Conseho Confiabel pa Lanta Yiu

“MI TABATIN 19 aña, mi tabata biba leu for di mi famia, y mi no tabata ni un tiki prepara.” Asina Ruth a bisa di su prome embaraso. Como cu e mes tabata unico yiu, nunca e no a pensa masha riba e asunto di ser un mayor. Unda lo e por a haya conseho confiabel?

Di otro banda Jan, cu awe ta tata di dos yiu adulto, ta corda: “Na principio mi tabata hopi sigur di mi mes. Pero no a tarda mucho cu mi a bin realisa cu mi tabata falta conocemento practico.” Sea cu mayornan ta cuminsa lanta nan yiunan sin sa con tin cu hacie of na mitar di caminda nan no sa kico pa haci, unda nan por haya yudansa?

Awendia, mas y mas mayor ta busca informacion riba Internet. Pero kisas bo ta puntra bo mes ta con confiabel e conseho ei por ta. Tin bon motibo pa tene cuidou. Bo sa ta ken realmente ta dunando bo conseho via Internet? Cuanto exito nan tabatin cu nan mes yiunan? Sin duda bo kier ta cauteloso ora ta trata di asuntonan cu ta toca bo famia. Anto manera e articulo anterior a trece dilanti, tin biaha asta conseho di expertonan ta resulta decepcionante. Pues, na unda bo por acudi?

E Fuente supremo di conseho tocante lantamento di yiu ta Jehova Dios, Esun cu a origina famia. (Efesionan 3:15) E ta e unico experto di berdad. Den su Palabra, Bijbel, el a duna instruccion confiabel y practico cu realmente ta duna bon resultado. (Salmo 32:8; Isaias 48:17, 18) Pero ta keda na nos pa aplic’e.

Nos a puntra varios pareha pa conta kico nan a siña mientras cu nan tabata lanta nan yiunan pa bira adultonan bon balansa y temeroso di Dios. E mayornan ei a bisa cu nan exito tabata principalmente debi cu nan a aplica principionan biblico. Nan a descubri cu e conseho di Bijbel ta mes confiabel awe cu tempo a skirbie.

Pasa Tempo cu Bo Yiunan

Ora cu a puntra Catherine, un mama di dos yiu, cua ta e conseho cu a yud’e mas tanto, mesora el a referi na Deuteronomio 6:7. E versiculo ei ta bisa: “Siña [principionan biblico] cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” Catherine a realisa cu pa e por a aplica e conseho ei, lo e mester a pasa mas tempo hunto cu su yiunan.

Kisas bo ta pensa: ‘Papia ta facil, haci ta otro.’ Awe cu hopi famia tin mester di dos entrada pa por cubri gasto, ta con mayornan cu tin hopi cos di haci por pasa mas tempo hunto cu nan yiunan? Torlief, kende su yiu homber awor ta lantando su propio famia, ta bisa cu e punto importante ta pa haci loke Deuteronomio ta conseha. Hiba bo yiunan hunto cu bo unda cu bo ta bai, y di mes lo surgi oportunidadnan pa papia. Torlief ta conta: “Ami cu mi yiu homber tabata traha hunto riba proyectonan di cas. Nos a keiro hunto como famia. Y nos a come hunto.” Como resultado, segun Torlief, “nos yiu homber semper a sinti cu e por a expresa su mes libremente.”

Pero kico si e liña di comunicacion kibra y ta bira dificil pa tin un combersacion? Esaki ta sosode tin biaha segun cu e muchanan ta bira mas grandi. Un biaha mas, loke por yuda ta di pasa mas tempo hunto cu nan. E casa di Catherine, Ken, ta corda cu ora nan yiu muher a bira teenager, el a keha cu Ken no tabata scuch’e. Esei ta un keho comun cerca teenager. Kico Ken por a haci? E ta corda: “Mi a dicidi di pasa mas tempo hunto cu ne, nos dos so, papiando tocante su pensamentonan, sintimentonan y frustracionnan. Esei realmente a yuda.” (Proverbionan 20:5) Sinembargo, Ken  ta kere cu esaki a yuda pasobra den nan cas comunicacion no tabata algo nobo. El a bisa: “Ami cu mi yiu muher semper tabatin un bon relacion cu otro, p’esei el a sinti cu e por a papia libremente cu mi.”

Ta interesante pa nota cu un investigacion recien a informa cu teenagernan ta tres biaha mas inclina cu nan mayornan pa bisa cu mayor cu yiu no ta pasa suficiente tempo hunto. Pues, pakico no sigui e conseho di Bijbel? Pasa mas tanto tempo posibel hunto cu bo yiunan; sea ta ora bo ta sosega of ta traha, na cas of di biahe, mainta ora bo lanta y anochi prome cu bo bai drumi. Si ta posibel, hiba nan hunto cu bo unda cu bo ta bai. Manera Deuteronomio 6:7 ta bisa indirectamente, no tin nada cu por remplasa e tempo cu bo ta pasa hunto cu bo yiunan.

