Storia di Bida

Jehova A Bendiciona Mi Deseo pa Ta Misionero Ricamente

segun e relato di Sheila Winfield da Conceição

Un biaha un misionero cu tabata di bishita for di Africa a conta nos cu den e teritorio unda e tabata asigna, tur hende ta lag’e drenta paden y ta scucha atentamente na e bon nobo di Reino di Dios. Segun cu mi tabata tend’e, mi a pensa: ‘Lo mi tin gana di traha den un teritorio asina!’ E combersacion ei, tempo cu mi tabatin 13 aña, a lanta den mi curason e deseo pa ta un misionero.

SINEMBARGO, nos famia a cuminsa siña tocante Jehova hopi mas prome. Un mainta na aña 1939, dos yoncuman nechi bisti a bati na nos porta na Hemel Hempstead, un pueblo djis pafo di e zona metropolitano di London, Inglatera. Nan tabata Testigonan di Jehova. Mi a nace un aña prome cu esei, pues mi no ta corda e bishita ei. Pa evita nan mi mama a bisa nan cu mi tata lo por ta interesa pero cu lo e no ta na cas prome cu nueb’or di anochi. Esta sorprendi mi mama a keda ora cu nan a bolbe bek e mesun anochi ei! Despues cu mi tata, Henry Winfield, a haya sa kico ta nan posicion den asuntonan politico y nacionalista, el a invita nan pa drenta y a acepta un estudio di Bijbel. El a progresa rapidamente y a batisa. Algun aña despues, mi mama Kathleen, tambe a cuminsa studia. El a batisa na aña 1946.

Na 1948, mi a cuminsa participa cu regularidad den e predicacion di e bon nobo di Reino di Dios. Mi a haya cu mi tabatin mester di un holoshi pa mi por raporta precies cuanto ora mi a dedica na sirbishi. Si ami cu mi dos ruman hombernan a comporta nos mes bon, nos tabata haya tur diasabra como zakgeld un moneda cu a bal seis cen. Mi a spar mi monedanan  di seis cen pa casi dos aña pa mi por a cumpra e holoshi di mas barata cu tabatin e tempo ei. Sinembargo, Ray, mi ruman homber mas chikito, semper tabata pidi mi tata pa dun’e su zakgeld na dos moneda di tres cen, nunca un di seis cen. Un dia el a insisti asina tanto pa haya dos moneda cu mi tata a rabia. Ray a cuminsa yora y a bisa cu e tabatin mester di dos moneda di tres cen debi na un secreto entre e cu Jehova. Finalmente, Ray a splica: “Un di e monedanan di tres cen ta pa pone den caha di contribucion, y e otro ta pa mi.” Mi mama a yora di alegria, mi tata a core bai cambia e placa, y ami a siña e importancia di apoya e obra di Reino financieramente.

Rond di e tempo aki, mi tata a haci areglo pa nos bai biba caminda tabatin mas necesidad di proclamadonan di Reino. Na 1949 el a bende su boerderij y tambe su tereno di saca santo y greis y a cuminsa traha pionero, predicando full-time como un Testigo di Jehova. Ami a batisa dia 24 di september 1950, como simbolo di mi dedicacion na Jehova. Djei padilanti, durante vakantie di zomer, mi tabata sirbi como pionero di vakantie (yama awor pionero ausiliar), dedicando 100 ora of mas pa luna na e trabou di predica. Pero esei tabata apenas e principio. Poco despues un deseo fuerte a lanta den mi curason pa haci mas ainda pa promove adoracion puro.

Mi Deseo pa Ta Misionero

Na 1951, mi tata a ser asigna na Bideford, Noord Devon. Poco despues cu nos a yega einan, e misionero cu tabata sirbi na Africa a bishita nos congregacion, manera mi a conta na cuminsamento. Despues di e bishita ei, mi deseo pa bira un misionero a influencia tur mi decisionnan. E docentenan na scol tabata sa di mi meta y nan a haci tur nan posibel pa pone mi cambia di opinion, cu e speransa cu lo mi a sigui un carera den mundo. Sinembargo, riba mi ultimo dia di scol, ora cu mi a bai na e camber di e docentenan pa gradici nan y pa yama nan ayo, un di nan a bisa mi: “Pabien! Abo ta e unico studiante cu realmente sa kico bo kier den bida. Nos ta spera cu bo ta logra bo meta.”

