E Anticristo Desenmascara

CON lo bo proteha bo mes si bo sa cu ta reina un epidemia mortal den bo area? Probablemente lo bo subi bo resistencia y keda leu for di hende cu por contagia bo. Den un sentido spiritual nos tin cu haci mescos. E Scritura ta bisa nos cu e anticristo “ta den mundo caba.” (1 Juan 4:3) Si nos no kier wordo “contagia”, nos tin cu identifica e “portadonan” y evita nan. Afortunadamente, Bijbel ta duna bastante informacion riba e topico aki.

“Anticristo” ta nifica “contra (of na luga di) Cristo.” Pues den e sentido di mas amplio, e palabra ta referi na tur persona cu ta opone Cristo of su representantenan, of cu falsamente ta pretende di ta un di nan. Hesus mes a bisa: “Esun cu no ta cu mi ta contra mi [of, ta anticristo]; y esun cu no ta recohe hunto cu mi ta plama.”—Lucas 11:23.

Naturalmente, ora Juan a skirbi tocante e anticristo tabata mas cu 60 aña despues cu Hesus a muri y a ser resusita pa bida den shelo. P’esei, e actividadnan di e anticristo ta afecta mas bien e siguidonan leal di Hesus riba tera, y ta den e contexto ei nos mester mira esakinan.—Mateo 25:40, 45.

E Anticristo Ta Anticristian

Hesus a spierta su siguidonan cu mundo en general lo odia nan. El a bisa: “Nan lo entrega boso na tribulacion y lo mata boso, y tur nacion lo odia boso pa causa di mi nomber. Y hopi profeta falso lo lanta y lo gaña hopi hende.”—Mateo 24:9, 11.

Como cu e discipelnan di Hesus ta ser persigui “pa causa di [Hesus su] nomber”, e persiguidonan claramente ta anticristo, contra Cristo. E ‘profetanan falso’, di cua algun un tempo tabata cristian, tambe ta cai den e categoria ei. (2 Juan 7) Juan a skirbi cu e ‘hopi anticristonan’  aki “a sali for di nos, ma nan no tabata realmente di nos; pasobra si nan tabata di nos, nan lo a keda cerca nos.”—1 Juan 2:18, 19.

Tanto e palabranan di Hesus como di Juan ta indica bon cla cu e anticristo no ta un solo persona sino ta consisti di hopi anticristo individual. Ademas, como cu nan ta profeta falso, un di nan metanan principal ta engaño religioso. Cua ta algun di nan tacticanan?

Nan Ta Plama Mentira Religioso

Apostel Pablo a spierta su compañero Timoteo pa tene cuidou cu e siñansa di apostatanan, manera Himeneo y Fileto, kende nan “palabranan lo plama manera cangrena.” Pablo a agrega: “[E hombernan aki] a desvia for di e berdad, bisando cu resureccion a tuma luga caba, y asina nan ta trastorna fe di algun hende.” (2 Timoteo 2:16-18) Aparentemente, Himeneo y Fileto a siña hende cu e resureccion tabata algo simbolico y cu cristiannan a ser resusita caba den sentido spiritual. Ta berdad cu manera Pablo mes a declara bon cla, den bista di Dios ora un hende bira un berdadero discipel di Hesus, e ta haya bida. (Efesionan 2:1-5) Sinembargo, e siñansa di Himeneo y Fileto a pasa por halto e promesa di Hesus di cu lo tin un resureccion literal di e mortonan bou di e gobernacion di e Reino di Dios.—Juan 5:28, 29.

Mas despues, un grupo yama gnostico a amplia riba e idea di un resureccion puramente simbolico. E gnosticonan tabata kere cu hende lo por haya conocemento (gnó·sis na Griego) den un manera mistico, y p’esei nan a combina cristianismo apostata cu filosofia Griego y tradicion mistico oriental. Por ehempel, nan a kere cu tur materia fisico ta malbado, y pa e motibo ei, Hesus no a bin realmente den carni sino simplemente a parce di tin un curpa humano. Pero manera nos a mira, esaki ta netamente loke apostel Juan a spierta di dje.—1 Juan 4:2, 3; 2 Juan 7.

