Mustra Respet pa Nos Reunionnan Sagrado

“Eseinan lo mi hiba na mi sero santo, y lo mi haci nan contento den mi cas di oracion.”—ISAIAS 56:7.

1. Ki motibonan biblico nos tin pa mustra e debido respet pa nos reunionnan?

JEHOVA a reuni su pueblo, e cristiannan ungi y nan compañeronan, pa ador’e na su “sero santo.” E ta haci nan contento den su “cas di oracion”, esta, su tempel spiritual, cu ta “un cas di oracion pa tur nacion.” (Isaias 56:7; Marco 11:17) E desaroyonan aki ta indica cu e adoracion di Jehova ta santo, puro y eleva. Ora nos ta mustra e debido respet pa nos reunionnan, caminda nos ta studia y adora Dios, nos ta duna prueba cu nos tin e punto di bista di Jehova di cosnan sagrado.

2. Kico ta indica cu Jehova a considera e luga cu el a scohe pa rindi adoracion na dje como sagrado, y con Hesus a mustra cu e tambe a mir’e mescos?

² Den antiguo Israel, nan mester a considera e luga cu Jehova a scohe pa rindi adoracion na dje como sagrado. E tabernakel y su mobilario y articulonan di uzo mester a ser ungi y santifica pa “nan por ta masha santo mes.” (Exodo 30:26-29) E dos seccionnan di e santuario a ser yama “e Luga Santo” y “e Santisimo.” (Hebreonan 9:2, 3) Despues e tabernakel a keda remplasa pa e tempel den Jerusalem. Nan a yama Jerusalem “e stad santo”, ya cu e tabata e centro di adoracion di Jehova. (Nehemias 11:1; Mateo 27:53) Hesus mes a mustra e debido respet pa e tempel durante su ministerio riba tera. El a rabia cu e hendenan pa e manera sin respet cu nan a uza e area di tempel pa propositonan comercial y pa corta caminda ora nan tabatin cu carga mercancia.—Marco 11:15, 16.

3. Kico ta ilustra e caracter sagrado di e asambleanan di Israel?

³ E Israelitanan tabata reuni cu regularidad pa adora Jehova y pa scucha e lesamento di su Lei. Cierto dia di nan fiestanan a ser yama convocacionnan santo of asambleanan solem, indicando e caracter sagrado di e reunionnan aki. (Levitico 23:2, 3, 36, 37) Na un asamblea publico den e tempo di Esdras y Nehemias, e Levitanan “a splica e lei na e pueblo.” Como cu “henter e pueblo tabata yora ora nan a tende e palabranan di lei”, e Levitanan “a calma henter e pueblo, bisando: ‘Keda keto, pasobra e dia ta santo.’” Despues di esei e Israelitanan a celebra e Fiesta di Tabernakelnan (of di Ramada) cu “gran goso.” Ademas, “tur dia . . . tabata lesa for di e buki di e lei di Dios, for di e prome dia te na e ultimo dia. Y nan a celebra e fiesta shete dia largo. Y riba e di ocho dia tabatin un reunion solem di acuerdo cu e ordenansa.” (Nehemias 8:7-11, 17, 18) Esakinan realmente tabata ocasionnan santo caminda esnan presente mester a presta atencion cu respet.

Nos Reunionnan Ta Sagrado

4, 5. Ki rasgonan di nos reunionnan ta duna prueba cu nan ta ocasionnan sagrado?

⁴ Ta berdad cu awe Jehova no tin un stad santo literal riba tera, cu un tempel special dedica na su adoracion. Sinembargo, nos no mester lubida cu reunionnan pa rindi adoracion na Jehova ta ocasionnan sagrado. Tres biaha pa siman, nos ta reuni pa lesa y studia e Scritura. E Palabra di Jehova ta ser ‘splica’, y  mescos cu den tempo di Nehemias, ta “duna e nificacion” di e lei di Dios. (Nehemias 8:8) Tur nos reunionnan ta cuminsa y caba cu oracion, y na mayoria di nan nos ta canta cantica di alabansa na Jehova. (Salmo 26:12) E reunionnan di congregacion ta realmente un parti di nos adoracion y ta rekeri di nos pa nos tin un actitud devoto y di presta atencion cu respet.

