1. Pakico nos tin cu acepta disciplina di Dios?

REI SALOMON di Israel di antiguedad a duna cada un di nos un bon motibo pa acepta disciplina di Dios. E di: “Mi yiu, no rechasa e disciplina di SEÑOR, ni aborece su reprendemento, pasobra esun cu SEÑOR ta stima, e ta reprende, mescos cu un tata ta reprende e yiu cu e tin delicia den dje.” (Proverbionan 3:11, 12) Si, bo Tata celestial ta disciplina bo pasobra e stima bo.

2. Kico ta “disciplina” y con un persona por ser disciplina?

² “Disciplina” por referi na castigo, coreccion, instruccion y educacion. Apostel Pablo a skirbi: “Na e momento mes ningun disciplina no ta parce di ta causa di goso, sino di dolor; ma pa esnan cu a wordo entrena dor di dje, despues e ta duna e fruta pacifico di husticia.” (Hebreonan 12:11) Si bo ta acepta y aplica disciplina di Dios, esei por yuda bo cana den e caminda di husticia y permiti bo yega mas cerca di e Dios santo, Jehova. (Salmo 99:5) Coreccion por bini di parti di bo rumannan den fe, pa medio di e cosnan cu bo ta siña na reunion cristian y for di bo estudio di e Palabra di Dios y e publicacionnan di ‘e mayordomo fiel.’ (Lucas 12:42-44) Pues, bo por ta gradicido ora hala bo atencion den un di e formanan aki riba algo cu bo tin cu drecha! Pero ki disciplina por ta necesario ora un cristian comete pica serio?

3. Ki ora un miembro di congregacion ta ser expulsa?

³ Sirbidornan di Dios ta studia Bijbel y publicacionnan cristian. Na nan reunion-, asamblea- y congresonan nan ta siña tocante e normanan di Jehova. Pues, cristiannan sa kico  Jehova ta rekeri di nan. Ta solamente ora un miembro di e congregacion comete pica serio sin arepenti e ta ser expulsa.

4, 5. Ki ehempel biblico di expulsion ta ser presenta aki, y pakico Pablo a urgi e congregacion pa restaura e homber?

⁴ Considera un ehempel biblico di un persona cu a ser expulsa. E congregacion na Corinto a tolera “inmoralidad di tal forma cu no [tabata] existi ni meimei di e paganonan, cu un homber [tabata] biba cu esposa di su tata.” Pablo a urgi e Corintionan pa “entrega un hende asina na Satanas pa destruccion di su carni, pa [e] spirito wordo salba.” (1 Corintionan 5:1-5) Ora e pecador a ser expulsa, na moda di papia entrega na Satanas, el a bolbe bira parti di e mundo di Diabel. (1 Juan 5:19) Su expulsion a elimina un influencia carnal maligno for di e congregacion y a conserva e congregacion su “spirito”, of actitud dominante, di manera cu esaki por a sigui refleha e cualidadnan di Dios.—2 Timoteo 4:22, NW; 1 Corintionan 5:11-13.

⁵ No mucho tempo despues, Pablo a urgi e cristiannan na Corinto pa restaura of reestablece e malechor. Dicon? Segun e apostel, nan mester a haci esei pa “Satanas no tuma bentaha” riba nan. Tur cos a mustra cu e pecador a arepenti y a cuminsa hiba un bida moralmente limpi. (2 Corintionan 2:8-11) Si e Corintionan a nenga di restaura e homber arepenti, Satanas lo a tuma bentaha riba nan den e sentido cu nan lo tabata sin heful y sin misericordia net manera Diabel tabata kier. Muy probablemente, nan no a tarda pa ‘pordona y consola’ e homber arepenti.—2 Corintionan 2:5-7.

6. Kico expulsion por logra?

⁶ Kico un expulsion ta logra? E ta mantene e nomber santo di Jehova liber di reproche y ta proteha e bon reputacion di su pueblo. (1 Pedro 1:14-16) Expulsion di un malechor cu no arepenti for di e congregacion ta respalda e normanan di Dios y ta conserva e puresa spiritual di e congregacion. Tambe e por yuda e persona cu no a arepenti realisa e gravedad di su pica.