 Un otro mentira, inventa siglonan despues, ta e doctrina di e asina yama Santisimo Trinidad, cu ta pretende cu Hesus ta tanto Dios Todopoderoso como Yiu di Dios. Dr. Alvan Lamson a declara den su buki The Church of the First Three Centuries (E Iglesia di e Prome Tres Siglonan) cu e doctrina di Trinidad “a origina di un fuente henteramente aheno for di esun di e Scritura Hudiu y cristian; cu el a crece y a ser inyecta den cristianismo mediante e Tatanan influencia pa e doctrina di Plato.” Ken “e Tatanan influencia pa e doctrina di Plato” tabata? Nan tabata clero apostata cu tabata loco cu e siñansanan di Plato, un filosofo pagano di Grecia.

E echo cu a “inyecta” Trinidad den e doctrina di Iglesia tabata un strategia maestral di e anticristo, pasobra e doctrina aki a crea un misterio rond di Dios y a haci e relacion cu su Yiu un cos confuso. (Juan 14:28; 15:10; Colosensenan 1:15) Figura bo, con un persona por “hala cerca Dios”, manera e Scritura ta anima nos, si Dios ta un misterio?—Santiago 4:8.

Pa crea mas confusion ainda, hopi traductor di Bijbel a kita e nomber di Dios, Jehova, for di nan traduccion, a pesar cu e ta aparece mas cu 7.000 biaha den e texto original! Ta bisto anto cu e intento pa comberti e Todopoderoso no solamente den un misterio, sino un misterio sin nomber, ta un gran falta di respet pa nos Creador y pa su Palabra inspira. (Revelacion 22:18, 19) Ademas, remplasando e nomber divino cu titulonan manera Señor y Dios ta bai contra di e oracion modelo di Hesus, cu ta bisa en parti: “Bo nomber sea santifica [of, haci santo].”—Mateo 6:9.

Anticristonan Ta Rechasa e Reino di Dios

Anticristonan a bira hopi mas activo durante “e ultimo dianan”, e tempo den cua nos ta biba awe. (2 Timoteo 3:1) Un meta principal di e gañadonan aki di tempo actual ta pa confundi hende tocante e papel di Hesus como Rei di e Reino di Dios, un gobierno celestial cu pronto lo goberna henter e tera.—Daniel 7:13, 14; Revelacion 11:15.

Por ehempel, tin lidernan religioso ta predica cu e Reino di Dios ta un condicion den curason di hende, un punto di bista cu no tin base den e Scritura. (Daniel 2:44) Otronan ta pretende cu Cristo ta obra mediante gobierno- y institutonan humano. Sinembargo, Hesus a declara: “Mi reino no ta parti di e mundo aki.” (Juan 18:36, NW) De echo, ta Satanas y no Cristo, ta “e prins” y “e dios di e mundo aki.” (Juan 14:30; 2 Corintionan 4:4) Pa e motibo aki pronto Hesus lo elimina tur gobierno humano y lo bira e unico Gobernante di e tera. (Salmo 2:2, 6-9; Revelacion 19:11-21) Ta pa esaki e hendenan ta pidi ora cu nan ta recita e Oracion di Nos Tata, bisando: “Cu bo reino bin. Cu bo boluntad sosode na tera.”—Mateo 6:10.

Como cu hopi lider religioso ta sostene e sistemanan politico di mundo, nan a opone—asta persigui—e personanan cu ta proclama e berdad tocante e Reino di Dios. Un punto interesante ta cu e buki biblico di Revelacion ta menciona un prostituta simbolico—“e Gran Babilonia”—cu ta “burachi di e sanger di e santonan y di e sanger di e testigonan di Hesus.” (Revelacion 17:4-6) Ademas, e ta practica prostitucion spiritual ora e ta duna su sosten na e “reinan” (of gobernantenan politico) di e tera, a cambio di cierto fabor. E muher simbolico aki ta nada menos cu e religionnan falso di mundo. E ta un parti principal di e anticristo.—Revelacion 18:2, 3; Santiago 4:4.

E Anticristo Ta ‘Bisa Loke Horea Kier Tende’

Fuera di rechasa berdad biblico, hopi hende cu ta yama nan mes cristian a rechasa normanan biblico di conducta y ta bai tras di e normanan moral popular. E Palabra di Dios a predeci e desaroyo aki, bisando: “E tempo lo bin cu nan [hende cu ta pretende di ta sirbi Dios] lo no soporta doctrina sano mas; ma al contrario, pa satisface nan mes deseonan, nan lo acumula  pa nan mes siñadonan pa bisa nan loke nan horea cu ta kishiki kier tende.” (2 Timoteo 4:3) E siñadonan religioso falso aki ta ser describi tambe como “apostelnan falso, trahadonan engañoso, kendenan ta disfrasa nan mes como apostelnan di Cristo.” Bijbel ta sigui bisa: “Nan fin lo ta segun nan obranan.”—2 Corintionan 11:13-15.

