Un Cuestion Cu Ta Toca Bo

BO TIN un amigo of famia cu bo ta hopi pega cu ne? Con lo bo sinti bo si un hende acusa bo cu bo tin e relacion pega ei puramente pa motibonan egoista? Lo bo no sinti bo ofendi, y podise asta indigna? Esei ta netamente e acusacion cu Satanas e Diabel a lansa contra tur persona cu tin un relacion intimo cu Jehova Dios.

Reflexiona un rato riba loke a sosode ora cu Satanas a logra pone e prome pareha humano, Adam cu Eva, kibra e lei di Dios y uni cu ne den su rebelion contra Dios. Acaso loke a sosode a nifica cu hende lo a keda obedecido na Jehova tanten cu esei a cumbini nan? (Genesis 3:1-6) Un 2.500 aña despues cu Adam a desvia, Satanas a bolbe lanta e mesun cuestion, pero e biaha aki en conexion cu un homber cu yama Job. Laga nos analisa e relato biblico ei cuidadosamente, ya cu e acusacion cu Diabel a haci ta identifica e cuestion bon cla.

“Lo Mi No Bandona Mi Integridad”

Job tabata ‘un hende perfecto [“sin culpa”, NW] y recto, cu a teme Dios y cu a aparta su mes for di maldad.’ Sinembargo, Satanas a cuestiona Job su rectitud. El a puntra Jehova: “Ta pornada Job ta teme Dios?” Anto Diabel a calumnia tanto Dios como Job ora el a acusa Jehova di a cumpra Job su lealtad dor di proteh’e y bendicion’e. Satanas a desafia Dios, bisando: “Ma saca bo man awor y mishi cu tur loke e tin; siguramente e lo maldiciona bo den bo cara.”—Job 1:8-11.

Pa contesta e ponencianan aki, Jehova a permiti Satanas test Job. Den un intento pa kita Job di sirbi Dios, Diabel a trece un calamidad tras di otro riba e homber fiel ei. Nan a horta of mata tur e bestianan di crio di Job, asesina su sirbidornan y mata su yiunan. (Job 1:12-19) Pero Satanas tabatin exito? No! Sin cu Job tabata sa cu ta Diabel tabata e causa di su dificultadnan, el a bisa: ‘Jehova a duna y Jehova a kita. Bendiciona sea e nomber di Jehova.’—Job 1:21.

Despues, Satanas a presenta dilanti di Jehova, y Jehova a bis’e: “[Job] ta mantene su integridad, maske cu bo a pone mi contra dje, pa ruin’e sin motibo.” (Job 2:1-3) E cuestion sumamente importante tabata Job su integridad, un cualidad cu ta rekeri pa hende keda leal na Dios y pega fielmente na husticia. Te asina leu Job a sali victorioso encuanto e cuestion di integridad. Sinembargo, Diabel no a entrega.

Satanas e ora ei a inclui henter humanidad den su insinuacion. El a bisa Jehova: “Cuero pa cuero! Si, tur loke un hende tin e lo duna pa su bida. Ma saca bo man awor y mishi cu su weso y cu su carni; e lo maldiciona bo den bo cara.” (Job 2:4, 5) Uzando e termino  general “un hende” en bes di e nomber di Job, Diabel a cuestiona e integridad di tur hende. Ta como si fuera el a bisa: ‘Un hende lo haci loke sea ta necesario pa salba su bida. Duna mi un chens, y wak con mi ta kita tur hende for di Dios.’ Tabata berdad cu ningun hende lo no keda leal na Dios bou di tur condicion y na tur momento?

