Construyendo Unidamente pa Alaba Dios

E HENDENAN riba un di e Islanan Salomon a tuma nota di un Salon di Reino nobo di Testigonan di Jehova. Un señora a bisa: “Den nos iglesia, nos tin hopi evenemento pa recauda fondo. Nos ta pidi nos miembronan pa duna placa, pero ainda no tin suficiente fondo pa traha un misa nobo. Ta con Testigonan ta yega na fondo?” E Testigo cu e tabata papia cu ne a contest’e: “Nos ta adora Jehova como un famia mundial. Nos congregacion y nos rumannan rond mundo a contribui loke tabata necesario pa e Salon di Reino nobo. Jehova a siña nos pa ta uni den tur cos.”

Den tur actividad di Testigonan di Jehova bo por mira e union cu tin den nan, incluso den e construccion di miles di Salon di Reino. E tipo di union ei cu tin na momento di realisa e proyectonan aki no ta algo nobo. El a existi den e pueblo di Dios pa miles di aña. Con asina?

Construccion di e Tabernakel y e Tempel

Jehova tabata referi na e nacion di Israel ora el a bisa Moises mas cu 3.500 aña pasa: “Laga nan traha un santuario pa mi.” (Exodo 25:8) Relaciona cu e diseño di e proyecto di construccion aki, Jehova a bisa mas aleu: “Conforme tur loke mi ta bai mustra bo [referiendo na Moises], manera e diseño di e tabernakel y e diseño di tur su articulonan-di-uzo, asina boso [referiendo na henter e nacion] mester trah’e.” (Exodo 25:9) Anto Jehova a duna detayenan specifico pa e structura, mobilario y acesorionan di e santuario. (Exodo 25:10–27:19) E “tabernakel”, of tent, aki lo mester a bira e centro di adoracion berdadero pa henter Israel.

Nos no sa cuanto hende a traha riba e proyecto, pero tur Israelita a haya e invitacion pa contribui cu ne. Moises a bisa nan: ‘Tuma for di meimei di boso un ofrenda [of, “contribucion”, NW] pa Jehova; esun cu su curason ta dispuesto, lag’e hiba esaki como ofrenda pa Jehova.’ (Exodo 35:4-9) Con e Israelitanan a reacciona? Exodo 36:3 ta declara: “Di Moises nan a ricibi tur e contribucionnan cu e yiunan di Israel a hiba pa haci e trabou den construccion di e santuario. Y ainda e pueblo tabata sigui hiba ofrendanan voluntario p’e tur mainta.”

No a tarda hopi cu tabatin un monton di material contribui, y e pueblo a sigui trece mas. E artesanonan cu tabata haci e trabou finalmente a bisa Moises: “E pueblo ta hiba mucho mas cu suficiente pa e trabou di construccion cu SEÑOR a ordena nos pa haci.” P’esei Moises a duna ordo: “No laga ni homber ni muher haci ningun trabou mas pa e ofrendanan di e santuario.” Cu ki resultado? “E material cu nan tabatin tabata suficiente, y mas cu suficiente, pa tur e trabou cu mester a wordo haci.”—Exodo 36:4-7.

 Debi na e generosidad di e Israelitanan, e tabernakel a keda completa den un aña. (Exodo 19:1; 40:1, 2) Dunando sosten na adoracion berdadero, e pueblo di Dios a honra Jehova. (Proverbionan 3:9) Cu tempo, nan lo a cuminsa cu un proyecto di construccion mucho mas grandi. Anto un biaha mas, ken cu a desea esei por a yuda, sea cu nan tabatin experencia riba tereno di construccion of no.

Casi cinco siglo despues di a traha e tabernakel, Israel a cuminsa construi e tempel na Jerusalem. (1 Reinan 6:1) Esaki lo tabata un cas magnifico, un structura permanente traha di piedra y palo. (1 Reinan 5:17, 18) Jehova a duna David e plannan di construccion pa e tempel mediante inspiracion. (1 Cronicanan 28:11-19) Pero el a scohe Salomon, yiu di David, pa dirigi e trabou di construccion. (1 Cronicanan 22:6-10) David a duna e proyecto su pleno sosten. El a percura pa tin piedra, palo y otro material y a contribui gran cantidad di oro y plata for di su propiedad personal. Ademas, el a encurasha e otro Israelitanan pa nan ta generoso, puntrando nan: “Ken mas ta dispuesto pa haci un donacion voluntario pa SEÑOR awe?” Con e pueblo a reacciona?—1 Cronicanan 29:1-5, BPK.

Pa ora Salomon a cuminsa construi e tempel, e tabatin na su disposicion miles di tonelada di oro y plata. Tabatin asina tanto brons y hero cu no por a pisa e metalnan ei. (1 Cronicanan 22:14-16) Cu respaldo di Jehova y sosten di henter Israel, e proyecto a caba den apenas shete aña y mei.—1 Reinan 6:1, 37, 38.

