Conserva Bo Mes den e Amor di Dios!

“Rumannan stima, . . . conserva boso mes den e amor di Dios, . . . [anticipando] bida eterno.”—JUDAS 20, 21.

1, 2. Con bo por keda den e amor di Dios?

JEHOVA stima e mundo di humanidad asina tanto cu el a duna su Yiu unigenito pa tur hende cu eherce fe den dje por haya bida eterno. (Juan 3:16) Ta algo magnifico pa experencia un amor asina! Si bo ta un sirbidor di Jehova, sin duda lo bo kier disfruta di e amor ei pa semper.

² Discipel Judas a revela con bo por keda den e amor di Dios. El a skirbi: “Edificando boso mes den boso santisimo fe, haciendo oracion den spirito santo, conserva boso mes den e amor di Dios, sperando cu gran anticipacion e misericordia di nos Señor Hesucristo pa bida eterno.” (Judas 20, 21) Loke por yuda bo edifica bo mes riba e “santisimo fe”, esta, e siñansanan cristian, ta un estudio di e Palabra di Dios y e trabou di predica e bon nobo. Si bo kier keda den e amor di Dios, bo tin cu haci oracion “den spirito santo”, kiermen, bou di su influencia. Pa bo por ricibi e bendicion di bida eterno, bo tin cu eherce fe tambe den e sacrificio di rescate di Hesucristo.—1 Juan 4:10.

3. Pakico algun persona no ta Testigo di Jehova mas?

³ Algun persona cu un tempo tabatin fe no a conserva nan mes den e amor di Dios. Debi cu nan a scohe pa hiba un bida di pica, nan no ta Testigo di Jehova mas. Con bo por evita di yega asina leu? Algo cu por yuda bo keda leu for di pica y conserva bo mes den e amor di Dios ta di medita riba e siguiente puntonan.

Demostra Bo Amor pa Dios

4. Con importante obediencia na Dios ta?

⁴ Mustra bo amor pa Dios dor di obedec’e. (Mateo 22:37) Apostel Juan a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Juan 5:3) Un patronchi di obediencia na Dios por fortalece bo pa resisti tentacion y duna bo goso. E salmista a bisa: “Bendiciona ta e hende cu no ta cana den e conseho di malbadonan . . . Ma su delicia ta den e lei di SEÑOR.”—Salmo 1:1, 2.

5. Kico amor pa Jehova lo motiva bo pa haci?

⁵ Bo amor pa Jehova lo motiva bo pa no comete un pica serio cu lo trece reproche riba su nomber. Agur a pidi den oracion: “No duna mi ni pobresa ni rikesa—duna mi solamente mi pan di cada dia, pa mi no tin di mas y nenga bo, y bisa: ‘Ken ta Jehova?’ Of pa mi no ta den necesidad y horta, y profana e nomber di mi Dios.” (Proverbionan 30:1, 8, 9) Sea determina pa no ‘profana e nomber di Dios’, treciendo reproche riba dje. Mas bien, semper haci esfuerso pa cumpli cu  loke ta corecto y asina glorific’e.—Salmo 86:12.

6. Kico por pasa si bo comete pica intencionalmente?

⁶ Pidi bo Tata celestial amoroso regularmente den oracion pa e yuda bo resisti e tentacion di practica pica. (Mateo 6:13; Romanonan 12:12) Sigui aplica e conseho di Dios pa bo oracionnan no wordo stroba. (1 Pedro 3:7) Si bo comete pica intencionalmente, e consecuencianan por ta masha lamentabel, pasobra Jehova simbolicamente ta tapa su mes cu un nubia pa e oracionnan di hende rebelde no por pasa yega cerca dje. (Lamentacion 3:42-44) Pues mustra cu bo ta humilde y pidi den oracion pa bo no haci nada cu por stroba bo di acerca Dios den oracion.—2 Corintionan 13:7.

Mustra Amor pa e Yiu di Dios

7, 8. Si bo haci caso di e conseho di Hesus, con esaki por yuda bo rechasa un bida di pica?

⁷ Mustra amor pa Hesucristo dor di obedece su mandamentonan, pasobra esaki lo yuda bo rechasa un bida di pica. Hesus a bisa: “Si boso warda mi mandamentonan, boso lo keda den mi amor; mescos cu mi a warda e mandamentonan di mi Tata, y ta keda den su amor.” (Juan 15:10) Con aplicacion di Hesus su palabranan por yuda bo keda den e amor di Dios?