Jehova a permiti Diabel dal Job cu un malesa teribel. Job a sufri asina tanto cu el a pidi pa e muri. (Job 2:7; 14:13) No obstante, Job a declara: “Te na mi morto lo mi no bandona mi integridad”! (Job 27:5) Job a bisa esaki pasobra e tabata stima Dios, y nada no por a cambia esei. Job a demostra cu e tabata un homber di integridad. Bijbel ta bisa di Jehova: “[El] a bendiciona e ultimo dianan di Job mas cu e promenan.” (Job 42:10-17) Tabatin mas hende manera Job? Kico e tempo cu a pasa a revela?

Con e Desafio A Ser Contesta

Den capitulo 11 di e buki biblico di Hebreonan, apostel Pablo a menciona varios homber y muher fiel di tempo precristian, entre otro Noe, Abraham, Sara y Moises. Caba e apostel a declara: “Lo mi no tin basta tempo pa mi conta di [otronan].” (Hebreonan 11:32) E sirbidornan fiel aki di Dios tabata asina tanto cu Pablo a referi na nan como ‘un nubia grandi di testigo’, comparando nan cu un nubia inmenso cu ta extende den shelo. (Hebreonan 12:1) Si, atrabes di siglonan, masha hopi hende a haci uzo di nan boluntad liber y a scohe pa duna nan lealtad na Jehova Dios.—Josue 24:15.

E mihor contesta contra e ponencia di Satanas cu e por kita hende di sirbi Jehova a bin for di e propio Yiu di Dios, Hesucristo. Ni sikiera e dolor insoportabel di un staca di tormento no a kibra su integridad na Dios. Na momento cu Hesus a hala su ultimo rosea, el a sclama: “Tata, den bo mannan mi ta entrega mi spirito.”—Lucas 23:46.

E tempo cu a pasa a demostra bon cla cu Diabel no por a kita tur hende di sirbi e Dios berdadero. Masha hopi hende a siña conoce Jehova y a ‘stim’e cu henter nan curason y cu henter nan alma y cu henter nan mente.’ (Mateo 22:37) Nan lealtad firme na Jehova a proba cu Satanas ta kiboca den e cuestion di integridad humano. Abo tambe por duna prueba cu Diabel ta kiboca si bo ta un homber of muher di integridad.

Kico Bo Tin Cu Haci?

E boluntad di Dios ta pa ‘tur clase di hende wordo salba y yega na un conocemento exacto di e berdad.’ (1 Timoteo 2:4) Con abo por haci esei? Traha tempo pa studia Bijbel y adkiri ‘conocemento di e unico Dios berdadero y di Hesucristo, kende el a manda.’—Juan 17:3.

Satanas a desafia e integridad di hende ora el a cuestiona e motibonan pakico hende ta sirbi Dios. Pa conocemento por influencia bo motivacion, e mester yega na bo curason. Anto pa esaki sosode, bo tin cu haci mas cu djis busca informacion for di Bijbel. Cultiva e custumber di medita riba loke bo siña. (Salmo 143:5) Ora bo ta lesa Bijbel of un publicacion basa riba Bijbel, haci sigur di tuma tempo pa reflexiona riba preguntanan manera: ‘Kico esaki ta siña mi tocante Jehova? Cua cualidadnan di Dios mi ta mira expresa akinan? Den ki areanan di mi bida ami mester ta asina? Kico Dios ta aproba of desaproba? Ki efecto esei tin riba loke mi ta sinti pa Dios?’ Meditando di e manera ei lo yena bo curason cu amor y aprecio pa e Creador.

Integridad na Dios no ta limita na e esfera di creencia religioso. (1 Reinan 9:4) Pa mantene bo integridad na Jehova Dios bo mester ta moralmente recto den tur area di bida. Lo bo no perde nada cu esei. Jehova ta “e Dios felis”, y e kier pa bo gosa di bida. (1 Timoteo 1:11, NW) Ban considera algun practica cu  bo tin cu evita pa bo por keda moralmente limpi y asina gosa di un bida mas felis y di e aprobacion di Dios.

