Hayando Tesoro Spiritual na Guinea

PA SIGLONAN, exploradonan a risca nan bida y salud en busca di tesoro y rikesa. Esnan intrepido cu a yega Guinea, na West Africa, a haya dos tipo di rikesa masha distinto for di otro: material y spiritual. E pais aki cu ta rico na diamanta, oro, hero y bauxiet di calidad halto (for di cua nan ta saca aluminio), tin un poblacion di mas cu nuebe miyon persona.

A pesar cu e religionnan di cristiandad no ta predomina den e pais, adoracion ta algo importante, y hopi hende ta duna gran balor na tesoro spiritual. Kico e tesoronan aki ta exactamente? Nan ta e sirbidornan fiel di Jehova, describi na Hageo 2:7 como “e rikesa di tur nacion”, of “e cosnan deseabel di tur e nacionnan” [NW].

Tesoronan Spiritual

Pa coba den profundidad di e tera en busca di tesoronan scondi ta rekeri bastante esfuerso. Di igual manera, den e ministerio cristian, esfuerso sincero ta necesario pa haya rikesa spiritual. Na Guinea, e trabou di predica e Reino a cuminsa den curason di e pais na principio di decada di 1950 y a yega e capital, Conakry, te na principio di decada di 1960. Awor tin alrededor di 900 Testigo di Jehova den 21 congregacion y grupo den henter e pais.

Misioneronan a yega na aña 1987 y nan a bai traha hunto cu e unico congregacion cu tabatin na Conakry. Awor tin mas cu 20 misionero den e capital y den interior di e pais. Cu masha entusiasmo nan ta encurasha e congregacionnan y ta participa hunto cu e rumannan local den e ministerio.

 Luc, kende ta biba na Conakry, tabatin goso ora cu e tabata studia Bijbel cu Albert, un docter hoben. Albert a busca berdad religioso den varios iglesia, y e tabata envolvi den practicanan spiritista. E tabata bisti un rench’i dede cu el a haya cerca un montado cu a garantis’e cu e renchi lo dun’e suerte. Despues cu Albert a hay’e cu hopi decepcion den su buskeda pa e religion berdadero, el a benta e renchi afo y a pidi den oracion: “Dios, si bo ta existi, haci posibel pa mi por siña conoce bo y sirbi bo. Sino, mi ta bai biba gewoon segun mi propio deseonan.” Poco despues, Albert tabata di bishita na cas di su ruman muher y el a tende con un Testigo di Jehova tabata studia Bijbel cu su subrina. No a tarda hopi cu nan a haci areglo pa Luc cuminsa studia Bijbel cu Albert.

Tur siman, Luc gustosamente tabata cana mas cu cinco kilometer ida y buelta pa conduci e estudio. Aunke Luc no tabatin hopi scol, Albert cu si tabata un graduado di universidad, a keda hopi impresiona cu Luc su fe firme den e Scritura y su manera practico di aplica e informacion biblico. Albert a keda masha felis ora el a haya sa cu e sufrimento di humanidad no ta Dios su falta, sino mas bien, cu Jehova su proposito ta pa pone fin na tur sufrimento y transforma e tera aki den un paradijs. (Salmo 37:9-11) Berdadnan biblico hunto cu e conducta excelente cu el a observa entre e miembronan di e congregacion a toca Albert su curason.

Sinembargo, mescos cu un artesano habil cu hopi cuidou y esfuerso tin cu corta un diamanta bruto pa e por briya, asina Albert tabatin cu kita varios capa di mal actitud di mundo afin di harmonisa su bida cu e normanan husto di Dios. El a stop di consulta montado, di bebe demasiado alcohol y di hunga wega di placa. Loke Albert a haya mas dificil tabata pa stop di huma. Ora cu finalmente el a pidi Jehova intensamente den oracion pa yud’e, el a logra. Seis luna despues el a legalisa su matrimonio. Su casa tambe a cuminsa studia Bijbel. Awor ambos ta sirbidornan batisa di Jehova.

 Martin ta un otro diamanta spiritual. El a cuminsa studia Bijbel na Guéckédou ora cu e tabatin 15 aña. Su mayornan catolico tabata contra pa e asisti na e reunionnan di Testigonan di Jehova. Nan a destrui Martin su literatura biblico, nan a batie y a core cu ne for di cas. Mescos cu diamanta ta ser forma dor di somete carbon na presion extremo, asina Martin su amor pa berdad biblico a bira firme debi na e oposicion cu el a confronta. Cu tempo, su mayornan a bira mas suave y el a bolbe na cas. Kico a pone cu e actitud di su mayornan a cambia? Nan a nota un diferencia grandi entre e comportacion di Martin y comportacion di su rumannan mas chikito, kendenan a desaroya un actitud rebelde y a cuminsa practica inmoralidad sexual. Combenci cu Martin su religion nobo tabata bon p’e, su tata gustosamente a ricibi miembronan di e congregacion na su cas. Martin su mama a gradici e rumannan hopi biaha pa tur loke nan a haci pa yuda su yiu. Martin a batisa cu 18 aña, mas despues el a asisti na e Scol di Entrenamento Ministerial y awor e ta sirbi como pionero special.

