E Palabra di Jehova Ta Bibo

Puntonan Sobresaliente di e Buki di Eclesiastes

“HENDE cu a nace di muher ta biba poco dia y ta yen di problema”, e patriarca Job a remarca. (Job 14:1) P’esei ta masha importante pa nos no malgasta nos bida cortico na precupacionnan y actividadnan cu no tin ningun balor! Cua ta e actividadnan cu lo mester ocupa nos tempo, energia y recursonan? Cua ta esnan cu nos lo mester evita? E palabranan di sabiduria cu tin den e buki biblico di Eclesiastes ta duna guia confiabel relaciona cu esaki. E mensahe cu nan ta transmiti “ta capas pa husga [of, “discerni”, NW] e pensamentonan y intencionnan di curason” y nan por yuda nos hiba un bida cu tin proposito.—Hebreonan 4:12.

Rei Salomon di antiguo Israel, un homber famoso pa su sabiduria, a skirbi e buki di Eclesiastes. E buki aki ta contene conseho practico tocante loke realmente ta bale la pena den bida y loke no tin ningun balor. Siendo cu Salomon ta referi na algun di e proyectonan di construccion cu el a haci, lo e mester a skirbi Eclesiastes despues cu e proyectonan ei a termina y prome cu el a desvia for di adoracion berdadero. (Nehemias 13:26) Esei ta indica cu e buki a ser skirbi prome cu aña 1000 prome cu nos era, casi na final di Salomon su reinado di 40 aña.

KICO NO TA BANIDAD?

(Eclesiastes 1:1–6:12)

“Tur ta banidad”, e predicado ta bisa. Y e ta puntra: “Ki probecho hende tin di tur su trabou cu e ta haci bou di solo?” (Eclesiastes 1:2, 3) E expresion “banidad” y “bou di solo” ta aparece bes tras bes den Eclesiastes. E palabra Hebreo pa “banidad” literalmente ta nifica “rosea” of “stoom” y ta referi na algo cu no tin substancia ni balor duradero ni ta permanente. E expresion “bou di solo” ta nifica “riba e tera aki” of “den e mundo aki.” Pues tur cos—tur esfuerso humano cu ta ignora e boluntad di Dios—ta banidad.

Salomon a bisa: “Warda bo pasonan ora bo ta bai na e cas di Dios, y hala cerca pa scucha.” (Eclesiastes 5:1) Participacion den e adoracion berdadero di Jehova Dios no ta banidad. De echo, e yabi pa nos por tin un bida cu proposito ta di presta atencion na nos relacion cu Dios.

Contesta Riba Pregunta Biblico:

1:4-10—Kico tocante e ciclonan di naturalesa ta un “cansancio”? E predicado ta menciona solamente tres di e funcionnan basico cu ta haci bida riba tera posibel: solo, biento y e ciclo di awa. Pero en realidad, e ciclonan di naturalesa ta hopi y nan ta masha complica. Bo por dedica henter bo bida na studia nan y toch keda sin compronde nan plenamente. Esei en berdad por ta un “cansancio.” Ademas, ta frustrante pa compara nos bida cortico cu e ripiticion interminabel di e ciclonan aki. Asta intentonan pa haci descubrimentonan nobo ta un cansancio. Al fin y al cabo, inventonan nobo no ta nada mas cu aplicacion di principionan cu e Dios berdadero a establece y uza caba den creacion.

2:1, 2—Dicon e escritor ta referi na harimento como “locura”? Harimento podise ta yuda nos lubida nos problemanan momentaneamente, y diberticion por pone cu nos no ta pensa seriamente riba nos problemanan. Sinembargo, harimento no ta laga nos dificultadnan disparce. P’esei e escritor ta referi na e intento pa logra felicidad mediante harimento como “locura.”

 3:11—Kico Dios a traha “apropia na su tempo”? Algun di e cosnan cu Jehova Dios a traha “apropia” of “bunita” [NW] y bon na e debido tempo ta e creacion di Adam cu Eva, e aliansa di regenboog, e aliansa cu Abraham, e aliansa cu David, e binida di e Mesias y e entronisacion di Hesucristo como Rei di e Reino di Dios. Pero tin un cos mas cu Jehova lo haci “bunita” den futuro cercano. Nos por tin e confiansa cu e husto mundo nobo lo bira un realidad na su debido tempo.—2 Pedro 3:13.

3:15b, NW—Con e ‘Dios berdadero ta keda busca e loke ta ser sigui tras di dje’? ‘Loke ta ser sigui tras di dje’ por ta referi na cosnan cu ta Dios su proposito pa haci. Mientras cu e ciclonan repetitivo di nace y muri y di guera y pas kisas ta laga hende sinti nan mes impotente y ta pone nan pensa cu historia ta blo sigui ripiti su mes, e Dios berdadero por busca y logra tur loke cu E kier. (Eclesiastes 3:1-10, 15a) ‘Loke ta ser sigui tras di dje’ por ta aplica tambe na hende husto, cu hopi bes ta ser persigui pa e malbadonan. Den e caso ei, Jehova ta sigui busca e hustonan afin di ‘sostene nan fuertemente.’—2 Cronicanan 16:9.