⁸ Loke por yuda bo pega na principionan moral ta di presta atencion na e palabranan di Hesus. E Lei cu Dios a duna Israel a declara: “No comete adulterio.” (Exodo 20:14) Pero Hesus a revela un principio tras di e mandamento ei bisando: “Ken cu wak un muher pa dese’e, ya caba el a comete adulterio cu ne den su curason.” (Mateo 5:27, 28) Apostel Pedro a bisa cu algun persona den e congregacion di prome siglo tabatin “wowo yen di adulterio” y tabata ‘seduci almanan inconstante.’ (2 Pedro 2:14) Sinembargo, distinto di nan, abo por evita pica sexual si bo ta stima y obedece Dios y Cristo y ta determina pa conserva bo relacion cu nan.

Laga e Spirito di Jehova Guia Bo

9. Pa loke ta spirito santo, kico por sosode si bo persisti den pica?

⁹ Pidi Dios pa su spirito santo, y laga esaki guia bo. (Lucas 11:13; Galationan 5:19-25) Si bo persisti den pica, Dios por kita su spirito for di bo. Despues cu David a peca en conexion cu Betsabe, el a roga Dios: “No tira mi for di bo presencia, y no kita bo spirito santo for di mi.” (Salmo 51:11) Rei Saul a perde Dios su spirito pa motibo cu e no a arepenti di su picanan. El a peca ora el a ofrece un ofrenda kima y ora el a keda sin destrui e tou di carne y buey, y e rei di e Amalekitanan. Despues di esei Jehova a kita su spirito santo for di Saul.—1 Samuel 13:1-14; 15:1-35; 16:14-23.

10. Pakico bo tin cu rechasa asta e idea di practica pica?

¹⁰ Rechasa asta e idea di practica pica. Apostel Pablo a skirbi: “Si nos sigui peca voluntariamente despues di a ricibi e conocemento di e berdad, no ta keda sacrificio pa pica mas.” (Hebreonan 10:26-31) Lo ta masha lamentabel si bo mester yega dje leu ei den hacimento di pica!

Desplega Berdadero Amor pa Otro Hende

11, 12. Con amor y respet lo kita bo di comete inmoralidad sexual?

¹¹ Amor pa prohimo lo impedi bo di comete inmoralidad sexual. (Mateo 22:39) E amor ei lo motiva bo pa proteha bo curason pa e no tenta bo pa busca e cariño di casa di otro hende, ya cu esei lo por hiba na e pica di adulterio. (Proverbionan 4:23; Jeremias 4:14; 17:9, 10) Imita e homber husto Job, kende no a permiti su mes fiha atencion riba ni un otro hende muher cu no tabata su casa.—Job 31:1, BPK.

¹² Respet pa e santidad di matrimonio por  yuda bo evita pica serio. E proposito di Dios tabata pa matrimonio honorabel y relacion sexual fungi como e medio pa hende haya yiu. (Genesis 1:26-28) Corda cu organonan sexual tin di aber cu bida, y bida ta sagrado. Fornicado y adultero ta desobedece Dios, ta rebaha e acto sexual, ta falta respet pa e santidad di matrimonio y ta peca contra nan mes curpa. (1 Corintionan 6:18) Pero amor pa Dios y pa prohimo combina cu obediencia na Dios lo kita un persona di practica conducta cu por resulta den su expulsion for di e congregacion cristian.

13. Den ki manera un persona inmoral ta “destrui cosnan valioso”?

¹³ Nos tin cu resisti pensamento pecaminoso pa nos no pone nos sernan keri sufri. Proverbionan 29:3 ta bisa cu “esun cu anda cu prostituta ta malgasta su rikesa [“destrui cosnan valioso”, NW].” Un adultero cu no ta arepenti ta destrui su relacion cu Dios y ta daña lasonan familiar. Esei ta duna su esposa base pa divorcio. (Mateo 19:9) Sea cu ta e esposo of e esposa a haci malo, un divorcio por causa e partner inocente, e yiunan y otro personanan hopi dolor. Ya cu nos sa con destructivo conducta inmoral ta, esei mester motiva nos pa resisti e tentacion pa participa den dje, no ta berdad?