Evita Inmoralidad Sexual

Jehova mes a fiha e norma pa matrimonio den su Palabra. Bijbel ta bisa: “Un homber lo bandona su tata y su mama y lo uni cu su esposa. Y nan lo bira un carni.” (Genesis 2:21-24) Siendo cu parehanan casa a bira “un carni”, nan ta honra Dios su areglo matrimonial si nan ta limita nan relacion sexual entre nan dos. Apostel Pablo a declara: “Laga matrimonio wordo honra pa tur hende, y laga e cama matrimonial ta sin mancha; pasobra Dios lo husga fornicadonan y adulteronan.” (Hebreonan 13:4) E expresion “cama matrimonial” ta referi na relacion sexual entre un homber cu un muher legalmente casa cu otro. Si un di nan tene relacion sexual pafo di matrimonio esei ta adulterio y por trece huicio desfaborabel di Dios.—Malakias 3:5.

Kico di sex prome cu matrimonio? Esei tambe ta contra e normanan moral cu Jehova a establece. Bijbel ta bisa: “Esaki ta e boluntad di Dios . . . pa boso abstene boso di inmoralidad sexual.” (1 Tesalonicensenan 4:3) Homosexualidad, relacion sexual cu famia hopi pega of cu bestia tambe ta picanan contra Dios. (Levitico 18:6, 23; Romanonan 1:26, 27) Ken cu kier agrada Dios y gosa di un bida realmente felis tin cu keda leu for di practicanan inmoral.

Kico di actonan cu ta excita hende sexualmente prome cu casamento? E practica aki ta desagrada Jehova. (Galationan 5:19) Nos mente tambe mester keda limpi di pensamentonan inmoral. Hesus a bisa: “Ken cu wak un muher pa dese’e, ya caba el a comete adulterio cu ne den su curason.” (Mateo 5:28) E palabranan ei ta aplica tambe na wakmento di imagennan pornografico riba papel, riba pantaya of riba Internet; e ta aplica na lesamento di relatonan tocante actividadnan sexual; y na scuchamento di musica cu letra inmoral of dobel sentido. Ora nos evita e tipo di cosnan ei nos lo agrada Dios y hiba un bida mas sano.

Kico di flirtmento? Flirtmento ta nifica mustra interes romantico den otro hende den forma di chansa of comportacion sexualmente seductivo. Ta contra di principionan biblico pa un homber of muher casa dirigi tal atencion na un persona cu no ta su casa, y e ta un indicacion di falta di respet pa Jehova. (Efesionan 5:28-33) P’esei ta masha inapropia pa hende soltero coketia of manda señalnan romantico pa otro djis pa pasa pret! Kico si un persona tuma e flirtmento ei mas na serio di loke tabata bo intencion? Pensa riba e dolor emocional cu esei por causa. Loke tambe ta haci e asunto aki serio ta e echo cu flirtmento por hiba na adulterio of fornicacion. Di otro banda, ora nos ta trata miembronan di e sexo opuesto na un manera decente, esei ta aumenta nos respet propio.—1 Timoteo 5:1, 2.

Agrada Dios den Otro Areanan di Bida

Den hopi pais ta facil pa haya bebida alcoholico. Tin algo malo den bebe alcohol? E Scritura no ta prohibi bebemento modera di biña, cerbes of otro bebida alcoholico. (Salmo 104:15; 1 Timoteo 5:23) Sinembargo, bebemento di mas y buracheria ta malo den bista di Dios. (1 Corintionan 5:11-13) Un cos ta sigur, lo bo no kier pa bebemento di mas daña bo salud y perhudica bo bida di famia.—Proverbionan 23:20, 21, 29-35.

Jehova ta e “Dios di berdad.” (Salmo 31:5, BPK) Bijbel ta declara: “Ta imposibel pa Dios gaña.” (Hebreonan 6:18) Si bo kier e aprobacion di Dios, bo tin cu evita di gaña. (Proverbionan 6:16-19; Colosensenan 3:9, 10) Bijbel ta conseha cristiannan pa “papia berdad cu [nan] prohimo.”—Efesionan 4:25.