Rikesa Spiritual Importa

Mientras cu Guinea ta exporta gran parti di su recursonan natural, algun di su rikesanan spiritual a ser “importa.” Hopi hende a bin biba einan for di otro nacionnan Africano, por lo general pa motibonan economico. Otro personanan a bin pa scapa di gueranan largo y cruel.

Ernestine, di Camerun, a bin Guinea 12 aña pasa. El a studia cu Testigonan di Jehova y tabata asisti na e reunionnan aña den aña afo, sin batisa. Na aña 2003, su wowo a yena cu awa ora cu el a mira e bautismo na un asamblea di circuito di Testigonan di Jehova. El a sinti su mes hopi culpabel y a bisa Jehova den oracion: “Mi tin 51 aña awor, y mi no a haci nada pa bo. Mi kier sirbi bo.” Despues, Ernestine a actua na harmonia cu su oracion humilde.  El a splica e homber cu e tabata biba cu ne cu nan por a keda hunto solamente si nan a casa legalmente. E homber a bai di acuerdo, y despues Ernestine a yora di alegria na su propio bautismo na november 2004.

For di principio di decada di 1990, Guinea a ricibi miles di refugiado for di Liberia y Sierra Leone, incluso centenares di sirbidor di Jehova. Asina cu e rumannan yega na un campo di refugiado, nan ta haci areglo pa tene e reunionnan regularmente, nan ta organisa e trabou di predica y ta traha un Salon di Reino. Tin hende a bira sirbidor di Jehova den e camponan di refugiado. Isaak ta un di nan. Despues cu el a batisa, a surgi e posibilidad pa Isaak bolbe bek na su empleo anterior na un compania grandi na Liberia. En bes di acepta esei, el a scohe pa keda den e campo di refugiado di Laine como un pionero regular. El a splica: “Awor mi no tin cu pidi permit di un hefe pa asisti na reunion ni pa bai asamblea. Mi ta liber pa sirbi Jehova.” Na december 2003, a tene un congreso di districto den e campo aisla aki pa e 150 Testigonan cu tabata biba entre e 30.000 refugiadonan. Felismente, 591 persona a asisti, incluso 9 persona sordo cu a sigui e programa den idioma di seña. Diesdos persona a batisa. E rumannan a keda cu masha aprecio pa e esfuerso cu a ser haci pa percura un bankete spiritual pa nan.

“Cosnan Deseabel” Ta Haci Cambionan Necesario

Pa buscadonan di oro cu diamanta, ningun obstaculo no ta parce mucho grandi pa surpasa. P’esei ta conmovedor pa mira e esfuerso cu personanan nobo ta haci pa surpasa tur obstaculo afin di sirbi Jehova. Considera e caso di e mucha muher Zainab.

Na edad di 13 aña, Zainab a hay’e forsa ta traha como catibo. Nan a hib’e Guinea for di su cas cu tabata den un otro pais di West Africa. Na edad di 20 aña el a tende e mensahe di Bijbel. E tabata ansioso pa aplica loke el a siña.

Pa Zainab tabata dificil pa asisti na e reunionnan cristian pa adoracion. Pero el a aprecia e reunionnan masha y tabata determina pa no perde nan. (Hebreonan 10:24, 25) E tabata sconde su bukinan pafo ya asina e por a pasa cohe nan riba caminda pa bai reunion. Na varios ocasion, su “doñonan” a batie cruelmente pasobra el a asisti na e reunionnan spiritual aki.

Despues circunstancianan a cambia, y Zainab a ser libra for di sclabitud. Mesora el a cuminsa asisti na tur reunion, locual a yud’e progresa rapidamente. El a haya oferta di un trabou cu un salario halto, pero el a nenga esei pasobra e trabou lo a strob’e di asisti na reunion pa haya instruccion cristian. El a inscribi den e Scol di Ministerio Teocratico, el a bira un publicador di Reino no batisa y despues a simbolisa su dedicacion na Jehova mediante bautismo den awa. Poco despues di esei, el a cuminsa den e sirbishi di pionero ausiliar. Seis luna despues, el a aplica pa sirbi como pionero regular.

Un persona interesa a declara despues di a asisti na un par di reunion: “Mi no ta sinti cu mi ta pober ora mi t’aki.” Mientras cu hopi hende ta interesa solamente den e rikesanan material di Guinea, esnan cu ta stima Jehova ta busca ansiosamente e rikesanan spiritual. Si, “e cosnan deseabel di tur e nacionnan” ta acudiendo na Jehova su adoracion puro djawe!

[Cuadro na pagina 8]

GUINEA-2005

Maximo di Testigo: 883

Estudio di Bijbel: 1.710

Asistencia na Memorial: 3.255

[Mapa na pagina 8]

(Pa e texto den su formato completo , wak e publicacion)

GUINEA

Conakry

SIERRA LEONE

LIBERIA

[Plachi na pagina 8]

Albert y Luc

[Plachi na pagina 9]

Salon di Reino na Conakry

[Plachi na pagina 10]

Ernestine

[Plachi na pagina 10]

Martin

[Plachi na pagina 10]

Zainab

[Reconocemento pa Potret na pagina 9]

USAID