7. Tanten cu David no a confesa su transgresionnan, ki efecto esei tabatin riba dje?

⁷ Mayoria cristian cu comete un pica serio ta sinceramente arepenti y no ta ser expulsa for di e congregacion. Naturalmente no ta facil pa mustra berdadero arepentimento. Tuma por ehempel Rei David di Israel, kende a compone Salmo 32. E cantica ei ta revela cu pa un tempo David no a confesa su pica serio cu probablemente tabatin di aber cu Betsabe. Esei a pone cu e angustia cu el a sinti pa motibo di su picanan a caba cu su vigor, mescos cu tempo di hopi calor ta caba cu e humedad di un palo. David a sufri fisicamente y mentalmente, pero ora el a ‘confesa su transgresionnan, Jehova a pordon’e.’ (Salmo 32:3-5) Anto David a canta: “Bendiciona ta e hende, kende su inikidad SEÑOR no ta tuma na cuenta.” (Salmo 32:1, 2) Tabata algo magnifico pa experencia Dios su misericordia!

8, 9. Con arepentimento ta ser manifesta, y con importante esei ta pa determina ki ora un persona expulsa por ser restaura?

⁸ Esaki ta mustra bon cla anto cu si un pecador kier haya misericordia, e mester ta arepenti. Sinembargo, berguensa y miedo di wordo descubri no ta arepentimento. “Arepenti” ta nifica “cambia di pensamento” relaciona cu mal conducta, pa motibo di duele. Un persona arepenti tin ‘un curason kibra’ y kier corigi e malecho si esei ta posibel.—Salmo 51:17; 2 Corintionan 7:11, NW.

⁹ Arepentimento ta un factor masha importante pa determina ki ora un persona expulsa por ser restaura den e congregacion cristian. Un persona expulsa no ta ser acepta automaticamente bek den e congregacion despues cu un cierto cantidad di tempo a pasa. Prome cu e por ser restaura, mester bin un cambio grandi den e condicion di su curason. E mester realisa ki grave su pica tabata y ki reproche el a  trece riba Jehova y e congregacion. E pecador mester arepenti, pidi pordon di curason y cumpli cu e rekisitonan husto di Dios. Ora e ta pidi pa e ser restaura, e mester por duna evidencia cu el a arepenti y cu e ta produciendo “obranan cu ta cuadra cu arepentimento.”—Echonan 26:20.

10, 11. Pakico nos no mester purba sconde un pica?

¹⁰ Kisas algun persona cu a comete pica ta rasona: ‘Si mi conta un hende di mi pica, lo mi tin cu bai contesta pregunta cu ta duna mi berguensa y mi por wordo expulsa. Ma si mi keda keto, mi por evita esei y ni un hende den congregacion lo no haya sa nunca.’ Pero e pensamento ei no ta tene cuenta cu algun factor importante. Kico nan ta?

¹¹ Jehova ta un Dios “yen di compasion y gracia, kende no ta rabia lihe y kende ta abunda den misericordia y berdad; kende ta mantene misericordia pa milnan, kende ta pordona inikidad, transgresion y pica.” Pero debidamente e ta corigi su pueblo “manera mester ta.” (Exodo 34:6, 7; Jeremias 46:28) Si bo a comete un pica serio, con bo por ricibi e misericordia di Dios si bo ta purba sconde bo pica? Jehova ta conciente di dje y e no ta djis sera wowo pa malecho.—Proverbionan 15:3; Habacuk 1:13.

12, 13. Kico por pasa cu un cristian cu ta purba sconde su malecho?

¹² Si bo a comete un pica serio, confesion por yuda bo recobra un bon consenshi. (1 Timoteo 1:18-20) Pero si bo keda sin confesa, esei por resulta den un consenshi sushi cu por pone bo cai den mas pica. Corda cu bo pica no ta djis contra un otro hende of e congregacion. E ta contra Dios. E salmista a canta: “E trono di Jehova ta den shelo. Su mes wowo ta mira, su propio wowo radiante ta examina e yiunan di hende. Jehova mes ta examina e husto y tambe e malbado.”—Salmo 11:4, 5, NW.