‘E Cas di e Dios Berdadero’

Tanto e tabernakel como e tempel a ser yama ‘e cas di e Dios berdadero.’ (Huesnan 18:31; 2 Cronicanan 24:7) Pero Jehova nunca tabatin mester di e proteccion di un cas. (Isaias 66:1) El a laga traha e luganan ei pa beneficia hende. De echo, na inauguracion di e tempel, Salomon a puntra: “Di berdad Dios lo biba riba tera? Mira, shelo y e shelo di shelonan no por contene bo; cuanto menos e cas aki cu mi a traha!”—1 Reinan 8:27.

Jehova a bisa pa medio di su profeta Isaias: “Mi cas lo wordo yama cas di oracion pa tur e  pueblonan.” (Isaias 56:7) E sacrificio- y oracionnan cu hende tabata ofrece na e tempel, y tambe e ceremonianan cu a tene einan, a permiti hende devoto na Dios—Hudiu y no Hudiu—hala cerca di e Dios berdadero. Nan a haya Jehova su amistad y proteccion pasobra nan tabata rindi adoracion na su cas. E oracion cu Salomon a ofrece durante dedicacion di e tempel a enfatisa e berdad aki. Bo por lesa e palabranan conmovedor cu el a expresa na Dios na 1 Reinan 8:22-53 y 2 Cronicanan 6:12-42.

Ya for di hopi tempo pasa e antiguo cas ei di e Dios berdadero a pasa pa historia. Pero e Palabra di Dios a señala cu lo yega un tempo cu lo recohe hende di tur nacion pa adora Jehova na un tempel spiritual hopi mas grandi. (Isaias 2:2) E manera pa acerca Jehova lo tabata mediante e solo sacrificio perfecto di Dios su Yiu unigenito, prefigura pa e sacrificionan di bestia ofreci na e tempel. (Juan 14:6; Hebreonan 7:27; 9:12) Testigonan di Jehova ta adorando Dios awe den e manera superior ei, y nan ta yudando hopi hende pa haci mescos.

Proyectonan di Construccion di Tempo Actual

Rond mundo, Testigonan di Jehova ta sirbi e Dios berdadero. Nan ta forma “un nacion poderoso”, di cua su poblacion ta sigui crece. (Isaias 60:22) E luga principal di reuni di Testigonan di Jehova ta e Salon di Reino. * Tin miles di e edificionan aki den uzo, y mester di miles mas.

Testigonan di Jehova ta ‘pone nan mes disponibel’ voluntariamente pa construi e Salonnan di Reino necesario. (Salmo 110:3) Sinembargo, hopi biaha Testigonan local no tin e experencia necesario den construccion, y den algun region caminda tin gran aumento ta reina hopi pobresa. Na aña 1999 e Cuerpo Gobernante di Testigonan di Jehova a institui un programa di construccion di Salon di Reino pa yuda supera e obstaculonan ei. Mediante e programa aki, Testigonan cu tin experencia den trabounan di construccion a biaha bai luganan leu afin di entrena nan rumannan homber y muher pa traha Salonnan di Reino. E trahadonan entrena aki e ora ei a sigui cu e trabou di construccion den e region ei. Kico tabata e resultado di e esfuerso special aki?

Te cu februari 2006, Testigonan di Jehova a construi mas cu 13.000 Salon di Reino nobo den paisnan di poco recurso. Wak kico algun persona cu ta haci uzo di e Salonnan di Reino nobo a bisa.

“E congregacion tabatin un promedio di asistencia di 160 hende. Na e prome reunion despues cu a traha e Salon di Reino nobo, e asistencia a subi te 200. Awor, seis luna despues, nan tin un asistencia di 230 hende. Ta bisto cu Jehova su bendicion ta riba e construccion di e luganan modesto y toch practico aki.”—Un superintendente di circuito na Ecuador.

“Pa añanan hende tabata puntra nos: ‘Ki dia boso lo tin un Salon di Reino manera esnan cu nos ta mira den boso publicacionnan?’ Gracias na Jehova, porfin nos tin un luga di adoracion representabel. Nos tabata tene reunion den e tienda di un ruman, cu un promedio di asistencia di 30 hende. Na e prome reunion  den e Salon di Reino nobo, 110 persona a asisti.”—Un congregacion na Uganda.

“Dos ruman muher pionero regular ta informa cu for di dia cu a traha e Salon di Reino a bira mas dushi pa predica den e teritorio. E hendenan ta mas inclina na scucha den sirbishi di cas pa cas y tambe den situacionnan informal. E rumannan muher aki ta conduci awor 17 estudio di Bijbel, y hopi di e studiantenan di Bijbel aki ta asisti na reunion.”—Sucursal di Islanan Salomon.

“Un pastor cu ta biba den bisindario di un Salon di Reino nobo a bisa cu esaki a subi e prestigio di henter e bario y cu e hendenan local ta orguyoso di dje. Hopi hende cu pasa dilanti di e salon ta bisa con bunita el a keda. Esaki ta duna e rumannan bon chens pa predica. Mas y mas hende kier sa tocante nos hermandad mundial. Hopi persona cu pa añanan no tabata asisti na reunion a ser motiva pa bolbe cuminsa asocia cu regularidad.”—Sucursal di Myanmar.

