Graduadonan di un Scol Cu Ta Beneficia Hende Rond Mundo

DEN mas cu 98.000 congregacion di Testigonan di Jehova na mas cu 200 pais, Dios ta siñando hende di tur nivel di bida. E buki principal di instruccion ta Bijbel, y e meta di e educacion aki ta pa siña hende kico ta e boluntad di Dios y con pa biba di acuerdo cu ne, yudando nan asina pa progresa spiritualmente. Esnan cu acepta e educacion aki ta saca gran beneficio. Anto loke nan siña, nan ta comparti tambe cu otro hende, na harmonia cu e instruccion di Hesucristo pa haci discipel.—Mateo 28:19, 20.

Fuera di e programa educativo continuo cu Testigonan di Jehova tin den nan congregacionnan, nan a establece tambe varios scol specialisa. Un di esakinan ta e Scol di Entrenamento Ministerial. E scol a keda inaugura na october 1987 na Pittsburgh, Pennsylvania, Merca. E prome klas a consisti di 24 studiante di abla Ingles. Djei padilanti a tene e scol aki na 21 idioma den 43 pais. Te asina leu, anciano- y sirbidornan ministerial soltero di mas cu 90 pais a siguie. Ora e graduadonan completa e curso di ocho siman, ta asigna nan pa sirbi caminda tin un necesidad, sea den nan propio pais of den exterior. Te cu fin di aña 2005, mas cu 22.000 ruman homber cristian a completa e curso. Jehova a bendiciona ricamente nan esfuersonan humilde pa promove interesnan di Reino y beneficia otro hende.—Proverbionan 10:22; 1 Pedro 5:5.

 Loke Nan A Haci pa Asisti

Pa por asisti na e Scol di Entrenamento Ministerial, mayoria studiante tin cu pidi liber for di nan empleo, sea cu nan ta traha part-time of full-time. Esaki tin biaha ta un problema. Na Hawai, dos ruman homber cristian cu a haya invitacion pa asisti na e scol tabatin cu pidi liber for di nan trabou como maestro di scol. Cu fe den Jehova, nan a entrega nan peticion, y a splica dicon nan kier a asisti y con nan lo a beneficia. Ambos a haya e tempo liber.

Den varios caso, Testigonan cu a pidi liber di trabou a haya como contesta cu nan lo no tin trabou ora nan bin bek. Toch nan a scohe pa haya entrenamento cerca Jehova su organisacion, maske esei a nifica cu nan lo a perde nan trabou. Tin di e personanan aki cu despues a haya invitacion di nan doño di trabou pa bin traha bek ora nan caba cu e scol. Por resumi nan determinacion pa asisti na e scol asin’aki: Haci bo peticion na bo doño di trabou, pidi Jehova su yudansa den oracion, y laga sobra cos den su man.—Salmo 37:5.

“Siña pa Jehova”

E scol su programa di ocho siman ta ensera un estudio profundo di Bijbel. Studiantenan ta siña con e pueblo di Jehova ta organisa pa haci e boluntad di Dios. Nan ta siña tambe con nan por uza Bijbel na un manera mas efectivo den nan sirbishi di veld, na reunionnan di congregacion y na asamblea.

Un graduado cu tabatin aprecio pa e scol a skirbi lo siguiente na un studiante cu tabatin cu bai e scol ainda: “Kere mi, esaki lo ta e mihor experencia educativo cu lo bo haya den bo bida. E texto biblico cu ta bisa ‘ser siña pa Jehova’, realmente lo haya mas nificacion. Henter e experencia ta un proceso di moldea y refina bo curason y personalidad pa nan cuadra mas cu e ehempel di Cristo Hesus. Bo ta bai pasa den e experencia di mas grandi den bo bida.”—Isaias 54:13, NW.

Evangelisado, Wardado, y Maestro

Actualmente graduadonan di e Scol di Entrenamento Ministerial ta sirbi den 117 pais. Esakinan ta inclui islanan den areanan di Atlantico, Caribe y Pacifico, y tambe den mayoria pais caminda tin sucursal di Testigonan di Jehova. Sucursalnan ta informa cu e entrenamento excelente cu e studiantenan ta haya ta bisto den nan actividadnan como evangelisado, wardado y maestro. Nan entrenamento ta prepara nan pa uza Bijbel den un manera mas efectivo den sirbishi di veld. (2 Timoteo 2:15) Ora nan ta contesta preguntanan di e doñonan di cas, nan ta referi cu frecuencia na e buki Rasonamento for di e Scritura * y ta siña otro publicadornan di Reino pa haci mescos. E entusiasmo di e graduadonan ta contagioso, y nan actividad ta fortalece e congregacionnan.

