Bo Tin Jehova Su Punto di Bista di Cosnan Sagrado?

“Vigilando cuidadosamente ... pa no tin fornicado ni ningun hende cu no ta aprecia cosnan sagrado.”—HEBREONAN 12:15, 16, NW.

1. Ki actitud cu ta reina den mundo e sirbidornan di Jehova no tin?

MUNDO en general casi no ta presta atencion mas na cosnan sagrado. E sociologo Frances Edgar Morin a declara: “Tur e fundeshinan riba cua normanan moral ta basa—Dios, naturalesa, patria, historia, inteligencia—a perde nan caracter absoluto ... Hende mes ta scohe cua ta e norma- y balornan cu nan kier sigui.” Esaki ta un refleho di “e spirito di mundo”, esta, “e spirito cu ta obra awor den e yiunan di desobediencia.” (1 Corintionan 2:12; Efesionan 2:2) E personanan cu a dedica nan mes na Jehova y cu di buena gana ta somete nan mes na su soberania legitimo, no tin e spirito of actitud sin respet ei pa cu cosnan sagrado. (Romanonan 12:1, 2) Sirbidornan di Dios mas bien ta realisa ki papel importante santidad tin den e adoracion cu nan ta rindi na Jehova. Kico ta e cosnan den nos bida cu lo mester ta sagrado? E articulo aki lo considera cinco cos cu ta santo pa tur sirbidor di Dios. Anto e siguiente articulo lo enfoca riba e santidad di nos reunionnan cristian. Pero prome, kico e palabra “santo” ta nifica realmente?

2, 3. (a) Con e Scritura ta enfatisa Jehova su santidad? (b) Con nos ta demostra cu nos ta considera e nomber di Jehova como santo?

² Den e idioma Hebreo biblico, e palabra “santo” ta transmiti e idea di un cos cu ta separa. Den adoracion, “santo” ta aplica na loke ta separa of aparta for di uzo comun y coriente, es decir, loke ta ser considera sagrado. Jehova ta santo den e sentido absoluto, te na e grado maximo. Bijbel ta yam’e e “Santisimo.” (Proverbionan 9:10, NW; 30:3, NW) Den antiguo Israel, e sumo sacerdote tabatin un plachi di oro pega na su turband cu e palabranan graba “Santidad ta pertenece na Jehova.” (Exodo 28:36, 37, NW) E Scritura ta describi con kerubin- y serafinnan celestial staciona rond di e trono di Jehova ta proclama: ‘Santo, santo, santo, ta Jehova.’ (Isaias 6:2, 3; Revelacion 4:6-8) E ripiticion aki ta enfatisa e echo cu Jehova ta santo, limpi y puro na e grado di mas halto. De echo, Jehova ta e Fuente di tur santidad.

³ Jehova su nomber ta sagrado of santo. E salmista a declara: “Laga nan alaba bo nomber grandi y temibel; santo e ta.” (Salmo 99:3) Hesus a siña nos pidi den oracion: “Nos Tata cu ta den shelo, bo nomber sea santifica [of, “sea considera sagrado; sea trata como santo”, NW, nota na pia di pagina].” (Mateo 6:9) Hesus su mama terenal, Maria, a proclama: “Mi alma ta engrandece Señor ... Esun Poderoso a haci cosnan grandi pa mi; y santo ta su nomber.” (Lucas 1:46, 49) Como sirbidornan di Jehova, nos ta considera su nomber como santo y ta evita di haci cualkier cos cu lo por trece reproche riba e nomber santo ei. Ademas, nos tin Jehova su punto di bista di cosnan sagrado, es decir, nos ta considera como sagrado e cosnan cu e ta haya ta sagrado.—Amos 5:14, 15.

Dicon Nos Tin Respet Profundo pa Hesus

4. Dicon Bijbel ta describi Hesus como “Esun Santo”?

⁴ Como e yiu “unigenito” di e Dios santo, Jehova, Hesus a ser crea santo. (Juan 1:14; Colosensenan 1:15; Hebreonan 1:1-3) P’esei  Bijbel ta yam’e “Esun Santo di Dios.” (Juan 6:69) El a keda cu su santidad ora cu Dios a transferi su bida for di shelo pa tera, pasobra tabata bou di poder di spirito santo cu Maria a duna lus na Hesus. Un angel a bisa Maria: “Spirito santo lo bin riba bo ... esun santo cu tin cu nace lo wordo yama e Yiu di Dios.” (Lucas 1:35) Den oracion na Jehova, cristiannan na Jerusalem a referi dos biaha na Dios su Yiu como “bo Yiu santo Hesus.”—Echonan 4:27, 30.

