“Expertonan” Ta Bin y Bai

DEN e mundo djawe, un hende cu tin acceso na computer por busca conseho pa mayor riba Internet y den un kinipi di wowo e ta haya mas cu 26 miyon referencia encuanto e topico aki. Si bo mester tuma un minuut so pa lesa cada un di e referencianan ei, bo yiu lo crece bira grandi te bai for di cas prome cu bo por caba di lesa nan tur.

Unda mayornan tabata bai busca conseho tempo cu no tabatin docter di mucha, psicologo di mucha ni Internet? Por lo general, nan tabata acudi na otro miembronan di famia. Mama-, tata-, tanta- y omonan tabata dispuesto y den posicion pa duna guia y yudansa financiero, y asta wak pa yiu. Pero den hopi pais, debi cu mayoria di hende di cunucu a bai biba den stad, esaki a pone cu e lasonan familiar estrecho ei a caba casi completamente. Den hopi caso awe, mama cu tata ta haya nan, nan so para dilanti di e reto pa lanta yiu.

Esaki sin duda ta un di e motibonan pakico e negoshi di cuido di yiu a crece asina lihe. Un otro motibo ta cu tur caminda hende tin masha confiansa cu ciencia por duna nan bon conseho. Rond di fin di siglo 19, e publico Mericano a cuminsa kere di berdad cu ciencia lo por a drecha tur aspecto di bida humano. Awel, pakico no criamento di yiu tambe? P’esei ora cu e Congreso Nacional di Mamanan di Merca a lamenta publicamente na aña 1899 cu ‘mayornan ta incompetente’, un batayon di “experto cientifico” a aparece rapidamente pa duna un man. Nan a priminti di yuda mama- cu tatanan cu tabata luchando pa lanta nan yiunan.

Conseho pa Lanta Yiu Segun Buki

Sinembargo, kico e expertonan aki a logra? Acaso e mayornan di awe tin menos precupacion y ta mihor prepara pa lanta nan yiunan cu esnan di antes? E contesta ta no, segun un encuesta recien na Gran Bretania. E encuesta ei a revela cu rond di 35 porciento di mayor cu tin yiu chikito te ainda ta en busca di conseho confiabel. Otro mayornan ta sinti cu nan no tin ningun otro opcion cu sigui nan propio instinto.

Ann Hulbert, un mama di dos yiu, a analisa e historia di literatura profesional tocante lantamento di yiu den su buki Raising America: Experts, Parents, and a Century of Advice About Children (Lantando Yiu na Merca: Expertonan, Mayornan y un Siglo di Conseho Tocante Yiu). Hulbert a señala cu masha poco conclusion di expertonan tabata basa riba ciencia bon funda. Mas bien, ta parce cu nan conseho tabata mas bou di influencia di nan propio experencianan den bida cu influencia di cualkier informacion obhetivo. Mirando bek, ta parce cu gran parti di loke e expertonan ei a skirbi tabata “in” den nan tempo, cosnan contradictorio y tin biaha extravagante.

Pues den ki situacion mayornan djawe ta? Francamente bisa, hopi di nan ta tur confundi, ya cu nan ta haya nan cu mas conseho, opinion y controversia cu nunca. Sinembargo, no ta tur mayor ta sinti nan perdi. Manera e siguiente articulo lo mustra, rond mundo tin mayornan cu ta beneficiando di un fuente di sabiduria di hopi tempo pasa cu te ainda ta resulta di ta un fuente di conseho confiabel.