Ancianonan di congregacion tin e privilegio di “pastorea e tou” y yuda atende e necesidadnan spiritual di otro cristiannan. (1 Pedro 5:2, 3) Un anciano a bisa tocante e areglo di pastorea: “Nos ta aprecia masha cu sucursal ta manda ruman homber bon entrena pa yuda nos cu e responsabilidad di pastorea e tou di Dios.” Un sucursal na Lehano Oriente tambe a remarca: “E graduadonan ta masha compasivo. Nan ta traha duro y ta gana e respet di e congregacion. Nan humildad, calor di amistad y entusiasmo ta bon conoci y altamente aprecia. Nan ta sacrifica nan mes di buena gana y gustosamente ta muda pa congregacionnan cu tin mester di wardado.” (Filipensenan 2:4) Hombernan asina ta refresca nan rumannan den fe y merece elogio.—1 Corintionan 16:18.

Un otro cos ta cu e instructornan di e Scol di Entrenamento Ministerial ta yuda e studiantenan mehora nan habilidad como orador publico. Hopi di e graduadonan, despues di aplica e sugerencianan y conseho cu  nan ta haya, por ser uza den corto tempo den programanan di asamblea di circuito y congreso di districto. Un superintendente di circuito a remarca cu e graduadonan ta duna “discursonan excelente y ta aplica e informacion uzando bon rasonamento.”—1 Timoteo 4:13.

E calidad di enseñansa na reunionnan di congregacion a mehora considerablemente den un pais Africano despues cu nan a tene e Scol di Entrenamento Ministerial einan y a asigna varios graduado pa traha den veld. Ancianonan cu a bin di e scol ta duna asistencia den e trabou di predica, pastorea y siña, yudando asina pa edifica e congregacionnan spiritualmente.—Efesionan 4:8, 11, 12.

Mihor Supervision den e Congregacion

Hopi caminda tin mester di mas anciano y sirbidor ministerial. Algun congregacion lo no tabatin ningun anciano si no a manda un graduado di Scol di Entrenamento Ministerial pa nan. P’esei ta asigna hopi graduado pa sirbi caminda tin tal necesidad.

Hopi sucursal ta informa cu e hombernan aki “conoce e areglonan di e organisacion bon”, “ta tuma nan responsabilidadnan na serio”, “ta yuda otro rumannan aprecia y respeta e organisacion di Jehova” y “ta contribui na e calor y spiritualidad di nan congregacion.” Esaki ta asina pasobra e graduadonan di e scol ta aplica loke tin skirbi den e Palabra di Dios y no ta depende riba nan mes comprondemento ni ta sabi den nan mes bista. (Proverbionan 3:5-7) Hombernan asina ta bira un bendicion spiritual den e congregacionnan na cua nan ta asigna.

Nan Ta Sirbi den Teritorionan Aisla

Algun graduado apunta como pionero special ta yuda gruponan aisla bira congregacion. Expresando aprecio pa nan yudansa, un anciano den un area aisla di Guatemala a bisa: “Binti aña largo mi a precupa con lo bai atende e teritorio inmenso aki. Hopi biaha mi a haci oracion tocante e asunto. E rumannan di Scol di Entrenamento Ministerial ta bon entrena como orador y tambe den asuntonan di e organisacion, y mi a keda contento di mira cu awor e area ta hayando atencion amoroso.”

Graduadonan a siña con pa ta efectivo den teritorionan caminda nan tin cu biaha distancianan largo atrabes di seronan pa yega na pueblitonan plama. Unabes nan yega, nan ta establece y organisa rapidamente gruponan aisla, asta ora cu anteriormente otro publicadornan no a logra haci esei. Por ehempel, un anciano na Niger a pidi pa laga algun graduado bin yud’e como cu e tabata di opinion cu nan lo por a haci un excelente trabou den e area caminda e tabata biba. Specialmente den areanan aisla, por ta mas facil pa hombernan soltero sirbi como pionero special y superintendente di circuito. Mescos cu apostel Pablo, nan tin cu trata cu ‘peliger riba riunan, peliger di ladronnan, peliger den desierto’, y incomodidad personal y tambe precupacion pa e congregacionnan cu nan ta sirbi.—2 Corintionan 11:26-28.

