Bañamento Ritual Hudiu Tabata Predecesor di Bautismo?

JUAN BAUTISTA a predica “bautismo di arepentimento.” Hesus tambe a manda su siguidonan haci hende discipel y batisa nan.—Marco 1:4; Mateo 28:19.

Bijbel ta indica cu den caso di bautismo cristian un hende mester bai completamente bou di awa. Segun e buki Jesus and His World (Hesus y Su Mundo): “Ritonan similar por ser observa den hopi religion, di pasado y presente, den diferente pais y cultura.” E buki ta afirma cu “e origen di bautismo cristian . . . ta ser haya den Hudaismo.” Kico di berdad tin den e afirmacion ei?

Tankinan di Awa pa Ritual Hudiu

Arkeologonan cu tabata coba cerca di e Sero di e Tempel di Jerusalem a descubri casi 100 tanki of piscina pa haci baño ritual, cu ta data di siglo un prome cu nos era y di siglo un di nos era. Un inscripcion den un sinagoga di siglo 2 of 3 di nos era ta bisa cu e tankinan di awa ei tabata disponibel pa “bishitantenan cu tin mester di nan.” Arkeologonan a haya mas tanki di awa den e seccion di Jerusalem caminda famianan rico y sacerdotal tabata biba; casi tur cas tabatin su propio luga priva pa haci baño ritual.

E bañonan tabata tankinan rectangular coba den baranca of den tera y fura cu bloki of piedra. Tambe nan tabata gepleister pa evita lekkage. Mayoria di nan tabata midi rond di dos meter hancho y tres meter largo. Via canal cu nan a coba nan tabata yena e tankinan cu awa di yobida. E awa tabata por lo menos 1,20 meter hundo ya asina ora un hende buk, e por a bai completamente bou di awa. Tin biaha tabatin un muraya no mucho halto meimei di e trapi cu a baha bai den e awa. Arkeologonan ta kere cu nan a uza un banda di e trapi pa drenta e baño di purificacion, ora cu e persona cu a bai baña tabata impuro, y e otro banda tabata pa sali, pa evita cualkier contaminacion.

E tankinan di awa a ser uza en conexion cu puresa ritual di e Hudiunan. Kico esaki a ensera?

E Lei y Tradicion Tocante Bañamento

E Lei di Moises a pone enfasis riba e echo cu e pueblo di Dios mester ta limpi, tanto den sentido spiritual como fisico. Tabatin varios  acto cu por a haci e Israelitanan impuro den sentido ceremonial, y pa purifica nan mes di eseinan nan mester a baña nan curpa y laba nan paña.—Levitico 11:28; 14:1-9; 15:1-31; Deuteronomio 23:10, 11.

Jehova Dios ta completamente puro y santo. P’esei a ser rekeri di e sacerdote- y Levitanan pa laba nan man y nan pia prome cu nan acerca Jehova su altar. Tabatin castigo di morto si nan keda sin cumpli cu esei.—Exodo 30:17-21.

Expertonan ta kere cu pa siglo un di nos era, e institucion religioso Hudiu a extende e rekisitonan di purificacion sacerdotal pa hende no Levita. Tanto e secta di Esenenan como e Farizeonan tabatin hopi ritual di labamento di curpa. Un fuente ta informa relaciona cu e tempo di Hesus: “Puresa ritual a ser rekeri di un Hudiu prome cu e drenta e Sero di e Tempel, prome cu e haci un sacrificio, prome cu e ricibi e beneficio di un ofrenda sacerdotal y pa otro propositonan similar.” Textonan di e Talmud ta declara cu e personanan cu a baña nan curpa mester a bai completamente bou di awa.

Hesus a critica e Farizeonan pa nan insistencia riba purificacion ritual. Evidentemente nan a practica “varios labamento”, incluso “labamento di copa y canica y weya di brons.” Hesus a bisa cu e farizeonan a kibra e mandamentonan di Dios pa impone nan propio tradicionnan. (Hebreonan 9:10; Marco 7:1-9; Levitico 11:32, 33; Lucas 11:38-42) Ningun parti di e Lei di Moises no a rekeri pa hende hinca curpa completamente bou di awa.

Acaso bautismo cristian a origina di e bañamento ritual cu e Hudiunan tabata practica? No!

Bañamento Ritual y Bautismo Cristian

E Hudiunan tabata efectua ritonan di purificacion riba nan mes curpa. Sinembargo, e bautismo cu Juan a efectua no tabata un tipo di bañamento ritual cu e Hudiunan tabata conoce. E echo cu Juan a bira conoci como Juan Bautista ta indica cu e bautismo cu el a efectua tabata diferente. E lidernan religioso Hudiu asta a manda un delegacion cerca dje pa puntra: “Pakico . . . bo ta batisa?”—Juan 1:25.

E purificacion cu e Lei di Moises a rekeri mester a ser ripiti cada biaha cu un adorado a bira impuro. Esaki no tabata e caso cu e bautismo cu Juan a efectua ni cu esun cu e cristiannan despues tabata practica. E bautismo di Juan a indica arepentimento y rechaso di e estilo di bida anterior. Bautismo cristian a simbolisa e echo cu un persona a dedica su mes na Dios. E cristian a haci esei un biaha so, no bes tras bes.

E bañamento cu tabata tuma luga den cas di e sacerdotenan Hudiu y den e bañonan publico pega cu e Sero di e Tempel simplemente tabatin un similaridad superficial cu bautismo cristian. E nificacion di cada un di e baimentonan bou di awa aki tabata completamente diferente. The Anchor Bible Dictionary ta comenta: “Tin un consenso entre expertonan cu Juan [Bautista] no a tuma over ni adapta ningun bautismo en particular for di su ambiente”, esta, for di Hudaismo. Por bisa mescos di e bautismo cu a ser practica den e congregacion cristian.

Bautismo cristian ta representa “un apelacion na Dios pa un bon consenshi.” (1 Pedro 3:21) E ta simbolisa cu un persona a dedica su mes completamente na Jehova pa sirbie como un discipel di Su Yiu. Un simbolo apropia di tal dedicacion ta cu e persona ta bai completamente bou di awa. Ora e persona bai bou di awa esei ta representa cu el a muri pa cu su estilo di bida anterior. Ora lant’e bek for di bou di awa esei ta simbolisa cu el a ser resusita pa haci Dios su boluntad.

Jehova Dios ta duna un bon consenshi na esnan cu haci un dedicacion asina y despues ser batisa. P’esei, apostel inspira Pedro por a bisa su compañeronan di fe: “Bautismo awor ta salba boso.” Esei ta algo cu ningun cantidad di bañamento ritual Hudiu hamas por a alcansa.