⁵ Jehova ta bendiciona su pueblo ora cu nan ta reuni hunto pa ador’e, pa studia su Palabra y pa gosa di dushi asociacion cristian. Nos por tin sigur cu ora tin un reunion, ta einan Jehova ‘ta ordena pa tin bendicion.’ (Salmo 133:1, 3) Nos ta ricibi parti di e bendicion aki si nos t’ei presente y ta sigui e programa spiritual cu atencion. Es mas, Hesus a declara: “Caminda dos of tres ta reuni den mi nomber, ei mi ta meimei di nan.” E declaracion aki den su contexto ta aplica na ancianonan cristian cu ta reuni hunto pa trata problemanan serio entre algun persona, pero den un sentido amplio e ta aplica tambe na nos reunionnan. (Mateo 18:20) Si pa medio di spirito santo, Cristo ta presente ora cu cristiannan ta reuni hunto den su nomber, nos no mester considera e reunionnan ei como sagrado?

6. Kico nos por bisa di nos luganan di reunion, tanto grandi como chikito?

⁶ Ta berdad cu Jehova no ta biba den tempel cu man di hende a traha. Sinembargo, nos Salonnan di Reino ta luganan di adoracion berdadero. (Echonan 7:48; 17:24) Nos ta reuni einan pa studia e Palabra di Jehova, haci oracion na dje y canta su alabansanan. Esei ta conta tambe pa nos Salonnan di Asamblea. Luganan mas grandi cu nos ta huur pa nos congresonan—manera salanan di exhibicion of stadionnan—ta bira luganan  di adoracion durante e periodo cu nos ta uza nan pa nos reunionnan sagrado. Tal ocasionnan pa rindi adoracion, sea ta un luga grandi of chikito, merece nos respet, y nos mester refleha e respet ei den nos actitud y comportacion.

Maneranan pa Mustra Respet pa Nos Reunionnan

7. Den ki manera concreto nos por mustra respet pa nos reunionnan?

⁷ Tin maneranan concreto cu nos por mustra respet pa nos reunionnan. Un manera ta di t’ei presente pa canta e canticanan di Reino. Hopi di nan ta den forma di oracion y p’esei nos tin cu canta nan cu respet profundo. Citando Salmo 22, apostel Pablo a skirbi tocante Hesus: “Lo mi proclama bo nomber na mi rumannan, meimei di e congregacion lo mi canta bo alabansa.” (Hebreonan 2:12) Pues, nos mester hacie un custumber pa ta sinta na nos luga prome cu e presidente di e reunion introduci e cantica, anto consentra riba e nificacion di e palabranan segun cu nos ta canta. Laga nos cantamento refleha e sintimentonan di e salmista cu a skirbi: “Lo mi duna gradicimento na [Jehova] cu henter mi curason, den e reunion di e hendenan recto y den e asamblea.” (Salmo 111:1) Si, un bon motibo pa yega nos reunionnan tempran y keda te ora nan caba ta pa canta alabansa na Jehova.

8. Ki ehempel den Bijbel ta mustra cu e oracionnan na nos reunionnan merece nos atencion cu respet?

⁸ Un otro rasgo cu ta duna realse spiritual na tur nos reunionnan ta oracion di curason haci na fabor di tur esnan presente. Na un ocasion, cristiannan di prome siglo na Jerusalem a reuni hunto y “nan a halsa nan bos di un acuerdo na Dios” den oracion ferviente. Cu ki resultado? Nan a sigui “papia e palabra di Dios cu tur frankesa”, a pesar di persecucion. (Echonan 4:24-31) Nos por imagina cu cualkier un di esnan presente a laga su mente dual durante e oracion ei? No, nan a haci oracion “di un acuerdo.” Oracionnan expresa na nos reunionnan ta refleha e sintimento di tur esnan presente. Nan ta merece nos atencion cu respet.