5. Ki mision sagrado Hesus a cumpli cu ne riba tera, y dicon su sanger ta precioso?

⁵ Hesus tabatin un mision sagrado pa cumpli cu ne mientras cu e tabata riba tera. Na momento di su bautismo na aña 29 di nos era, el a ser ungi como Sumo Sacerdote di e gran tempel spiritual di Jehova. (Lucas 3:21, 22; Hebreonan 7:26; 8:1, 2) Ademas, lo e tabatin cu entrega su bida como un sacrificio. E sanger cu el a drama lo a percura e rescate pa medio di cua pecadornan humano lo por a haya salbacion. (Mateo 20:28; Hebreonan 9:14) P’esei nos ta considera e sanger di Hesus como sagrado, “precioso.”—1 Pedro 1:19.

6. Kico ta nos actitud pa cu Cristo Hesus, y dicon?

⁶ Demostrando cu nos tin un profundo respet pa nos Rei y Sumo Sacerdote, Cristo Hesus, apostel Pablo a skirbi: “Dios a halsa [su Yiu] te na e halturanan, y a dun’e e nomber cu ta riba tur nomber, cu pa e nomber di Hesus tur rudia mester dobla, di esnan cu ta den shelo, y riba tera, y bou di tera, y cu tur lenga mester confesa cu Hesucristo ta Señor, pa e gloria di Dios Tata.” (Filipensenan 2:9-11) Nos ta demostra cu nos tin Jehova su punto di bista di cosnan sagrado ora nos ta somete nos mes gososamente na nos Lider y Rei reinante, Cristo Hesus, e Cabes di e congregacion cristian.—Mateo 23:10, NW; Colosensenan 1:18.

7. Con nos ta mustra nos sumision na Cristo?

⁷ Sumision na Cristo ta ensera tambe cu nos ta mustra e debido respet pa e hombernan cu e ta uza pa hiba delantera den e trabou cu e ta dirigiendo awor. Nos mester reconoce cu e papel di esnan ungi pa spirito santo cu ta forma e Cuerpo Gobernante ta un responsabilidad sagrado. Esei ta conta tambe pa papel di e superintendentenan cu nan a apunta den e sucursalnan, districtonan, circuitonan y congregacionnan. P’esei e areglo aki ta merece nos respet profundo y sumision.—Hebreonan 13:7, 17.

Un Pueblo Santo

8, 9. (a) Den ki sentido e Israelitanan tabata un pueblo santo? (b) Con Jehova a inculca den e Israelitanan e principio di santidad?

⁸ Jehova a sera un aliansa cu Israel. E relacion aki a duna e nacion nobo ei un status of posicion special. Nan a ser santifica of poni apart. Jehova mes a bisa nan: “Boso mester ta santo pa mi, pasobra ami, SEÑOR, ta santo; y mi a aparta boso for di e pueblonan pa boso ta di mi.”—Levitico 19:2; 20:26.

⁹ For di ora cu Jehova a funda e nacion di Israel, el a inculca den e Israelitanan e principio di santidad. Jehova a decreta castigo di morto pa e persona cu a djis mishi cu e sero caminda e Dies Mandamentonan tabata ser  duna. Pues den un sentido Sero Sinai a ser considera como sagrado. (Exodo 19:12, 23) E Israelitanan mester a considera e sacerdocio y e tabernakel cu su mobilario tambe como sagrado. (Exodo 30:26-30) Kico ta e situacion den e congregacion cristian?

10, 11. Dicon nos por bisa cu e congregacion cristian di unginan ta sagrado, y ki efecto esaki tin riba e “otro carnenan”?

¹⁰ E congregacion cristian di unginan ta sagrado den bista di Jehova. (1 Corintionan 1:2) De echo, henter e grupo di cristian ungi riba tera na cualkier momento durante di historia ta ser compara cu un tempel santo, aunke no ta nan ta forma e gran tempel spiritual di Jehova. Pa medio di su spirito santo Jehova ta biba den e tempel cu nan ta representa. Apostel Pablo a skirbi: “Den [union cu Cristo Hesus] henter e edificio, siendo bon hinca den otro, ta crece pa bira un tempel santo den Señor; den kende boso tambe ta wordo traha conhuntamente pa ta un luga-di-biba pa Dios den spirito.”—Efesionan 2:21, 22; 1 Pedro 2:5, 9.

¹¹ Pablo a skirbi mas aleu na cristiannan ungi: “Boso no sa cu boso ta e tempel di Dios, y cu e spirito di Dios ta biba den boso? ... E tempel di Dios ta santo, y esei ta loke boso ta.” (1 Corintionan 3:16, 17) Pa medio di su spirito, Jehova ta “biba” entre e unginan y ta “cana meimei di nan.” (2 Corintionan 6:16) Continuamente e ta guia su “esclabo” fiel. (Mateo 24:45-47) E “otro carnenan” ta aprecia e privilegio cu nan tin di por asocia cu e grupo aki considera como un “tempel.”—Juan 10:16; Mateo 25:37-40.