“Un ruman muher a invita un persona interesa pa pasa na e sitio di construccion den su bario. E homber a conta despues: ‘Ami a pensa cu e trahadonan lo no a laga mi drenta. Pa mi sorpresa, e Testigonan a cuminda mi masha amabel. Homber y muher tabata traha duro, sin perde tempo. Tabatin harmonia y un bon spirito.’ E homber a acepta un estudio di Bijbel y a cuminsa asisti na e reunionnan. Mas despues el a bisa: ‘Mi manera di pensa a cambia. Lo mi no bandona Dios awor cu mi a hay’e.’”—Sucursal di Colombia.

 Nos Sosten Ta Importante

Construccion di Salonnan di Reino ta un parti importante di nos sirbishi sagrado. E manera cu Testigonan di Jehova di tur parti di mundo a sostene e trabou ei—financieramente y tambe den otro manera—ta realmente digno di elogio. Pero nos tin cu corda cu otro aspectonan di sirbishi sagrado tambe ta masha importante. De bes en cuando, cristiannan ta victima di desasternan natural y nan tin mester di nos yudansa. Produccion di literatura biblico ta hunga un papel clave den sostene sirbishi sagrado. Mayoria di nos a yega di mira e impacto cu un revista of buki biblico, laga den man di un persona cu tin e disposicion corecto, tabatin riba dje. Ademas, ta masha importante pa sostene misioneronan y otro rumannan den sirbishi special di tempo completo. E cristiannan ei cu ta sacrifica nan mes ta hunga un papel clave den e expansion di e trabou di predica den e ultimo dianan aki.

E Israelitanan cu a contribui cu construccion di e tempel a alegra masha. (1 Cronicanan 29:9) Awe, ora nos ta sostene adoracion berdadero cu nos contribucion, esei di igual manera ta haci nos felis. (Echonan 20:35) Nos ta experencia e felicidad ei ora nos tira nos contribucion den e caha destina pa e Fondo pa Salon di Reino y ora nos contribui cu e obra mundial, sosteniendo asina otro proyectonan liga cu e predicacion di e bon nobo di Reino. Den un manera maraviyoso, Testigonan di Jehova djawe ta uni den adoracion berdadero. Ohala nos tur por ser yena cu e felicidad cu ta bin di sostene e adoracion ei!

[Nota]

[Cuadro/Plachi na pagina 20, 21]

MANERANAN CU ALGUN HENDE TA SCOHE PA DUNA

CONTRIBUCION PA E OBRA MUNDIAL

Hopi hende ta aparta, of hinca den nan presupuesto, un montante pa nan pone den e cahanan di contribucion marca: “Contribucion pa e Obra Mundial—Mateo 24:14.”

Tur luna congregacionnan ta manda e montantenan aki pa e sucursal di Testigonan di Jehova cu ta sirbi nan respectivo pais. Tambe por manda donacion voluntario di placa directamente na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, of na e oficina di sucursal di Testigonan di Jehova cu ta sirbi bo pais. Si manda cheque, e mester ta na nomber di “Watch Tower.” Tambe por haci donacion di prenda of otro cos di balor. Un carta breve cu ta declara cu esakinan ta un regalo incondicional mester compaña e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, riba peticion di e dunado, lo por debolbe e donacion na dje. Pa mas informacion, por fabor, tuma contacto cu e Treasurer’s Office na e adres ya menciona.

DONACION PLANIA

Ademas di regalo incondicional di placa, tin otro metodonan di duna na beneficio di e sirbishi di Reino mundial. Esakinan ta inclui:

Seguro: Por nombra Watch Tower como beneficiario di un polisa di seguro di bida of di un areglo di pension.

Cuenta di Banco: Por duna Watch Tower derecho di uza cuenta di banco, time deposit of cuenta di pension personal, of derecho di cobra nan despues di morto di nan doño, conforme rekisitonan bancario local.

Accion y Bono: Por haci donacion di accion y bono na Watch Tower como un regalo incondicional.

Propiedad: Por haci donacion di propiedad cu por ser bendi, sea como regalo incondicional of bou di e condicion cu e dunado por sigui biba den dje te na su morto. Tuma contacto cu e oficina di sucursal di bo pais prome cu traha e acta pa traspasa cualkier propiedad.

Testament y Trust: Por nombra Watch Tower como heredero di propiedad of placa via un testament legal, of por nombra Watch Tower como beneficiario di un areglo di trust. Un trust cu ta beneficia un organisacion religioso por duna cierto beneficio fiscal.

Pa mas informacion, bo por tuma contacto cu Watch Tower, via carta of telefon, na e adres indica akibou, of na e oficina di Testigonan di Jehova cu ta sirbi bo pais.

Watch Tower

P.O. Box 4708 (Seroe Loraweg 142A)

Curaçao, N.A.

Telefon: (599-9) 461-7528

[Plachi na pagina 18]

Nos esfuersonan uni ta haci posibel cu por traha Salonnan di Reino bunita rond mundo

[Plachi na pagina 18]

Salon di Reino nobo na Ghana