9. Con nos por mustra respet pa nos reunionnan sagrado pa medio di nos paña y comportacion?

⁹ Ademas, nos por mustra con profundo nos respet pa e caracter sagrado di nos reunionnan ta na e manera cu nos ta bisti. Nos areglo personal pa loke ta trata nos paña y nos estilo di cabei por contribui hopi na e dignidad di nos reunionnan. Apostel Pablo a conseha: “Mi kier pa e hombernan di tur luga haci oracion, hisando mannan santo, sin rabia y sin pleito. Mescos, mi kier pa hende muher dorna nan mes cu bisti apropia, decente y modera, no cu cabei tur na vlecht y oro of perla of bisti costoso, sino mas bien ... manera ta pas pa muhernan cu ta teme Dios.” (1 Timoteo 2:8-10) Ora nos ta asisti na congresonan grandi teni den stadionnan na aire liber, nos por bisti na un manera cu ta pas pa e clima calor pero toch na un manera cu ta indica dignidad. Ademas, nos respet pa e ocasion lo yuda pa nos no come ni cou bals durante e sesionnan. Nos paña apropia y bon comportacion na nos reunionnan ta duna honor na Jehova Dios, na su adoracion y na nos rumannan den fe.

Conducta Cu Ta Pas pa e Cas di Dios

10. Con apostel Pablo a mustra cu na nos reunionnan cristian nos mester tin un norma halto di conducta?

¹⁰ Na 1 Corintionan, capitulo 14, nos ta haya e conseho sabi di apostel Pablo tocante e manera cu mester conduci reunionnan cristian. El a conclui cu e palabranan: “Laga tur cos sosode corectamente y na un manera ordena.” (1 Corintionan 14:40) Nos reunionnan ta un parti importante di e actividad di e congregacion cristian, y nan ta rekeri un tipo di conducta cu ta pas pa e cas di Jehova.

11, 12. (a) Kico nos mester graba den mente di e muchanan cu ta asisti na nos reunionnan? (b) Den ki manera apropia chikitinnan por expresa nan fe na nos reunionnan?

 ¹¹ Nos tin cu siña specialmente nos muchanan con pa comporta nan mes na nos reunionnan. Mayornan cristian mester splica nan yiunan cu Salon di Reino y caminda ta tene Estudio di Buki di Congregacion no ta luga pa hunga. Nan ta luganan caminda nos ta adora Jehova y ta studia su Palabra. Rei sabi Salomon a skirbi: “Warda bo pasonan ora bo ta bai na e cas di Dios, y hala cerca pa scucha.” (Eclesiastes 5:1) Moises a siña e Israelitanan pa reuni hunto, tanto hende grandi como “mucha.” El a bisa: “Reuni e pueblo . . . pa nan tende y siña y teme SEÑOR boso Dios, y percura di cumpli cu tur e palabranan di e lei aki. Y nan yiunan, cu no tabata sa, lo tende y siña pa teme SEÑOR.”—Deuteronomio 31:12, 13.

¹² Awe ta mescos. Nos chikitinnan ta bin reunion hunto cu nan mayornan principalmente pa nan tende y siña. Unabes muchanan por paga tino y compronde por lo menos e berdadnan biblico basico, nan por haci tambe un “declaracion publico” di nan fe dor di participa cu comentarionan breve. (Romanonan 10:10, NW) Un chikitin lo por cuminsa cu duna comentario dor di bisa un par di palabra como contesta riba un pregunta cu e ta compronde. Na cuminsamento, kisas e tin cu lesa e contesta, pero cu tempo lo e purba expresa su mes cu su propio palabranan. Esaki ta probechoso y dushi pa e mucha, y tal expresionnan spontaneo di fe ta alegra curason di e hendenan grandi presente. Claro cu mayornan mes ta pone un bon ehempel dor di duna comentario. Caminda ta posibel, ta bon pa e muchanan tin nan propio Bijbel, buki di cantica y ehemplar di e publicacion cu nos ta studia. Nan mester siña mustra e debido respet pa e publicacionnan ei. Tur esaki lo graba den mente di e muchanan cu nos reunionnan ta sagrado.

13. Kico nos ta spera pa loke ta e hendenan cu asisti na nos reunion pa prome biaha?

¹³ Claro cu nos no kier pa nos reunionnan parce e servicionan religioso di cristiandad. Esakinan tin sea un ambiente friu y di devocion hipocrita of hopi bochincha manera na un concierto di rock. Nos kier pa e reunionnan na nos Salonnan di Reino ta caluroso y hospitalario, pero no na e extremo cu nan ta parce un club den bario. Nos ta reuni pa adora Jehova, p’esei nos reunionnan semper mester refleha dignidad. Nos deseo ta pa despues cu hendenan cu asisti pa prome biaha a tende e informacion presenta y a observa e comportacion di nos cu nos yiunan, nan bisa: “Sigur sigur Dios ta meimei di boso.”—1 Corintionan 14:25.