Nan conducta ta inclui “sensualidad” [“libertinahe”, NW], cu ta un gran falta di respet pa principionan moral halto. (2 Pedro 2:1-3, 12-14) Acaso nos no ta mira con un cantidad creciente di lider religioso y nan siguidonan ta adopta—of a lo menos no ta condena—practicanan no cristian, manera homosexualidad y relacion sexual pafo di matrimonio? Para un rato y compara e puntonan di bista y estilonan di bida ampliamente acepta aki cu loke Bijbel ta declara na Levitico 18:22; Romanonan 1:26, 27; 1 Corintionan 6:9, 10; Hebreonan 13:4; y Judas 7.

“Pone e Expresionnan Inspira na Prueba”

En bista di lo anterior, nos tin cu haci caso di e palabranan di apostel Juan y no ser indiferente pa cu nos creencianan religioso. Juan a spierta: “No kere tur expresion inspira, sino pone e expresionnan inspira na prueba pa mira si nan ta origina di Dios, pasobra hopi profeta falso a sali den e mundo.”—1 Juan4:1, NW.

Considera e bon ehempel di cierto hende ‘di mentalidad noble’ cu tabata biba den e stad di Berea den prome siglo. Nan “a ricibi e palabra cu bon boluntad y tabata scudriña e Scrituranan tur dia, pa mira si e cosnan aki [cu Pablo y Silas a papia] tabata asina.” (Echonan 17:10, 11) Si, aunke e Bereanonan tabata ansioso pa siña, nan a haci sigur cu loke nan a tende y acepta tabata firmemente hancra den e Scritura.

Awe tambe, cristiannan berdadero no ta bai tras di tur e diferente puntonan di bista popular aki sino mas bien ta tene firmemente na berdad biblico. Apostel Pablo a skirbi: “Esaki ta mi oracion, cu boso amor por abunda mas y mas ainda den conocemento berdadero y tur discernimento.”—Filipensenan 1:9.

Si bo no a hacie ainda, pone como bo meta pa haya sa loke Bijbel ta siña realmente y asina adkiri “conocemento berdadero y tur discernimento.” Hende cu ta imita e Bereanonan no ta laga “palabranan di engaño” di e anticristonan desvia nan. (2 Pedro 2:3) Mas bien, e berdad spiritual di e berdadero Cristo y su siguidonan autentico ta haci nan liber.—Juan 8:32, 36.

[Cuadro/Plachi na pagina 4]

LOKE BIJBEL TA BISA DI E ANTICRISTO

“Yiunan, ta e ultimo ora [evidentemente fin di e periodo apostolico]; y mescos cu boso a tende cu anticristo ta bin, asina awor caba hopi anticristo a lanta.”—1 Juan 2:18.

“Ta ken ta e mentiroso, sino esun cu ta nenga cu Hesus ta e Cristo? Esaki ta e anticristo, esun cu ta nenga e Tata y e Yiu.”—1 Juan 2:22.

“Tur spirito [“expresion inspira”, NW] cu no ta confesa Hesus no ta di Dios; y esaki ta e spirito di e anticristo, di cual boso a tende cu e ta bin, y awor e ta den mundo caba.”—1 Juan 4:3.

“Pasobra hopi gañado a sali bai den mundo, esnan cu no ta reconoce cu Hesucristo a bin den carni. Esaki ta e gañado y e anticristo.”—2 Juan 7.

[Cuadro/Plachi na pagina 5]

UN GAÑADO CU HOPI CARA

E palabra “anticristo” ta aplica na tur hende cu ta nenga loke Bijbel ta bisa tocante Hesucristo, tur cu ta opone su Reino y tur cu ta maltrata su siguidonan. E ta inclui tambe personanan, organisacionnan y nacionnan cu ta pretende di ta representa Cristo, of cu indebidamente ta asumi e papel di Mesias ora nan ta priminti arogantemente cu nan lo logra loke Cristo so por haci, esta, trece berdadero pas y siguridad.

[Reconocemento]

Agustin: ©SuperStock/age fotostock

[Plachi na pagina 7]

Mescos cu e Bereanonan, nos mester “scudriña e Scrituranan tur dia”