14. Ki les relaciona cu malecho nos por siña for di Proverbionan 6:30-35?

¹⁴ E echo cu no tin nada cu por compensa adulterio mester motiva bo pa evita e acto sumamente egoista aki. Proverbionan 6:30-35 ta mustra cu mientras hende por compronde pa un ladron cu ta horta pasobra e tin hamber, nan ta desprecia un adultero pasobra e tin un mal curason. E ta “caba cu su mes.” Bou di e Lei di Moises, lo el a haya castigo di morto. (Levitico 20:10) Un persona cu comete adulterio ta pone otro hende sufri djis pa satisface su pasion, y un adultero cu no ta arepenti no ta keda den e amor di Dios sino ta ser expulsa for di e congregacion cristian limpi.

Mantene un Consenshi Limpi

15. Den ki condicion un consenshi marca “como si fuera ta cu hero cayente esaki a wordo haci” ta?

¹⁵ Pa keda den e amor di Dios, nos no por laga nos consenshi cria cayo. Ta logico cu nos no mester acepta e normanan moral degrada di mundo, y nos tin cu tene cuidou den asuntonan manera ki tipo di amigo, material pa lesa y entretenimento nos ta scohe. Pablo a duna e spiertamento: “Den e ultimo temponan algun lo cai for di fe, dor di paga atencion na spiritonan engañoso y doctrinanan di demoñonan, pa medio di e hipocresia di gañadonan, kende nan mes consenshi a wordo kima como si fuera ta cu hero cayente esaki a wordo haci.” (1 Timoteo 4:1, 2) Un consenshi marca “como si fuera ta cu hero cayente esaki a wordo haci” ta manera cuero kima tur na cicatris y sin heful. Un consenshi asina lo no spierta nos mas pa keda leu for di  hende apostata y situacionnan cu por pone nos cai for di e fe.

16. Pakico ta asina importante pa nos tin un consenshi limpi?

¹⁶ Pa nos haya salbacion nos mester tin un consenshi limpi. (1 Pedro 3:21) Mediante nos fe den Hesus su sanger drama, nos consenshi a ser purifica di obranan morto pa nos por rindi sirbishi sagrado na “e Dios bibo.” (Hebreonan 9:13, 14) Si nos comete pica voluntariamente, nos lo susha nos consenshi y lo no ta cualifica mas como hende limpi pa e sirbishi di Dios. (Tito 1:15) Pero cu yudansa di Jehova, nos por tin un consenshi limpi.

Otro Maneranan pa Evita Mal Conducta

17. Ki beneficio tin den ‘sigui Jehova completamente’?

¹⁷ ‘Sigui Jehova completamente’, manera Caleb di Israel di antiguedad a haci. (Deuteronomio 1:34-36) Haci loke Dios ta rekeri di bo, y no pensa mes di participa na “e mesa di demoñonan.” (1 Corintionan 10:21) Rechasa apostasia. Si bo ta alimenta bo mes cu aprecio cu e cuminda spiritual cu ta disponibel solamente na e mesa di Jehova, lo bo no ser engaña pa maestro falso ni pa forsanan spiritual malbado. (Efesionan 6:12; Judas 3, 4) Enfoca riba cosnan spiritual, manera estudio di Bijbel, asistencia na reunion y sirbishi di veld. Si bo sigui Jehova completamente y mantene bo mes ocupa den e obra di Señor, bo por conta cu lo bo ta felis.—1 Corintionan 15:58.

18. Ki efecto temor di Jehova lo tin riba bo conducta?

¹⁸ Sea determina pa “ofrece na Dios un sirbishi aceptabel cu reverencia y temor.” (Hebreonan 12:28) Temor respetuoso di Jehova lo motiva bo pa rechasa un rumbo di desobediencia. Lo e yuda bo comporta bo mes na harmonia cu e conseho cu Pedro a duna cristiannan ungi: “Si boso ta invoca como Tata esun cu imparcialmente ta husga di acuerdo cu cada hende su obra, comporta boso mes cu temor durante di e tempo cu boso ta pasa riba mundo.”—1 Pedro 1:17.

19. Pakico semper bo tin cu pone na practica loke bo ta siña for di e Palabra di Dios?

¹⁹ Semper pone na practica loke bo ta siña for di e Palabra di Dios. Esaki lo yuda bo evita pica serio pasobra lo bo resulta di ta entre hende cu “pa motibo di practica, tin nan mente entrena pa discerni loke ta bon y loke ta malo.” (Hebreonan 5:14) En bes di no tin cu nes cu e manera cu bo ta papia y comporta bo, percura pa bo cana manera un persona sabi, ‘haciendo bon uzo di bo tempo’ den e dianan malbado aki. ‘Compronde kico ta e boluntad di Jehova’ y sigui hacie.—Efesionan 5:15-17; 2 Pedro 3:17.