Cosnan Sagrado den Nos Bida Cristian

12. Kico ta cosnan cu ta sagrado den nos bida, y dicon?

¹² Pues anto, no ta un sorpresa cu hopi cos den bida di e miembronan ungi di e congregacion cristian y di nan compañeronan ta ser considera sagrado. Nos relacion cu Jehova ta un cos sagrado. (1 Cronicanan 28:9; Salmo 36:7) E ta asina precioso pa nos cu nos no ta permiti nada ni ningun persona bin entre nos y nos Dios, Jehova. (2 Cronicanan 15:2; Santiago 4:7, 8) Oracion ta hunga un papel importante den yuda nos mantene un relacion intimo cu Jehova. Oracion tabata asina sagrado pa profeta Daniel cu asta ora cu su bida tabata na peliger el a sigui fiel den su custumber di haci oracion na Jehova. (Daniel 6:7-11) Bijbel ta  compara “e oracionnan di e santonan”, esta, di cristiannan ungi, cu e sencia uza den adoracion na e tempel. (Revelacion 5:8; 8:3, 4; Levitico 16:12, 13) E simbolismo ei ta enfatisa e condicion sagrado di oracion. Ta ki un gran privilegio nos tin di por comunica cu e Soberano di universo! Nada straño cu nos ta considera oracion como sagrado den nos bida!

13. Cua forsa ta santo, y con nos mester permitie funciona den nos bida?

¹³ Tin un forsa den bida di cristiannan ungi y di nan compañeronan cu definitivamente nan ta considera sagrado: e spirito santo. E spirito ei ta e forsa activo di Jehova, y como cu semper e ta actua na harmonia cu e boluntad di e Dios santo, e ta ser yama corectamente “spirito santo” of “e spirito di santidad.” (Juan 14:26; Romanonan 1:4) Pa medio di spirito santo, Jehova ta duna su sirbidornan e poder pa predica e bon nobo. (Echonan 1:8; 4:31) Jehova ta duna su spirito na “esnan cu ta obedec’e”, esta, na esnan cu ta “cana segun e spirito” y no segun deseonan di carni. (Echonan 5:32; Galationan 5:16, 25; Romanonan 8:5-8) E forsa poderoso aki ta haci posibel cu cristiannan por produci e “fruta di e spirito”—es decir, cualidadnan excelente—y “un conducta santo y devoto.” (Galationan 5:22, 23; 2 Pedro 3:11) Si nos ta considera spirito santo como sagrado, nos lo evita di haci cualkier cos cu lo por hacie tristo of strob’e di obra den nos bida.—Efesionan 4:30.

14. Ki privilegio e unginan ta considera como sagrado, y con e otro carnenan tambe ta comparti e privilegio aki?

¹⁴ E privilegio cu nos tin di carga e nomber di e Dios santo, Jehova, y di ser su Testigonan ta un otro cos cu nos ta considera sagrado. (Isaias 43:10-12, 15) Jehova a cualifica cristiannan ungi pa nan ta “sirbidornan di un aliansa nobo.” (2 Corintionan 3:5, 6) Como tal, nan tin e tarea di predica e bon nobo of “evangelio aki di e reino” y di “haci tur e nacionnan discipel.” (Mateo 24:14; 28:19, 20) Nan ta cumpliendo fielmente cu e encargo aki, y miyones di hende manso manera carne ta reaccionando faborablemente, bisando simbolicamente na e unginan: “Laga nos bai cu boso, pasobra nos a tende cu Dios ta cu boso.” (Zacarias 8:23) E personanan manso aki gososamente ta sirbi den sentido spiritual como ‘cunukero’ y ‘cuidado di cunucu’ pa e ‘sirbidornan ungi di nos Dios.’ Den e manera ei, e otro carnenan ta di gran yudansa pa e unginan y ta duna nan un man pa nan por cumpli cu nan ministerio na un escala mundial.—Isaias 61:5, 6.