 Un otro practica ta wega di placa. Aunke wega di placa ta popular cerca hopi hende, e ta un forma di golosidad, pasobra ta un intento pa traha placa riba custia di otro hende. Jehova no ta aproba hende cu ta “golos pa ganashi deshonesto.” (1 Timoteo 3:8, NW) Pues si bo kier agrada Jehova, lo bo keda leu for di tur sorto di wega di placa, entre nan, wega di number, bingo y pustamento di cabai. Lo bo ripara cu de echo bo ta keda cu mas placa den bo saco pa satisface e necesidadnan di bo famia.

Hortamento, esta, coi cos cu no ta di bo, ta un otro forma di golosidad. Bijbel ta bisa: “No horta.” (Exodo 20:15) Ta robes pa concientemente cumpra articulonan horta y pa coi cos sin pidi permiso. Bijbel ta bisa: “Laga esun cu ta horta, no horta mas; ma mas bien, lag’e traha, haciendo cu su mes mannan loke ta bon, pa e por tin algo pa comparti cu esun cu ta den necesidad.” (Efesionan 4:28) En bes di horta tempo for di doño di trabou, sirbidornan di Jehova ta percura di duna un dia completo di trabou. Nan ‘deseo ta pa comporta nan mes den tur cos na un manera honorabel.’ (Hebreonan 13:18) Ademas, un consenshi limpi siguramente ta contribui na pas mental.

Kico Dios ta pensa di hende cu tin un caracter violento? Bijbel ta spierta: “No sera amistad cu hende cu ta gusta rabia, y no anda cu hende di mal genio.” (Proverbionan 22:24) Rabiamento descontrola ta hiba hopi biaha na actonan di violencia. (Genesis 4:5-8) Pa loke ta tumamento di vengansa, Bijbel ta declara: “Nunca paga malo cu malo na ningun hende. Respeta loke ta corecto den bista di tur hende. Si ta posibel, asina leu cu ta depende di boso, sea na pas cu tur hende. Nunca no venga boso mes, stimanan, ma laga luga pa e furia di Dios, pasobra ta para skirbi: ‘“Ta di mi vengansa ta, ami lo paga bek”, Señor ta bisa.’” (Romanonan 12:17-19) Ora nos ta sigui tal conseho, nos bida lo ta mas trankil, y esei lo aumenta nos felicidad.

Bo Por Logra

Lo bo por logra mantene bo integridad na Dios a pesar di presion pa haci lo contrario? Si, bo por. Tuma nota cu Dios kier pa bo logra demostra cu Satanas ta kiboca den e cuestion di integridad, pasobra Su Palabra ta bisa: “Sea sabi, mi yiu, y haci mi curason contento, pa mi por contesta esun cu reprocha mi.”—Proverbionan 27:11.

Bo por pidi Jehova den oracion pa fortalece bo pa haci loke ta corecto den su bista. (Filipensenan 4:6, 7, 13) P’esei haci esfuerso pa aumenta bo conocemento di e Palabra di Dios, Bijbel. Meditando cu aprecio riba loke bo ta siña for di Bijbel, lo yuda bo profundisa bo amor pa Dios y lo motiva bo pa agrad’e. Segun 1 Juan 5:3: “Esaki ta e amor di Dios, cu nos ta warda su mandamentonan; y su mandamentonan no ta pisa.” Gustosamente Testigonan di Jehova den bo comunidad lo yuda bo studia Bijbel. Nos ta invita bo pa tuma contacto cu nan localmente, of bo por skirbi e editornan di e revista aki.

[Plachi na pagina 4]

Job a keda fiel bou di prueba

[Plachi na pagina 7]

Aumenta bo conocemento di e Palabra di Dios; esei lo fortalece bo determinacion pa haci loke ta corecto