Mi a busca un trabou part-time mesora, y riba prome di december 1955, mi a bira un pionero regular. Mas despues, mi mama cu mi ruman hombernan tambe a bira pionero. Asina a sosode cu durante varios aña, henter nos famia tabata den sirbishi di tempo completo.

Rumbo pa Irlanda

Un aña despues, mi a haya invitacion pa sirbi na Irlanda. Esaki tabata un paso den direccion di mi meta pa bira misionero. Na februari 1957, hunto cu dos otro pionero hoben, June Napier y Beryl Barker, mi a yega na Cork, den zuid di Irlanda.

Sirbishi di veld na Irlanda tabata un reto. Tabatin hopi oposicion di parti di Iglesia Catolico Romano. Nos a siña haci sigur cu tin un caminda pa sali for di un flat of un proyecto di  vivienda, den caso cu nos mester a core sali pura. Nos tabatin custumber di sconde nos baisnan na un distancia leu, pero hopi biaha ken cu ta tabata haya nan y corta e tayernan of baha nan.

Un biaha ora ami cu Beryl tabata bishita e habitantenan di un proyecto grandi di vivienda, un grupo di mucha a cuminsa grita palabranan di insulto y tira nos cu piedra. P’esei nos a drenta un tienda, cu tabata parti di un cas, caminda nan ta bende lechi. Un multitud desordena a cuminsa forma pafo di e luga. Como cu Beryl gusta lechi, el a bebe dos pa tres glas pocopoco, cu e speransa cu e hendenan lo a bai. Pero nan no a bai. Net na e momento ei un pastor hoben a drenta e tienda. El a tuma nos pa bishitante y el a ofrece pa mustra nos e bario. Sinembargo, prome el a hiba nos na un otro camber den e cas, y mientras nos a sinta keto keto, el a duna santa olio na un homber bieu cu tabata muriendo. Caba nos a sali for di e cas hunto cu e pastor. Ora e multitud a mira nos sali combersando cu ne, nan a bai.

Rumbo pa Galaad

Na 1958 lo tabatin e Asamblea Internacional Boluntad Divino na New York. Mi tata tabata bai e asamblea ei, y mi tambe tabatin gana di bai, pero mi no tabatin placa. Anto mi wela a muri inespera y a laga 100 pond sterling (500 AWG.) pa mi. E pasashi ida y buelta pa e asamblea tabata costa 96 pond sterling, pues mi a boek mi pasashi mesora.

Poco despues, un representante di e sucursal di Testigonan di Jehova na Gran Bretania a bishita nos y a invita tur e pioneronan special cu tabata bai e asamblea pa solicita pa haya entrenamento como misionero na e Scol Biblico di Galaad di Watchtower. Mi no por a kere mi horeanan! El a duna un formulario di solicitud na tur cu excepcion di ami. Mi tabata mucho jong. Mi a pidie pa inclui mi, y a splic’e cu ya caba mi a bandona mi pais natal y tabata practicamente den un asignacion di misionero. Ora el a mira con determina mi tabata, el a duna mi un formulario. Esta hopi oracion mi a haci pa mi ser acepta! E contesta a bin bek lihe, y mi a haya e invitacion pa asisti na Galaad.

Pa mi gran goso, mi tabata den e di 33 klas di Galaad, hunto cu 81 pionero di 14 pais. E cinco lunanan di e curso a pasa masha lihe. Casi na final, Ruman Nathan H. Knorr a duna nos un discurso motivador di cuater ora. El a anima esnan cu por a keda soltero pa haci esei. (1 Corintionan 7:37, 38, NW) Pero pa nos cu a desea di casa un dia, el a sugeri pa nos traha un lista di loke nos personalmente tabata rekeri di un casa apropia. Anto si un posibel candidato mester presenta, nos lo por a samina e persona a base di e rekisitonan ei.

 Mi lista personal di loke mi a rekeri di un posibel esposo a inclui lo siguiente: E tambe lo mester ta un misionero y ta stima Jehova, e mester sa mas tocante e berdad biblico cu mi, e mester ta dispuesto pa no haya yiu prome cu Armagedon pa nos por sigui den sirbishi di tempo completo, e mester ta papia Ingles bon y e mester tin mas edad cu mi. Mi lista tabata un gran yudansa pa mi, un hoben di 20 aña cu tabata a punto di haya un asignacion pa bai un pais leu.

