Pakico Haci Loke Ta Corecto?

UN HOMBER bon siña a yega di bisa: “E deseo ta presente den mi, ma e hacimento di bon si no t’ei. Pasobra e bon cu mi ta desea di haci, mi no ta haci; ma mi ta practica exactamente e maldad cu mi no ta desea di haci.” Dicon tabata dificil pa e homber aki practica e bon cu e tabata desea di haci? El a splica: “Asina mi ta descubri e lei aki: ora mi ta desea di haci loke ta bon, maldad ta presente den mi. Pasobra segun e hende interior mi ta deleita mi mes den e lei di Dios, ma den e miembronan di mi curpa mi ta mira un otro lei cu ta bataya contra e lei di mi mente y ta haci mi preso di e lei di pica, cual ta den mi miembronan.”—Romanonan 7:18, 19, 21-23.

E palabranan aki di apostel Pablo, skirbi casi 2.000 aña pasa, ta splica dicon ta asina dificil pa hende imperfecto haci loke ta corecto. Pa nos pega na bon principio, specialmente bou di circunstancianan trabahoso, nos mester tin fortalesa moral. P’esei ta bon pa nos puntra: Kico ta e motibo mas importante pa haci loke ta corecto?

Wak kico e Scritura ta bisa tocante e futuro di un persona moralmente recto. Na Salmo 37:37 y 38, nos ta lesa: “Tuma nota di e hende perfecto [“sin culpa”, NW], y observa esun cu ta recto; pasobra e hende di pas lo tin descendiente. Ma transgresornan conhuntamente lo wordo destrui; e desendientenan di e malbado lo wordo corta kita afo.” Proverbionan 2:21 y 22 ta bisa nos: “E rectonan lo biba den e tera, y e perfectonan [“esnan sin culpa”, NW] lo keda den dje; ma e malbadonan lo wordo corta kita for di tera, y e traidornan lo wordo ranca for di dje cu raiz cu tur.”

Aunke e promesanan aki y otronan mas cu nos ta haya den Bijbel ta duna nos un insentivo pa sigui e rumbo cu ta agrada Dios, no ta pa esei nos ta sirbie. E motibo fundamental pakico nos kier agrada Dios ta conecta cu un cuestion cu ta envolve tur criatura inteligente personalmente. E siguiente articulo lo considera kico e cuestion ei ta y con e ta toca nos.