Nos Realmente Por Siña Conoce Dios?

“ESAKI TA BIDA ETERNO, CU NAN POR CONOCE . . . E UNICO DIOS BERDADERO.”—JUAN 17:3.

“O  PROFUNDIDAD di e rikesanan, tanto di e sabiduria como di e conocemento di Dios!” apostel Pablo a declara. El a agrega: “Ki inscudriñabel su huicionan ta y insondabel su camindanan!” (Romanonan 11:33) Acaso nos tin cu conclui for di e palabranan aki cu hende no tin e capasidad pa descubri e sabiduria y conocemento di Dios? Es decir, cu ta imposibel pa siña conoce Dios y su proposito?

E personanan cu ta sigui e filosofia religioso conoci como via negativa ta kere cu ta imposibel pa siña conoce Dios. The Encyclopedia of Religion ta declara tocante e filosofia aki: “Dios ta surpasa tur loke nos por sa di dje . . . No por duna Dios un nomber ni por definie. Cualkier nomber of definicion ta impone limite, y Dios ta surpasa . . . nan . . . E no ta un obheto di conocemento, pasobra e ta surpasa conocemento.” *

Segun e revista Newsweek, hopi persona den sociedadnan caminda religion casi no tin influencia mas, ta leun den direccion di “un tipo nobo di credo” cu, de echo ta ensera cu “tin solamente un berdad, y e berdad aki ta cu no tin berdad.”

Sinembargo, hopi hende ainda no a haya contesta riba nan preguntanan tocante e proposito di bida. Nan ta observa e problemanan teribel di pobresa, malesa y violencia. Pa nan, e insiguridad di bida por ta sumamente frustrante. Kisas nan ta anhela pa haya contesta, pero como cu nan no ta haya esaki, nan ta conclui cu no tin contesta. Consecuentemente, hopi hende asina ta separa nan mes for di religion organisa y ta busca nan propio manera di acerca Dios, y esei ta si nan ta kere ainda cu e ta existi.

E Punto di Bista Biblico

Hende cu tin un opinion faborabel di Bijbel y cu ta inclina na acepta Hesucristo como e Vocero di Dios, lo mester ta interesa pa sa e punto di bista biblico. Podise bo ta corda cu un biaha Hesus a papia di dos caminda, un  hancho y espacioso “cu ta hiba na destruccion” y un chikito y smal “cu ta hiba na bida.” El a splica con pa identifica e hendenan cu tabata riba cada un di e camindanan ei, bisando: “Na nan fruta boso lo conoce nan.” Ki tipo di fruta? Loke nan ta bisa, no loke nan ta haci. Manera Hesus a clarifica: “No ta tur hende cu bisa mi: ‘Señor, Señor’, lo drenta e reino di shelo; ma esun cu haci e boluntad di mi Tata cu ta den shelo.” Djis declara cu nos ta kere den Dios no ta suficiente. Nos tin cu haci e boluntad di Dios. Logicamente, nos mester sa prome kico precies ta e boluntad di Dios.—Mateo 7:13-23.

Hesus a mustra bon cla cu ta posibel pa hende siña conoce Dios. El a bisa:“Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Juan 17:3) Pues ta bisto anto cu nos por adkiri e sabiduria y conocemento cu Dios ta revela, basta nos haci esfuerso pa busca nan. E regalo cu Dios ta duna esnan cu haci e esfuerso ei ta bida eterno, pues definitivamente ta bale la pena busca nan.

[Nota]

[Plachi na pagina 4]

Hesus a bisa cu un caminda smal ta hiba na bida