Rumbo pa Brazil

Riba diadomingo, 2 di augustus 1959, nos a gradua y a haya sa unda nos asignacion lo ta. Ami cu Vehanouch Yazedjian, Sarah Greco, Ray y Inger Hatfield, Sonia Springate y Doreen Hines, a ser asigna pa bai Brazil. Nos tabata hopi emociona. Mi a imagina hopi selva, colebra, mata di gom y indjan nativo. Sinembargo, ki un sorpresa mi a haya ora mi a yega! En bes di e selva di yobida di Amazona, mi a haya Rio de Janeiro, cu e tempo ei tabata e capital di e pais, un stad moderno y cu hopi solo.

Nos prome reto tabata pa siña Portugues. Durante e prome luna, nos tabata siña 11 ora pa dia. Despues di a predica na Rio y a biba pa un tempo na e sucursal di Testigonan di Jehova einan, nan a manda mi na un cas di misionero na Piracicaba, den Estado São Paulo, y despues pa un cas di misionero na Porto Alegre, den Estado Rio Grande do Sul.

Pero na principio di 1963, mi a haya un invitacion pa traha den e Departamento di Traduccion na sucursal. Floriano Ignez da Conceição, kende a duna nos les di Portugues na cuminsamento ora nos a yega Brazil, tabata na encargo di e departamento. El a conoce e berdad na 1944, tempo cu tabatin apenas un 300 Testigo na Brazil, y despues el a asisti na e di 22 klas di Galaad. Riba un dia, algun luna despues, Ruman Conceição a pidi mi keda un rato merdia, ya cu e tabatin un cos di papia cu mi. Na prome instante, mi a precupa. Acaso mi a haci algo robes? Ora cu porfin bel a bati pa bai come, mi a puntr’e ta kico e tabatin di bisa mi. Como contesta el a puntra mi: “Bo kier casa cu mi?” Mi a keda babuca. Mi a pidie duna mi tempo pa pensa riba e asunto y mi a core bai abou pa bai come.

Floriano no tabata e prome ruman homber cu a expresa interes den mi. Sinembargo, te cu e momento ei ningun di nan no a satisface loke personalmente mi tabata rekeri di un casa apropia. Mi ta kere cu mi lista a yuda mi evita di tuma mal decision. Pero e biaha aki tabata otro. Floriano a satisface tur loke mi tabata rekeri! Pues nos a casa dia 15 di mei 1965.

Confrontando e Dificultadnan di Malesa

Matrimonio tabata un dushi experencia pa mi cu Floriano, a pesar di e retonan cu nos a confronta. Un di e retonan aki tabata Floriano su problemanan di salud cu a cuminsa un poco prome cu nos a casa. Añanan prome, el a sufri un colapso pulmonar, y awor e efectonan di esei a cuminsa caus’e hopi dolor. Como resultado, nos a bandona Betel y a ser asigna como pionero special na e stad Teresópolis, den e region montañoso di Estado Rio de Janeiro. Nos a spera cu e clima cu tin einan lo a yud’e recupera.

Ademas, na december 1965 mi a haya e noticia cu mi mama tabatin cancer y tabata gravemente malo. Nos tabata skirbi otro cu regularidad, pero mi tabatin shete aña sin mira mi mama. P’esei el a paga nos pasashi pa bin bishit’e na Inglatera. Docternan a opera mi mama, pero nan no por a saca e cancer. Aunke e tabata na cama y hopi malo, el a keda cu su deseo di participa den e trabou di predica. E tabatin un mashin di type den su camber di manera cu e por a dicta carta pa bo type p’e. E tabata predica tambe brevemente na bishitantenan. El a muri dia 27 di november 1966. E mesun luna ei, el a raporta dies ora di sirbishi di veld! Mi tata a sigui fiel den sirbishi di pionero te na su morto na 1979.

Despues di morto di mi mama, ami cu Floriano a regresa Brazil, caminda nos a sigui sirbi te  awe den Estado Rio de Janeiro. Na principio, nos a ser asigna pa haci e trabou di circuito den e capital di e estado, pero nos goso tabata di corto duracion, ya cu Floriano a bolbe bira malo. E ora ei nos a regresa Teresópolis como pionero special.

