Siña Bo Yiunan Duna Comentario

PERLA, kende ta biba na Mexico, ta corda cu tempo e tabata chikito, su mama tabata yud’e prepara comentario cortico pa e Estudio di Toren di Vigilancia. Awor Perla tin un yiu homber di cinco aña. Con e ta yud’e? “Ami mes ta prepara e Toren di Vigilancia prome. Ora mi ta hacie, mi ta busca un paragraf cu mi yiu por compronde, uno cu e por splica cu su mes palabra. E ora ei nos ta consentra riba loke e ta yama ‘mi paragraf.’ Mi ta pidie uza ehempel di cosnan di bida di tur dia pa e splica e informacion. Caba nos ta repasa e comentario varios biaha. Nos ta uza un obheto tamaño di un microfon pa e sa con e tin cu ten’e ora e ta duna comentario. Mi ta masha contento cu e no ta laga ni un reunion pasa sin duna comentario of hisa man. Mayoria biaha, e ta bai cerca e conductor prome cu e reunion cuminsa y bis’e cua ta ‘su’ paragraf.”

Jens, un anciano cu ta sirbi den un grupo di abla Hindi, tin dos yiu homber, un di dos y un di cuater aña. Ora e cu su casa ta prepara pa reunion hunto cu nan yiunan, nan ta uza un metodo cu Jens a siña for di su mayornan. E ta bisa: “Nos ta dicidi ki parti di e material e muchanan por compronde. E ora ei nos ta purba duna nan un descripcion general di e topico en particular ei of un resumen di e puntonan principal di e articulo, despues di cua nos ta haci nan e preguntanan cu nos kier pa nan contesta na reunion. Hopi bes nos ta keda sorprendi pa e contestanan cu nan ta duna na un manera basta natural. E manera cu nan ta expresa nan mes ta refleha realmente loke nan ta compronde. Como resultado, nan contestanan ta bira un berdadero alabansa pa Jehova y un expresion personal di nan fe.”