Juda A Keda Desola?

BIJBEL a profetisa cu e Babilonionan lo a ruina e tera di e reino di Juda y cu esaki lo a keda desola of bandona te ora e exiliadonan Hudiu lo a regresa. (Jeremias 25:8-11) E motibo di mas fuerte pa kere cu e profesia aki a cumpli ta e relato historico inspira cu a ser registra un 75 aña despues cu e prome grupo di exiliado a regresa nan patria. E relato ta bisa cu e rei di Babilonia ‘a hiba esnan cu a scapa for di spada, preso na Babilonia y nan tabata sirbidor di dje y di su yiu hombernan te ora cu e reino di Persia a bin na poder.’ Y relaciona cu e tera, Bijbel ta bisa: “Tur e dianan di su desolacion el a tene sabat.” (2 Cronicanan 36:20, 21) Tin evidencia arkeologico pa apoya esaki?

Den e revista Biblical Archaeology Review, Ephraim Stern, profesor di arkeologia Palestino na Universidad Hebreo, a bisa: “Tanto e Asirionan como e Babilonionan a ruina gran parti di Israel di antiguedad, pero evidencia arkeologico ta revela cu nan respectivo conkistanan tabatin consecuencianan masha distinto for di otro.” El a splica: “Mientras cu e Asirionan a laga rastronan bon cla di nan presencia na Palestina, tin un bashi straño despues cu e Babilonionan a ruina e pais . . . Nos no ta haya ningun evidencia cu un otro nacion a ocupa e tera sino te den e periodo di e Personan . . . No tin absolutamente nada cu ta indica cu un ehersito stranhero a ocupa e tera. Durante tur e tempo ei, ni un solo stad cu e Babilonionan a ruina a ser habita di nobo.”

Profesor Lawrence E. Stager di Universidad di Harvard ta di acuerdo. E di: “Rond Filistea, y despues rond Juda”, e rei di Babilonia su “politica di destruccion total a crea practicamente un desierto west di Riu Jordan.” Stager a agrega: “Ta te den e tempo di Ciro e Grandi, sucesor Perso di e Babilonionan, e registro arkeologico ta cuminsa atrobe . . . na Jerusalem y na Juda, caminda hopi exiliado Hudiu a regresa nan patria.”

Si, Juda a keda desola pa basta aña manera e palabra di Jehova a bisa cu lo a sosode. Loke Jehova Dios profetisa semper ta cumpli. (Isaias 55:10, 11) Nos por pone nos pleno confiansa den Jehova y den e promesanan registra den su Palabra, Bijbel.—2 Timoteo 3:16.