Siña Nan Bon Norma y Balor

Mario, un tata di dos yiu, tambe ta recomenda: “Duna bo yiunan hopi amor, y lesa pa nan.” Sinembargo, esei no ta djis un asunto di stimula bo yiunan su facultad mental. Bo tin cu siña nan con pa distingui loke ta bon for di loke ta malo. Mario ta agrega: “Tene un estudio di Bijbel cu nan.”

Ta p’esei Bijbel ta conseha mayornan: “No provoca boso yiunan na rabia, ma lanta nan den e disciplina y instruccion di Señor.” (Efesionan 6:4) Den hopi cas djawe mayornan no ta pone enfasis riba instruccion moral. Tin hende ta kere cu ora muchanan bira mas grandi, nan lo por dicidi pa nan mes ki norma y balor nan lo acepta. Esei ta parce bo logico? Mescos cu curpa hoben tin mester di bon nutricion pa crece bira fuerte y sano, asina tambe mente y curason hoben tin mester di instruccion. Si bo yiunan no siña normanan moral cerca bo na cas, nan probablemente lo adopta e puntonan di bista di nan compañeronan di scol, di maestronan of di medionan di comunicacion.

Bijbel por yuda mayornan siña nan yiunan con pa distingui loke ta bon for di loke ta malo. (2 Timoteo 3:16, 17) Jeff, un anciano cristian di hopi experencia cu a lanta dos yiu, ta recomenda pa uza Bijbel pa siña yiunan bon norma y balor. El a bisa: “Ora bo uza Bijbel, bo ta yuda bo yiunan realisa kico e Creador ta pensa di un asunto, no djis kico Mami cu Papi ta pensa. Nos a ripara cu Bijbel tin un efecto unico riba mente y curason. Pa atende un comportacion of idea robes, nos tabata tuma tempo pa busca un texto biblico apropia. Anto den priva, nos tabata laga e yiu lesa e texto. Hopi biaha e mucha tabata cuminsa yora despues di les’e. Nos tabata keda asombra. Bijbel tabatin un impacto hopi mas grandi cu cualkier cos cu nos por a bisa of haci.”

Hebreonan 4:12 ta splica dicon: “E palabra di Dios ta bibo y activo ... y ta capas pa husga e pensamentonan y intencionnan di curason.” Pues anto, e mensahe di Bijbel no ta simplemente e opinionnan personal of experencianan di e hendenan cu Dios a uza como escritor. Mas bien, e mensahe ta representa loke Dios ta pensa di asuntonan moral. Esaki ta loke ta distingui e mensahe di Bijbel for di tur otro conseho. Uzando Bijbel pa siña bo yiunan, bo ta yuda nan haya Dios su manera di pensa tocante asuntonan. Bo entrenamento tin mas peso, y bo tin mihor chens di yega na e curason di bo yiu.

Catherine, menciona anteriormente, ta di acuerdo. E ta bisa: “Mas dificil e situacion tabata, mas nos a busca guia den e Palabra di Dios; anto esei a duna bon resultado!” Abo lo por haci mas tanto uzo di Bijbel pa siña bo yiunan con pa distingui loke ta bon for di loke ta malo?

Sea Rasonabel

Apostel Pablo a señala un otro principio importante cu ta util den lantamento di yiu. El a urgi su compañeronan cristian: “Laga tur hende sa cu boso ta rasonabel.” (Filipensenan 4:5, NW) Esei sin duda ta inclui nos yiunan. Nan tambe tin cu mira cu nos ta rasonabel. Anto corda, ser rasonabel ta refleha “e sabiduria di ariba.”—Santiago 3:17.

 Pero con nos por ta rasonabel den e entrenamento di nos yiunan? Aunke nos ta duna nan tur e yudansa cu nos por, nos no ta controla tur nan accionnan. Por ehempel, Mario, cita anteriormente, ta un Testigo di Jehova, y e ta corda: “Semper nos a anima nos yiunan pa pone metanan spiritual manera por ehempel, bautismo y sirbishi di tempo completo. Pero nos a splica nan bon cla cu ora e momento yega ta nan mes lo tabatin cu scohe.” Cu ki resultado? Awor ambos yiu ta sirbiendo como predicado di tempo completo.

Bijbel ta spierta tatanan na Colosensenan 3:21: “No provoca boso yiunan, pa nan no perde animo.” Catherine ta gusta e versiculo ei. Ora un mayor su pasenshi cuminsa caba, ta facil pa e rabia of bira exigente. Pero Catherine ta bisa: “No exigi di bo yiu mes tanto cu bo ta exigi di bo mes.” Catherine tambe ta un Testigo di Jehova, y el a agrega: “Haci sirbimento di Jehova un dushi experencia.”

Jeff, menciona anteriormente, a haci e observacion practico aki: “Segun cu nos yiunan tabata bira grandi, un bon amigo a bisa nos cu el a bin realisa cuanto biaha e tabatin cu bisa no ora su yiunan pidi algo. Esei tabata frustra e muchanan, y laga nan sinti nan oprimi. Pa evita esaki, el a recomenda nos pa busca maneranan pa bisa si.”