20. Pakico nos mester evita cudishi?

²⁰ No duna cudishi un chens. Cudishi ta e deseo golos pa loke ta pertenece na otro hende. Un di e Dies Mandamentonan ta bisa: “No cudisha [“desea”, BPK] cas di bo prohimo; no cudisha esposa di bo prohimo, ni su sirbidor homber, ni su sirbidor muher, ni su buey, ni su burico, ni nada cu ta pertenece na bo prohimo.” (Exodo 20:17) E lei aki a  proteha un persona su cas, esposa, cria, animal, etcetera. Pero loke ta mas importante ainda ta Hesus su declaracion cu cudishi ta contamina hende.—Marco 7:20-23.

21, 22. Ki medidanan preventivo un cristian por tuma pa evita di comete pica?

²¹ Tuma medida preventivo pa deseo no hiba na pica. Discipel Santiago a skirbi: “Cada un ta wordo tenta ora cu e wordo atrai y seduci dor di su mes pasion [“deseo”, NW]. Anto ora pasion concebi, e ta duna lus na pica; y ora pica keda cumpli, e ta produci morto.” (Santiago 1:14, 15) Por ehempel, si un persona tabatin un problema cu bebemento den pasado, kisas e ta percura pa e no tin bebida alcoholico mes na cas. Pa evita tentacion cu ta envolve un persona di e sexo opuesto, un cristian podise tin cu cambia su luga di sinta of para na trabou of asta su trabou mes.—Proverbionan 6:23-28.

²² No dal ni e prome stap pa bai comete pica. Flirtmento y pensamento riba cosnan inmoral por hiba na fornicacion of adulterio. Mentira chikito por duna un persona curashi pa gaña cosnan mas serio y esei por hiba na e custumber pecaminoso di gaña. Ladronicia di cosnan chikito por haci consenshi di un persona asina sin heful cu e ta cuminsa horta na gran escala. Asta ora un persona tolera djis un pensamento apostata, esei por hib’e riba e caminda di apostasia total.—Proverbionan 11:9; Revelacion 21:8.

Kico Bo Mester Haci si Bo A Peca?

23, 24. Ki consuelo nos por haya for di 2 Cronicanan 6:29, 30 y Proverbionan 28:13?

²³ Tur hende ta imperfecto. (Eclesiastes 7:20) Pero si bo a comete un pica serio, bo por haya consuelo for di e oracion di Rei Salomon na inauguracion di e tempel di Jehova. Salomon a pidi Dios den oracion: “Cualkier oracion of suplica cu un hende of cu henter bo pueblo Israel haci, ora cada un conoce su mes afliccion y su mes dolor, y ta habri su mannan den direccion di e cas aki, e ora ei tende abo for di shelo, bo luga di biba, y pordona, y duna cada un segun tur su camindanan, kende su curason bo conoce (pasobra ta abo so conoce curason di e yiunan di hende).”—2 Cronicanan 6:29, 30.

²⁴ Si, Dios conoce e curason y e ta pordona. Proverbionan 28:13 ta bisa: “Esun cu sconde su picanan lo no prospera, ma esun cu confesa y laga nan lo haya misericordia.” Si un persona confesa su pica cu un curason arepenti y stop di practic’e, e por ricibi e misericordia di Dios. Awor, si bo ta den un condicion spiritualmente debil, kico otro por yuda bo keda den e amor di Dios?

Con Lo Bo Contesta?

• Con nos por conserva nos mes den e amor di Dios?

• Con amor pa Dios y pa Cristo por yuda nos rechasa un bida di pica?

• Pakico berdadero amor pa otro hende ta impedi nos di comete inmoralidad sexual?

• Den ki otro manera nos por evita mal conducta?

[Preguntanan di Estudio]

[Plachi na pagina 21]

Judas ta mustra con nos por conserva nos mes den e amor di Dios

[Plachi na pagina 23]

Un divorcio por causa e partner inocente y yiunan hopi dolor

[Plachi na pagina 24]

Bo ta determina pa ‘sigui Jehova completamente’, mescos cu Caleb?

[Plachi na pagina 25]

Pidi yudansa regularmente den oracion pa resisti tentacion