Na 1974, despues di varios aña di tratamento doloroso, docternan finalmente a kita Floriano su pulmon robes. Durante e tempo ei, e no por a sirbi como superintendente presidente ni como pionero special, pero si e por a conduci estudio di Bijbel durante oranan di bishita na hospital. Un di e estudionan ei tabata na Ingles cu Bob, un Mericano pensiona. Bob a acepta e berdad y despues a batisa. Pocopoco Floriano a recupera y el a sigui sirbi como pionero regular te cu awe.

Jehova A Bendiciona Mi Ministerio

Atrabes di añanan, mi a sigui sirbi como pionero special, y Jehova a bendiciona mi ministerio. Na Teresópolis, mi tabatin e privilegio maraviyoso di yuda mas cu 60 hende dedica nan bida na Jehova. Entre nan tabatin un señora cu yama Jupira, cu a siña lesa cerca mi. Cu tempo, mi a studia cu ocho di su yiunan adulto. Como resultado, Jupira y mas cu 20 miembro di su famia ta sirbiendo Jehova activamente awe. Un di nan ta anciano, tres ta sirbidor ministerial y dos ta pionero.

Mi a siña mantene un actitud positivo pa loke ta e posibilidad cu hende por acepta e berdad. Na un ocasion, mi tabata conduciendo un estudio di Bijbel cu un señora hoben cu yama Alzemira ora cu su casa, Antônio, a menasa di manda dos cacho grandi riba mi si mi no bandona nan cas inmediatamente. Despues di esei, de bes en cuando mi tabatin contacto cu Alzemira te cu shete aña despues, ora cu mi a logra haya Antônio su permiso pa bolbe studia cu Alzemira. Pero asina mes, Antônio a taha mi di papia tocante Bijbel cu ne. Sinembargo, un dia cu awa tabata yobe mi a invita Antônio pa participa den e estudio. E ora ei mi a descubri cu su problema tabata cu e no por a lesa ni skirbi. Djei padilanti, Floriano y otro rumannan a studia cu ne y a siñ’e lesa. Awe tanto Alzemira como Antônio ta rumannan batisa. Antônio ta un gran yudansa den e congregacion, y ta compaña hopi hoben den e ministerio.

Esakinan ta djis algun di e tantisimo experencianan cu nos tabatin durante mas cu 20 aña cu nos a sirbi na Teresópolis. Na principio di 1988, nos a haya un asignacion nobo: e stad di Niterói. Einan nos a sirbi pa cinco aña y despues nos a muda pa Santo Aleixo. Caba nos a muda pa Congregacion Japuíba den curason di e estado y nos tabatin e privilegio di lanta Congregacion Ribeira.

Un Bida Simpel Pero Recompensador

Atrabes di añanan, ami cu Floriano tabatin e privilegio di a yuda mas cu 300 hende dedica nan bida na Jehova. Actualmente, algun ta sirbi na sucursal, y tin di nan ta pionero, anciano y sirbidor ministerial. Mi ta masha gradicido cu Dios mediante su spirito santo a uza nos pa yuda asina tanto hende!—Marco 10:29, 30.

Ta berdad cu Floriano tabatin cu trata cu problemanan serio di salud. A pesar di su condicion, e ta keda firme, gososo y cu confiansa den Jehova. Hopi biaha e ta bisa: “Awendia felicidad no ta bin di hiba un bida sin problema. E ta bin di tin Jehova su yudansa pa trata cu nos problemanan.”—Salmo 34:19.

Na aña 2003, docternan a haya cancer den mi wowo robes. Mi a opera y nan a remplasa mi wowo pa un wowo artificial cu mi tin cu haci limpi varios biaha pa dia. A pesar di esaki, Jehova a bendiciona mi cu e energia pa sigui sirbie como pionero special.

Pa loke ta cosnan material, mi a hiba un bida simpel. Sinembargo, Jehova a bendiciona mi den mi asignacion y haci mi rico den sentido spiritual. E comentario di e ruman muher misionero tocante e trabou di predica na Africa a resulta di ta un bon descripcion di nos asignacion na Brazil. De echo, Jehova a bendiciona mi deseo pa ta misionero ricamente!

[Plachi na pagina 9]

Ami hunto cu mi famia, 1953

[Plachi na pagina 9]

Predicando na Irlanda, 1957

[Plachi na pagina 10]

Na Brazil, 1959, hunto cu otro misionero. Di man robes pa drechi: Ami, Inger Hatfield, Doreen Hines, y Sonia Springate

[Plachi na pagina 10]

Hunto cu mi casa