Jeff a sigui bisa: “Nos a haya esaki un bon conseho. Anto nos a cuminsa busca oportunidadnan pa nos yiunan haci cosnan hunto cu otro hende den circunstancianan cu nos a aproba. Pues, nos tabata acerca nos yiunan y bisa nan: ‘Boso sa cu tal y tal hende ta bai haci esaki of esaya? Dicon boso no ta bai cu nan?’ Of si e muchanan a pidi nos pa bai un caminda, nos a forsa nos mes pa bai asta si nos tabata cansa. Nos a haci esei djis pa evita di bisa no.” Esei ta e esencia di ser rasonabel: ser husto, comprensivo y flexibel sin bai contra di principionan di Bijbel.

Beneficia di Conseho Confiabel

Mayoria di e parehanan aki awor ta wela y welo. Nan ta gosa di mira con e mesun principionan biblico aki ta yuda nan yiunan pa ser bon mayor. Abo por beneficia di e conseho di Bijbel?

Ora Ruth, menciona den e introduccion, a bira mama, e cu su casa tin biaha tabata sinti nan mes nan so para. Pero nan no tabata sin guia. Nan tabatin e conseho superior di e Palabra di Dios, Bijbel. Testigonan di Jehova a saca hopi publicacion excelente pa studia Bijbel cu por yuda mayornan. Entre nan tin Siña for di e Gran Maestro, Mi buki di relato bíblico, Loke hovenan sa puntra—Contesta práctica y E homber mas importante cu hamás a biba. Torlief, casa di Ruth, ta bisa: “Awe mayornan tin un abundancia di conseho basa riba Bijbel na nan alcance. Si nan djis probecha di nan, nan por haya yudansa riba tur tereno di bida segun cu nan ta lanta nan yiunan.”

 [Cuadro/Plachi na pagina 5]

Loke EXPERTONAN Ta Bisa ... Loke BIJBEL Ta Bisa

Tocante Mustra Cariño:

Den e buki The Psychological Care of Infant and Child (Cuido Psicologico di Baby y Mucha) (1928), dr. John Broadus Watson a urgi mayornan: “No brasa y sunchi” bo yiunan. “No laga nan sinta den bo scochi.” Sinembargo, recientemente dr. Vera Lane y dr. Dorothy Molyneaux a trece dilanti den e revista Our Children (maart 1999): “Investigacion ta indica cu mucha chikito cu no haya contacto fisico y expresionnan di cariño hopi biaha no ta desaroya bon.”

Na contraste, Isaias 66:12 ta menciona con Dios a demostra su amor pa su pueblo mediante expresionnan di amor manera di un mayor. Asina tambe ora e discipelnan di Hesus a purba taha e hendenan di trece mucha chikito cerca Hesus, el a corigi nan, bisando: “Laga e muchanan bin cerca mi; no stroba nan.” Anto “el a tuma nan den su brasa y a bendiciona nan.”—Marco 10:14, 16.

Tocante Siña Bon Norma y Balor:

Den un articulo di New York Times Magazine na 1969, dr. Bruno Bettelheim a enfatisa e echo cu un mucha tin e “derecho di forma su propio opinionnan interno, sin ser influencia pa e predicashinan autoritario di [su mayornan], sino influencia unicamente pa su mes experencia directo cu bida.” Pero casi 30 aña despues, dr. Robert Coles, autor di e buki The Moral Intelligence of Children (E Inteligencia Moral di Muchanan) (1997), a reconoce: “Muchanan tin gran necesidad di un sentido di proposito y guia den bida, un set di norma y balor” aproba pa nan mayornan y otro adultonan.

Proverbionan 22:6 ta urgi mayornan: “Instrui un mucha den e caminda cu e mester cana, y asta ora cu e bira bieu e lo no aparta su mes for di dje.” E palabra Hebreo traduci como “instrui” ta nifica tambe “inicia” y aki e ta referi na inicia e prome instruccion di un baby. Pues Bijbel ta encurasha mayornan pa cuminsa siña nan yiunan bon norma y balor for di infancia. (2 Timoteo 3:14, 15) Loke nan siña durante e añanan di formacion ei probablemente lo keda den nan mente.

Tocante Disciplina:

Dr. James Dobson a skirbi den The Strong-Willed Child (E Yiu Cabesura) (1978): “Castigo fisico na man di un mayor amoroso ta un instrumento valioso pa frena comportacion perhudicial.” Di otro banda, den un articulo adapta for di e di shete edicion di e buki popular Baby and Child Care (Cuido di Baby y Mucha) (1998), dr. Benjamin Spock a bisa: “Sutamento di yiu ta siña nan cu e persona mas grandi y mas fuerte tin poder pa haci loke e kier, sea cu e tin rason of no.”

Relaciona cu disciplina, Bijbel ta declara: “Bara y reprendemento ta duna sabiduria.” (Proverbionan 29:15) Sinembargo, no ta tur mucha tin mester di castigo fisico. Proverbionan 17:10 ta bisa nos: “Un reprendemento ta drenta mas profundo den un hende cu tin comprondemento, cu shen sla den un bobo.”

[Reconocemento]

Uza Bijbel pa yega na curason di bo yiu

[Plachi na pagina 7]

Mayornan sabi ta organisa recreo pa nan yiunan