5:9, NW—Den ki sentido ‘e probecho di e tera ta entre nan tur’? Tur habitante di e tera ta depende di e “probecho di e tera”, es decir, di loke e tera ta produci. Un rei no ta un excepcion. Pa e rei haya e producto di su cunucu, su sirbidornan mester traha duro pa cultiva su cunucu.

Les pa Nos:

1:15. Ta en vano pa dedica tempo y energia na purba corigi e opresion y inhusticia cu nos ta mira awe. Ta e Reino di Dios so por elimina maldad.—Daniel 2:44.

2:4-11. Actividadnan cultural, manera arkitectura, hardineria y musica, y tambe un bida di luho ta “coremento tras di biento”, pasobra nan no ta duna bida un berdadero proposito ni ta produci felicidad duradero.

2:12-16. Sabiduria tin mas bentaha cu bobedad pasobra e por yuda resolve cierto problema. Sinembargo, relaciona cu morto, sabiduria humano no tin ningun bentaha. Anto asta si un persona kisas a haya fama pasobra e tin hopi sabiduria, poco despues hende ta lubid’e.

2:24; 3:12, 13, 22. No tin nada malo den disfruta di e fruta di bo trabou.

2:26. Sabiduria divino, locual ta produci goso, ta ser duna na ‘e persona cu ta bon den bista di Jehova.’ Ta imposibel pa haya e sabiduria aki sin un bon relacion cu Dios.

3:16, 17. Ta irealistico pa spera di haya husticia den tur situacion. En bes di precupa y bira ansha pa loke ta pasando den e mundo djawe, nos tin cu spera riba Jehova pa rectifica asuntonan.

4:4. Trabou duro bon haci por duna satisfaccion. Sinembargo, traha duro djis pa bo sobresali riba otro hende ta fomenta competencia y por lanta rencor y jaloersheid. Nos trabou duro den e ministerio cristian mester tin e motivacion corecto su tras.

4:7-12. Relacionnan humano ta mas importante cu pocesionnan material y nos no mester sacrifica e relacionnan ei pa core tras di rikesa.

4:13. No ta tur biaha posicion y edad ta gana respet. Personanan den puesto di responsabilidad mester actua sabi.

4:15, 16. “E di dos mucha homber”, esta, e sucesor di e rei, na prome instante kisas tin e sosten di “tur e hendenan”, pero ‘despues nan lo no ta contento cu ne.’ En berdad, popularidad por lo general ta di corto duracion.

5:2. Nos oracionnan no mester ta cu hopi palabra sino bon pensa y cu respet.

5:3-7. Demasiado precupacion cu cosnan material por pone hende sinta soña tocante interesnan egoista. Ademas, esei por pone cu anochi bo ta keda intrankil, blo ta pensa fantasia, strobando bo di haya un dushi soño. Papiamento di hopi palabra por laga un persona parce bobo den bista di otro hende y por pon’e haci un promesa descabeya dilanti Dios. ‘Teme e Dios berdadero’ ta yuda nos evita di haci cualkier un di e cosnan aki.

 6:1-9. Ki bal nos tin rikesa, gloria, bida largo y asta un famia grandi, si circunstancia ta stroba nos di disfruta di nan? Y ta mihor nos acepta realidad—“loke wowo ta mira”—cu haci hopi esfuerso pa cumpli cu “loke alma ta desea”, esta, deseonan cu ta imposibel pa satisface. Pues anto, e mihor proceder den bida ta di keda contento cu “cuminda y paña” mientras cu nos ta gosa di e cosnan sano den bida y ta enfoca riba mantene un relacion intimo cu Jehova.—1 Timoteo 6:8.

CONSEHO PA HENDE SABI

(Eclesiastes 7:1–12:8)

Con nos por proteha nos bon nomber of reputacion? Kico mester ta nos actitud relaciona cu gobernantenan humano y e inhusticianan cu podise nos ta mira tuma luga? Siendo cu e mortonan no ta conciente di nada, con nos lo mester uza nos bida awor? Den ki manera hobennan por uza nan tempo y energia na un manera sabi? E conseho sano di e predicado riba e asuntonan aki y otronan mas ta para skirbi pa nos den capitulo 7 pa 12 di Eclesiastes.

Contesta Riba Pregunta Biblico:

7:19—Den ki sentido sabiduria ta mas fuerte cu “dies gobernante”? Ora Bijbel ta uza e cifra dies den sentido figurativo e ta representa un conhunto completo. Salomon tabata kiermen cu e balor protectivo di sabiduria ta mas grandi cu un cantidad completo di homber na poder cu ta proteha un stad.

10:2—Kico kiermen cu e curason di un hende “ta dirigie na banda drechi” of “na banda robes”? Como cu banda drechi hopi biaha ta indica e posicion di aprobacion, esei kiermen cu e persona su curason ta motiv’e pa haci bon. Sinembargo, si un persona su curason ta motiv’e pa sigui un mal caminda, Bijbel ta bisa cu e ta dirigie na banda robes.