Un Rasgo Permanente di Nos Adoracion

14, 15. (a) Con nos por evita di ‘neglisha e cas di nos Dios’? (b) Con Isaias 66:23 ta cumpliendo caba?

¹⁴ Manera a ser bisa caba na principio di e articulo aki, Jehova ta reuniendo su pueblo y ta haci nan contento den su “cas di oracion”, su tempel spiritual. (Isaias 56:7) E homber fiel, Nehemias, a recorda su compañeronan  Hudiu cu nan mester a mustra e debido respet pa e tempel literal dor di sostene materialmente. El a declara: “Nos lo no neglisha e cas di nos Dios.” (Nehemias 10:39) Ademas, nos no mester neglisha Jehova su invitacion pa ador’e den su “cas di oracion.”

¹⁵ Demostrando cu ta necesario pa nos reuni hunto cu regularidad pa rindi adoracion, Isaias a profetisa: “‘Lo ta di luna nobo pa luna nobo, y di sabat pa sabat, cu henter humanidad lo bin pa buig mi dilanti’, SEÑOR ta bisa.” (Isaias 66:23) Esaki ta tumando luga awe. Regularmente, tur siman y tur luna, cristiannan dedica ta bin hunto pa adora Jehova. Nan ta haci esaki, entre otro, dor di asisti na reunionnan cristian y participa den e ministerio publico. Abo ta un di esnan cu regularmente ta ‘bin buig dilanti Jehova’?

16. Dicon asistencia regular na reunion lo mester ta un rasgo permanente di nos bida actual?

¹⁶ Isaias 66:23 lo aplica plenamente na e bida cu nos lo tin den e mundo nobo cu Jehova ta priminti. E tempo ei, “henter humanidad”, den un sentido literal, siman aden siman afo y luna aden luna afo, ‘lo bin pa buig dilanti Jehova’, es decir, lo ador’e pa henter eternidad. Siendo cu reuni hunto pa rindi adoracion na Jehova lo ta un rasgo permanente di nos bida spiritual den e mundo nobo, pakico nos no ta haci asistencia regular na nos reunionnan sagrado un rasgo permanente di nos bida actual?

17. Dicon nos tin mester di nos reunionnan “mucho mas ainda [cu nos] ta mira cu e dia ta yegando cerca”?

¹⁷ Segun cu e fin ta yega cerca, nos mester ta mas determina cu nunca pa asisti na nos reunionnan cristian pa rindi adoracion. Como muestra di respet pa e caracter sagrado di nos reunionnan, nos lo no permiti nos empleo, huiswerk of scol djanochi stroba nos di reuni regularmente hunto cu nos rumannan den fe. Nos tin mester di e fortalesa cu nos ta haya mediante e asociacion ei. Nos reunionnan di congregacion ta duna nos e oportunidad di siña conoce otro, di encurasha otro y di stimula otro “pa stima y haci bon obra.” Nos tin mester di esaki “mucho mas ainda [cu nos] ta mira cu e dia ta yegando cerca.” (Hebreonan 10:24, 25) P’esei laga nos semper demostra e debido respet pa nos reunionnan sagrado dor di asisti regularmente na nan, bisti na un manera apropia, y comporta nos mes na un manera cu ta pas pa e ocasion. Haciendo asina, nos ta demostra cu nos tin Jehova su punto di bista di cosnan sagrado.

Como Repaso

• Kico ta mustra cu mester considera e reunionnan di e pueblo di Jehova como sagrado?

• Ki rasgonan di nos reunionnan ta duna prueba cu nan ta ocasionnan sagrado?

• Con muchanan por mustra cu nan ta respeta e caracter sagrado di nos reunionnan?

• Dicon nos tin cu haci asistencia regular na reunion un rasgo permanente di nos bida?

[Preguntanan di Estudio]

[Plachi na pagina 28]

Reunionnan pa adora Jehova ta sagrado na unda cu tene nan

[Plachi na pagina 31]

Nos chikitinnan ta asisti na reunion pa tende y pa siña