 310 aña mas despues cu Enok a nace.—Genesis 5:3-18.

¹⁴ Sinembargo, a pesar di e echonan aki, Enok cu curashi a sigui ‘cana cu Dios’ y a condena “e cosnan duro” of ofensivo cu hende tabata bisa contra Jehova. (Genesis 5:22; Judas 14, 15) E posicion sin miedo aki na fabor di adoracion berdadero aparentemente a pone Enok haya hopi enemigo, y su bida a cuminsa core peliger. Den e caso aki, Jehova a spar e profeta di e agonia di morto. Despues di revela na Enok cu “e tabata agrada Dios”, Jehova a “traslad’e” for di bida pa morto, kisas durante un trans profetico.—Hebreonan 11:5, 13; Genesis 5:24.

15. Ki excelente ehempel Enok a pone pa sirbidornan di Jehova djawe?

¹⁵ Inmediatamente despues di a menciona cu Enok a ser traslada, Pablo a bolbe enfatisa e importancia di fe, bisando: “Y sin fe ta imposibel pa agrada [Dios].” (Hebreonan 11:6) Si, ta fe a duna Enok e curashi pa cana cu Jehova y proclama Su mensahenan di huicio den un mundo cu no tabata kere den Dios. Den esaki, Enok a pone un excelente ehempel pa nos. Nos tambe tin un trabou paresido pa haci den un mundo cu ta contra di adoracion berdadero y cu ta yena cu tur sorto di maldad.—Salmo 92:7; Mateo 24:14; Revelacion 12:17.

Curashi Cu Ta Bin di Temor di Dios

16, 17. Ken Abdias tabata, y den ki circunstancia el a haya su mes?

¹⁶ Fuera di fe, tin un cualidad mas cu ta produci curashi. Esei ta temor respetuoso di Dios. Laga nos considera un ehempel sobresaliente di un homber temeroso di Dios cu a biba den tempo di profeta Elias y Rei Acab. Acab tabata goberna e reino di noord di Israel y durante su reinado, adoracion di Baal a corumpi e reino ei na un escala sin precedente. De echo, 450 profeta di Baal y 400 profeta di Acera (e palo sagrado), tabata ‘come na mesa di Jezabel’, esposa di Acab.—1 Reinan 16:30-33; 18:19.

 ¹⁷ Jezabel tabata un enemigo cruel di Jehova, y el a purba caba cu adoracion berdadero for di e pais. El a asesina algun profeta di Jehova y asta a purba mata Elias, kende a scapa pa motibo cu el a sigui instruccion di Dios y a hui bai na otro banda di Riu Jordan. (1 Reinan 17:1-3; 18:13) Bo por imagina con dificil lo tabata den e tempo ei pa sostene adoracion berdadero den e reino di noord? Piyo ainda, kico si bo tabata traha den e palacio di Rei? Esei tabata e situacion den cua Abdias, * un homber temeroso di Dios cu a fungi como mayordomo di e cas di Acab, a haya su mes.—1 Reinan 18:3.

18. Kico a haci Abdias excepcional como un adorado di Jehova?

¹⁸ Abdias indudablemente tabata cauteloso y a la bes discreto den su adoracion di Jehova. Pero asina mes, e no a compromete su fe. De echo, 1 Reinan 18:3 ta bisa nos: ‘Abdias tabatin gran temor pa Jehova.’ Si, Abdias su temor di Dios tabata excepcional! E temor saludabel aki en buelta a dun’e un curashi extraordinario, manera a keda demostra un poco despues cu Jezabel a asesina e profetanan di Jehova.

19. Kico Abdias a haci cu a demostra su curashi?

¹⁹ Nos ta lesa: “A sosode cu dia Jezabel a destrui e profetanan di SEÑOR, Abdias a cohe shen profeta y a sconde nan na cincuenta-cincuenta den un cueba, y a provee pan y awa pa nan.” (1 Reinan 18:4) Manera bo por imagina, tabata un tarea hopi peligroso pa secretamente alimenta shen homber. Abdias no solamente mester a percura pa Acab y Jezabel no gar’e sino tambe e mester a percura pa e 850 profetanan falso cu tabata frecuenta e palacio no descubrie. Fuera di esei, tabatin cantidad di otro adorado di dios falso den e pais, for di campesino te prins, cu sin duda lo a probecha di cualkier oportunidad pa desenmascara Abdias y asina haya fabor cerca Rei y Lareina. Sinembargo, bou di nanishi di tur e adoradonan di idolo ei, Abdias cu curashi a percura pa e necesidadnan di e profetanan di Jehova. Esta un curashi e temor di Dios por duna un hende!

20. Con Abdias su temor di Dios a yud’e, y con su ehempel ta yuda abo?

²⁰ Como cu Abdias a demostra curashi mediante temor di Dios, Jehova evidentemente a proteh’e for di su enemigonan. Proverbionan 29:25 [NW] ta bisa: “Temblamento pa motibo di hende, esei ta pone un trampa, pero esun cu ta confia den Jehova lo ser proteha.” Abdias no tabata superman; e tabatin miedo di ser gara y mata, mescos cu nos tambe lo tabatin miedo. (1 Reinan 18:7-9, 12) Sinembargo, temor di Dios a dun’e e curashi pa vence cualkier miedo di hende cu lo e por tabatin. Abdias ta un excelente ehempel pa nos tur, specialmente pa esnan cu ta adora Jehova maske nan ta core e riesgo di perde nan libertad of asta nan bida. (Mateo 24:9) Si, laga nos tur haci esfuerso pa sirbi Jehova “cu reverencia y temor.”—Hebreonan 12:28.

21. Kico nos lo considera den e siguiente articulo?

²¹ Fe y temor di Dios no ta e unico cualidadnan cu ta produci curashi; amor por ta un motivacion asta mas grandi. Pablo a skirbi: “Dios no a duna nos un spirito di temor [of, “cobardia”, NW], sino di poder y di amor y di sano huicio.” (2 Timoteo 1:7) Den e siguiente articulo, nos lo mira con amor por yuda nos sirbi Jehova cu curashi durante e ultimo dianan trabahoso aki.—2 Timoteo 3:1.

[Nota]

Bo Por Contesta Esaki?

• Kico a contribui na e curashi di Josue y Caleb?

• Kico berdadero fe ta ensera?

• Dicon Enok no tabatin miedo di proclama Dios su mensahe di huicio?

• Con temor di Dios ta contribui na curashi?

[Preguntanan di Estudio]

[Plachi na pagina 16, 17]

Jehova a ordena Josue: “Sea fuerte y tene curashi”

[Plachi na pagina 18]

Abdias a cuida y proteha Dios su profetanan

[Plachi na pagina 19]

Cu curashi Enok a papia e palabra di Dios