10:15—Den ki sentido “trabou di un hende bobo ta cans’e”? Si un hende no tin bon huicio, su trabou duro no ta produci nada cu realmente ta bale la pena. E no ta haya ningun satisfaccion for di e trabou. Tal esfuerso vigoroso ta cans’e so.

11:7, 8—Kico Salomon tabata kiermen cu e declaracion: “Lus ta agradabel, y ta bon pa wowo mira solo”? Lus y solo ta pa duna placer na hende bibo. Salomon a declara aki cu ta dushi pa ta na bida y cu nos mester “regociha” of alegra prome cu e dianan di scuridad, esta biehes, horta nos di nos energia y vigor.

11:10—Dicon “adolescencia y hubentud” ta banidad? Si no uza nan corectamente nan ta banidad, pasobra mescos cu stoom of vapor, e dianan di vigor di hubentud ta disparce rapidamente.

Les pa Nos:

7:6. Harimento na un momento inapropia ta mesun iritante y inutil cu e zonido di chispa di sumpiña bou di un weya na candela. Nos ta haci bon di evita tal harimento.

7:21, 22. Nos no mester ta demasiado precupa pa loke otro hende ta bisa.

 8:2, 3; 10:4. Ora un supervisor of doño di trabou critica nos of corigi nos, ta sabi pa nos keda calmo. Esaki ta mihor cu ‘ser pura pa bai for di su presencia’, es decir, pura pa entrega nos retiro.

8:8; 9:5-10, 12. Nos bida por termina mesun inespera cu ora ta coi pisca den reda of ta coi parha den trampa. Es mas, ningun hende no por stop e forsa di bida di sali na momento di morto, ni ningun hende no por retira di e guera cu morto ta hiba contra humanidad. P’esei nos no mester malgasta tempo. Jehova kier pa nos balora bida y disfruta di dje den un manera sano. Pa haci esaki, nos tin cu pone e sirbishi di Jehova na prome luga den nos bida.

8:16, 17. Ni maske nos perde soño pensando riba esei, nos no por compronde e pleno magnitud di tur loke Dios a haci y a permiti sosode den humanidad. Si nos sinta precupa pa tur e maldadnan cu a ser cometi, esei solamente lo horta nos di nos goso den bida.

9:16-18. Nos mester duna balor na sabiduria asta ora cu hende en general no ta apreci’e. Mihor ta e palabranan calmo di un hende sabi cu e gritonan duro di un hende bobo.

10:1. Nos mester tene cuidou cu loke nos ta bisa y haci. Un solo bobedad, manera por ehempel un explosion di rabia, un acto di mal uzo di alcohol of un incidente envolviendo comportacion sexual impuro, ta suficiente pa ruina e bon reputacion di un persona respeta.

10:5-11. Nos no mester envidia un persona incompetente cu ta den puesto halto. Falta di bon habilidad pa haci asta tareanan simpel por tin mal consecuencia. Sinembargo, ta bentahoso pa cultiva e habilidad di uza sabiduria ya cu “e ta duna bon exito.” Pues ta masha importante anto pa nos ta competente of habil den e trabou di predica e Reino y haci discipel.

11:1, 2. Nos mester practica generosidad di henter nos curason. Esei ta stimula generosidad den otro hende.—Lucas 6:38.

11:3-6. E insiguridadnan di bida no mester haci nos indeciso.

11:9; 12:1-7. Hobennan tin cu rindi cuenta na Jehova. P’esei nan mester uza nan tempo y energia den e sirbishi di Dios prome cu biehes kita nan vigor for di nan.

“E PALABRANAN DI HENDE SABI” PA GUIA NOS

(Eclesiastes 12:9-14)

Con nos mester mira e “palabranan agradabel” cu e predicado a busca pa haya y skirbi? Na contraste cu e ‘hopi bukinan’ di sabiduria humano, “e palabranan di hende sabi ta manera punta di hero, y maestronan di e coleccionnan aki ta manera clabonan bon claba; nan ta duna dor di un wardado.” (Eclesiastes 12:10-12) E palabranan di sabiduria cu Jehova—e solo “wardado”—ta duna, tin un efecto cu ta duna stabilidad den nos bida, “manera clabonan bon claba.”

Si nos aplica e conseho sabi cu tin den e buki di Eclesiastes, esei en berdad lo yuda nos hiba un bida felis y cu proposito. Es mas, Bijbel ta sigura nos: “Lo bai bon cu esnan cu ta teme Dios.” Pues anto, laga nos ta firme den nos determinacion pa “teme Dios y warda su mandamentonan.”—Eclesiastes 8:12; 12:13.

[Plachi na pagina 15]

Un di e obranan di mas bunita di Dios lo bira un realidad na su debido tempo

[Plachi na pagina 16]

Algun di e regalonan cu Dios a duna nos ta cu nos por come, bebe y gosa di tur nos trabou duro