¹³ Jehova lo no bendiciona ni un persona cu ta sconde pica serio y ta purba keda den e congregacion cristian limpi. (Santiago 4:6) Pues si bo a cai den pica y kier haci loke ta corecto, no basila pa confesa esei honestamente, sino bo consenshi lo keda remorde bo, specialmente ora bo lesa of tende conseho tocante asuntonan relaciona cu e pica serio ei. Kico lo sosode si Jehova kita su spirito for di bo, mescos cu el a haci den e caso di Rei Saul? (1 Samuel 16:14) Sin e spirito di Dios, bo por cai den pica mas serio ainda.

14. Pakico un malechor mester sigui e conseho di Santiago 5:14 y 15?

¹⁴ P’esei, kico un malechor arepenti mester haci? “Lag’e yama e ancianonan . . . y laga nan haci oracion p’e, huntando e cu azeta den e nomber di [Jehova]; y e oracion haci den fe lo restaura esun cu ta malo, y SEÑOR lo lant’e.” (Santiago 5:14, 15) Un manera cu un persona ta “duna fruta cu ta cuadra cu arepentimento” ta di acerca e ancianonan. (Mateo 3:8) E hombernan fiel y amoroso aki lo ‘haci oracion p’e y hunt’e cu azeta den e nomber di Jehova.’ Mescos cu azeta of un enguente cu ta suavisa, nan conseho biblico lo resulta di ta un consuelo pa ken cu ta berdaderamente arepenti.—Jeremias 8:22.

15, 16. Con ancianonan cristian ta sigui e ehempel cu Dios a pone, manera Ezekiel 34:15 y 16 ta trece dilanti?

¹⁵ Jehova, nos Wardador, a pone un ehempel amoroso ora el a libra e Hudiunan for di sclabitud na Babilonia na aña 537 prome cu nos era y ora el a libra Israel spiritual for di “e Gran Babilonia” na aña 1919 di nos era! (Revelacion 17:3-5; Galationan 6:16) Asina el a cumpli cu su promesa: “Lo mi alimenta mi tou y lo mi hiba nan na un luga caminda nan por sosega . . . Lo mi busca esnan cu ta perdi, trece bek esnan cu tabata dual, pone verband pa esnan cu ta herida, y fortifica esnan cu ta malo.”—Ezekiel 34:15, 16.

 ¹⁶ Jehova a alimenta su carnenan figurativo, el a pone nan sosega na un luga sigur y a busca esnan perdi. Mescos tambe, wardadonan cristian ta percura pa e tou di Dios ta spiritualmente bon alimenta y fuera di peliger. E ancianonan ta busca e carnenan cu dual for di e congregacion. Mescos cu Dios a ‘pone verband pa esun herida’, superintendentenan ta “verband” carne cu tin herida causa pa loke otro hende por a bisa of pa motibo di nan mes accionnan. Y mescos cu Dios a ‘fortifica esun cu ta malo’, e ancianonan ta yuda esun cu a bira spiritualmente enfermo, posiblemente pa motibo di un malecho cu el a comete.

17. Pakico nos no mester basila pa busca yudansa spiritual di e ancianonan?

¹⁷ E ancianonan ta cumpli gustosamente cu e conseho aki: “Tene misericordia cu temor.” (Judas 23) Algun cristian a comete e pica serio di inmoralidad sexual. Pero si nan ta berdaderamente arepenti, nan por spera un trato misericordioso y amoroso cerca ancianonan cu ta ansioso pa yuda nan spiritualmente. Papiando entre otro di su mes, Pablo a bisa relaciona cu e hombernan aki: “No cu nos tin dominio riba boso fe, ma nos ta trahado hunto cu boso pa boso goso.” (2 Corintionan 1:24) P’esei, nunca basila pa busca nan yudansa spiritual.

18. Con ancianonan ta trata cu un ruman den fe cu a faya?

¹⁸ Si bo a comete un pica serio, pakico bo por tin confiansa den e ancianonan? Pasobra nan ta na prome luga wardadonan di e tou di Dios. (1 Pedro 5:1-4) Ni un wardado amoroso no ta bati un lamchi manso cu ta grita pa motibo cu el a lastima su curpa. P’esei, ora ancianonan ta trata cu un ruman den fe cu a faya, nan enfoke no ta riba ki castigo su malecho ta merece, sino riba ki pica el a comete y con nan por yud’e recupera spiritualmente caminda esei ta posibel. (Santiago 5:13-20) Ancianonan mester husga cu husticia y “trata e tou cu ternura.” (Echonan 20:29, 30, NW; Isaias 32:1, 2) Mescos cu tur otro cristian, ancianonan mester ‘haci husticia, stima misericordia, y cana humildemente cu Dios.’ (Mikeas 6:8) E cualidadnan ei ta sumamente importante ora nan tin cu tuma decision cu tin di aber cu e bida y sirbishi sagrado di “e carnenan cu [Jehova] ta pastorea.”—Salmo 100:3.