Hobennan Ta Beneficia

E Scritura ta urgi hobennan pa corda riba nan Creador. (Eclesiastes 12:1) Graduadonan celoso di Scol di Entrenamento Ministerial ta bon ehempel pa hobennan cristian. Despues cu un congregacion na Merca a haya dos graduado, e cantidad di tempo cu e rumannan tabata pasa den sirbishi a bira dobel. Ademas, e cantidad di pionero regular, of proclamado di Reino di tempo completo, a subi di 2 pa 11. Esaki ta tipicamente loke ta sosode den hopi congregacion.

Ademas, e graduadonan ta stimula rumannan homber hoben pa asisti na e Scol di Entrenamento Ministerial. Esaki a motiva algun cu no ta sirbi ainda como sirbidor ministerial pa haci esfuerso pa alcansa e privilegio ei. E sucursal di Hulanda ta yama graduadonan di Scol di Entrenamento Ministerial “ehempelnan bibo pa rumannan homber hoben cu ta pensando riba kico pa haci cu nan bida.”

 Nan Ta Sirbi den Congregacionnan di Otro Idioma

Den hopi pais, esfuersonan pa predica e bon nobo na e hendenan den nan idioma nativo ta avansando cu mas forsa. Graduadonan di Scol di Entrenamento Ministerial hopi biaha ta siña otro idioma y ta sirbi den teritorionan cu tin un poblacion grandi di inmigrante. Por ehempel na Belgica, tin mester di mas predicado di Reino den e teritorio Albanes, Perso y Ruso.

Congregacion- y gruponan di otro idioma na Alemania, Gran Bretania, Italia, Merca, Mexico y otro paisnan ya caba ta sacando gran beneficio di superintendentenan biahero, ancianonan y sirbidornan ministerial cu ta graduadonan di Scol di Entrenamento Ministerial. E sucursal di Corea ta informa cu “mas cu 200 graduado ta hunga un papel prominente den yuda nos cu congregacion- y gruponan di otro idioma.”

Nan Ta Sirbi Humildemente den Otro Capasidad

Fuera di sirbi cu grupo- y congregacionnan di otro idioma, e rumannan cu a gradua di Scol di Entrenamento Ministerial ta sirbi como anciano, sirbidor ministerial y superintendente biahero. Tin di nan ta acepta asignacion den un otro pais, kisas satisfaciendo un necesidad urgente den e Departamento di Sirbishi na un sucursal. Esnan cu tin conocemento den trabou di construccion kisas ta participa den e programa di construi Salon di Reino.

E aumento mundial cu tin di e cantidad di congregacion y circuito ta nifica cu constantemente tin mester di mas superintendente biahero. Pa yuda satisface e necesidad aki, cierto graduado di Scol di Entrenamento Ministerial ta haya un entrenamento di dies siman den e trabou biahero y despues ta sirbi como superintendente di circuito regular of substituto. Rond di 1.300 graduado ta sirbi actualmente como superintendente biahero den 97 pais. Den un pais Africano, 55 porciento di e superintendentenan biahero a gradua di e Scol di Entrenamento Ministerial. Den un otro pais Africano, e cantidad ta 70 porciento.

For di Australia, Canada, Europa, Lehano Oriente y Merca a manda centenares di graduado di e scol pa exterior pa satisface necesidadnan specifico den otro pais. Den e manera aki, e beneficionan di e scol a extende rond mundo.

Mediante su Yiu, Hesucristo, Jehova a lanta evangelisado, wardado, maestro y otronan cu ta promove interesnan di Reino den e ultimo dianan aki. Tin expectativa pa mas aumento den e pueblo di Dios? Sigur cu si! Pues tin mas y mas mester di hombernan dedica cu ta haci esfuerso pa alcansa mayor responsabilidad. (Isaias 60:22; 1 Timoteo 3:1, 13) E Scol di Entrenamento Ministerial ta duna anciano y sirbidor ministerial un oportunidad di prepara nan mes pa expande nan ministerio, cu gran beneficio pa nan mes y pa otro hende den e campo mundial.

[Nota]

[Plachi na pagina 10]

E Scol di Entrenamento Ministerial ta promove interesnan di Reino rond mundo

[Plachi na pagina 13]

Abo ta desea di bai e Scol di Entrenamento Ministerial y beneficia otro hende?