15. Ki actividad apostel Pablo a considera sagrado, y dicon nos tambe ta mir’e mescos?

¹⁵ Apostel Pablo tabata un cristian cu a considera su sirbishi of ministerio publico como un cos sagrado of santo. El a referi na su mes como “un sirbidor publico di Cristo Hesus pa e nacionnan, ocupando [su] mes den e trabou santo di e bon nobo di Dios.” (Romanonan 15:16, NW) Den Pablo su carta na e cristiannan na Corinto, el a referi na su ministerio como un “tesoro.” (2 Corintionan 4:1, 7) Mediante nos ministerio publico, nos ta haci conoci “e declaracionnan sagrado di Dios.”  (1 Pedro 4:11, NW) P’esei, sea cu nos ta di e grupo ungi of di e otro carnenan, nos ta consider’e un privilegio di por participa den e trabou di duna testimonio.

‘Perfecciona Santidad den Temor di Dios’

16. Kico lo yuda nos evita di bira hende “cu no ta aprecia cosnan sagrado”?

¹⁶ Apostel Pablo a spierta su compañeronan cristian pa nan no bira personanan “cu no ta aprecia cosnan sagrado.” El a conseha nan pa mas bien nan ‘sigui tras di santificacion’, “vigilando cuidadosamente . . . pa ningun raiz venenoso nace y causa dificultad y pa hopi no ser contamina p’e.” (Hebreonan 12:14-16, NW) E expresion “raiz venenoso” ta referi na e poco hendenan den e congregacion cristian cu kisas ta critica e manera cu cosnan ta ser haci. Por ehempel, kisas nan no ta di acuerdo cu Jehova su punto di bista relaciona cu e santidad di matrimonio of cu ta necesario pa mantene puresa moral. (1 Tesalonicensenan 4:3-7; Hebreonan 13:4) Of podise nan ta participa den combersacionnan apostata, “papiamento vano cu ta viola loke ta santo”, presenta pa esnan cu “a desvia di e berdad.”—2 Timoteo 2:16-18, NW.

17. Dicon e unginan constantemente tin cu haci esfuerso pa refleha Jehova su punto di bista di santidad?

¹⁷ Pablo a skirbi na su rumannan ungi: “Stimanan, laga nos purifica nos mes di tur impuresa di carni y spirito, y asina perfecciona nos santidad den e temor di Dios.” (2 Corintionan 7:1) E declaracion aki ta mustra cu cristiannan ungi, “participantenan den un yamada celestial”, constantemente tin cu haci esfuerso pa duna prueba cu nan ta refleha Jehova su punto di bista di santidad den tur aspecto di nan bida. (Hebreonan 3:1) Mescos tambe apostel Pedro a stimula su rumannan engendra pa spirito santo: “Como yiunan obedecido, no conforma boso cu e pasionnan cu boso tabatin antes den boso ignorancia, ma mescos cu Esun Santo cu a yama boso, boso mes tambe sea santo den tur boso conducta.”—1 Pedro 1:14, 15.

18, 19. (a) Con miembronan di e “multitud grandi” ta mustra cu nan tin e punto di bista di Jehova di cosnan sagrado? (b) Ki otro rasgo sagrado di nos bida cristian nos lo considera den e siguiente articulo?

¹⁸ Kico di e miembronan di e “multitud grandi”, kendenan lo sobrevivi “e gran tribulacion”? Nan tambe tin cu duna prueba cu nan tin Jehova su punto di bista di cosnan sagrado. Den e buki di Revelacion, nan ta ser describi como rindiendo “sirbishi sagrado” [NW] na Jehova riba e plenchi terenal di su tempel spiritual. Nan a pone fe den Cristo su sacrificio di rescate, y simbolicamente “a laba nan pañanan y a haci nan blanco den e sanger di e Lamchi.” (Revelacion 7:9, 14, 15) Esaki ta duna nan un posicion limpi dilanti Jehova y ta pone nan bou di e obligacion di “purifica [nan] mes di tur impuresa di carni y spirito, y asina perfecciona [nan] santidad den e temor di Dios.”

¹⁹ Un rasgo importante den bida di cristiannan ungi y di nan compañeronan ta cu regularmente nan ta reuni hunto pa adora Jehova y studia su Palabra. Jehova ta considera e reunionnan di su pueblo como un cos sagrado. Den e siguiente articulo nos lo trata con y pakico nos mester tin Jehova su punto di bista den e asunto masha importante aki.

Como Repaso

• Ki punto di bista mundano sirbidornan di Jehova no tin?

• Dicon Jehova ta e Fuente di tur loke ta santo?

• Con nos ta mustra respet pa e santidad di Cristo?

• Kico ta e cosnan cu nos mester considera sagrado den nos bida?

[Preguntanan di Estudio]

[Plachi na pagina 23]

Den antiguo Israel, nan mester a considera e sacerdocio y e tabernakel cu su mobilario como sagrado

[Plachi na pagina 24]

E cristiannan ungi riba tera ta forma un tempel santo

[Plachi na pagina 25]

Oracion y nos ministerio publico ta privilegionan sagrado