19. Cu ki actitud ancianonan cristian ta purba reahusta un persona?

 ¹⁹ Wardadonan cristian ta haya nan nombramento via di spirito santo y nan ta haci esfuerso pa laga e spirito aki guia nan. “Si un hende wordo sorprendi den cualkier delito”, hombernan cu cualificacion spiritual ta purba “restaura un hende asina den un spirito di mansedumbre.” (Galationan 6:1; Echonan 20:28) Cu suavidad, pero pegando firmemente na normanan divino, e ancianonan ta purba reahusta su forma di pensa, mescos cu un docter compasivo ta pega un man of pia kibra cu hopi cuidou pa evita di causa dolor innecesario y toch soluciona e problema. (Colosensenan 3:12) Ya cu e ancianonan ta haci oracion y ta uza e Scritura pa determina si mester extende misericordia, nan decision lo refleha e manera cu Dios ta mira e asunto.—Mateo 18:18.

20. Ki ora lo por ta necesario pa anuncia na e congregacion cu a reprende un cierto ruman?

²⁰ Si un pica ta ampliamente conoci of sin duda lo bira conoci, probablemente lo ta apropia pa haci un anuncio na e congregacion pa asina proteha su reputacion. Lo haci un anuncio tambe si mester informa e congregacion. Durante e tempo cu un individuo cu a haya un reprendemento hudicial ta curando spiritualmente, por compar’e cu un persona cu ta recuperando di un lesion, locual ta limita su actividad temporalmente. Probablemente, pa un tempo lo ta mihor pa e persona arepenti scucha en bes di duna comentario na reunion. E ancianonan por haci areglo pa laga un ruman cristian studia Bijbel cu ne pa fortalec’e caminda e ta debil pa asina e por bira “sano den fe” atrobe. (Tito 2:2) Tur esaki ta sosode cu amor y no ta pa castiga e malechor.

21. Con algun caso di malecho por ser trata?

²¹ Ancianonan por duna yudansa spiritual den varios manera. Por ehempel, supone cu un ruman cu den pasado tabatin problema cu bebemento, a bebe di mas un of dos biaha ora e tabata su so na cas. Of talbes un ruman cu hopi tempo pasa a stop di uza tabaco, a huma un of dos biaha den un momento di debilidad. Aunke el a haci oracion y ta kere cu Dios a pordon’e, e mester busca yudansa di un anciano pa su pica no bira un custumber. Un of dos anciano por atende e situacion. Sinembargo, e anciano(nan) lo informa e superintendente presidente, ya cu lo por tin mas factor envolvi.

22, 23. Pakico bo mester sigui acepta disciplina di Dios?

²² Pa ricibi e aprobacion di Dios, cada cristian mester presta atencion na e disciplina di Jehova. (1 Timoteo 5:20) P’esei, tuma na pecho cualkier coreccion cu bo ricibi ora bo ta studia e Scritura y publicacionnan cristian of ora bo tende conseho presenta na reunion-, asamblea- y congresonan di e pueblo di Jehova. Keda alerta pa haci e boluntad di Jehova. E ora ei disciplina di Dios lo yuda bo mantene un defensa fuerte—manera un baluarte—contra pica.

²³ Ora bo ta acepta disciplina di Dios, esei lo por yuda bo keda den su amor. Ta berdad cu algun individuo a ser expulsa for di e congregacion cristian, pero esei no tin nodo di sosode cu bo si bo ta “warda bo curason” y ‘cana manera hende sabi.’ (Proverbionan 4:23; Efesionan 5:15) Sinembargo, si na e momentonan aki bo ta expulsa, pakico no dal e pasonan pa bo wordo restaura? Dios kier pa tur hende cu a haci un dedicacion na dje ador’e fielmente y cu “un curason contento.” (Deuteronomio 28:47) Bo por haci esei pa eternidad si bo ta acepta semper e disciplina di Jehova.—Salmo 100:2.